BLOGGER TEMPLATES - TWITTER BACKGROUNDS »

٢٨‏/٠٢‏/٢٠٠٩

الصبر من أعظم النعم

الصبر.. الحل الوحيد هو الصبر.. والجميل انه من عند ربنا يعنى مبنشتريهوش بفلوس .. بس كل اللى محتاجينه هو اننا نتجه لربنا ونقوله يارب الصبر من عندك يارب .. لو مكانش الصبر دا ربنا خلقه والله كان زمان ناس كتير فرقعت وانتحرت واتجننت.. الحمد لله على نعمة الصبر

قال تعالى: (إِنَّمَا يُوَفَّى الصَّابِرُونَ أجْرَهُم بِغَيْرِ حِسَاب)

٢٣‏/٠٢‏/٢٠٠٩

ارهاب بالحسين يعنى terrorism

امبارح حصلت انفجارات فى الحسين وماتت واحدة فرنسية واتصاب حوالى 17.. افتكرت ايام زمان فى اول التسعينات لما كانت على طول بتحصل اعمال ارهابية .. لكن ازاى تعدى سنة دلوقتى على مصر من غير كوارث.. لازم يطلعلنا حد مخه ضارب يفرقع ويعمل شوية قلبان فى البلد.. نفسى أعرف البنى ادم اللى عمل كدا دا كان مخه فى ايه.. ازاى يجيله قلب يقتل ناس أبرياء ملهمش اى ذنب فى اللى حصلهم دا وحتى لو ليهم ذنب وحتى لو كانوا من الكفار ايام ابو جهل ليه الواحد ده يعين نفسه حاكم و يحكم عليهم بالقتل.. دا أكيد حد مش طبيعى من اللى فاكرين نفسهم فى جهاد مع الغرب.. وللا تلاقيه من اللى ليهم افكار غريبة وبيقولوا ان السياحة حرام فحلل قتل الناس بالباطل.. فى الاول انا قلت ممكن يكون شاب من اللى بيعانه من البطالة وجاله اكتئاب فعمل كدا.. بس عقلى مش راضى يقبل المنطق دا ان واحد عشان زهقان فى حياته يقوم قاتله شوية اجانب.. محدش عنده دين وقلب وضمير ممكن يعمل كدا

٢٢‏/٠٢‏/٢٠٠٩

أيام وبنعيشها

الايام كلها بتعدى بس فى أيام بتعدى كأنها ثوانى وفى أيام بتعدى كأنها شهور وسنين

٢١‏/٠٢‏/٢٠٠٩

You are my sun

أنت شمسى

٢٠‏/٠٢‏/٢٠٠٩

bored

مش عارفة زهقانة وللا ملانة ولا كسلانة

١٨‏/٠٢‏/٢٠٠٩

الرجل والساطور

مش عارفة اذا الموضوع دا حاجة جديدة وللا حاجة كانت موجودة من زمان بس مستخبية.. الموضوع بدأت اخد بالى منه من ساعة ما بدأ الحديث عن الازمة المالية والناس اللى بتخسر فى البورصة .. من ساعتها بقينا نسمع ان كل كام يوم واحد خسر فلوسه فى البورصة .. جاله اكتئاب قام راجع بيته ودابح مراته وولاده وبعدين ينتحر.. مكانتش قصة وللا اتنين دول قصص كتيييير..وبعد كدا تقريباً الازواج والزوجات عجبتهم حكاية القتل .. بقيت أشوف بالجرايد جرايم قتل بالهبل.. الزوج الفلانى قتل الست مراته عشان اصله كان مخنوق منها من زمان وكانت بتعامله وحش فنفسه اتفتحت على القتل واتشجع كدا من كتر ما شاء الله ما سمع عن الرجالة اللى زيه واللى قدروا يتخلصوا من عذابات مراتتهم بالقتل .. وكأن القتل بقى حاجة عادية وبسيطة ومفيش اى حل لأى مشكلة بين الراجل ومراته غير القتل.. زمان كان فى فيلم اسمه المرأة والساطور بس الظاهر احنا دلوقتى بقينا محتاجين لفيلم جديد اسمه الرجل والساطور عشان تبقى لايقة شوية على أحداث قتل الازواج لزوجاتهم اليومين دول.. زمااااااااان كانت الستات بيخوفوا أزواجهم وبيقولولهم لو زعلتونا هتكون نهايتكم فى اكياس سودا بس الستات كانوا شجعان بعد لما بيقتلوا بيعترفوا ويفتخروا بكدا :) لكن دلوقتى بقى الرجالة يقتلوا ويقوموا قاتلين نفسهم ورا مراتتهم على طول او يهربوا يعنى بس الواضح انهم مش بشجاعة الستات اللى بيقتلوا .. حتى فى دى كمان الستات متفوقات عليهم.. دى كام حادثة قتل ازواج لزوجاتهم والعكس لاقيتهم فى الكام يوم اللى فاتوا

1_

قاتل زوجته فى مدينة نصر يعترف بضربها وتقييدها بـ «جنزير» لرفضها الإفصاح عن «شخص» حدّثها فى «الموبايل»

http://www.almasry-alyoum.com/article2.aspx?ArticleID=199269&IssueID=1318

2_حبس المتهم بقتل زوجته فى إمبابة بعد ضبطه فى فندق بالإسكندرية ١٦/ ٢/ ٢٠٠٩

http://www.almasry-alyoum.com/article2.aspx?ArticleID=199272&IssueID=1318

3_حبس المتهمة بقتل زوجها فى أكتوبر بعد اعترافها

3_http://www.almasry-alyoum.com/article2.aspx?ArticleID=198975&IssueID=1316

١٥‏/٠٢‏/٢٠٠٩

شتاء من غير مطر.. طب ازاى!!

اللى أعرفه إن الشتاء يعنى الجو برد وفى مطر ورعد وبرق بس اللى ملاحظاه ان الشتا السنة دى غريبة بجد مفيش برد ولا مطر ولا رعد وبرق ولا كلام من دا انا بحب جو المطر دا جداااااااااااااااااً بحس انه جو رومانسى والجو بتكون رائحته حلو كدا وغريبة وياسلام كمان لما تكون مشغل موسيقى هادية الله يارب تمطر بقى

١٤‏/٠٢‏/٢٠٠٩

حب من غير فلانتين

عارفة ان فى ناس كتير بتحب تحتفل بالفلانتين.. وأنا من عادتى مبحبش أرخم على حد.. ومبحبش أجى فى الفلانتين وأقعد أقول حرام وحلال والكلام دا.. بقول أنا عارفة أنه مينفعش نحتفل بيه بس كل واحد حر ..غالباً اللى بيحتفلوا بيه الشباب والبنات المرتبطين فى الجامعة بالذات.. أنا كاتبه الموضوع عشان أقول كام نقطة كدا خفيفة.. أولاً إن الحب حاجة جميلة وطاهرة فبلاش نلوثها ونستعملها غلط .. ثانياً بلاش نسمى العلاقات المحرمة حب.. ثالثاً بلاش نسمى الصحوبية بين الولاد والبنات حب.. رابعاً بلاش نخلى الحب مقتصر فى تيشرت أحمر ودبدوب أحمر خامساً بلاش نبوظ أجمل نعمه ربنا أنعم بيها عليها ونستعملها بشكل حرام _ حب الناس و حب نفسك ... صعب ان حد يحب الناس و هو مش حابب نفسه..أحب نفسي يعنى أحب اختيار الله فيا... _دى بعض النصائح اللى قالها مصطفى حسنى امبارح بالبرنامج: دي بعض الوصايا اللي ممكن تخليك تحب و تتحب: لا تسيئ الظن بالناس.. افتح سجن سوء الظن ... و انطلق بين الناس بالحب والتسامحو انت تتحدث أشكر من أمامك و اذكر اسمه القول اللين... اختار الكلمات الجميلة الرقيقة و أنت تتحدث مع الناساياك و الغضباياك و السخرية والنقد : لانها تجعل من معك لا يشعر بالأمان أثناء و جودك.. ....حب كل شئ... حب أهلك و حب الناس و حب نفسك...عيش في سلام مع نفسك... أرض بما اختاره الله لك... ولا تنتظر مقابلا من أحد

١٣‏/٠٢‏/٢٠٠٩

اتقابلنا بعد سنين

إمبارح كان يوم حلو اوى لأتى قضيته مع صحباتى القدام.. بقالنا سنين مشفناش بعض قضينا اليوم كله سوا.. ضحك وهزار وتريقة وأكل.. وحكاوى كتيييييير..بجد كان يوم جميل .. مش عارفة ياترى هنشوف بعض بعد أد ايه تانى؟؟؟

٠٥‏/٠٢‏/٢٠٠٩

ربع جنية وتليفزيون

خبر قرأته الصبح على المصرى اليوم مش عارفة إذا هيكون بيهم حد وللا لاءة بس الخبر بعنوان " صرة من الدنانير" ومحتواه بيتكلم عن ان يوم 15 فبراير هيكون اخر يوم للتعامل بالربع جنية والنص جنية الورق بمصر.. يعنى اللى معه عملات من النوع دا يتخلص منهم بأسرع وقت ممكن!

خبر تانى قرأته فى جريدة دى فيلت الالمانية عن الممثلة أنجيلينا جولى وعن رغبتها الملحة فى انها تنجب طفلاً أخر فى أقرب وقت ممكن .. وللى مش عارف يعنى ان أنجيلينا عندها أربعة أطفال بالتبنى وطفلين توأم لسة جايين للدنيا فى شهر سبعة اللى فات.. يعنى كدا الست أنجيلينا عندها ستة أطفال اللهم لا حسد وكانت مصرة جداً انها تبقى حامل فى الوقت الحالى لكن الدكاترة قالولها لازم ترتاح سنة على الاقل قبل انجاب طفل جديد.. قارنوا حالتها بحال مصر اللى بتدعو الجميع لعدم انجاب أكثر من طفلين وواجعين دماغنا بالزيادة السكانية وهم هناك عندهم أزمة مالية مطلعة عنيهم لكن ما شاء الله شغالين الله ينور بالستة والسبعة ومع ذلك مبيعانوش من أزمة سكانية!!

!!!

خبر تالت بقى قرأته برده فى المصرى اليوم بس موتنى من الضحك.. الخبر بيقول انك لازم تغير تليفزيونك خلال ست سنوات وتجيب تليفزيون جديد حتى لو كنت لسة شارية دلوقتى.. تفتكروا ليه؟! عشان سعادتك تقدر تشوف القنوات الارضية المصرية !! يا سلام إذا الناس بيشتروا دش عشان يهربوا من تخلف القنوات الارضية.. سؤال كدا على ماشى: هو لسة فى حد بيتفرج على القنوات الارضية أصلاً؟؟