BLOGGER TEMPLATES - TWITTER BACKGROUNDS »

٣٠‏/٠٦‏/٢٠٠٧

من ينقذ المرأة من جبروت الرجل...1

زمان من كام سنة فاتوا كده لما كنت بسمع سيرة حقوق المرأة كان بيركبني 100 عفريت وكنت أقول حقوق إيه دول واخدين حقهم وزيادة وإنهم (النساء يعني) عاوزين الإنحلال والتسيب وعاوزين على رأي المثل الشعبي يمشوا على حل شعرهم والسبب في كده إني كنت فاكر زي كتير من الناس إن حقوق المرأة اللي بطالب بيها هي التعري والمساواة التامة بين الرجل والمرأة والحرية الغير مشروطة على تصرفتها والتنازل عن عفتها لأي كان وشخصيا مازلت أؤمن وبشدة إن هي دي أهداف الغرب الفعلية والحقيقية من وراء حملة حقوق المرأة اللي عملنها ومصدعين الدنيا بيها. لكن مش ده اللي انا جي أتكلم عليه هنا من فترة صغيرة كده 9 شهور على وجه التحديد كنت ماشي أنا واحد صاحبي في الشارع بنتكلم عادي شيوية وسمعنا (صويت) أو صراخ واحدة ست عمالة تصرخ وتقول إلحقوني ولسة حجري أنا وأحمد صاحبي نشوف في إيه لاقينا من الحارة اللي قدمنا طالع راجل ماسك واحدة ست وهات فيها ضرب بالكفوف والأقدام وبيجرها من شعرها عشان يركبها العربية وكان في حوالي 4 أو 6 أشخاص قريبين منهم ولم يحرك أحد ساكنا وترددت لثواني أروح (أحوش) ولا أكبر لكن أحمد صاحبي حسملي الموضوع بسرعة وقالي وهو بيضحك تلاقيه (ظبتها)مع واحد في الشقة وفعلا كبرت -وبقلها بكل خجل والله-وكملنا طرقنا ويومنا عادي بس لما روحت ما عرفتش أهدى طول الليل بفكر أفرض كان ده زوج ظالم وجبار في الأرض وبيعذبها وهي راحت عند أهلها وأهلها ناس كبار في السن ومش قادرين يحوشوا بنتهم إفرض كان أخ مدمن ولا صايع وعاوز أختة تعمل حاجة مش صح وإفرض وإفرض.... وآدايقت أوي أوي أوي من نفسي يوميها لإني صدقت فورا إن البنت هي الوحشة وهي اللي مش كويسة ومدخلتش في وقتها. وكعادة النفس البشرية - نفسي انا على الأقل- صباح اليوم التاني نسيت كل شئ عن الموضوع وكان همي الوحيد ساعتها انا حاكل إيه النهاردة...؟! بعدها بكام يوم وأنا رايح كليتي المحروسة وراكب المكروباص طول ما إحنا في الطريق ناس (رجالة)بتعدي من قدام المكروباص والسواق بيهدي ويكمل طريقه ولما قربنا من الكلية كان في 3 بنات بيعدوا الشارع لقيت السواق قرب بالمكروباص وقعد يزود السرعة ويهدي لحد ما لزق فيهم ووالله أنا أفتكرته خبطهم فعلا وقام مطلع راسه من الشباك وبعلو صوته قال :ما تهزي نفسك يا .... أنا بصراحة دمي أتحرق لكن -للأسف- لتاني مرة كبرت وبعد كده بفترة يمكن شهر جت الطامة الكبرى أحداث التحرش الجنسي في وسط البلد أنا أول مرة سمعت بالموضوع ده كان من باربي في الكلية وبعدين قعدت أدور على النت وسمعت من الناس لحد ماعرفت الموضوع وشوفت الفيديوهات ويارتني ماشوفت مكنتش مصدق إني في بلد مسلم أبدا والله ومكنتش مصدق إن في -ولد لإني مش حينفع أقول عليهم رجالة- مسلم وعربي وشرقي ممكن يعمل كده ومكنتش بدعي غيردعاء واحد يارب ردهلهم في أقرب الناس ليهم وعلى مشهد ومسمع من كل الناس وإنتقم يارب للعملوا في أعراض الناس ده وتمر الأيام والليالي وفي مرة من المرات وأنا بحضر محاضرة في الكلية دخل علينا دكتور مادة ما عرفنا بنفسه وقعد يرغي كده في كلام تافه زيه ومش فاكر إيه بالظبط اللي حصل بس لقيتة بيكلم بنت في الصف الأول وباين عليها والله محترمة بيقلها والله باللفظ كده إيه يا موزة....؟! البنت طبعا أتصدمت وماستوعبتش ولا حد فينا كمان ولقيته بيكمل وبيقول لبقيت البنات بقه هو إنته مش أسمكم مزز دلوقت ولا إيه وبيضحك وبعد كده قعد يهبل في الكلام وهنا بصراحة ماعرفتش أمسك نفسي وعشان أنا أصلا طولت كتير في الكلام فامش حقعد أحكلكم انا قلت إيه وإيه اللي حصل فيا تلخيص لكل ده انا عرفته مقامه قدام الطلبة وكنت على وشك إني أطرد نهائي من الكلية لكن بفضل الله ثم مساعدة الطلبة ربنا الحمد لله ستر طب يا عم روك إيه أخرة الكلام الفارغ اللي إنت بتقوله ده ومصدع راسنا وواجع عنينا بيه اللي عاوز أقوله إن بجد لازم يبقى في وقفة حاسمة -خصوصا من قبل البنات- للإطضهاد النفسي والمادي والمعنوي اللي بتعرضوا ليه يوميا بجد أي بنت تعرف حد أو يكون حد من أهلها يقدر يوصل صوتهم للإعلام والحكومة ماتسكوتس وتقول ومايهدوش لحد ما يعيشوا بكرامتهم اللي أحقها وأقرها الإسلام -وإحنا اللي ضيعناها بجرينا وراء التقاليد والعادات- أنا فاكر إني مرة قريت على مدونة تقريبا تقريبا علاء ومنال حل جذري جدا لموضوع المعكسات ده كانت بتقترحة منال كان نفسي أقوله على البلوج هنا بس بصراحة الحياء يمنعني ومقدرش أقول غير إنه يخلي الرجالة مش رجالة بعد كده وأنا عن نفسي والله رغم إني رجل لكن كنت مؤيد ليه جدا جدا لأن الشباب اللي بيعكسوا هما ده اللي يسحقوه فكروا كده في كم المعكسات اللي كل يوم البنات بتتعاكسه وقلة الأدب والمسخرة اللي بيسمعوها والأهم من كده الرعب النفسي اللي بتعيش فيه البنت وهي خايفة على شرفها لحد يتعرض ليها أو حتى يعتدي عليها بالمس وطبعا بيحصل ولا حول ولا قوة إلا بالله وفكروا أكتر وأكتر في أيديولوجية المجتمع بتاعنا اللي بتركز على إن المرأة مهمتا الوحيدة في الحياة هي إشباع رغبة الرجل الجنسية فقط أنا عارف إن الأغلبية حتقول إني مزودها في الحتة اللي في الأخر دي لكن أنا حسيبلكم دليلين وإنتم فكرو فيهم كويس وإنتم وضميركم شوفوا عند أي إعلان بيطلب موظفة إيه اللي بيتكتب طالبين سكرتيرة مثلا أو بائعة في محل يقلك أي كلام وعلى طول بين قوسين (حسنة المظهر) بجد ركزوا في إعلانات طلب الوظائف اللي في الوسيط أو الأهرام حتلاقوا حسنة المظهر دي في كل حتة ده في الوسيط بتاعة الأسبوع اللي فات محل ملابس طالب بائعين من الجنسين رجال ونساء البائع خبرة لاتقل عن 3 سنوات أما البائعة فاكتبين بالظبط كده -يشترط حسن المظهر- ماهي حاجة من الأتنين يا إما المجتمع ده فارض إن البنت دي سوري في الكلمة شئ معفن عشان كده دايما بيكرر ويشدد على حسن مظهرها اما الشاب فهو أوردي أمور ووسيم وحسن الملبس والرائحة وده يبقى برضه إطضهاد وإجحاف في حق المرأة -وأفتكر إن العكس هو الصحيح- وأما بيركز على جسد المرأة عشان تشبع الرغبات الجنسية للناظرين إليها من الرجال ومحدش يقلي غير كده وإلا ليه دايما بيركزوا على مظهر البنت بس الحاجة التانية السينما المصرية -سينما خلع الملابس- أي ممثلة عشان تشتهر بأقصر وأسرع الطرق هي التعري شفوا أفلام زمان على روتانا زمان بجد والله مش بهزر وحتلاحظوا التالي 1 - لبس البنات اللي كان مالوش لزمة أصلا ووجوده زي عدمه وبدا للأسف يرجع تاني وبشكل أسوأ كمان في الفيديو كليب 2 - كم القبل والأحضان اللي لايعد ولا يحصى في كل فيلم 3 - ودي الأهم الفيلم ما يبقاش فيلم غير من 3 حجات أ- راقصة ب- مشهد أو إتنين إغتصاب ج- بنت-ودي تقريبا لازم في كل فيلم- بنت تفرط في شرفها وكأننا في أمريكا أو إن العلاقات في مجتمعنا قبل الزواج شئ عادي خالص وماحدش يجي يقلي إن المشاهد دي أرضاء لجمهور النساء عشان بيحبوا يشوفوا الحجات دي ولو حد قال كده حرد عليه بمشهد من فيلم المنسي لعادل إمام لما راح هو وأحمد آدم السينما عشان يخشوا فيلم وفاكرين كانوا بينقوا الفيلم إزاي سألوا هنيدي اللي كان واقف على باب السينما : الفيلم ده في مناظر ورد عليهم هنيدي وقال بعد ما خد نفس سيجارة: الفيلم ده...في 4 مناظر ومافتكرش إنهم كانوا بيكلموا على مناظر طبيعية

٢٧‏/٠٦‏/٢٠٠٧

كليات القمة

من ضمن الاشياء الغلط اللى كنت فاهماها ..إن الانسان لو فى كلية طب أو هندسة
اذن فهو مثقف من الدرجة الاولى..
كنا أربع بناتيت ,بس مش أى بناتيت ,.لا بنات من الناس الدحيحة يعنى اللى بياكلوا الكتب دول!!كلنا كنا قسم علمى
علوم_ظهرت نتيجة الثانوية العامة..
أثنين مننا راحوا طب بشرى..وواحدة راحت طب اسنان وانا رحت السن ألمانى
_أول واحدة من اللى راحوا طب ..اتقطعت صلتى بيها تماما ومعرفش عنها حاجة..

الثانية والتالتة لسة على صلة بيهم ببعض ..بس بنشوف بعض على فترات متفاوتة ..لكننا بنتكلم على طول فى
التليفون.
.
وبما إنهم كملوا طريق العلمى ودخلوا كليات علمية..فهم لسة دحيحة ذى زمان..وبما انى دخلت كلية نظرية ..لسة
جينات الدح فى دمى لكن أقل مليون مرة منهم طبعا..لدرجة انى بأعتبر مدلعة بالنسبة لهم ..
طول سنين الكلية والدكاترة كانوا مدخلين فى دماغنا اننا عشان نبقى مترجمين ناجحين لازم نكون مثقفين ونعرف على
الاقل شىء عن كل شىء ونقرا كتير ونشوف الاخبار والبرامج الثقافية ونحضر ندوات كلما اتيحت الفرصة لسماع أى
(على ادى يعنى ..مش عبقرية)وسنة ورا سنة:كل ما اجى أتكلم مع واحدة من الاتنين اصحابى دول مثلا عن اى خبر
من الاخبار اللى شفتها او سمعتها او قراتها واحب اتناقش معاهم..الاقيهم واحدة تقولى:مش بحب اسمع النشرة او
الاخبار والتانية :تقولى مش فاضية للحاجات دى..
بحس بذهول ساعتها بس بعديها بقى وخلاص واغير الموضوع..
أجى أتكلم معاهم عن موقع عجبنى على النت واكون عاوزة اديهلهم يشوفوه..يقولولى..واحدة تقولى:معنديش كمبيوتر
ومش بحبه أصلا ومش بعرف استخدمه ولو استخدمته بلعب جيميز وخلاص
والتانية تقولى:مش بدخل على النت اصلا
طيب هى كليات القمة بتخلى الناس كدااااا!!!
وأرجع أصاب بذهول للمرة التانية وبالتالى تم غلق الموضوع..
الاقى واحدة منهم تقعد تكلمنى عن المواد بتاعتها والتقديرات واذاى هى اتأثرت اوى لما جابت امتياز بس مطلعتش
بترتيب على الكلية
وفى الاخر يجيلى صداع منها لانى مش خارجة معاهم عشان اتكلم عن المواد بتاعتهم
والتانية دكتورة بس رومانسية زيادة عن اللزوم وبتحب واحد قريبها معاه دبلوم وعايزة تتجوزه..اول ما قالتلى الخبر
محستش بنفسى غير انى قاعدة ازعق ومنفعلة وباقولها انتى بتعملى فى نفسك كدا ليه؟؟حرام عليكى
هى طبعا نفضتلى وقالت انى مش حاسة بيها وكدا..وبعد كدا انا قلتلها هى حرة تختار حياتها براحتها..والغريب ان اهلها
موافقين!! سنين بعدناها عن بعض..خلت كل واحدة فينا بفكر مختلف..بس مش عارفة دى طبيعة حياة وطبيعة بيئة وللا ايه؟وللا
طبيعة كليات مختلفة
كنا اربع سنين مع بعض فى المدرسة
وبعد اربع سنين جامعة

بقت كل واحدة مختلفة تماما عن التانية..
ياترى لو كنت فى كلية عملية ذيهم كنت هابقى كدا... وللا ايه؟؟
وللا الكلية ملهاش ذنب فى كدا كله؟

٢٥‏/٠٦‏/٢٠٠٧

أحيانا بنبعد ..لكن بنرجع نقرب

الدنيا كبيرة أوى وغريبة أوى أوى ..كل واحد عايش فى عالمه الخاص ..وكل واحد بيلف ويدور فى دائرة خاصة بيه..ناس ربنا مديها حاجات كتير ومش مرتاحة وناس معندهاش حاجة ومش مرتاحة وناس معندهاش حاجة ومرتاحة!!ناس عندهم علم ودين ومال ومفتقدين المشاعر ومحتاجينها اوى وحاسين إنهم ممكن يضحو بكل ما هو غال وثمين من أجل هذا الاحساس..وناس عندهم المال والمشاعر ومفتقدين العلم والثقافة وحاسين إنهم مالكين الدنيا بفلوسهم بس ناسيين إنهم جهلة ومش عارفين إن دا غيبهم..وناس عندهم عايشين عندهم علم وأسرة ومعندهم فلوس وناس وناس وناس.......!!ص ناس عندهم صحة ربنا أنعم بيها عليهم ومش حاسيين.أحيانا ربنا يبعتلنا رسايل كدا تنبهنا وتقولنا خدوا بالكوا ربنا مديكوا حاجات كتير وانتو مش واخدين بالكوا منها.. من عادتى إن مش بحب أروح مع أصحابى ملاجىء أزور ناس هناك أو مستشفيات أزور حد هناك..باستنى لما الحد اللى فى المستشفى يخرج ويرجع بيته وبعدين ازوره..لحد ما خالتو دخلت المستشفى من كام يوم ..مممممفدى خالتو بقى وهتعمل عملية صعبة فى القلب وكدا فلازم اروح ازورها.. المهم انا رحت امبارح عندها المستشفى وكنا قاعدين نضحك ونهزر وكدا وبعد كدا لاقيت ممرضات داخلين وطالعين وقاعدين يدوها حقن وحاجات كدا كذا مرة ..هم كانوا بيجهزوها للعملية عشان المفروض انها تعملها النهاردة..وبعد مشهد الحقن لاقيت ممرضة جت وجابت حاجة طويلة كدا ومتعلق فيها كيس دم ومتوصل منه انابيب وخراطيم رفيعة خالص ووصلوه فى ايد خالتو عشان ينقلولها دم...انا قعدت مذبهلة..الحاجات دى باشوفها بس فى التليفزيون..مكنتش معتقدة ان دا حقيقى ..وانا باتفرج واقول فى نفسى ياااااااااااااه ..كل السنين دى ومش واخده بالى من نعم ربنا عليا..مدينى حاجات كتير كتير اوى وناسية أشكره عليها..انا مكسوفة من ربنا أوى..ومش عارفة أقولك إيه يارب..مكنتش حاسة ان قلبى دا نعمة كبيرة اوى ..مكنتش حاسة ان لسانى سليم وباتكلم بيه وأحيانا باعصاك بيه..مكنتش حاسة ان عينى سليمة وغيرى مش بيشوف انا عارفة يارب انى مقصرة فى حقك ساعدنى يارب على حسن عبادتك

٢٣‏/٠٦‏/٢٠٠٧

Love

* Love is astrong emotion. It is agift from Allah.Alot of people are waiting for it. Alot of people wanna only achance to love. May be it deos not come and may be it comes. Alot of us are searching for it . But we dont need to search for it cuz it comes automatically. We dont know ,when it will come. Ithink that love decorates our life. It gives us ahope of better future and better life.
1_If you always think of someone and always remember this one,then you are in love.
2_When you are with someone and feel that you own the Universe, then you are in love. 3_If you can not imagine your life without this person,then you are in love. 4_When you are sick &only think of one person .and need him beside you to be able to fight your disease,then you are in love. 5_If you always close your eyes and see one person,then you are in love. 6_When it is cold and you need his touch to feel warm,then you are in love. 7_When you sit among alot of people,who are speaking to you and you dont hear their voice and only hear the voice of one person,who is not with you,then you are in love. 8_When you can feel,what for someone happend,without seeing him,then you are in love. 9_When you can easily forgive someone,then you are in love with this person.
10_When you hear the name of someone,and hear your heartbeats increase and increase,then you are in love.
11_ When you can speak and treat with someone without wearing any masks,then you are in love.
12_ When you feel your strength,when you treat with all people and feel your weakness,when you are between ones arms,then you are in love.
13_ When you can not sleep when someone is angry,you are in love.
14_When yopu miss somebody,who is setting beside you,then you are in love.
15_ When you wanna do your best to make someone happy,then you are in love.

٢١‏/٠٦‏/٢٠٠٧

تخاربف

فى انسان بيتولد ويعيش ويموت وهو مش شايف العالم ولا شايف اللى حواليه..هو عايش وشايف نفسه فقط وباصص طول عمره تحت رجليه..
ولما تقوله :العالم بيتغير حواليك
يقولك: اهو احنا عايشين وهنطلب ايه تانى ما هو احنا احسن من غيرنا..
تقوله:بتبص لغيرك اللى اقل منك ليه؟ طب ما تبص للى احسن منك
يقولك :اللى يبص لفوق يتعب
دا انسان عايش فى خندق تحت الارض ومش هيطلع للنور ابدا .اتولد وعاش تحت الارض ومش عارف ايه اللى داير حواليه
..........................
كلمات المواساة ولا بتحل حاجة ولا بتقدم ولا بتاخر ولكنها عند بعض الناس قد تريحهم ولكنها عند البعض الاخر ليس لها اى فائدة لانهم يدركون جيدا انها كلمات مثل المسكن الذى يخفى أثر الالم لساعات معدودة فقط ثم يعود الالم من جديد ولكنه كان مغيبا مؤقتا او مرفوع مؤقتا من الخدمة
.............................
ليه طريق الصح صعب
ليه طريق الغلط أسهل
لو كان الطريق صح من الاول مكانش هيبقى فى صعب وسهل لأن ساعتها كان هيبقى اللى إحنا شايفينه صعب دلوقتى من أسهل ما يمكن بس لو أتعودنا عليه من الاول...
.............................
غريبة هى تلك الفطرة التى فطرنا الله عليها !احتياج فطرى بين الذكر والانثى..كلاهما يعيش بين أناس كثيرين ولكن احتياجهما لبعضهما البعض هو الغريب كلاهما يرى ان الاخر هو حياته وكيانه بالكامل..كلاهما يردد انه لايستطيع العيش بدون الاخر..كلاهما يرى جنته فى نظرة من الاخر .. غريبة هى تلك الفطرة التى فطرنا الله عليها
...............................
الحب مهم ولكن ان مكانش فى حب فألاهم انه يكون فى مودة ورحمة ..فبهما تصبح الحياة قابلة للعيش وبهما ياتى الحب وتصبح الحياة فى قبضة أيدينا وبهما يمكننا أن نضحك من قلوبنا
..................................
أحيانا نفضل نتمنى ان ربنا يدينا نعمة معينة ونقعد سنين نستناها ولما يدينا النعمة دى نفرح بها أوى ..وبعد كدا نعصاه بيها ونقول إن دا من حقنا لأننا مش هنقدر نعمل غير كدا..ولما فجاة ربنا يأخد مننا النعمة دى..نبكى عليها كتييير ونرجع الى ربنا كما كنا فى البداية وأكتر ونتدين بقى ونقول قال الله وقال الرسول..طب ليه التناقضات دى كلها؟ماكنا نحافظ على النعمة دى من الاول عشان ربنا يباركلنا فيها ..لما تعصى ربنا بنعمة ادهالك مترجعش تزعل بقى لما ياخدها منك!!!

٢٠‏/٠٦‏/٢٠٠٧

رجال الاعمال مع منى الشاذلى والعاشرة مساء

السلام عليكم
تابعت على فترات مش متباعدة اوى لقاءات منى الشاذلى فى برنامجها الناجح العاشرة مساء مع بعض رجال الاعمال
ذى أستاذ عماد أديب وأحمد بهجت ونجيب ساويرس
وبصراحة التلات حلقات عجبونى مووووت
لان فيهم شفت تلات شخصيات مختلفة لتلا رجال اعمال من انجح رجال الاعمال فى الوطن العربى..وطول ما انا باتفرج على البرنامج بفكر فى انهم التلاتة متفقين فى بعض الحاجات ذى هدوء الاعصاب الشديد والذكاء الحاااااد
ناس شايفين طريقهم صح
مثقفين من الدرجة الاولى
باعدين عن السياسة تماما..ودا مش معناه جهلهم بيها لااااااا
لكنهم مدركين ومواكبين لكن الاحداث بس مش بيدخلوا فى منطقة مش بتاعتهم
وعجبنى جدا تحليل عماد اديب للحالة السياسية فى مصر لما قال:ان مصر عبارة عن مجموعتين
كأنها مريض ودكاترة
الدكاترة شايفين حالة المريض خطيرة جداااا ومفيش امل فى شفائه وكدا كدا ميت
ودول طبعا المعارضة اللى دائما شايفين الوضع خطير ولا يحتمل
ومجموعة تانية شايفة ان المريض اصلا مش مريض بالعكس دا فى احسن احواله
ودى المشكلة ان مفيش مجموعة فاهمة التانية اصلا ولا قادرة تحس بيها وتفهم عقليتها وتعيش ظروفها
اما احمد بهجت بقى
فكان طالب بسيط فى كلية هندسة..كل حلمه فى الدنيا يبقى عنده شقه ويشترى تلاجة وغسالة وبوتجاز ويتجوز وخلاص
وسافر يدرس بره بدا شغل بسيط والشغل دا نجح وجاب فلوس اخدت الفلوس دى وعمل بيها شغل تانى وهكذا وهكذا لحد مابقى رجل الاعمال الناجح أحمد بهجت
أما ساويرس فانا مش شفت الحلقة من اولها
هو لى وجهات نظر غريبة ومش عجبتنى اصلا
وخاصة لما بدأ يتكلم عن الاخوان ولما اتكلم عن القناة بتاعته الفضائية
بس هو لا يقل شىء فى نجاحه فى شغله كرجل اعمال ناجح
بل انه اغنى رجل فى مصر حيث بلغت ثروته 30 مليار جنية حسب مجلة فوربس
وهو يحتل المركز 91 من اغنى أغنياء العالم
تلات شخصيات رسمت طريقها صح وماشية فيه صح

١٩‏/٠٦‏/٢٠٠٧

تاج_1

السلام عليكم
تاج رقم 1
وصلنى من
صاحب مدونة رسالة من تحت الماء
ومن شادى فايد
احب شخص الى قلبك في الدنيا؟
سيدنا محمد
- انسان مستعد تضحى بحياتك عشانه_ركز حياتك_؟
ماما
انسان كرهته لدرجه الجنون واتمنيت لو تمسك سكينه وتنقض عليه وتغرزها في قلبه تقتله وتقف تبص لجثته وتشفي غليل قلبك؟
شارون
ماهو: اسم اجمل كتاب كتبه بشر قراته محتفظ به حتى الان؟
كتاب صحابيات حول الرسول
اسم كتاب كتبه بشر برضه انت متعلق بيه وبتقراه كل فترة؟
بعض الكتب لمصطفى محمود
وكتاب اه يا دماغى ليوسف معاطى
اهم جهاز منزلي انت بتستخدمه ومتعلق بيه؟
الكمبيوتر
مكان تشعر باراحة عندما تدخلة؟
المساجد كلها
شيء تحس بالراحه النفسيه عندما تنظر اليه؟
البحر
مكان تحس فيه بالحنين الى شيء لا تدري ماهو وذكريات جارفه الى لا شيء؟
النيل بليل
اجمل مدينه زرتها داخل مصر؟
مرسى مطروح
اجمل مكان طبيعي رايته داخل مصر؟
القاهرة بليل بتبقى جميلة اوى شخصيه كارتونيه بتحبها؟
توم وجيرى نوع هاتفك المحمول ؟
1110
سرعه بروسيسور جهازك؟
مش عارفة

حجم ذاكرة هارد جهازك؟ 80

المساحه التى تشغلها المواد الاسلاميه على جهازك؟

كل شوية نفرمت الجهاز وكل حاجة تتمسح ونرجع نحملها تانى ..مش فاكرة نفس المساحه السالف ذكرها في قلبك-الاجابه لنفسك عشان الرياء يا اخواننا؟ اوك

اهم هدف انت واضعه لحياتك الان؟

لما ابقى مسئولة عن أسرة صغنونة كدا لازم تبقى اسعد واجمل أسرة فى الدنيا..مهما دا كلفى

مواصفات فتى الاحلام بالنسبه لك؟

بيحافظ على فروض ربنا

طيب

حنين

طموح

عنده شخصية

قوى..بمعنى لو حد ضايقنى ممكن يعمله ساندوتشات شاورمة..ههههههه

صف ما ياتي :شعورك عندما تسمع كلمه مصر؟

ولا حاجة..(حلوة وللا وحشة بقى اهى بلدى )ا

شعورك لما تسمع كلام عن اليهود؟

خيانة

شعورك لما بتشوف ضابط شرطه؟

بافتكر حكاية الاستفتاء شعورك لما بتشوف الكناس العجوز في الطريق؟

واحد بيعمل شغله..عشان يقدر يعيش

افكارك تجاه شاب ماشي في الطريق يلبس جلبيه بيضا قصيرة وعمامه وله لحيه وبجيبه السواك وبيده المصحف؟

كل واحد حر فى طريقة حياته

احساس يراودك في اشارة مرور مغلقه بسبب مسئول كبييييير؟ مشفتش الموقف دا خالص لانى مش بخرج كتير تحب تمرر التاج لمييييييييييييييييييييييييييييييييييييييييييييين؟

مش همرره لانه متكرر كتييييير

١٨‏/٠٦‏/٢٠٠٧

Nokia n 90...n 73

بنى ادمة:ورينى موبايلك كدا..ايه دا ؟دا ذى بتاعى 1110

باربى:اها دا انا جايباه من بدرى ..انتى اول مرة تشوفيه؟

نفس البنى ادمة:ايوة ..بس ليه جبتيه كدا؟

باربى:ماله ؟؟ماهو عسول اهو!فى ايه

بنى ادمة:ايه يابنتى هو انتى مش عايشة فى الدنيا؟مش بتشوفى موبيلات اصحابك؟

باربى:ااااااه ..لا باشوف يعنى مالها موبيلات اصحابى..عادى يعنى

بنى ادمة:يابنتى دا دلوقتى فى

(n 90..n 73)

وكدا يعنى..موبيلاتنا انا وانتى دى مش بقت نافعة اصلا

باربى:مممممم..عمرى ما جه فى بالى حكاية انواع الموبايلات دى ولا شغلت حيز من تفكيرى اصلا..ياستى مش بيرن

وباتكلم فيه..خلاص هاوجع دماغى ليه بقى!!

بنى ادمة:لا لا لا يا بنتى دا انا من كام يوم كدا اخدت موبايل اخويا الكبير ن90

بس ايه بقى تحفة تحفة تحفة..مكنتش عاوزة اسيبه من ايدى وكنت ماشية اصور بيه طوب الارض

باربى:امممممم

بنى ادمة:ومن حوالى اسبوع كدا اخدت موبايل اخويا التانى وقعد يفرجنى على صور تامر حسنى على الموبايل

باربى:اممممممممممم

بنى ادمة:واخدت الموبايل منه ورحت بيه فرح واحدة صاحبتى وقعدت اصورها هى وعريسها طول الفرح والصور بقى

على موبايل اخويا

باربى:امممممممم(بينى وبين نفسى باقول..ايه حالة الحرمان اللى هى فيها دى..هى معندهاش سيرة غير الموبايلات

وللا هى عاوزة تقنعنى ها من البنات الهاى كلاس اللى عارفة كل حاجة عن الموبايلات الجامدة..وللا ايه)

هى باينها فاكرانى مش عارفاها

تفكير الناس فى الموضوع دا بالذات مختلف

انا عن نفسى الموضوع عادى ولا بيفرق معايا اصلا

بس الظاهر ان بعد كدا قبل ما حد هيسألنى عن اسمى هيسالنى الاول عن نوع الموبايل

الحق ارمى موبايلك فى الزبالة واشترى موبايل احدث حاجة عشان الناس تحترمك