BLOGGER TEMPLATES - TWITTER BACKGROUNDS »

٠٢‏/١١‏/٢٠٠٨

مذهب فضيلة الإمام اللمبي...!؟

والله انا قاعد أكتر من نص ساعة مش عارف أقول إيه أو أكتب إيه يارب أرحمني إيه الغباء والتخلف اللي بقى منتشر في مجتمعنا ده ياساتر يارب قبل ما قلكم اللي حصل ليا طلب عندكم أي حد عندو حديث / فتوى / آية/ كتاب لأي عالم من علماء الدين بيبيح ليه النظر للبنت حتى ولو كانت عارية وبكررها ولو كانت عارية ياريت يتفضل ويمن علينا ويذكروا لينا هنا أي حاجة لأي حد حتى لو كان اللمبي ما عنديش مشكلة ======================================= =======================================
طبعا مش حتلاقوا فأموت وأعرف شباب مصر الجميل الأمور الكتكوت الطعم ده جاب الفتوى دي منين...؟! كنت داخل الصبح بلف على الفيس بوك أعمل دعاية للجروب والبلوج وعشان أعرف وجهات النظر المختلفة للناس في موضوع التحرش وقرأت عجب العجاب والله 98% من اللي قرأته من الولاد بيقولوا أصل أصل البنات هما اللي بيلبسوا ضيق ولبس مستفز يا راجل....!؟ لأ.....تصدق أول مرة آخد بالي يا حيني وإحنا اللي ظالمين الولاد وبنقول عليهم بيتحرشوا بالبنات ليه بقى ظالمنيهم
======================================= =======================================
لأن دينا يبقول إيه البنت المنقبة غض البصر عنها إنما أي بنت تانية بقى بص براحتك والنظرة ب 10 حسنات أقسم بالله العظيم انا ردود الناس خلتني أصدق إن إحنا في في دينا حاجة كده وده أحد الردود - ده واحد بس - من اللي لقتهم على الجروبز عشان تصدقوا كلامي وانا حنقلوا بالنص والله العظيم وربنا عليا شهيد "يعني ايه محدش يعاكس البنت لو قلعت ملط المفروض من واحد مكبوت يعمل ايه و هو شايف حاجة محروم منها" يا حلاوة قزقز لب يا حبيبي حاجة محروم منها إنت مالك البنت لبسة نقاب / حجاب / ضيق / من غير هدوم إنت مأمور بغض البصر في أي حالة في أي مكان في أي زمان فلبس البنت مش مبرر ليك أبدا إن إنته تبص وإلا هات لي دليل من القرآن والسنة ======================================= =======================================
ولا حضرات الشباب اللي بيقولوا كده عندهم حاجة أكبر من ربنا وحاجة أفضل من الرسول عليه الصلاة والسلام بيسمعوا ليها إنت لو عاوز تدعوا لأحتشام البنات وده لازم فده مطلب شرعي وجميل جدا ومجتمعنا فعلا محتاجه إنما تقول أصل البنت لبسة كده فأنا بقلهم حاجة واحدة بس عاوزك كده تكون راجل من ظهر راجل وتيجي كده يوم القيامة وإنته واقف بين قدين ربنا وبتتحاسب والنار بترقص قدامك تقول لربنا لما يسألك عن النظرة المحرمة دي عملتها ليه وليه خدشت أعراض الناس وليه أهنت كرامة بنت مسلمة مهما كان لبسها عاوزك بقى تقول إيه أصل أصل هي كان لبسها مستفز أو تقول أنا كنت بعمل بفتوى فضيلة الإمام اللمبي

7 comments:

barbie girl يقول...

عندك حق يا روك.. بس أنا مكنتش متخيلة ان فى ناس شريرين بالشكل دا

princess يقول...

بجد هو لسه فى ناس بتفكر سورى فى اللفظ يعنى بالغباء ده
ربنا يشفى يارب
ويارب كل اللى بيعمل كده يتردله فى يوم من الايام
حاجة تحرق الدم

The Rock يقول...

لا والله ياباربي فيه

وفيه أشر من كده كمان

بس ماتخفيش

انا سوبر هيرو - هههههه- وحكون دايما موجود معاكي إن شاء الله.

=============================
=============================

برنسس

برضه والله في ناس بالغباء والجهل ده

لسه موجودين وما نقرضوش

وآميييييييييييييييييييييين

وبقولها والله من كل قلبي

على الدعاء اللي دعتيه

يارب اللي يأذي بنات الناس ويهين أعراضهم

يارب تتردله عشان يتحرق دمه ويتهان

زي ما أهان وحرق دم الناس التانية

AHMED SAMIR يقول...

طب علشان الصدمة تكتمل
ياريت تقوللي رأيك في البوست دة
البوست بتاعي على فكرة
http://theegyptiansilentmajority.blogspot.com/
على فكرة
لبس البنات وطريقتهم في المشي والكلام ليها عامل مؤثر جدا في موضوع التحرش والمعاكسات دة
ولو انكرنا كدة نبقى مش موضوعيين
تحياتي

barbie girl يقول...

أستاذ سمير:

أنا مش قادرة أفهم أنت إزاى متعاطف مع البنى أدم دا.. وإزاى بتقول إن العقوبة قاسية.. قاسية ايه بس وبتاع ايه.. فى ايه؟؟!! لو مراتك حد مسكها من صدرها كدا كنت هتقول ساعتها إن الحكومة قاسية عليه ولا كنت هتاكله بسنانك؟؟ ثانى حاجة لو كل البلد فيها حرامية وجم فجأة حكموا على حرامى منهم بالحبس هنقول ساعتها دا حرام وظلم وحكم قاسى جدا زى ما حضرتك قلت وللا هنقول لما باقى الحرامية يشوفوا واحد اتحبس هيخافوا ومش هيسرقوا تانى ولو استمروا فى السرقة يبقى يستاهلوا الحكم بالحبس زى الحرامى الاول..

اللى اسمه شريف دا ميفرقش حاجة عن أى حرامى بياخد حاجة مش بتاعته.. وأما حكاية بقى إنه معهوش فلوس يتجوز فمفيش أى دين فى الدنيا بيقول إن اللى مش قادر يتجوز يتحرش ببنات الناس أو يتفرج على كليبات قذرة كل هدفها إثارة الشباب.. رسولنا بيقول " من استطاع منكم الباءة فليتزوج ومن لم يستطع فعليه بالصيام" صدق رسول الله .. طيب مش هيصوم طول عمره ماشى لكن يبعد عينه عن المثيرات وميلقيش بغلطاته على غيره ويستحل حرمات الناس.

The Rock يقول...

A.SAMIR

أنا رديت عند حضرتك في البلوج

ورأي متفق تماما مع باربي

وحعيد نفس السؤال تاني

لكل من يتعاطف مع الشخص اللي تحرش بنهى

حاتعمل إيه لو الراجل ده أو غيره

مد إيده

ومسك صدر والدتك أو أختك أو مراتك

قدام عينك

ياترى حتتصرف إزاي وتعمل فيه

إيه...........؟

Rosa يقول...

لا فض فوك معنديش حاجة أكتر من كدا أقدر أقولها لك