BLOGGER TEMPLATES - TWITTER BACKGROUNDS »

٢٧‏/٠٢‏/٢٠٠٨

تنظيم القاعدة شايفينه بأى عين ههه"اليمين وللا الشمال"

تنظيم القاعدة اكيد عارفينه
هحكيلكم على الموضوع من البداية
كنت امبارح فى ندوة فى الجامعة الامريكية
كنت بحضر ندوة كدا لكاتب صحفى أمريكى اسمه لورانس رايت..وكانت الندوة بعنوان"منظمة القاعدة بين الماضى والحاضر والمستقبل" الراجل دا عامل كتب كتير اوى عن تنظيم القاعدة ومتكلم فيها عن شخصيات مهمة للتنظيم دا زى اسامة بن لادن وايمن الظواهرى..المهم ان الموضوع الرئيسى للندوة طبعا واضح من العنوان انه عن تنظيم القاعدة وفضل يقول نقد واعتراضات كتير على حكاية القاعدة والارهاب والبيئة اللى سمحت بوجود شخصيات امثال اسامة بن لادن والظواهرى. حلو وبعد المحاضرة كنت بتكلم أنا وواحدة صاحبتى عن موضوع الندوة..وفى وسط الكلام قالتلى ان فى ناس فاهمين ان القاعدة دى هى حامية الاسلام وانها حركة مقدسة جدا عند البعض ومش بيعتبروها حركة ارهابية..رغم كل اللى بيتقال عن القاعدة من قيامها باعمال ارهابية كثير..وكل الناس عارفاها.. انا ساعتها اعترضت على كلامها وقلتلها ..لا محدش بيفكر كدا خالص..المهم اختلفنا فى النقطة دى ولما رجعت البيت حكيت لماما عن الندوة وفى وسط الكلام لاقيتها بتقول نفس الكلام بتاع صاحبتى وبردو اختلفنا فى النقطة نفسها.. دلوقتى انا عاوزة أعرف الناس بشكل عام شايفين تنظيم القاعدة دا من أى منظور بالضبط ياترى شايفينه على انه"حامى حمى الاسلام" وانه حركة دفاع عن المسلمين وللا شايفين انهم جماعة ارهابية وياترى عندكم أسباب لموافقتكم لسياسات القاعدة أو إعتراضاتكم عليها ؟؟ عندى فضول اعرف لانى لما سمعت رأى صاحبتى ورأى ماما حسيت انى شايفة الموضوع من منظور واحد بس وناسية ان فى وجهات نظر أخرى.. مستنية أعرف أراءكم فى الموضوع دا بقى

١٩‏/٠٢‏/٢٠٠٨

ما بين الحب والموبايل والسعادة

دا خبر صغنن كدا كنت عملته للجريدة من فترة
قلت انزله واسمع الاراء عليه
اولا دا مش تأليفى
هو دا ملخص لدراسة امريكية معمولة مؤخرا عن الحب وأثره على الرجل والمرأة
مش عارفة رأيكوا ايه
عموما الموضوع اهو
.......
.......
الحب يؤثر على المعدة: اعداد باربى جيرل
علاقة الحب بين الرجل والمرأة لا تقتصر فقط على المشاعر الدافئة التى يكنها كل طرف للاخر وانما تعتمد ايضا على الجمال الجسدى.
لذلك تحرص اغلب النساء اللاتى يعشن قصص حب على المحافظة على رشاقتهن ويفضلن تناول الخضروات والفاكهة بشكل كبير.
وذلك على عكس الرجال الذين يأكلون لمجرد اطفاء شهوة الجوع ولا يبالون بنتيجة ذلك وتأثيرة على شكلهم ومظهرهم الخارجى.
فهم يرون ان الخضروات والفاكهة هى غذاء للارانب ولا يعتبر غذاء مشبعا يطفىء جوع اى انسان.فكانت النتيجة أن غذاء المرأة الذى
يتكون فى أغلبه من الخضروات والفاكهة يساعدها على الصبر وتحمل حماقات الرجل مهما فعل .فى حين يحدث العكس مع الرجال
فهم يأكلون حتى تمتلىء بطونهم لدرجة الشبع ولا يكترس الرجل بالاخلاص لمرأة واحدة فى حياته وانما يشعر دائما بشعور متجدد
حيال أى أنثى جديدة يراها.
......................
......................
ودا موضوع تانى كنت مترجماه بردعن علاقة السعادة بعمر الانسان
وادى الموضوع
كشفت دراسة جديدة هذا الاسبوع أن السعادة توجد فى حياة كل إنسان فى بدايتها ونهايتها فقط, فى حين إنها تقل فى منتصف العمر. وقد أجريت هذه الدراسة على مليون شخص من 80 دولة حول العالم بما فيهم الولايات المتحدة. وقد أجرى هذه الدراسة الباحث الاقتصادى أندريو أوسوالد من جامعة وارويك بإنجلترا والباحث ديفيد بلانشفلور من كلية دارتموس, وتتناول هذه الدراسة العلاقة بين العمر والسعادة. وقد أخذ الباحثون فى اعتبارتهم الاسباب التى قد تؤثر على السعادة فى حياة الانسان كالطلاق وفقدان الوظيفة وقلة الدخل. وقد توصل الباحثون عن طريق هذه الدراسة أن السعادة فى الولايات المتحدة تقل وتصل أقل معدلاتها فى عمر الاربعين للسيدات وال 50 للرجال.وفى بريطانيا تصل السعادة لأقل معدلاتها فى سن الاربعين للرجال والسيدات. وقد حيرت هذه النتائج السيد أوسوالد لأنه يرى أن فى منتصف العمر يكون الناس أكثر قدرة على قبول ما يمرون به من صعوبات ولديهم القدرة على التعامل معها.كما يرى أن الناس الذين يضحكون كثيرا يعيشون أكثر من غيرهم وأضاف أن من هم أكبر سناقد تعلموا أن ينظروا الى ما ما فعلوه من ايجابيات فى حياتهم وبالتالى فهم أكثر سعادة من غيرهم.لذلك فهو يرى أ، نتائج هذه الدراسة هى مجرد خرافات. أما السيد ريتشارد إيسترليم الباحث الاقتصادى المهتم بالدراسات الخاصة بالسعادة قال بأن أزمة منتصف العمر هى ليست شيئا محتوما وأضاف أن من ليست لديهم أزمة مادية فى هذه المرحلة العمرية فإنهم يحظون بالكثير من السعادة بل وتصبح هذه الفترة من أسعد أيام حياتهم فإذا كانت الماديات والامور الاسرية تسير بشكل جيد فإنه لا يوجد شىء سىء يؤثر على سعادة الانسان.

...............

...............

ودا موضوع تانى عن الموبايل وانه بيسبب أرق

طبقا لدراسة حديثة أهتمت بالاثار الجانبية الناتجة عن استخدام أجهزة المحمول اتضح أن هذه الاشعاعات تتسبب فى الارق وقلة عدد ساعات النوم. حيث أظهرت هذه الدراسة_التى تمت برعاية شركات المحمول نفسها_ أن استخدام أجهزة المحمول قبل النوم مباشرة يؤدى الى ان الانسان يستغرق وقتا أطول ليتمكن من الاستغراق فى النوم بشكل عميق علاوة على أن عدد ساعات النوم_التى يحتاجها الجسم لأستعادة نشاطه استعدادا لليوم التالى_ تصبح أقل. وتعد هذه الدراسة أكثر إزعاجا بالنسبة لأثرها على الاطفال والمراهقين_الذين يحتاجون لساعات نوم أطول_ حيث توضح أن أغلبهم يستخدمون تليفوناتهم الجوالة ليلا وهو ما يؤثر بشكل سلبى على نومهم. كما أن عدم قدرتهم على النوم لفترة كافية قد يؤدى الى تغيير مزاجهم ويؤدى الى تغييرات فى شخصيتهم.بالأضافة الى ضعف القدرة على التركيز وضعف فى مستوى استيعابهم للمواد الدراسية. وتعد هذه الدراسة_التى قام بها علماء من مؤسسة بلوشيب كارولينسكا وجامعة أوبسالا فى السويد وجامعة واين ستات فى ميشينجان بالولايات المتحدة الامريكية _ هى دراسة شاملة مقارنة بالدراسات التى أجريت من هذا النوع. وقد تولى نشر هذه الدراسة مؤسسة ماساشوسيتتس التى تختص باقامة ندوات متعلقة بتكنولوجيا الابحاث الكهرومغناطيسية.وقد قام منتدى أصحاب مصانع أجهزة المحمول ممثلا شركات المحمول الرئيسية بتمويل هذه الدراسة وقد لاقت هذه الدراسة اهتماما كبيرا من قبل أكبر الخبراء المهتمين بالنوم والذين قال أحدهم "إننا قد توصلنا الان بالادلة القاطعة الى أن إشعاعات أجهزة المحمول تؤثر على النوم العميق" حيث أجرى العلماء هذه الدراسة على حوالى 35 رجلا و36 إمرأة ممن تتراوح أعمارهم ما بين 18 و 45 عاما. فقد تم تعريض البعض لأشعة تماثل الاشعة الناتجة من أجهزة الجوال وتم وضع أخرين فى ظروف مشابهة ولكن دون تعريضهم لأية أشعة على الاطلاق. وكانت نتيجة هذه التجارب أن بعض من تعرضوا لهذه الاشعة استغرقوا وقتا أطول ليستغرقوا فى النوم وقد كانت فترات نومهم قصيرة.وقد أنهى العلماء هذه الدراسة قائلين " قد كشفت الدراسة أنه أثناء التعرض الصورى للأشعة فى المعمل لإشعاعات تبلغ 884 ميجاهرتز فإن المواد التى تتكون داخل الجسم أثناء النوم واللازمة لإعادة النشاط للجسم بعد يوم عمل شاق يتحول تأثيرها ويصبح عكسيا" ولكن أصحاب مصانع أجهزة المحمول اعترضوا على هذه النتائج وأصروا على أن هذه النتائج ليست نتائج حاسمة وقالوا بأن الباحثيين المشاركين بهذه الدراسة لم يعلنوا أن أجهزة المحمول تسبب اضطرابات فى النوم. *ولكن الباحث بينجت أرنيتز_الذى أشرف على الدراسة_ قال"اننا توصلنا أن أجهزة الموبايل تؤثر بالفعل على عملية النوم وذلك من خلال التجارب التى قمنا بها. وهذا يشير الى انه من المحتمل أن تؤثر هذه الاشعاعات على المخ أيضا" ويعتقد أيضا أن هذه الاشعة ربما تسمح بتنشيط الجهاز العصبى وهذا ما يساعد فى جعل الانسان متيقظا لفترات أطول وتزداد نسبة التركيز لديه وهذا ما يقلل لديه القدرة على النوم . فى حين أعتقد بعض من أجريت عليهم هذه التجارب أن لديهم حساسية خاصة للموجات الكهربية وقالوا بأنهم أصيبوا بنوبات صداع وضعف فى القدرة على الاستيعاب ولكنهم لم يستطيعوا أن يحددوا إذا كان ذلك ناتج عن تعرضهم للأشعة اثناء التجارب أم ناتج من استخدامهم لأجهزة المحمول.

.........................
.........................
ياترى رأيكم ايه فى الدراسات دى؟
رأيكم متوافق معها ولا معترضين ولا مش فارقة

١٥‏/٠٢‏/٢٠٠٨

فلانتين بقى وبتاع

بقيت احس فعليا ان المصريين بقوا يستنوا كل لحظة تفرحهم بكل شوق.
ويمكن يكونوا بيعدوا الايام والليالى والثوانى عشان تيجى اى لحظة ولو مدتها دقايق معدودة عشان تفرحهم.
يقولوا حلال يقولوا حرام مبقتش قضيتهم.
المهم ايه اللى يفرحهم.
ويمكن بعدها يقعدوا يسألوا نفسهم:ياترى هيجى يوم تانى قريب يفرحنا؟؟ جميل أوى التعبير عن الحب بهدايا والوان حمرا وقلوب وبلالين وكلام وأغانى
بس الاجمل اننا نحب بعض بجد
ومتتحولش علاقاتنا الى تعبيرات ورموز مادية بحتة عشان ميفقدش الحب جماله
طب ايه اللى هيحصل لو حبيبك او حبيبتك مجبلكش او مجبلكيش هدية فى اليوم دا؟ ايوا يعنى هتتصرفوا ازاى يعنى؟؟ عمرى ما فكرت احتفل بعيد الحب خالص
انا فاكرة موقف طريف كل ما يجى عيد الحب افتكره واقعد اضحك على نفسى
كنت فى سنة اولى فى الجامعة
ومكنتش اعرف ان الحب عاملينله يوم بيحتفلوا بيه وبيلبسوا احمر وبيشتروا هدايا والحاجات دى
وانا من ساعة ما اتولدت بموووت فى اللون الاحمر
فكانت صدفة انى كنت لابسة احمر فى اليوم دا
وطول ما انا ماشية للجامعة لاقية ناس لابسين احمر وماسكين ورد احمر وانا ماشية فى قمة الاذبهلال
ومش عارفة فى ايه
ولما قربت من الجامعة لاقيت ناس كتير بيبيعوا ورد احمر وعليهم زحمة كتييييييييييير
كل دا وانا مش مستوعبة ايه اللى حصل
وبسأل نفسى هو الربيع جه بدرى وللا الناس بقت رومانسية فجأة وللا فى ايه؟
ولما دخلت السكشن بتاعى لاقيت اصحابى بيبصوا للاحمر اللى انا لابساه وبيقولولى ايوا يا عم!!!!!!
وانا مشششششششششششششششششش فاهمة بردوا
بحسبهم معجبين بشياكتى واناقتى كالعادة يعنى :) بس العبط ليه ناسه بقى!!:) المهم فى الاخر قالولى ان اليوم دا عيد الحب وافتكرونى ساعتها مرتبطة بقى وعايشه قصة حب وانا كنت زى الهبلة
مش فاهمة هم بيقولولى كدا ليه
وبعد ما فهمت قعدت افهمهم انى اصلا مكنتش اعرف وبصراحة كان شكلى عبيط اوى
ورجعت البيت بقول لاختى الصغيرة ..الناس كلها لابسة احمر النهاردة
لاقيتها ما شاء الله عليها فاهمة ومش مصابة بالطفولية اللى كانت عندى وقالتلى ايوا النهاردة عيد الحب
ومن ساعتها مبقتش البس احمر فى الفلانتين
حتى بعد ما اتخطبت بطلت الاحمر فى اليوم دا لان حبى لخطيبى مالوش علاقة ولا باحمر ولا بأخضر
احنا كل ايامنا فلانتين..(من غير حسد يعنى..انا عارفة ان فى عيون مدورة شوية) ربنا يجعل ايام الناس كلها حب وورود ودباديب واحمرات واصفرات واخضرات ويارب نقدر نحب نفسنا ونتصالح معها قبل ما نحب غيرنا
لاننا اذا كرهنا نفسنا هنكره غيرنا ومش هيبقى قلبنا فى حب لحد
ياريت كل واحد يقف مع نفسه وقفه ويسأل نفسه اذا كان بيكره حد او بيتمنى زوال الخير من عند حد؟وهل حصل فى
مرة كان قلبه جواه حقد وضغينة على حد وهو مش حاس انه ماشى فى الطريق دا
والله اعرف ناس بتغير من بعض لدرجة انها بتضايق من فرح غيرها..الغيرة ليها درجات..ياريت نفرمل نفسنا قبل ما
توصل الغيرة الى حقد
طب واللى قلبه مليان غيرة وحقد على غيره ازاى يقدر يحب ويقول كلام حلو لشريك حياته
اكيد الكلام دا بيقى كدل ونفاق والحب دا مبيبقاش صادق وربنا مش بيبارك فيه..
حاسة انى دخلت فى نقط كتير جوه بعضها يارب مكونش لخبطكم

١١‏/٠٢‏/٢٠٠٨

أبو تريكة

السلام عليكم بالرغم من انى مبفهمش كتير يعنى فى الكورة بس تابعت كل ماتشات منتخب مصر فى الدورة الافريقية دى .ماعدا ماتش واحد بس وامبارح كان الماتش أكثر من رائع..كنت فرحانة أوى وخاصة لما شفت بعد الماتش لقطات من الشوارع المصرية بعد الماتش مباشرة وفرحتهم والاعلام والاغانى..حسيت ان شعبنا طيب اوى بجد والله شعب مفيش أطيب منه..بيستنى أآ حاجة ولو صغيرة عشان يفرح وينشى همومه ومشاكلة وقسط التلاجة وقسط البوتاجاز وازمة رغيف العيش اللى بقى شبة كحك العيد..الف الف مليون مبروك لمنتخب مصر ولكل المصريين.. عجبنى أوى الجول اللى جابه ابو تريكة بمساعدة زيدان..واستبسال زيدان فى انه يفضل معه الكورة ويشوطها حتى وهو واقع على الارض..عجبنى كمان لعب زكى ..كان جامد جدا..أما عصام الحضرى بقى فدا مشكلة كل لما أشوفه افتكر الاسد أو النمر ما شاء الله عليه ..أحسن واقوى حارس مرمى شفته فى حياتى..بيعجبنى أوى تركيزه وانه عارف الكورة اتجاهها ازاى ويبقى واقف مستنيها..ويمسكها..واللى ضحكنى بجد لما طلع الحضرى فوق الشبكة وقعد يرقص ويطلع لسانه لجماهير الكاميرون..ههههههههههههه..وأحلى حاجة كمان انهم بطول الدورة الافريقية كل لما يجى جول يسجدوا كلهم فى مشهد رائع وامبارح كملن لما سجد معاهم حسن شحاتة ..مشهد جميل اوى..ويهز القلوب الف الف مليون مبروك للمنتخب المصرى الهايل واللى فرح الشعب الغلبان دا.. بجد لو كل واحد عمل اللى عليه وخد باله فى شغله بالشكل دا هنبقى أحسن أمة فى الدنيا..وأنجح ناس على رأى إعلانات موبينيل..بس يا سلام بقى لو تكون الرواتب بالالافات كدا والهدايا بالملايين زى اللاعيبة عشان نعرف نركز كويس فى شغلنا ونعمله بضمير بجد..

٠٩‏/٠٢‏/٢٠٠٨

مستمرة فى التخاريف

السلام عليكم يوم الاربع اللى فات كنت فرحانة جدا جدا جدا..عشان بعد أحلام وأمنيات وكلام من دا يعنى كانت أول مرة يتنشرلى أول موضوع مترجم ليا فى جريدة روزاليوسف..صحيح كان موضوع صغير والمحرر بصراحة ظبتهولى جامد .بس مكانتش فارقة معايا إذا الموضوع صغير ولا مش صغير المهم انى كنت فرحانة مووووووووووووت.مكنتش مصدقة إن إسمى محطوط عليه ومش مصدقة ان دا شغلى. الحمد لله رب العالمين.بجد إحساس جميل أوى. .................................................... .................................................... إمبارح كانت خطوبة بنت خالتو سارة الامورة ..كانت خطوبة جميلة أوى وسارة كانت عاملة شغل جامد هههههههههه.. البنت عندها عشرين سنة وكانت قاعدة تقول بقالى عشرين سنة مستنية اليوم دا ونازلة تصقيف ورقص(بنات لوحدنا يعنى مش اوبن بوفيه)..كأنها معنسة وعندها خمسين سنة ههههههه بجد ضحكتنا كلنا جامد..كانت خطوبة كوميدية جداااا..ربنا يباركلك يا سارة ويزيدك سعادة وفرحة انتى وعريسك يارب..بس مش عارفة كان هيبقى موقفه ايه لو شافك وانتى فى حالة الجنان اللى طلعتيه علينا دا..كان هيتخض وخاصة انك كنتى قدامه زى الملاك البرىء يا عينى ونزلت عليكى الرقة فجأة ههههههههههههههه .................................................... .................................................... إمبارح كانت وفاة الكاتب المحترم مجدى مهنا..ربنا يرحمه ويسكنه الجنة يارب ..بجد موته أثر فيا جامد أوى..كنت بحسه دائما راجل محترم وكنت بحب اتفرج على البرنامج بتاعه على دريم..برنامج "فى الممنوع"..وعموده الرائع فى المصرى اليوم.. بجد هنفتقدك جامد يا أستاذ مجدى..ربنا يرحمك ويرحم كل أموات المسلمين..

٠٥‏/٠٢‏/٢٠٠٨

تخاريف كلاكيت تانى مرة

هل الطبقة العليا الاغنيا يعنى بيشغلوا نفسهم بمشاكل سياسية أو ثقافية او يتكلموا فى مشكلة زى مشكلة فلسطين وغزة ؟؟هل بيخطر على بالهم حكاية قرية القرصاية؟؟هل بيلاحظوا زيادة موضوع الاعتصامات اللى زاد فى مصر وبيزعلوا لما بيسمعوا واحد من اللى بيعملوا اعتصامات دول بيقولوا ان مرتبه 200 جنية ونفسه مرتبه يزيد؟؟ وللا الناس العادية اللى دماغها مش مشغوله بالفلوس هم بس اللى بيقعدوا يفكروا ويشغلوا بالهم بالحاجات دى عشان يلاقوا حاجة تشغلهم ويحسوا انهم مهمين وليهم رأى وكدا؟؟
كنت دائما بقول اننا من الطبقة الوسطى وان طبقتنا دى قربت تنقرض عشان مصر بقى فيها طبقتين بس وهما طبقة الفقراء وطبقة الاغنياء..بس مكنتش متخيلة ان الطبقة الوسطى دى بالفعل انقرضت!!!!!!!!! .......................................................... ........................................................... يمكن يكون ناس كتير بيعتبروا الاخوان المسلمين هم حماة الاسلام وهم اللى لو مسكوا الحكم هيعدوا البلد وينتشر العدل ويكون الحكم اسلامى ونبقى عايشين زى زمن النبى..ويمكن أكون انا مش مقتنعة بأن الاخوان مثاليين زى ما ناس كتير شايفنهم..ودائما بقول ان كلنا مسلمين ومينفعش نقسم نفسنا الى شوية اخوان وشوية مش اخوان..وكل طرف يبص للطرف التانى على ان هو اللى صح والطرف التانى غلط..الاخوان مسلمين زيهم زى أى مسلم..بس بحس انهم رغم اعلانهم انهم مش عاوزين الحكم خالص..انهم بيسعوا للحكم .. لكن الغريب ان تطلع جرايد ومجلات بشكل مستمر وتهاجم الاخوان بحجج وكلام غريب..لدرجة تحسسنى انى زهقانة ومش مصدقه ان كل الحاجات الغريبة دى الاخوان بيعملوها وكأنهم عصابة ارهابية.. ...................................................... ...................................................... لما كنت قاعدة فى البيت كنت فاكرة ان الدنيا صغيورة وسهلة وبسيطة بس لما دخلت الشغل حسيت الدنيا كبييييييرة أوى عليا..والناس مش بالشكل الطيب المثالى اللى كنت فاكراه..طلعوا بيحاربوا فى الدنيا ..بيضحكوا فى وش بعض وممكن يقولوا كلام مش كويس على بعض من ورا بعض ..وبيغيروا من بعض.. رغم انهم بيشتغلوا فى مؤسسة واحدة يعنى المفروض ان كلهم يعملوا مع بعض عشان المؤسسة دى تنجح..بس العكس هو الحاصل..وممكن يغير البعض منهم مبادئه وأفكاره ومعتقداته عشان يرضى شخص واحد رئيسه ويشترى رضاه بكلامه دا.. طب بيكون شكلهم ايه قدام نفسهم بعد لما بيعملوا كدا؟؟