BLOGGER TEMPLATES - TWITTER BACKGROUNDS »

١١‏/١٢‏/٢٠٠٧

العيد فرحة

السلام عليكم ورحمة الله
كل سنة وانتم طيبين
عرفت اول إمبارح أنه أول أيام ذى الحجة
والعيد يوم الاربع ان شاء الله
ووقفة عرفات يوم الثلاثاء
كتير من الناس فاكرين ان العيد للاطفال فقط
لاءة..العيد لينا كلنا..كل الناس بتكون فرحانة ومبسوطة..يمكن درجات السعادة بتكون أكتر عند الاطفال عشان اللعب والجرى والخروجات والبالونات والهدوم الجديدة ..لكن فى الاول وفى الاخر الكل بيفرح:)
بس بصراحة الفرحة بتبقى أكبر عند الاطفال
وأنا صغيرة كان ماما وبابا يضحكوا علينا ويقولولنا أ،هم خارجين فى مشوار ويودونا عند تيتة ولما يرجعوا نلاقيهم جايبين لنا هدوم العيد..انا فاكرة إنهم مرة كانوا جايبنلى أ،ا وأختى طقمين..واحد أخضر وواحد أحمر..
وأنا بموووت فى اللون الاحمر..بس كان فى مشكلة ..إن أختى كانت بتستنى وتشوفنى انا هختار الاول أى طقم ..والطقم اللى تلاقينى متمسكة بيه وبقول هو دا بتاعى ..تقوم هى قايلة ماليش دعوة..دا اللى عجبنى..وبما إنها الصغيرة..فكنت مش بزعلا وبديهولها..لكن المرة دى جت فى لون بحبه ..فاستخدمت ذكائى الطفولى وعملت نفسى عاوزة الطقم الاخضر وقولت لماما الله الطقم دا لونه جمييل اوى انا هاخد دا..فراحت أختى بكل شطارة صممت إنها بردوا عاوزة الطقم الاخضر فرحت سيبتهولها وأخدت الطقم الأحمر اللى كان نفسى فيه من الاول هههههههههههههههههه:)
...........................
...........................
وكان بقى ليلة العيد نقعد نطلع بقى الهدوم الجيدية دى ونرتبهم على كراسى الانتريه
ونحط جنبهم الشوز الجديدة والشراب
وكل واحدة تنزل بقى تشتريلها توكة تكون لون الطقم الجديد
أما الشنطة بقى فكانت حكاية
طبعا عشان الشياكة تكتمل :)
فكنا ننزل نختار شنطة شيك كدا بالالوان الغريبة دى ..مرة أحمر ومرة أخضر ومرة أورانج ومرة ومرة:)
كانت أحلى شنطة جبتها وانا عندى خمس سنين ..كانت جميلة اوى وكانت حمرا بردوا وفيها أربع خطوط بيضاء من الجنب وكانت ب 4 جنية ونص ههههههه ههههههه هههههههه ..أيام الرخص طبعا..بس ساعتها كانت أغلى شنطة جبتها وأشيط شنطة كمان فى شنط بنات خالتو كلهم طبعا دى شنطة باربى مش اى حد :) !!!
وبعد ما نشترى كل الحاجات القطاقيطى دى كلها نرجع البيت ونستحمى حماية العيد بقى بس الحمد لله مكانش فى خسائر فى الارواح ولا حاجة ههههههه ونقعد بقى نفكر هنعمل أى تسريحة شعر ..ونعمل خطط أنا والبت العسولة أختى عشان محدش من قارايبنا يكون عامل نفس التسريحة بتاعتنا..ونكون كالعادة أحلى منهم ههههههه عديها يعنى متركزوش فى دى أوى بقى!!!!
........................
........................
الصبح بقى فى يوم العيد:
لازم ننزل نصلى العيد ونرجع البيت نفطر على طول ونلبس الهدوم الجديدة وناخد العيديدة من بابا وماما وننزل نعيد على جدو " الله يرحمه" وبعديها نجرى على بيت تيتا على طوووول..نعيد عليها وناخد طبعا العيديدة ونقابل هناك خالو أولاده ونقعد نضحك ونهزر كتيييير .
ولم ينته العيد على كدا ..نووووووووو
دا إحنا بقى خلاص صحصحنا بقى نقوم رايحين على خالاتو وطبعا نظبتهم فى العيدية وننزل كلنا نشترى بلالين ملونة كتيييييييييييييييييييييييير ونرجع تانى على خالتو ونقعد نلعب بلبلالين ونفرقعها..وبعدها يأتى وقت الايس كريم..معرفش ايه علاقة الايس كريم بالعيد بس كنا لازن ننزل نشترى ايس كريم ونبقى فرحانين أوى لما حد فينا يكسب واحدة ايس كريم هدية..:)
وبعد كدا
يأـتى وقت نظارة الشمس وما أدراكوا بقى ما نظارة الشمس
ننزل عند الرجل اللى بيبيع لعب وبالونات ونضارات ملونة اخر شياكة وأناقة
وكل واحدة فينا تختارلها نضارة كدا عليها ميكى أو بطوط ونقعد نغيظ بعض بألوانها التحفففة هههههههههههههههههه
أها يااااااااه كل دا والعيدية لسة مخلصتش
يا سلام علينا
ورغم أننا بناتيت الا اننا كنا بنحب نشترى مسدسات اللى بترش مية ومسدسات تانية اللى بتعمل اصوات غريبة كدا وتطلع شرارة حمرا
ونملى بقى المسدسات مية ونقعد نرش شوية على بعض وشوية على الارض وشوية على البيوت اللى فى الشارع..
وبعدين نيجى عندنا فى الشقة مع القافلة الهائلة من أطفال العائلة دول ونقعد نتفرج على المسرحيات اللى كانت بتيجى على القناة الاولى..مكانش فى ستالايت ساعتها ولا التطور الحالى ولا روتانا سينما مش هتقدر تغمض عينيك ولا الايه ار تى ولا الحاجات دى..
وبعدين نلاقى الضيوف قاعدين يهلوا علينا زى هلتال العيد كدا
واحنا طبعا نفرح جدا لاننا هنفترس العيدية ونكمل شراء باقى دستة اللعب بتاعتنا ههههههه عالم فاضية هههههههههههه..
وبعدين يجى دور ماما وبابا فى انهم ينزلوا بقى يلفوا على العائلة يدوهم عيدية بردوا ..
ويأتى الليل وكنت ببقى زعلانة أوى إن الليل جه وأول يوم من أيام العيد خلص..بس كان يوم جميل أوى..قصدى كانت أيام جميلة أوووووووووووووووى
.......................
.......................
كل سنة حضراتكم جميعا بالف خير
وإن شاء الله يكون عيد سعيد عليكم كلكم

٠٣‏/١٢‏/٢٠٠٧

هل اللجوء الى إسرائيل حق أم جريمة فى حق الوطن؟؟؟

بعد أن تابعت سلسة الحلقات التى قدمها الاستاذ وائل الابراشى على قناة دريم تو "برنامج الحقيقة" والتى تناولت الحديث عن سفر المصريين إلى إسرائيل ,أصبحت لا أدرى إذا كان هؤلاء المصريون على حق أم أنهم حقا إرتكبوا جريمة فى حق الوطن..
فى بداية متابعتى لهذه الحلقات كنت مندهشة من هؤلاء الشباب ومتحاملة عليهم إلى حد كبير جدا وكنت أرى أنهم ليس لديهم أيه مبررات لسفرهم إلى إسرائل وفى الامس شاهدت الحلقة الاخيرة فى هذه السلسلة وكانت تتناول الحديث عن أحد المصريين الذى لجأ الى السفارة الاسرائيلية طالبا العون منها بعد أن أهانته بلده مصر .
تحدث هذا الرجل بدموعه عما حدث له وكيف أنه أهين من قبل بعض رجال الشرطة أمام بناته وزوجته وكيف أنه قد تم ضربه لدرجة أن عظام أذنه الداخلية قد كسرت من كثرة مالقيه من ضرب وإهانة ومعاملة غير ادمية, ولم يكتفوا بذلك فقط بل إنهم أخذوا زوجته أمام عينه بدون أى وجه حق ليقتلوا ما بقى بداخله من مروءة ويشعرونه بأنه لا يقدر على أن يفعل أى شىء لحماية زوجته منهم, وعندها قلت فى نفسى إنها حقا أكبر إهانة يلقاها الانسان عندما سهان هكذا ولا يدرى ماذا يفعل , ولم تنته القصة بعد ولكن هذا الرجل لجأ بشكاوى عدة إلى الكثير من المسؤلين والى رئيس الجمهورية نفسه ولكن لا حياة لمن تنادى.
كل ما حدث لهذا الرجل جعله ناقما على بلده _ بلد الامن والامان_ فقد إنتمائه ,كل ما أراده هو الانتقام, وعودة حقه له ولزوجته,فأراد أن يفضح بلده أمام عدوها اللدود " إسرائيل" وتقدم شاكيا حاله الى السفارة الصهيونية,ظانا أن اليهود أصبحوا أحن قلبا عليه من بلاده, وبالرغم من وجود الكثيرين الذين عارضوا فعلته,ملقين باللوم عليه وقائلين له: " ماذا تظن أن تفعل لك السفارة الاسرائيلية؟ وكيف خطر لك على بالك أن، هذه السفارة سوف تساعدك وتعيد لك حقك؟". طيب إذا كانت السفارة الاسرائيلية لا تقدم مساعدة كما قالوا, فبم يفسرون أنه بعد أن لجأ الى السفارة الاسرائيلية استدعته أمن الدولة وأخبروه بأنه سوف يتم رد إعتباره وسوف يأخذ حقه وعاملوه معاملة حسنة ..عكس المعاملة الاولى بتاتا؟؟
أنا لا أؤيد اللجوء الى إسرائيل ولا السفر إليها ولكنى أريد أن نعامل فى بلادنا معاملة أدمية على الاقل حتى لا يفقد الكثيرون منا إنتمائه لهذا البلد مثلما حدث مع هذا الرجل, لا نريد أن تكون عملية اللجوء الى عدوا مثل إسرائيل تصرفا يفعله الناس وهم غير مبالين بنتائجه..عاملين بمبدأ " أنا ومن بعدى الطوفان".. فى الغرب يحترمون الحيوان قبل الانسان وفى بلادنا أخر ما يفكرون فى احترامه الانسان!! منذ بضعة أيام قرأت مقالا لأستاذ مجدى مهنا فى المصرى اليوم يقول فيه إن وزارة الزراعة الاسترالية قد رفضت تصدير الأغنام الى مصر لأن مصر تسىء معاملة الاغنام.. هم لا يرضون عن معاملة مصر للأغنام فما بالهم إذا عرفوا كيف تعامل مصر الانسان وكيف أن الانسان المصرى كرامته مهدرة داخل وطنه, مما يؤدى فى النهاية الى أن أصبحت كرامته مهدرة أيضا خارج وطنه..

وفى الاول من ديسمبر شاهدت فى برنامج البيت بيتك على الفضائية المصرية مشكلة نادى الصيد وملخص هذه المشكلة أن بلجيكا رفضت أن تسمح بدخول مجموعة من الأطفال الذين يلعبون الرياضة الى بلادهم لحضور إحدى البطولات..ولا يوجد سبب منطقى لرفض دخول هؤلاء الاطفال الى بلجيكا..هل يشكل هؤلاء الاطفال خطرا كبيرا على الأمن البلجيكى أم ماذا؟؟ ليس هذا فحسب بل رفضت بلجيكا أيضا دخول مجموعة من أساتذة إحدى الجامعات فى مصر والذين أرادوا السفر من أجل حضور مؤتمر علمى هناك..هل يشكل أيضا هؤلاء الاساتذة خطرا على بلجيكا؟؟ بالفعل لا..ولكن ما أعتقده حقا هو أن عدم إحترام المصرى خارج بلده سببه الأساسى أنه لم يتم إحترامه أصلا داخل بلده!!! نعم أخطأ هؤلاء الشباب عندما لجأوا إلى إسرائيل ولكن مصر أيضا أخطأت عندما تخلت عنهم فى وقت هم فى أشد الحاجة اليها..أمل أن تحتضن مصر أبناءها قبل أن يذهبوا ويرتموا فى أحضان أعداءها..

٣٠‏/١١‏/٢٠٠٧

العاصمة الجديدة لمصر

العاصمة الجديدة لمصر
قرأت فى المصرى اليوم عدد يوم 22 نوفمبر عن موضوع غريب لم أسمع به من قبل ولم يخطر لى على بال وهو أن صفوت الشريف أعلن عن دراسة مشروع عاصمة جديدة لمصر وأن بعد هذا التصريح بيومين أعلن الرئيس مبارك عن الغاء هذا المشروع..
ذهلت من الفكرة كلها وفكرت لماذا تم طرح فكرة عاصمة جديدة لمصر من الاساس؟؟هل يمكن ان توجد عاصمة جديدة لمصر غير القاهرة؟؟لا أدرى ما هو سبب طرح هذه الفكرة ولكن ربما لم تعد القاهرة تليق الان بان تكون العاصمة وربما لزحامها وشوارعها المتكدسة بالبشر والمصالح الحكومية وغير الحكومية والادخنة والغبار والتلوث والضوضاء المسيطر على شوارعها ..لا ادرى
ربما تكون هذه هى البداية لأختيار مدينة من المدن الجدية لتكون العاصمة أو لأنشاء مدينة جديدة بالكامل لتكون هى العاصمة انخف العبء قليلا عن القاهرة ويذهب الكثيرون اليها ويعيشون هناك ويقيمون فيها.
رغم اننى لا أتخيل أى مدينة أخرى لتكون هى العاصمة غير القاهرة _ ليس حبا فيها_ ولكن ربما لاننى منذ ان بدات أن أدرك ما هيات الاشياء وقد علمونى أن القاهرة هى العاصمة إلا اننى اراها فكرة جديدة وجيدة فى ان واحد وربما كانت ستعود بالنفع على الكثيرين من الشعب وبخاصة الشباب الذين أصبحوا يجهلون مستقبلهم ولا يدرون ماذا سيفعلون فيه واين سيعيشون فيه؟؟
وكيف سيحصلون على شقق ليتزوجوا فيها؟ وكيف سيجدون المال الذى سيشترون به هذه الشقق الباهظة الثمن؟؟ارى انها فكرة جديرة بالدراسة لأنها سترحم الكثيرين من عناء العراك من أجل العيش فى القاهرة التى ضاقت بسكانها , وأجزم أنه لو كانت القاهرة بشرا لسمعنا صراخها عاااااليا!!!!!

٢٣‏/١١‏/٢٠٠٧

عادات ليس لها تفسير

هل جلست مع ذاتك وحاسبتها على ما تفعله؟
هل حظيت بالقليل من الوقت لتجلس مع نفسك وتحدثها عن تصرفاتها؟
لا أدرى إذا كنت فعلت هذا من قبل أم لا؟
أما أنا فنعم جلست مع نفسى عدة مرات وحاسبتنى وعاتبتنى! وحاولت إصلاحى , ليس بالضرورى أن كل محاولاتنا
لإصلاح ذواتنا تنجح ولكن الاكيد أن تكرار المحاولة يسوقنا فى إحدى المرات إلى النجاح..حتى ولو لمرة واحدة..
عندما تكون المشكلة مشكلتك أنت, وأنت تعرف انها فيك حقا وتدرك أهمية تغيرها , تكون المشكلة بذلك قد تم
حلها..لأنك أدركتها وإدراكك لها هى خطوة فى طريق علاجها , أما عندما تكون المشكلة لدى الاّخر فأنى لك ان تحلها؟؟
عندئذ ادرك صعوبة المشكلة!!
غالبا ما نردد أن كل شىء نفعله له تفسير , ولكن كثيرا ما الاحظ بعض التصرفات لبعض الناس من حولى ليس لها
تفسيرا أو ربما يكون لهذه التصرفات تفسيرا وانا لم أعثر عليه بعد..
أؤمن بحرية واستقلالية كل إنسان خلقه الله, ويزعجنى كثيرا تدخل أى إنسان فى تصرفاتى الخاصة ولا أعرف لماذا
يستمتع الانسان بأن يتدخل فيما لا يعنيه؟؟وما هو وجه المتعة فى أن يتدخل إنسان فى حياه إنسان اخر ويسأل عن
تفاصيل فى حياته لا تعنيه ولاتخصه على الاطلاق والاعجب من هذا انه لا يكتفى بمجرد ان يتدخل فى حياتك..بل انه
يكثر من القاء النصائح ب(افعل ولا تفعل)دا على إعتبار انه عين نفسه مسئولا عنك بالكامل..
أتمنى لو تتاح لى الفرصة ان ادخل فى عقول مثل هؤلاء البشر وأقرأ ما بداخلهم لعلى أقدر على تفسير ذلك وأفهم ما هو
سر إستمتاعهم بمثل هذه التصرفات!!
أعلم جيدا أن البعض عندما ينصح يكون هدفه الاساسى هو افادة من يتلقى نصحه ..
رجائى الى هواة تقديم النصائح لمن حولهم قبل ان تبدأوا ان تمطروهم بوابل من النصائح المتلاحقة ان تراعوا حالتهم
النفسية ومدى إمكانية تقبلهم لهذه النصائح فى هذا الوقت وقبل ان ينطقوا بالتصيحة ان يفكروا اولا هل هم يطبقونها
على أنفسهم أم لا!!!!!!!!

٣٠‏/١٠‏/٢٠٠٧

عبد الناصر والجانب المظلم من القمر

هكذا يرونه قائدا عظيما ومواطنا شريفا بطلا من أبطال التراث الشعبي أسطورة في تاريخ الكرامة العربية وقمرا في سماء هذا الوطن هذا مايراه وما يعتقده كل محب لهذا الزعيم المصري الراحل وهو لايرضى عن هذا الوصف بديلا وعندهم هي حقيقة غير قابلة للجدال أو النقاش ونسوا أو تناسوا أن عبد الناصر بشر وليس من أنبياء الله المرسلين حتى يكون معصوما من الخطأ. ونسوا أو تناسوا أن هناك جانب مظلم -شديد القتامة- للقمر وهو يساوي في حجمه وشكله الجانب المضئ من القمر تماما. منذ فترة قريبة وبالتحديد منذ أربعة أيام تم افتتاح متحف لمقتنيات اللواء محمد نجيب الذي تولى رئاسة مصر لمدة عامين (1952 – 1954) بعد إلغاء النظام الملكي، وإجبار الملك فاروق على التنازل عن العرش والرحيل عن مصر اللواء نجيب هو أول رئيس لجمهورية مصر العربية بعد إسقاط النظام الملكي وعليه لابد وأن يكون شخصية معروفة وسطر لها في التاريخ ما سطر فإذا سألت أي شخص تعرفه عن أول بشري سار على القمر سيجيبك على الفور أنه نيل أرمسترونج ولكن مع الأسف فإن هذا ليس الحال مع اللواء نجيب فإذا سألت عنه قد لايعرفه البعض وقد يجيبك البعض الأخر بإنه -تقريبا- أول رئيس لجمهورية مصر فما الذي حدث ومن المسؤول عن شطب ومحو إنجازات هذا الرجل العظيم من كتب التاريخ والأهم من عقول أبناء هذا الوطن. وعلى الناحية الأخر -وحدث ولا حرج- إن سألت عن عبد الناصر فهيئ نفسك لسماع قصائد حب وغزل ليس لها أول من آخر عن -كما يقولون- مهندس الثورة وقائد الثورة ...إلخ ولتفهم عزيزي القارئ ما أهدف إليه من هذا المقال وصلة هذا بذاك أسمحلي أن أصيغ سطور قليلة جدا عن اللواء نجيب أولا لا لاتخشى لن أبدأ لك من نشأته وكفاحه من الصبى وحتى الشباب ولكني -مضرا- سأقفز إلى فترة ما قبل الثورة وهو ما يعنينا هنا شارك محمد نجيب في حرب فلسطين عام 1948 وأصيب فيها ثلاث مرات وحصل على رتبة لواء أركان حرب ومنح لقب البكوية لما أبلاه في هذه الحرب الذي أصيب بها.وأنضم بعدها إلى تنظيم الضباط الأحرار الذي كان من مؤسسيه عبد الناصر. وكانت للواء نجيب شعبية جارفة بين ضباط الجيش وخاصة المنتمين منهم لتنظيم الضباط الأحرار لما كان يتمتع به من نزاهة وكرم أخلاق شهد عليها كل من عاصروه وعايشوه وحاربوا إلى جانبه وهو ما ترجم بإنتخابه رئيسا لنادي الضباط بأغلبية ساحقة وصلت إلى 95% بحسب ما ذكر مؤرخنا العسكري جمال حماد. مما جعل الملك فاروق يرشحه ليكون وزيراً للحربية قبل أيام من إندلاع ثورة 23 يوليو 1952 و بعد نجاح الثورة، رأى محمد نجيب أن يعود الجيش إلى ثكناته، وأن تعود الحياة النيابية لسابق عهدها و هو ما أشعل الخلاف داخل مجلس قيادة الثورة لخوف الضباط من سيطرة حزب الوفد و جماعة الإخوان على السلطة

وفي نوفمبر 1954، قرر مجلس قيادة الثورة -بزعامة وتحريض من عبد الناصر- عزل محمد نجيب من رئاسة

الجمهورية لأول مرة مما أثار سلاح الفرسان و طوائف عريضة من الشعب وطالبوا بعودته

.

وضع محمد نجيب تحت الإقامة الجبرية في قصر في ضاحية المرج المنعزلة وقتها، مع منعه تماماً من الخروج أو من مقابلة أياً من كان، حتى عائلته. وأستولى عبد الناصر على الحكم بهذا الإنقلاب وأقسم بالله أنه إلى هذه اللحظة وبعد بحثي في عشرات الكتب لكتاب محايدين ومشهور لهم بالمصداقية لم أجد حتى الأن سببا واحدا أو حادثة واحدة أضرت بالشعب المصري تستدعي الإنقلاب على هذا الرجل أو عزله من السلطة. وليت الحكاية أنتهت هنا. ولكنها كانت البداية بعدها حذف أسم محمد نجيب من كتب التاريخ في تلك الفترة التي تتحدث عن الثورة وهذا ماقاله محمود أباظة الرئيس الحالي لحزب الوفد وأصبح يذكر في كل مكان أن قائد الثورة هو عبد الناصر وأن أول رئيس لجمهورية مصر -وصدقوا هذا- هو عبد الناصر وأسقط تماما اللواء نجيب من صفحات التاريخ فلا أعرف لماذا قام عبد الناصر بهذا الأنقلاب -وهو في نظري أول النقاط السوداء في تاريخ هذا الزعيم- وهل كان الموضوع ببساطة هو حبا وطمعا في السلطة وإن لم يكن فلما التعتيم على تاريخ الرجل ولما حذف -بعمد- من صفحات التاريخ وحتى لا يتهمني أحد بأني -بفتري على عبد الناصر- أطلب منهم فقط أن يضغطوا على اللنك التالي موقع عبد الناصر وليقرؤا ما كتب في أعلى الصفحة جهة اليسار في المستطيل الصغير وبعدها لهبطوا بأعينهم إلى أسفل الصفحة ليقرؤا من هم أصحاب الموقع وموؤسسيه. في كل ذكرى لحرب أكتوبر يذكر الراحلين عبد الناصر والسادات وفي كل ذكرى توضع أكاليل الزهور على قبورهم ولا يأتي ذكر اللواء نجيب وكأنه لم يكن وكأنه لم يخط بيان الثورة بيده وكأنه لم يكن رئيسا للجمهورية. هذا التعتيم بدأه عبد الناصر نفسه وهو أسلوب أعتمده مع كل معارضيه ووصل حتى لأقرب الإصدقاء إليه -المشير عبد الحكيم عامر- والحديث في هذا الموضوع لايمكن بأي حال من الأحوال إختصاره في مقال أبدا لذلك وللأول مرة سوف أُقوم بتقسيم هذا المقال لعدة أجزاء حتى لايمل القارئ من طول المقال الشديد إذا كتبته مرة واحدة وعليه -كما هو واضح- أنا لم أنهي الموضوع بعد ولم أزل أتكلم عن الجانب المظلم من شخصية عبد الناصر وإن كنت قد أعطيت لمحة موجزة عن الخسوف الذي تم في تاريخ هذه الأمة وهذا البلد بالتحديد ويرفض الكثيرون ذكره أو الإعتراف بحدوثه أراكم في الأسبوع القادم إن شاء الله

٠٨‏/١٠‏/٢٠٠٧

عندما تعشق الانثى

ياترى فى فرق بين حب الرجل للمرأة وحب المرأة للرجل؟
ياترى الحب دا بيؤثر على حياتهم وعلاقاتهم باللى حواليهم؟؟
زمان كنت بشوف ان اى بنت صاحبتى او اى بنت معرفة يعنى ..بترتبط سواء بخطوبة او جواز باى شخص بلاقيها عندها استعداد تنسى كل الدنيا من اجل هذا الرجل..بلاقيها مش هاممها اى حد غيره..ممكن تنسى اصحابها..وتنسى حبايبها وتنسى نفسها من اجل هذا الرجل؟؟؟
كنت بستغرب لان على الصعيد الاخر بلاقى الرجل على عكس ذلك تماما
عادى خالص مع اصحابه واخواته وقرايبه..فكنت بقول لنفسى طيب هم البنات دول بيعملوا كدا ليه؟؟
ياترى هم ليه اشتروا حب وقرب شخص واحد بس وباعوا اى حد غيره
هل اصبحت الدنيا لهن متجسدة فى هذا الشخص دون سواه؟؟
..(بغض النظر عن نجاح او فشل العلاقة بعد ذلك)
هل هذا الشخص قادر فعلا انه يغنيها عن احتياجها لاى حد تانى حواليها؟؟
وكانت دائما فكرتى ان الحياة ليست مجرد علاقة حب بين ذكر وانثى.. لانى كنت شايفة ان الحب دا سيفتر بعد فترة ايا كانت هذه الفترة
ولكن
فكرتى اتغيرت شوية
لم يكن التغيير كليا ولكنه جزئيا
بمعنى انى بردو مؤمنة ان الانسان محتاج لكل اللى حواليه من اهل واصحاب واخوات..لكن ادركت ان العلاقة بين رجل وزوجته ونجاح هذه العلاقة هى اهم من اهم شىء فى الدنيا..لان بنجاح هذه العلاقة ستنجح اسرة باكملها وتتفرع من هذه الاسرة الصالحة الناجحة اسر اخرى فى المستقبل ..حكاية نجاح اسرة دى فى حد ذاتها مهمة صعبة جداااااااااااااااااااااااااااا
عشان كدا عندما تعشق الانثى يصبح من تحبه هو دنياها بالكامل
ترى فيه المستقبل والدفء والامان
ولكن اللى مش فاهماه لحد دلوقتى هو لماذا يختلف حب الرجل للمرأة عن حبها له؟؟؟
هل الانثى اكثر وعيا باهمية دورها واهمية الاسرة اكثر من الرجل؟؟

٢٥‏/٠٩‏/٢٠٠٧

المسلمون فى رمضان

النهاردة الموافق 28_9

عيد ميلاد وسام

كل سنة وانت طيب يا سمسم وعقبال 200 سنة

انت بقى هتبقى عجوووووز وعندك 200 سنة وانا هبقى صغنونة وعندى 197 ههههههههههههه

والتورتة دى هدية عيد ميلادك ايه رأيك بقى؟؟

انا عارفة انك بتحبها بالشيكولاتة بس انا جبتهالك كلها كريمة ..غلاسة بقى

وبعدين ما احنا كدا كدا صايمين..يعنى مش هناكلها بقى

..........................................................
........................................
كانوا عايشين فى عصر غريب فى الستينيات والسبعينيات..فى الافلام بتاعة زمان بنشوف البطل ميبقاش بطل الا لما يشرب خمرة والبطلة متبقاش بطلة الا لما تلبس مينى جيب وكت..زمان مكانش فى اهتمام ووعى بالدين زى دلوقتى بس كان فى اخلاقيات فى التعاملات بين الناس.. طيب جميل..ودلوقتى..الظاهر ان الحال اتغير..وبقى فى وعى وثقافة دينية كبيرة..ومعتقدش ان فى بيت دلوقتى مفيهوش ستلايت ومبيشفش القنوات الدينية او البرامج اللى بتنشر الوعى باى حال من الاحوال.. ولما اقارن دلوقتى بزمان الاقينا دلوقتى فى نعمة كبييييييييييييييييييرة اوى..ازاى..اقولكم ازاى..يعنى زمان مكانش الدش منتشر كدا زى دلوقتى..كان البرامج الدينية الوحيدة اللى بشوفها على حد زاكرتى يعنى ..برنامج حديث الروح اللى بيقعد بالضبط خمس دقايق قبل نشرة التاسعة مساء..وبرنامج الشعراوى يوم الجمعة..بسسسسسس بردو جميل ..والاجمل ان دور العبادة انتشرت للمسلمين والمسيحين حتى..يعنى مفيش حد حاجة ناقصاه.. طب التسهيلات دى بتقول يبقى اكيد الجيل دا اتصلح حالة والناس بقت طيبة ومتدينة وعارفين الصح من الغلط كويس اوى.. هم عرفوا فعلا الصح من الغلط والحلال من الحرام..لكنهم فاصلين تماما بين الدين والدنيا..شايفين ان الدين هو الصلاة والصوم والعبادات فى رمضان وخلاص..ونسيوا ان رسول الله صلى الله عليه وسلم كان قرآنا يمشى على الارض..نسيوا انهم محتاجين يربطوا العبادات بحسن المعاملات مع الاخرين.. انا كنت بقالى كتير مش مواظبة على انى اصلى فى المسجد..ومن حوالى سنتين بقيت اصلى التراويح فى المسجد..ودا تالت رمضان يعدى عليا وانا الحمد لله بحب اصليها فى المسجد بردو..بس خلال السنتين دول ولحد رمضان دا كمان بشوف حاجات عجيبة فى المساجد.. 1- زى مثلا ان واحدة خبطت واحدة غصب عنها تقوم خناقة والصوت يعلى ولا كأننا فى بيت ربنا..مش عارفة هم تفكيرهم بيكون ازاى فى اللحظة اللى بينسوا فيها انهم فى مسجد وبيكون كل همهم ان كل واحدة تبين قوتها وتثبت انها لا تقهر ابدااا 2- الحاجة المنتشرة السنة دى واللى تقريبا مش بيعدى يوم الا ولازم اسمعها هى كلمة(حرااااااااااااااااام)..كل واحدة تصليلها يومين فى المسجد تعتقد خطأ انه من حقها تقول حرام وحلال..مثال على كدا واحدة كانت بتصلى فى المسجد وكانت معها اطفالها وطبيعى الاطفال بيعملوا شوية دوشة كدا بس اهم كانوا قاعدين فى اخر صف واذا بالنساء فى المسجد بيزعقوا لوالدتهم وبيقولولها حراااااااااااااااااااااااااااااااااااااااااااااااااااااام عليكى عشان جايباهم معاكى..خديهم وروحى ..ومحاضرات بصوت عالى عن الحرام والحلال لحد ما والدة الاطفال قالتلهم كلمة واحدة بس(شكرااا)واخدت اولادها وخرجت من المسجد.وبجد صعبت عليا اوى ومكنتش عارفة اعملها حاجة... 3- ومرة كنت رايحة المسجد بصلى وانا لابسة جيب جينز قامت واحدة متبرعة قامت وجت جنبى..وقالتلى ..الصلاة بالجينز حراااااااااااااااااااااااااااااام.. بقى سهل علينا يا مسلمين نحلل ونحرم بمزاجنا للدرجة دى..ليه؟؟ بقى سهل علينا اننا نزعق ويعلى صوتنا ليه؟؟ كل النعم اللى ربنا انعم بها علينا وحالنا مش مظبوط..وكله بياكل فى كله.. ياسلام لو ننتهز الشهر الكريم دا وكل واحد يقعد مع نفسه قعدة كدا على انفراد ويشوف عيوبه ويحاول يصلح من نفسه..يا سلام لو يبقى عندنا سعة صدر لتقبل بعضنا لبعض..يا سلام لو نحاول يبقى خلقنا القرآن زي رسولنا الكريم صلى الله عليه وسلم..يا سلام لو نبقى مسلمين على حق..ونستحق كلمة مسلمين بجد

١٩‏/٠٩‏/٢٠٠٧

الجنة فى بيوتنا

السلام عليكم ورحمة الله وبركاته
جه رمضان وعدى منه كذا يوم
انا رمضان مرتبط عندى بحاجات معينة بتحسسنى بطعم رمضان ..من ضمن الحاجات دى برنامج عمرو خالد كل
سنة..شىء ضرورى
جداا جداا بالنسبة لى انى اشوفه
بس كنت متعودة على انه برنامج ايمانى بيرفع الايمانيات اللى احنا مهملنا طول السنة
السنة دى جه عمروخالد ببرنامج من نوع تانى
برنامج عن الاسرة
اسمه الجنة فى بيوتنا
بدات اتابع البرنامج من اول يوم رمضان كالعادة
مكنتش متخيلة ان البرنامج بالروعة دى
والجميل ان ابرنامج دا جاى فى فترة خطوبتى
يعنى الفترة اللى باهل فيها نفسى انى اكون زوجة وام وباهل نفسى انى يبقى عندى بيت واسرة
جديدة صغنونة وجميلة
دا طبعا بفضل ربنا عليا
لانى بجد امنية حياتى ان اسرتى تكون اجمل اسرة فى الدنيا..مش متخيلة
ان فى سعادة فى الدنيا توازى ان الانسان يعيش فى اسرة
صالحة كلها سعادة وحب وطاعة لربنا
الغريب ان معظم الناس بيشوفوا الدين كأنه شىء بيخنق متعنا ..وبيكبت حريتنا
طيب لو الدين كدا زى ما الناس شايفة..يبقى ليه ربنا نزلهلنا..ياترى ربنا
عاوز يضيق عليا..لا طبعا.واكيد ربنا بيختار لنا طريق
السعادة الحقيقة
يمكن منكونش احنا قادرين ندرك الموقف لاننا معشناهوش صح..لكن
لو عندنا ثقة فى ربنا وفى دينا ومشينا فى الطريق مظبوط
هنشوف اسر الجنة فى بيوتها بجد
ياريت كلنا نشوف البرنامج بجد بجد هيعجبكوا
كل سنة وانتم طيبين

١٤‏/٠٩‏/٢٠٠٧

يا دبلة الخطوبة عقبلنا كلنا....تيرارارم

الحمد لله أخيرا وبعد طول إنتظار تمت خطوبتنا أنا وباربي يوم 10\9\2007 في حفل عائلي خاص عشان خاطر المعجبين والجماهير وكده يعني وعاوزين نقول لكل اللي باركلنا الله يبارك فيكم وعقبال ما نفرح بيكم إن شاء الله فياريت تكونوا عذرتونا عشان تأخرينا في كتابة المواضيع عشان كنا مشغولين بالخطوبة وإن شاء الله نرجع قريب بمواضيع جديدة وشكل جديد

٠٩‏/٠٨‏/٢٠٠٧

دبور...وزن على خراب عشه...؟

بجد مالقتش حاجة توصف اللي بيعمله "بعض" من المسيحين في مصر أو الخارج غير المثل ده النهاردة على موقع في البلد قرأت خبر عن إلقاء القبض على كل من الأستاذ عادل فوزي والأستاذ بيتر عزت المشرفين على موقع منظمة مسيحي الشرق الأوسط بمجوعه من التهم وهى -ازدراء الدين الاسلامى -التبشير التنصير ويقولوا انه قد قام بتنصير ثلاثه اساءه سمعه مصر التخابر مع جهات اجنبيه حسب موقع منظمة مسيحي الشرق الأوسط نفسه وبجد أنا مش عارف هي المجموعة دي ومن على شاكلتها عاوزين إيه بالظبط وعاوزين يعملو إيه في مصر...؟! اللي المنظمة بتقولوا وأنا حاخد كلامهم كوبي وبست من موقعهم نفسه وحلونه هنا بالأحمر هو (نرى أن مسيحي الشرق الأوسط يعانون من التمييز الديني وحقوقهم مهدره بسبب الشريعة الإسلامية التي سلبتهم ابسط حق لهم إلا وهو أن يعيشوا مثلهم مثل غيرهم من غير المسيحيين ..) إيه هو التميز اللي بيعانوا منه....؟! خصوصا هنا في مصر المسيحين دلوقت تقريبا كل ماتروح في حتة تلاقلهم كنيسة أو أتنين (على الرغم من قلة عددهم بشدة مقارنة بالمسلمين في مصر) المسيحين دلوقت بيتقلده أكبر المناصب في الدولة وأذكر مثلا الدكتور بطرس غالي اللي كان وزير الدولة للشئون الخارجية في عهدي الرئيس محمد أنور السادات رحمه الله والرئيس محمد حسني مبارك ومن ثم تولى منصب أمين عام الأمم المتحدة 1992 - 1996 وكان هو العربي الوحيد الذي شغل هذا المنصب يعني ماكنش مسلم أهه عشان الناس اللي بتتكلم عن الإضهاد دي. وعلى فكره والد الدكتور بطرس غالي وهو بطرس باشا نيروز غالي كان رئيس وزراء مصر من 12 نوفمبر 1908 إلى 1910 وإن كانت فترة رئاسته للوزراء سيئة جدا لموالاته الشديدة للإنجليز وده تاريخ مش إفتراء من عندي أو تأليف من خيالي وعندنا الدكتور يوسف بطرس غالي وهو يشغل حاليا منصب وزير المالية وهو عضو مجلس شعب واللي بيتكلمه عن إضهاد المسيحين في مصر أدعوهم فقط لإلقاء نظرة على المناصب التي تقلدها الدكتور يوسف بطرس غالي بالنسبة للأعمال الحرة والمشاريع أغنى عائلة في مصر وأغنى شخص فيها هي عائلة رجل الأعمال الشهير نجيب سويرس الغني عن التعريف وبالنسبة للحياة السياسية في من أعضاء مجلسي الشعب والشورى مسيحين الدولة قررت أعياد المسيحين أعياد رسمية (وتاني وتالت ورابع وخامس)حطوا في بالكم إن مصر دولة إسلامية حد شاف فيكم مسيحين وهما مشين في الشارع المسلمين بيهجموا عليهم ويضربوهم مثلا حد سمع عن منع مصري مسيحي من المرور في الشارع ولا التنفس ولا السباحة ولا منعه من العمل ولا منعة من إصدار رخصة قيادة ولا عرقلة إجرائته الرسمية ولا منعه من الترشح في الدوائر الإنتخابية ولا منعه من السفر ولا منعه من الصلاة لمجرد إنه مسيحي حد يعرف مسلم أو غير مسلم بيجي على الفطار الصبح يكلوا إتنين مسيحين ويحلي بواحد صغير أنا ما بهزرش والله اللي يعرف يقول ولو فيه قولوا لإني ما عرفش بصراحة ومستغرب إضهاد إيه اللي بيكلموا عنه إضهاد إيه وكلنا سمع و رأى سيادة الرئيس محمد حسني مبارك وهو يشدد دائما على مبدئ المواطنة في حملته الإنتخابية الأخيرة وفي التعديلات الدستورية الأخيرة إضهاد إيه وأغلب المسيحين في مصر حطين على إيدهم وشم الصليب ومحدش بيكلمهم إضهاد إيه والولاد والبنات على حد سواء بيلبسوا الصليب ويعلقوه في سلاسلهم ومحدش بيكلمهم إضهاد إيه ولما تدخل أي محل مسيحي تلاقيه معلق صورتي (لمن يعتقدوتن) أنهم المسيح ومريم العذراء عليهم السلام إضهاد إيه وأي مسيحي بيبنه بيت بيحط على بوابة البيت صلبان وبعضهم بيزين سور البلوكونات بيه...؟! وأنا مرة كتبت على الموقع بتعهم إنته حد عارف فيكم إيه هي حقوق المسيحين في الشريعة الإسلامية اللي إنتوا بتقولوا إنها سلبت المسيحين أبسط حقوقهم لو حد عارف يبعت يقلي أو يكتب ويقول مصدره لإنه ممكن يكون جايبها من مكان غلط ومحدش رد خالص عليا طب منين مش عارفين إيه هي الحقوق اللي أقرها الإسلام لغير المسلمين عموما وبتقولوا إن الشريعة الإسلامية سلباكم أبسط حقوقكم المنظمة بتطالب أيضا ( بقيام دوله علمانيه يحكمها القانون وليست الشريعة الإسلامية .. الجميع متساويين في كل شيء .. لا مجال للدين في السياسة ..) بجد أنا مش عارف أعمل إيه غير الضحك يا إخوانا بالعقل كده تعداد مصر في أول يناير 2005 كان 73.67 مليون نسمة كم يبلغ تعداد المسيحين في مصر 25% مثلا (شخصيا أنا شايف إنهم أقل من كده بكتير ولايتجاوزا بأي حال من الأحوال 12%) بس خلينا نزود يبقى عددهم كام حوالي 19000000 نسمة طب هل ينفع عشان ربع السكان ألغي شريعة ودين ال 3 أرباع الباقية من الشعب ده بأي عقل وأي منطق الكلام ده لو شايفين إن ليهم حقوق مهضومة فحقهم كل الحق إنهم يطالبوا بيها ومحدش ييقدر يقول حاجة فهم أولا وأخيرا مصرين ولهم حق في وطنهم لكن إنهم يطالبوا بتغير شريعة بقيت الشعب ويمشوهم على مزاجهم فده اللي مرفوض شكلا وموضوعا وأسألهم بكل صدق وأمانة حيكون إيه رد فعلهم لو المسلمين في الغرب طالبوا بتطبيق الشريعة الإسلامية كنظام للحكم والتشريع في هذه الدول وهم -أي المسلمين - أقل من المواطنين المسيحين في هذه البلاد (وهو نفس وضع المسيحين هنا) إيه حيكون ردة فعلهم وحيقولوا إيه عليهم أسيب أي حد منهم يرد على نفسه. آخر حاجتين هذه التجمعات ومن على شاكلتها وللإمانة هم ليست بالشريحة الكبيرة أبدا من المسيحين ممن يقولون هذا الكلام إيه لازمة وما الداعي للإهانة إلى الإسلام ورسوله الكريم صلى الله عليه وسلم هل هذه هي أخلاق المسيح عليه السلام عندكم...؟! هل كان المسيح في دعوته عندكم يسب موسى ويوسف وإبراهيم عليهم جميعا الصلاة والسلام..؟! لما كنت بدخل على البال توك كانت غرف الدعوة للإسلام بتدعو بالدعوة الحسنة وحتى في المناظرات والله كان الكلام بالمنطق والحجة لكن لما كنت بدخل على بعض غرف المسيحين للإسف كانت كلها سب وشتم في رسول الله صلى الله عليه وسلم والإسلام وأنا ما بفتريش على حد البال توك موجود والغرف موجودة للي يحب يتأكد فإذا كنتم تطالبون بحقوقكم كما تدعون فما الداعي للسب والإهانة في الإسلام ورسوله صلى الله عليه وسلم إنت تطالب بقانون أو سياسة فاليه السب والشتيمة ليه ليه وصف الإسلام بالإحتلال الإسلامي لمصري وهو كان فتح وليس إحتلال أنا أعرف اللي بيطالب بحقة يطالب بأدب وأنا مش شاف أي تبرير لهذا الهجوم غير ضعف الحجة والدليل عندهم هما مش عارفين يقولوا إيه فبيشتموا وخلاص وإذا كنتم تدعون المطالبة بحقوق المسيحين في الشرق الأوسط فالمسيحين في فلسطين يبتسحلوا من قوات الصهاينة أفتكر قبل حوالي 7 أ 5 سنين لما مجاهدين لجؤا إلى كنيسة القيامة للإحتماء بيها من قوات الإحتلال ورفض رهبان الكنيسة بكل الطرق تسليمهم لقوات الإحتلال وفرض القوات حصار على الكنيسة بل قذفت بعض مناطقها واللي عرفته من أصدقائي المسيحين إن دي يمكن تعتبر أهم كنيسة في العالم المسيحي لا شوفنا مظاهرات ولا تنديدات ولا كلام عن الحقوق ولا شجب وإستنكار ولا جمعيات ومنظمات إتكونت ولا أي بطيخ ولا أملك إلا أن أفكر ضاحكا لو كان المسلمين هما اللي عملوا كده وقذفوه الكنيسة كان حيبقى إيه ردة فعل مسيحي الشرق والغرب وكلمة أخيرة لهذه المجموعات الصغيرة ومن على شاكلتها مصر بوتقة أنصهر فيها كل أطياف الناس على إختلاف مذاهبهم ودياناتهم مصر عاش وسيعيش فيها المسلم والمسيحي فأرضها واسعة وصدرها رحب وقلبها محب لكل أبنائها مهما كانت ديانته الإسلام دين سلام وتعايش ويعرف أكثر من أي ديانة أخرى حقوق الغير الإسلام أباح حرية العبادة والدين والكل (مسلم ومسيحي ) يعرف هذه الأية { لا إكراه في الدين قد تبين الرشد من الغي } (البقرة:256) والمسيحية عند من يعتنقوها دين تسامح ألا يتغنى المسيحيون بمقولة المسيح عندهم ( من ضربك على خدك الأيمن فأدر له خدك الأيسر) فأين هذا القول مما تفعلون يا من يدعون الدفاع عن المسيحية وأنتم أول من يخالف ما تقالون أنها تعاليم المسيح عليه السلام وعندكم في سفر الأمثال 29 : 25 ، متى 10 : 36 ، 37 ، وأننا سنقف أمام خالقنا يوم للمحاسبة دون أن ينفعنا مال أو أهل أو ولد فالأولى أن تنفذوا ما تقولون أنه تعاليم دينكم قبل أن تقولوا إنكم تدافعون عنها

٠٨‏/٠٨‏/٢٠٠٧

عمرك زهقت من نفسك

يمكن تقدر تنتقد اى انسان فى الدنيا..ولكن متقدرش تنتقد نفسك اكيد
وحتى لو حصل وانتقدت نفسك..هتكون غالبا بتقول الجانب الحلو فيك فقط
حتى الجانب الوحش اللى انت شايفه فيك..هتقوله برده بس هتحاول
تظهره بشكل كويس وتحوره بحيث يطلع شكلك حلو فى الاخر
لكن هل عمرك حسيت انك مخنوق من نفسك..ومش عاوزك..ورافض نفسك..وفى نفس الوقت مش قادر تتغير؟؟
دا بقى احساسى تجاه نفسى
كنت بنوته هادية ورقيقة والناس بيحسدونى على الهدوئى..
دلوقتى بقيت عصبية موووت..نرفوزة جدا
الاول لما كانت اى حاجة بتيجى تضايقنى كنت باخد الموضوع بهدوء وافكر واشوف هتصرف ازاى
دلوقتى مش بدى لنفسى اى وقت افكر فى اى حاجة
اقل تصرف من اى حد بينرفزنى واول ريأكشن بعمله هو انى بزعق
انا مش طايقانى بجد
انا عاوزة باربى بتاعة زمان ومش عارفة ارجعها تانى
وحشتنى باربى الاولى بجد..كانت عسولة اوى
ليه انا وصلت للدرجة دى؟
ليه العصبية والنرفزة المفاجأة دى؟
يمكن عشان ماما مسافرة وكل حاجة فوق دماغى؟؟
يمكن عشان خايفة من المستقبل..ومش عارفة هاشتغل ولا مش هلاقى شغل اصلا وللا هعمل ايه فى حياتى؟؟
مش عارفة بابا هيوافق على خطوبتى ولا لاءة؟؟
مش عارفة روك هيسافر ولا هيلاقى شغل هنا؟؟
مش عارفة هنلاقى شقة ولا لاءة؟؟
كل دا بالاضافة لعلاقتى المتوترة ببابا..هو عمل حواجر كتير اوى بيننا من زمان
وجاى دلوقتى عاوز يكسر الحواجز دى
بس الوقت متأخر ..متأخر اوى..انا خلاص اتعودت على كدا ومش عاوزة اغير السيستم دا ومش قادرة ابدأ من جديد
يمكن اكون غلطانة..بس مش قادرة اتغير..او بمعنى صريح..مش عاوزة اتغير
المهم انى مش مرتاحة..وعاوزة باربى بتاعة زمان..

٠٢‏/٠٨‏/٢٠٠٧

ماما حبيبتى

أقل حاجة ممكن اعملهالك هى انى اكتبلك بوست اقلك فيه الف مبروك يا مامتى على العمرة
وعقبال يارب ما تطلعى تحجى
يارب ربنا يتقبل منك يارب ويجعل هذه العمرة فى ميزان حسناتك
يارب يا مامتى متنسناش من الدعاء
وتخلى بالك من نفسك يا احلى ام فى الدنيا
بجد بجد انا بحبك اوى اوى
ربنا يخليكى لينا وميحرمناش منك ابدا ابدا
ويارب ترجعيلنا بالف سلامة يا حبيبة قلبى انا بموت فيكى يا سكرة

٢١‏/٠٧‏/٢٠٠٧

حلم عسوول خالص

كنت عايشة الحياة ببساطة ومن غير تعقيدات بس مكنتش مرتاحة..
كنت دايما بقول حاسة ان فى حاجة ناقصة.. مكنتش عارفة احس بالسعادة رغم ان مفيش حاجة ناقصانى بس مش عارفة ليه كان بيجيلى الاحساس دا؟! وفجأة لاقيت الدنيا بتضحك لى..وبتقولى هو دا اللى كان ناقصك..
مكنتش مصدقة نفسى..كنت ببقى حاسة انى طايرة فوق السحاب ومحدش عارف يوصل ليا ابدا ابدا..
كنت بانام وانا مبسوطة واصحى وانا ابتسامتى على وشى كنت باسجد لربنا واقول :معقول يارب السعادة اللى انا حاسة بيها دى بجد وحقيقى ومش حلم؟؟
معقول يارب انا صاحية ومش نايمة؟؟
معقول يارب انت راض عنى اوى كدا؟؟!
وبعدين لاقيت ان فى مشاكل بتظهر ..بس كانت بتعدى بسرعة..وكنت
بقول لنفسى معلش..كل انسان فى الدنيا حياته لازم يمر فيها مشاكل
وصعوبات عشان يرجع يعديها ويتغلب عليها ويرجع يحس بالسعادة تانى
ويعرف انها نعمة من ربنا عليه لا تقدر بمال
وبعد كدا حسيت ان الطريق اتقفل..
ايه دا هو كل دا كان حلم؟؟!ايه دا انا رجعت للواقع..قالولى لاءة كل انسان هو اللى بيعمل الواقع بنفسه لنفسه
قلتلهم:اومال دا ايه بقى؟
هو كل دا حلم ياربى..انا كنت خايفة من الاول انه يكون حلم.. انا عاوزة اكمل نوم واكمل الحلم.. .

١٣‏/٠٧‏/٢٠٠٧

القسوة والحنية

القسوة:بخاف منها..بخاف يجى عليا يوم ويبقى قلبى قاسى.
.وبخاف كمان توجة ليا بأى حال من الاحوال
الحنية:شىء جميل..نعمة من ربنا ..أجمل مثال ليها قدامى
هى مامتى حبيبتى..بحس انها احن انسان خلقه ربنا
فكرت كذا مرة فى الاتنين ..
وكنت مش عارفة اذا هما الاتنين بيكونوا فى الانسان
على اساس صفات وراثية وللا صفات مكتسبة
أحيانا بأشوف قدامى أم وأب قاسيين مثلا فبيطلع اولادهم زيهم..فبقول ان الصفات دى وراثية
لكن مرة قرأت إن الحنية ورقة القلب نعمة من الله على المسلمين..لأن الناس كانوا قبل الاسلام أو فى الجاهلية قاسيين..ولكن لما جه الاسلام رقق القلوب وتحولت قسوة قلوبهم الى رقة قلب..فبعدها قلت ان الصفات دى مكتسبة وممكن يتعلمها الناس.
طب ما انا أحيانا بكون طيبة وحنينة مع ناس معينة
وفى نفس الوقت مش بعرف اكون حنينة مع ناس تانيين؟!!1
بكون مستغربة لنفسى ومش فاهمانى
ولا باينى بكون طيبة مع الناس الطيبين بس
وقاسية مع الناس الشريرين وللا ايه

١٢‏/٠٧‏/٢٠٠٧

يا رب

ماشية فى طريق طويل طويل طويل بس كل ما أمشى متر أقف وافكر
واسأل نفسى
ياترى أكمل الطريق وللا أرجع وكفاية كدا؟
واجى اقول يارب اخترلى الخير
الاقينى بكمل الطريق تانى
اقف تانى واقول يارب اخترلى الخير
وارجع اكمله تانى واقول طالما كملت يبقى انا صح
اللى مخوفنى هو انى باقف فى النص كتير
مش عارفة اكمل الطريق وللا ربنا هو
اللى بيخلينى اقف عشان ينبهنى انى مش فى الطريق الصح؟؟
يارب قولى اكمل وللا ارجع
يارب لو انا مش صح وقفنى عشان متعبش

١١‏/٠٧‏/٢٠٠٧

تعرف يعنى ايه عفة؟؟؟؟

زمان لما كنت باسمع كلمة عفة مكنتش بافهم يعنى ايه الكلمة دى
مرة زماان برده كنت باتفرج على برنامج دينى والداعية اللى فيه سأل السؤال دا وقال:مين يعرف يعنى ايه عفة؟
لاقيت ناس كتير بترد وكل واحد بيقوله تعريف مختلف عن الاخر
بعد كدا بدات افهم ان ليها انواع كتيير
بس الغريب ان الناس دائما بتقصر معناها على عفة الفرج فقط
وبيقول معظمهم ان العفة هى ان تعف المرأة نفسها عن الرجل الذى لا يحل لها وكذلك ان يعف الرجل نفسه عن
النساء اللاتى لا يحللن له..
طب ليه مضيقين على نفسنا المعنى اوى كدا؟؟
العفة ليها جوانب كتييير اوى
مش عارفة ليه جه فى مخى ان ادور فى معناها وانواعها دلوقتى
المهم الى طلعت بيه هو ان
العفة:هى ان يعف الانسان نفسه عن كل ما هو حرام
يعنى مثلا فى عفة اللسان:وهى ان يكون لسانك عفيفا عن النطق بما هو حرام
وعفة العين:وهى غض البصر وعدم النظر الى المحرمات
وعفة للعقل:وهى عدم التفكير فى المحرمات
حتى اليد والقدم لهما عفة بالا نترتكب بهما المعاصى والا نستخدمهما فى المحرمات
طب هو انت انسان عفيف وللا لاءة؟؟
اللى انا ملاحظاه حواليا ان العفة دى بقت شىء يكاد ان يكون قد نسى فى الوقت الحاضر
قليل اوى مننا دلوقتى اللى بقى محافظ عليها
العفة بترفع من الانسان وتكبره قدام نفسه على الاقل
وبتحسسه انه انسان محترم
فى فرق كبير اوى بين الحد العفيف والحد اللى مش فارقة معه
اللهم ارزقنا العفة واغننا بحلالك عن حرامك وبفضلك عمن سواك

٠٦‏/٠٧‏/٢٠٠٧

أحيانا بيكون الغباء نعمة

عمرك أتمنيت إنك متفكرش؟
عمرك حسيت إنك تعبان من كتر ما مخك شغال وعقلك بيفكر؟
بفكر فى مليون حاجة..دماغى وجعتنى ..لدرجة انى بقبت بحسد الناس اللى مش بتفكر.ز
من عادتى انى باسمع اكتر مما باتكلم بكتير ..ومن كتر ما بسمع وبشوف ..بقيت افكر افكر فى كل حاجة!!بقيت اقارن
بينى وبين اى حد بيلفت نظرى..فى الاخر بتكون النتيجة ان الناس كلها مش ذى بعضها..
احيانا بحس انى نفسى ابقى خليط من شخصيات مختلفة..
هو ينفع كدا؟؟
*****
عرفت صحفية صغنونة كدا فى روزاليوسف..هى بنوتة عسولة..قوية جدا..ذكية جدا جدا..واثقة فى نفسها
مووت..بقينا اصحاب فى فترة قصيرة اوى..اثناء كلامنا مع بعض علمتنى حاجات من غير ما تقصد ومن غير ما انا
اقصد كمان..لانى لاحظت انها مختلفة عن ناس كتير فى العصر دا..دماغها مركزة فى الشغل اوى ..وساعات نومها
قليلقة جدا جدا جدا..فى الوقت اللى فيه ناس كتير كسلانين وعاوزين كل حاجة تجيلهم لحد عندهم..لاقيتها مختلفة
وواقوى حتى من الولاد اللى فى سنها ..كلامها معايا علمنى الجدية ..يعنى اكون جادة فى اى حاجة باعملها..يعنى وقت
الجد جد ووقت الهزار واللعب هزار بضمير هههه
لكن بعد كدا قعدت افكر..ياترى شخصية قوية زيها ممكن ان يقبلها الرجل زروجة له؟؟
اعتقد أن الرجل يستمتع بقوته وسيطرته ولا يقبل له ندا..
هل هيقدر رجل يتحمل ان تكون له زوجة بهذا الذكاء؟؟
طيب بعد كدا جه فى مخى سؤال تانى..هل ممكن ان يغنى الشغل عن الحب والحياة الاسرية الدافئة؟
*****
عرفت بنوتة تانية صاحبتى فى الكلية..دى بقى عكس الالى خالص..لانها مستعدة تضحى بمستقبلها العملى وتتفرغ فقط
من أجل ان يكون لها حياة أسرية دافئة وناجحة..لدرجة انها بدأت من دلوقتى انها تقرأ فى علم النفس وفى كتب عن
تربية الاطفال عشان عاوزة اولادها يطلعوا جيل صالح..مع العلم انها مخطوبة فقط ..
وأصبحت كل حاجة بتعملها فى حياتها متعلقة بانها هيبقى لها اسرة صغنونة فى المستقبل ولازم الاسرة دى تنجح
ودى بقى علمتنى بردوا من غير ما تحس اهمية ان الانسان لو عنده اسرية ورعية هو هيبقى مسئول عن الاسرة دى
ولازم يبذل كل جهده من اجل نجاحها..
*****
عرفت بنات تانيين كل همهم الاهتمام بجمالهم فقط
وشكلهم ولبسهم واهمال اى حاجة تانية فى الدنيا..
مش مهم ثقافة..ولا دين..ولا ادب..ولا حب..ولا اى حاجة
دول نموذج غريب شوفته بردو
عجبنى فيهم اهتمامهم بنفسهم
بس رافضاهم كنموذج كدا ذى ما هم
*****
هههههههههههههههه
حاسة انى بقيت متخصصة فى انى اخد بالى من تصرفات كل حد
يمكن لانى عاوزة ابقى حد كويس اوى
مش عارفة دا ينفع وللا ايه؟
انا قاعدة احكم على كل حد باتعامل معه وبانتقد كل حاجة ..
ياترى مين بينتقدنى ومين قاعد يقول باربى دى شخصيتها عاملة كذا وكذا
بس البنت دى رخمة وبتعمل كذا وكذا
باين عليا مخى ضرب بوووم