BLOGGER TEMPLATES - TWITTER BACKGROUNDS »

٢٠‏/١١‏/٢٠٠٨

أنت بطل وللا شخصية ثانوية؟؟

مش عارفة إذا الموضوع دا بينطبق على الناس كلها وللا عليا أنا لوحدى؟! أنا لاحظت فيا حاجة غريبة..
وهى إنى بشوف نفسى البطلة..
طبعا مش البطلة فى الحياة..
لكن فى كتير من الاحيان اللى بشوف فيها فيلم مثلا أو مسلسل بشفوف نفسى فى شخصية البطلة..
بصراحة أنا مش عارفة ليه؟
انا فاكرة إن وانا صغيرة لما كنت بسمع المذيعة بتقول مثلا ان هيجى فيلم معين بطولة فلان وفلانة ..
كنت مش فاهمة ليه المذيعة بتقول ان الفيلم دا بطولة الاتنين او الثلاثة دول وبس مع ان الفيلم بيمثل فيه ممثلون كثر..
ولما سألت ماما ساعتها قالتلى البطل هو الى بيكمل الطريق للاخر او بيكمل القصة لاخرها واللى بيتدور حوله كل الاحداث..
ويمكن عشان البطل او البطلة بيكونوا مجمعين فيهم صفات مثالية وحلوة كتير..
الاكيد انى مش فيا كل الصفات الحلوة اللى بتبقى دائما فى البطلات لكنى برده بشوفنى فى البطلة..
يعنى مشفتش نفسى قبل كدا فى شخصية ثانوية..
ممكن اختار صفة معينة موجودة فى شخصية ثانوية واقول دى فيا لكن الغالب ان البطولة بتكون من نصيبى..
ياترى فى حد كدا وللا أنا بس اللى كدا.. وحالتى خطيرة وللا ايه؟؟ ............................................... ............................................... حاجة غريبة كمان مش فاهماها ممكن تكون انت بتحب أكلة معينة واخوك مبيحبهاش واختك بتحبها وصاحبك مبيحبهاش ومامتك بتحبها وهكذا..
طب ازاى نفس الاكلة اللى ليها نفسى الطعم اللى مبيتغيرش وانسان يلاقى ان طعمها عاجبه وانسان تانى يلاقى ان طعمها نفسها مش عاجبه.. ................................................ ................................................ كلنا بنقول الزمن بيتغير وصفاتنا بتتغير وشخصيتنا بتتطور لكن بلاقى فيا بردو حاجة غريبة بتحصل وهى انى زمان كنت بحب حاجات معينة ودلوقتى بقيت مبحبش نفس الحاجاتاللى كنت بحبها زمان يعنى مثلاً زمان كنت بحب البس اللون الاسود.. دلوقتى بكره جدا اللون الاسود مع انه لون شيك وموضته مبتنتهيش أبدا.. بس بقيت اتخنق لما البسه!! زمان كنت بموت فى انى أشرب السحلب ويا سلام لما يبقى عليه مكسرات كان بيعجبنى جداً ودلوقتى مبحبهوش مش عارفة ليه !! زمان مكنتش بحب الكاكاو ودلوقتى بموت فى الكاكاو !! زمان كنت بحب الكشرى ودلوقتى بقى لو حد حابب يضايقنى يأكلنى الكشرى دا !! زمان كنت بأسمع كلام ماما وبابا من غير تفكير .. دلوقتى طبعا مفيش الكلام دا.. مش معناها انى بقيت فظيعة لكن بقيت افكر واختار اللى انا عايزاه مش اللى هم عايزينه!! زمان كنت عصبية بغباء ودلوقتى بقيت شوية اتحكم فى اعصابى لدرجة معينة ومش أى حاجة اتنرفز منها !! زمان كنت فاكرة ان الصداقة شىء ودلوقتى بقت الصداقة شىء تانى عندى!!

زمان كان ليا ستايل لبس معين ودلوقتى ستايل لبس تانى!!

ياترى حد تانى كدا وللا انا برده غريبة؟؟

7 comments:

أحمد المسلم يقول...

السلام عليكم ورحمة الله وبركاته .

يمكن القول أن كل واحد فينا يعيش في مسلسل حياته وهو البطل فكل الأحداث تدور حول حياته هو .

الناس لهم أذواق مختلفة وطبائع مختلفة ، فكل شعب يختلف عن الآخر وكل قبيلة تختلف عن الأخرى وفي الأسرة نجد أن كل فرد فيها يتميز بأمور ليست في الآخر ويحب ويكره أشياء ليس كما الآخر وهكذا ، فالله خلقنا مختلفين .

الزمن لا يتغير ولكننا نحن من يتغير ، فنحن نتغير في أفكارنا ومعتقداتنا ، فليس بغريب أن تحبين اليوم شيئا وغدا تكرهين نفس الشيء ، فكلنا هكذا نتغير دوما ، حتى وإن بدونا ثابتين لا نتغير !! .

كنت في الماضي طفلة ، وأنت الآن شابة قد لامست من النضج بعضه لذا ترين في نفسك شيئا من الإنضباط والهدوء وليس هذا بغير فالزمن يمر والإنسان يتغير وستظلين تتغيرين مادمت تعيشين في ذلك العالم وكل ما حولك سيتغير أيضا ، والسلام ختام .

barbie girl يقول...

احمد المسلم:

يمكن يكون حضرتك عندك حق فى تفسير الحاجات اللى شفتها من وجهة نظرى غريبة.. وشكرا لتشريفك للمدونة

princess يقول...

كلنا كده متقلقيش مش عارفة ليه بقينا بنتغير بس هقولك على حاجة مهما تتغيرى بلرده الفيرم الاساسى هوا هوا يعنى باربى هيا باربى اللى بيتغير التفاصيل:)
تحياتى

safa7_karmooz يقول...

اصل صوابع ايدك ولا رجلك مش زى بعضها ....نفس الشىء بينطبق على حياتك...لازم كل مرة حاجه هتتغير ...انا زمان من سن سنيتن كنت ببلع حبوب الدوا مهما كان حجمها

دلوقتى مبقتش اعرف ابلعها...

بس مش شايف ان ده ليه علاقة بأنك بطلة حياتك ولا مجرد كومبارس...

انا ساعات بحب ابقى كومبارس مجرد كسل...بس كل مرة الكومبارس ده بيخلى ناس كتير تيجى عليا فبفوق متاخر جدا...

بس الفترة اللى فاتت الحمد الله بطل حياتىورفضت دور الكومبارس اللى مكنش لايق عليا اصلا...مش مهم انك بطلة ولا لاء...المهم تعرفى تتعايشى مع كده ومش ترجعى فى القرار ده ابدا

كلامى ملخبط..انا عارف ^_^

barbie girl يقول...

مشمش:

انت دمجت نقطتين مختلفتين مع بعض

safa7_karmooz يقول...

منا حسيت بكده برضه ^_^

Rosa يقول...

كل الناس كدا مفيش حاجة ثابنة في الحياة و الواقع الوحيد و الأكيد ان الشئ الوحيد الثابت في الحياة هو التغيير.

طبيعة الأمور اننا دائما نتغير و أذواقنا و ميولنا تتبدل فما تقلقيش على نفسك يا حبيبتي كلنا في الهواء سوا و بالذات حواء