أوقـــــات فـــــراغ

مجلسنا الموقر ارحل يعنى امشى

2011-11-19T19:01:00.003+02:00

المجلس قعد واترستأ على الكرسى ولزق وسايب البلد تولع.. وادى المجلس اللى قال انه حمى الثورة ادى البلد بتقولك يا مجلسنا فارق بقى وسبنا نعيش بحرية احنا بلد ناسها طيبين ونستاهل نجرب الحرية.. اللى يضحك ويبكى فى نفس الوقت ان حزب النور بأعضاءه اترشقوا امبارح فى الميدان وانهارده محدش شايف وشهم لما بدأ الضرب..طبعاً قاعدين متدفيين فى بيوتهم وبيتابعوا من بعيد لبعيد وقاعدين ينزلوا تصريحات ان الشباب لازم ينزل ويشارك وهم قاعدين مستخبيين فى بيوتهم..طم متنزلوا يا سلفيين واتضربوا مع الشباب البسيط اللى اتطحنوا من الضرب.

ربى

2011-09-16T17:40:00.001+02:00

« قُلِ اللَّهُمَّ مَالِكَ المُلْكِ تُؤْتِي المُلْكَ مَنْ تَشَاءُ وَتَنْزِعُ المُلْكَ مِمَّنْ تَشَاءُ وَتُعِزُّ مَنْ تَشَاءُ وَتُذِلُّ مَنْ تَشَاءُ بِيَدِكَ الْخَيْرُ إِنَّكَ عَلى كُلِّ شَيْءٍ قَدِيرٌ .. تولِجُ اللَّيْلَ في النَّهَارِ وَتولِجُ النَّهَارَ في اللَّيْلِ وَتُخْرِجُ الْحَيَّ مِنَ المَيِّتِ وَتُخْرِجُ المَيِّتَ مِنَ الحَيِّ وَتَرْزِقُ مَنْ تَشَاءُ بِغَيْرِ حِسَابٍ رَحْمنَ الدُّنْيَا وَالآخِرَةِ وَرِحِيمَهُمَا تُعْطِي مَنْ تَشَاءُ مِنْهَا وَتَمْنَعُ مَنْ تَشَاءُ ، ارْحَمْني رَحْمَةً تُغْنِيني بِهَا عَنْ رَحْمَةِ مَنْ سِوَاكَ » أخرجه الطبراني عن معاذ رضي الله عنه

يشترى ود من يظلمه

2011-09-12T21:53:00.002+02:00

ماذا تقول لمن يشترى ود من يظلمه ولا يشترى ود من يحسن اليه ويتودد اليه؟ هل انا لما اتضايق لما اشوف كدا ابقى شريرة؟

بتحس بطعم الاكل؟؟

2011-09-09T15:40:00.003+02:00

هل بتستمتع بطعم الاكل ولو فى اى تغيير بسيط فى طعمه بتحسه ولا بتحدف الاكل على زورك على طول من غير ما تحس بالطعم واهو المهم المعدة تتملى وخلاص:) ؟؟ وهل شكل الاكل بيفرق فى فتح الشهية وللا مش مهم؟

سبحانك

2011-09-07T15:15:00.002+02:00

لا اله الا انت سبحانك انى كنت من الظالمين

ما هو دور الاباء فى حياة الابناء؟

2011-09-06T19:26:00.003+02:00

الاطفال زى جهاز الكمبيوتر الفاضى..غلط جدا لو تخيلنا انهم مولودين وعارفين الصح والغلط لوحدهم..غلط ردو لو عاملناهم عقلنا اللى يتوقع منهم تصرفات يعملوها ونعاقبهم لما نلاقيهم يعملوا عكس هذه التصرفات اللى توقعناها فقط..اعرف اسرة الام والا فيها معتقدين ان الترية هى انهم يأكلوا ويشربوا ولادهم وس وكدا فاكرين انهم يربووووا ولادهم.. هم معتقدين ان الولاد من نفسهم عارفين الصح والغلط والحلال والحرام..فاكرين ان الولاد من نفسهم متعلمين زوقيات التعامل واحترام الكبير والعطف على الصغير..فاكرين ان الولاد من نفسهم عارفين ان الصلاة فرض من ربنا ومسئولين لوحدهم عن نفسهم..مبيقولوش كلمة عيب او حلال او حرام واو صح او غلط لولادهم بدعوى ان الولاد المفروض انهم عارفين الصح من الغلط لوحدهم .. انا مش عارفة هو دا عدم معرفة من الاباء بدورهم فى حياة اولادهم وللا دا عدم رغبة فى تحمل المسئولية تجاه الاولاد ؟؟

قصة الثلاثة الذين اووا الى الغار"الدعاء"

2011-09-06T04:58:00.000+02:00

قصة الثلاثة الذين أووا الى الغار

قال الإمام البخاري : حدثنا إسماعيل بن خليل أخبرنا علي بن مسهر عن عبيد الله بن عمر عن نافع عن ابن عمر أن رسول الله صلى الله عليه وسلم قال: « انطلق ثلاثة نفر ممن كان قبلكم حتى آواهم المبيت إلى غار فدخلوه ، فانحدرت صخرة من الجبل فسدت عليهم الغار ، فقالوا : إنه لا ينجيكم من هذه الصخرة إلا أن تدعوا الله بصالح أعمالكم . فقال رجل منهم : اللَّهم كان لي أبوان شيخان كبيران ، وكنت لا أغبق قبلهما أهلا ولا مالاً ( أي : لا أقدم في الشرب قبلهما أحداً ) ، فنأى بي طلب الشجر يوماً فلم أرح عليهما حتى ناما ، فجلبت لهما غبوقهما فوجدتهما نائمين ، فكرهت أن أوقظهما وأن أغبق قبلهما أهلاً أو مالاً فلبثت والقدح على يدي أنتظر استيقاظهما حتى برق الفجر والصبية يتضاغون عند قدمي ( أي يصيحون من الجوع ) ، فاستيقظا فشربا غبوقهما . اللَّهم إن كنت فعلت ذلك ابتغاء وجهك فافرج عنا ما نحن فيه من هذه الصخرة ، فانفرجت شيئاً لا يستطيعون الخروج منه . فقال الآخر : اللَّهم إنه كانت لي ابنة عم كانت أحب الناس إليَّ ، وفي رواية : كنت أحبها كأشد ما يحب الرجال النساء ، فأردتها على نفسها فامتنعت ، حتى ألمت بها سنة من السنين فجائتني فاعطيتها عشرين ومائة دينار على أن تخلي بيني وبين نفسها ففعلت ، حتى أذا قدرت عليها وفي رواية فلما قعدت بين رجليها قالت : اتق الله ولا تفضن الخاتم إلا بحقه ، فانصرفت عنها وهي أحب الناس إليَّ وتركت الذهب الذي أعطيتها . اللَّهم إن كنت فعلت ذلك ابتغاء وجهك فافرج عنا ما نحن فيه ، فانفرجت الصخرة غير أنهم لا يستطيعون الخروج . وقال الثالث : اللَّهم إني استأجرت أُجراء وأعطيتهم أجرهم ، غير رجل واحد ، ترك الذي له وذهب فثمرت أجره حتى كثرت منه الأموال ، فجاءني بعد حين فقال : يا عبدَ الله أدِّ إليّ أجري ، فقلت : كل ما ترى من أجرك من الإبل والبقر والغنم والرقيق فقال : يا عبدَ الله لا تستهـزئ بي ! فقلت : لا أستهزئ بك ، فأخذه كله فاستقاه فلم يترك منه شيئاً . اللَّهم إن كنت فعلت ذلك ابتغاء وجهك فافرج عنا ما نحن فيه ، فانفرجت الصخرة فخرجوا يمشون » . صحيح البخاري (10/415) ، صحيح مسلم (4/1982)

الحياة بتعلمك ايه؟

2011-09-05T21:51:00.004+02:00

البيبى بيتولد طفل طاهر برىء نقى..معملش اى حاجة شريرة فى الحياة ازاى يفضل نفس الطفل النقى دا زى ما هو ببراءته رغم ان الحياة اللى احنا عايشنها بتعلم الواحد انه يتخلى احيانا_ قد يكون كثيرا او قليلا_ عن هذا النقاء الفطرى الطفولى؟

يعنى ايه معلش؟

2011-08-18T20:06:00.001+02:00

يعنى ايه معلش؟

اللهم ارزقنا خير رمضان

2011-08-14T19:42:00.000+02:00

مضى نصف شهر رمضان بما يحمله من خيرات ورحمات وغفران.نسأل الله ان يعيننا على اغتنام ما بقى بهذا الشهر المبارك و ان يرزقنا حسن العبادة وقراءة وختم وفهم القران الكريم وتدبر اياته.اللهم اعنا على قيام ليله وصيام نهاره.اللهم اجعل دعواتنا مقبولة .اللهم انزل علينا رحماتك وغفرانك واجعلنا من عتقائك من النار يارب العالمين.

خسارة يا جمهور الزمالك

2011-04-03T08:36:00.002+02:00

طب سيبونا نفرح بالثورة شوية يا جمهور الزمالك.. هى دى روح الديمقراطية بالنسبة لكم تكسير وضرب وتخريب ..خليتوا شكل المصريين زبالة قدام العالم

مصر جديدة

2011-03-21T01:10:00.002+02:00

فخورة انى مصرية

ارهاب اسكندرية

2011-01-02T15:34:00.002+02:00

غبى من يعتقد ان وراء الانفجار الذى حصل ليلة رأس السنة مسلمين..مستحيل حد مسلم يفكر يقتل ناس مالهمش اى ذنب لكن ذنبهم الوحيد هو تواجدهم فى الشارع الساعة 12 صباحا ..ديننا بيقول "لكم دينكم ولى دين" والمستفيد الوحيد من اللى حصل دول همهم الوحيد اشعال فتنة طائفية لنصبح زينا زى لبنان والعراق ودول كتير غير مستقرة داخلياَ.وكأنهم عاوزين يفهمونا ان المسلمين فجأة ادركوا ان عايش معاهم أقباط فى مصر..هو يعنى احنا مكانش عندنا جيران مسيحين واصحاب فى المدارس والجامعات مسيحيين ومدرسيننا فى المدارس مكانش فيهم مسيحيين.. مش عارفة ليه مصريين ان فى كره شديد متبادل بين المسلمين والمسيحين..

عالم برىء

2010-12-20T22:56:00.002+02:00

عالم برىء ..مفيهوش زيف ولا حقد ولا حسد ولا غيرة ولا كراهية ولا طمع..عالم الاطفال ..ياريت كان العالم كله اطفال فى اطفال

مينفعش تشوف نفسك قليل

2010-12-16T16:06:00.003+02:00

جميل ان الواحد يراعى الاخرين لكن الاجمل انه ميقللش من نفسه ابداً لان اللى بيشوف نفسه قليل الناس كمان بيفضلوا شايفنه دائماً قليل

اصول المعاصى

2010-12-13T15:07:00.000+02:00

أصول المعاصي ثلاثة. منها: الصحبة غير الصالحة (وعلاجها بقرار إنك تختار أصحابك صح). اللهم ارزقنا الصحبة الصالحة والحقنا بالصالحين ومنها تملّك شهوة منك، وعلاجها كثرة ذكر الله. لا إله إلا الله سيدنا محمد رسول الله ومنها نسيان المُنعم. وعلاجها التدريب على رؤية صفات الله في كل شيء حولنا. يا ربنا لك الحمد كما ينبغي لجلال وجهك وعظيم سلطانك

ربنا يرحمك يا حبيبتى

2010-12-10T19:31:00.003+02:00

عارفة ان الموت امر واقع واقع لا محالة.. نفسى مخافش منه.. لكن انا مش بس بخاف منه انا بترعب منه..بخاف اتحط فى مترين قماش تحت الارض لوحدى ومش معايا حد .. حاساه اصعب شىء فى الوجود.. سكون ووحدة ودود بياكل فى الجسم لحد ما يتحول لشوية عظم مرميين على الارض لحد ما يتحللوا.. سبحانك ياربى يا مالك الملك.. ربنا يرحمك يا جدتى ويجعل مسواك الجنة ..انت معملتيش حاجة وحشة فى حياتك عيشتى طيبة وفى حالك ..كنتى فرحانة بيا السنة اللى فاتت فى يوم فرحى وقعدتى تغنيلى رغم تعبك .. كانت ماما وانا صغيرة بتسبنى معاكى وتروح الشغل لدرجة انى افتكرتك فى يوم من الايام ماما..لسة كنت باتكلم معاكى وبنهزر سوا من عشرة ايام وكنتى بتحكيلى على حلم جميل حلمتيه ليا.. ودلوقتى بقيتى تحت التراب..بحبك اوى اوى.. ربنا يرحمك يارب

17 نوفمبر 2010

2010-11-21T14:18:00.001+02:00

اول عيد جواز لينا بنحتفل بيه مع احلى بنوتة كل سنة وانت طيب يا حبيبى

عيد سعيد يا يوكى

2010-11-14T13:10:00.004+02:00

العيد اللى فات كنت عاملة زى البطيخة..مكنتش عارفة البس هدوم شيك تليق بالعيد وكنت بحقد عليهم كلهم هنا فى البيت عشان لابسين براحتهم هدوم حلوة ..فى العيد اللى فات كانت يارا فى بطنى وكنت مقضياها نووووم..لكن العيد دا ان شاء الله هفضيه مع احلى بنوتة فى الدنيا..هتصحينى على وأوأتها العسولة النونو ونلبس جديد سوا سوا ونغنى اهلا اهلا بالعيد ونلعب بالبلالين سوا سوا.. يارب اجعله احلى عيد مع احلى يارا فى الدنيا..كل سنة وانتو طيبين جميعا ويارب الكل يكون سعيد ومزقطط فى العيد ويارب كل اسرة تكون متجمعة ومفيش حد منهم يبقى بعيد..عيد سعيد عليكم يارب:)

بنوتى الحلوة

2010-10-16T01:59:00.004+02:00

الحمد لله بقيت ماما بقالى شهر تقريبا..احساس كنت باتمناه من ربنا من زمان والحمد لله ربنا رزقنى به.. بنوتى الحلوة خليتنى نفسى أرجع بيبى..ماما تنيمنى على رجلها.. وتدلعنى وتلاعبنى .. بنوتى الحلوة خليتنى نفسى اعرف لما بتنام بتحلم بإيه؟؟ ولما بتسكت بتفكر فى ايه؟؟ بنوتى الحلوة خليتنى احس انى بحب الحياة عشان هى موجودة فيها.. خليتنى احس ان ليا لازمة فى الوجود.. بنوتى الحلوة خليتنى كل لما ابصلها اقول" الحمد لله" "الحمد لله" " الحمد لله" ربنا يباركلى فيها وميحرمنيش منها ابداً

مصر وتحرشات العيد

2010-09-12T05:19:00.003+03:00

بالصور نقلاً عن اليوم السابع... تحرشات جماعية بالبنات فى الحدائق العامة تفسد فرحة المصريين بالعيد.. و"الصبية" يدخنون السجائر بحديقة الفسطاط فى يوم حظر التدخين بالأماكن العامة

http://www.youm7.com/News.asp?NewsID=276432&SecID=12 الظاهر ان كتير من الناس فى البلد دى مش ناويين ينضفوا ولا بشهر رمضان ولا من غير رمضان..مفيش حاجة فارقة معاهم وقلة الادب بقت حاجة متأصلة فى دمهم. المستفز بقى انهم شوية عيال معدوش 15 سنة وطبعاً دا الجيل الجديد بتاع بلدنا المحروسة..معرفش اهاليهم شغلتهم ايه فى الحياة ..دول عيال مشافوش تربية من الاساس. بلد تعدادها اكتر من 80 مليون مخلوق مش عارفين نوفر منهم شوية ناس يشتغلوا فى الامن لحماية اهلها.. معلش اصل الدنيا عيد والامن بيعيدوا بقى وبياكلوا كجك وبسكوت..ربنا يرحمنا ويحمينا ويبعد عنا ولاد الحرام..كل سنة وانتوا طيبين.....

يارب اهدينى

2010-08-21T03:53:00.001+02:00

وايه يعنى؟

2010-08-20T05:49:00.001+02:00

المشكلة اللى عندى واللى هى السبب فى عصبيتى فى الحياة هى:انى عاوزة كل حاجة مظبوطة!! انا فعلاً انسانة غريبة لانه بكل بساطة مينفعش تبقى كل حاجة مظبوطة. ومينفعش يبقى كل الناس صح وماشيين بالورقة والقلم بالمظبوط. اومال امتى نستخدم كلمة "وايه يعنى"؟ وايه يعنى لما نؤجل اللى المفروض نعمله انهاردة لبكرة؟ وايه يعنى لما اللى المفروض نعمله بكرة نؤجله للاسبوع الجاى؟ وايه يعنى لما نعيش حياتنا كدا من غير تخطيط وتفكير ونعيش بركاوى؟ وايه يعنى لما نشوف الغلط بعنينا ونعمل عبط؟ وايه يعنى لما الواحد يسمع الاذان بودنه ويستهبل وينام؟ وايه يعنى لما دائما تقلل من نفسك اودام الناس وتخاف تطلب حقك ؟ وايه يعنى لما تدعى المرض اودام الناس عشان تصعب عليهم؟ وايه يعنى لما تكون قدراتك قليلة وتصمم تبقى دكتور مثلاً ولا تعترف بقلة قدراتك فى مجال معين ولا تتجه لمجال تانى تكون فيه اكثر تفوقاً؟ وايه يعنى لما تكون تعبان ومحدش مقدر انك تعبان؟ وايه يعنى لما حد يغدر عليك فجأة وبدون اسباب؟ وايه يعنى لما تلاقى تصرفات بتحصل اوادمك بدون تفكير؟ وايه يعنى لما تلاقى حد قريب منك زعلان لفرحك وفرحان لفرح غيرك؟ اكيد العيب فيا وكل الحاجات دى متنرفزش حد .. واكيد المفروض ابقى هادية جدا واعصابى باردة وباضحك كمان لو حصل اودامى اى تصرف من دول.. ما هى مشكلتى انى مش فاهمة انى مينفعش امشى الكون على مزاجى..

رمضان كريم

2010-08-11T04:10:00.003+02:00

كل سنة وزوار مدونتنا الكرام والامة الاسلامية كلها بأل خير يارب ورمضان كريم علينا كلنا ويارب أعنا على رمضان يارب اعنا على الصيام والقيام وقراءة القران والدعاء. اللهم اجعلنا من المقبولين فى رمضان. شهر رمضان كما ورد فى حديث عن رسولنا الكريم"أوله رحمة واوسطه مغفرة واخره عتق من النار" اللهم انزل علينا رحمتك فى اوله واغفر لنا ذنوبنا فى اوسطه واعتقنا من النار فى اخره.

اللهم بارك لنا فى شعبان وبلغنا رمضان

2010-07-17T17:36:00.003+03:00

كل سنة وانتم طيبين يا زوار مدونتنا الكرام بدأ شهر شعبان وهو شهر ترفع فيه الاعمال الى الله فلنحرص جميعاً على الطاعات حتى تكون اخر اعمالنا التى ترفع الى الله هى الطاعات وليست الذنوب. وياريت كل واحد فينا يبدأ يخطط كدا ويحط لنفسه جدول الطاعات اللى ناوى يمشى عليه فى رمضان ان شاء الله.

مصر...(2 - 6)...الناس

2010-06-21T10:45:00.007+03:00

سألت عن إفرازات مصر في مناحي الحياة المختلفة في الموضوع السابق ولذا أرى أنه لا بد لي أن أتكلم عن المسئول الأول والوحيد عن هذه الإفرازات أو النتائج - سمها ماشئت - ألا وهم الناس أو أهل البلد. كثير من سكان مصر - ولن أقول كل لأني ضد التعميم - يمكن تلخيصهم في ثلاث كلمات غنها المطرب لؤي في أغنيته واحد من الناس ألا وهم " وهي عايشة وخلاص". وهذه في رأيي المتواضع هي آفة مصر الكبرى وسبب ما نحن فيه الآن على كافة المستويات..أن كثير منا "عايش وخلاص" بلا هدف وبلا معنى إلى أن يقضي الله أمراً كان مفعولا. الغريب أنني كل ما تحدثت مع شخص في هذا الموضوع "الهدف في الحياة" أراهم يقفزون إلى كلمات وجمل من مثل مش شايف وضع البلد وماذا سيفعل الناس والشرطة والنظام تلاحقهم و "مش لقاين ناكل عيش" عشان نغير البلد إلى آخر هذه النوعية من الكلام وكأن الهدف الوحيد الذي خلقنا لأجله في الحياة والمتوفر لنا هو أن نقوم بثورة أو إنقلاب على الحكم - أياً كان هذا الحكم - . أوليس النجاح في عملك وفي دراستك هدفاً..أوليس إهتمامك بزوجتك وعائلتك وتربية أبنائك تربية حسنة صحيحة هدفاً..أوليس إهتمامك بعبادتك هدفاً..أوليس تطوير نفسك هدفاً..أوليس تحقيق سبق أو إنجاز أو حتى تميز في مجال علمي أو أدبي أو حتى فني هدفاً. مشكلة كثير من الناس أنه دائماً ينظر للصورة الكبرى أن يلتفت مطلقاً للقطع الصغيرة التي تكونها، ينظر للجبل ككل دون أن ينتبه إلى الرمال والحجارة التي تكونه، كل شئ.. كل شئ - وهذا ليس تعميماً - يتكون من أجزاء صغيرة وكذا الحياة أيضاً، فبلدنا مثلاً يتكون من مجتمع كبير ومتنوع وأساس هذا المجتمع هو العائلة - فالمجتمع عبارة عن تجمع كبير لعائلات مختلفة - وأساس هذه العائلة هو الفرد وهنا يستحضرني مقطع رائع من أغنية لمايكل جاكسون تقول " إذا أردت أن تجعل العالم مكاناً أفضل فأنظر إلى نفسك وقم بالتغير"..بغض النظر عن حبكم أو كرهكم للمطرب وإذا ما كنتم تسمعون أو لا تسمعون الأغاني أرجوكم تأملوا العبارة وإستوعبوها " إذا أردت أن تجعل العالم مكاناً أفضل فأنظر إلى نفسك وقم بالتغير" هذه حقيقة مطلقة حقيقة لا تقبل الجدال إن أردت وضعاً أفضل لعائلتك لمجتمعك لبلدك للعالم فأبدأ بنفسك - أنظر إلى الأجزاء الصغيرة وليس الصورة الكبيرة - محض خيال ؟ فما رأيك في "إديسون" أو جراهم بل" أو "بيل جيتس" او "مجدي يعقوب" أو "الرازي" أو أو أو.. وعدد ما شئت من مخترعين وملهمين جعلوا "العالم" وليس بلدهم مكان أفضل - وأنا هنا لم آتي على ذكر أعظم الخلق وهم أنبياء الله ورسله - حتى لا يقول أحد ده كان نبي، هؤلاء اناس عاديين ولكنهم بدؤا بأنفسهم فاستطاعوا أن يجعلوا العالم مكان أفضل. دعوني أتخيل معكم هذا السيناريو.. هذا شاب / شابة قرر أنه يريد أن يرى بلده افضل فقر أن يبدع في دراسته ليبدع بعدها في مجال عمله ليحسن من مستوى الناس فيما يقدر عليه متخذاً مثلاً د. محمد غنيم مثلاً. وآخر قرر أن يربي / تربي أولادهم تربية صحيحة لا أن يتركهم ليل نهار "في الشارع" ويعلمهم الصح من الخطأ ويحفزهم من صغرهم على التعلم والإبداع وتنمية نفسهم وان يجعلهم متميزون في عدة مجالات ليفيدوا بلدهم وآخر قرر أن ينخرط في أعمال الخير والمساعدة الإجتماعية ليساعد من يقدر عليه وآخر قرر أن يقاطع بصدق كل صحيفة مناقة أو كاذبة وكل إعلامي جاهل لا يفقه شيئاً فيما يقول وأخر قرر أن يخلص الدعاء من قلبه لإصلاح حاله وحال مجتمعه وبلده مع الأخذ بالأسباب وآخر قرر التميز في مجال عمله ليفيد بلده متخذاً د. زويل ود. يعقوب مثلاً وآخر قرر إقامة مشاريع خيرية أو إنفاق المال ولو جنيهاً واحداً - مش إحنا بنينا مستشفى 57357 كده - لعمل خير ولإحداث الفرق وآخر قرر أن يشجع فريقه بلا تعصب أعمى وتعلم عندما يخسر أن يبتسم ويبارك للفائز ويتمنى حظاً أفضل لفريقه وإنتهى وآخر وآخر ... كل على ماتقدر عليه نفسه أو قدراته لا أحد يطالب أبداً بعمل خارق بل ما تستطيعه فقط أياً كان ..أياً كان طالما كانت النية وراءه صادقة وأخلصت العمل له - ولا ضرر إطلاقا إن إنحرفت عن الطريق مرة أو عشر طالما ظللت تعود له مرة أخرى - وكل هؤلاء قرروا أن يالتزموا بأن يدعو شخصاً واحداً فقط لا غير لما يفعلونه زوجة / زوج صديقة / صديق أخ أخت أب أو أم جار له شخصاً واحداً فقط ..وقرروا أن يتركوا "الفهلوة" للأبد وبلا رجعة ترى كيف سيصبح هذا المجتمع وكيف سيكون شكل هذا البلد. وأختم بمقاطع من قصيدة إرادة الحياة للشاعر أبو القاسم الشابي

إذا الشّعْبُ يَوْمَاً أرَادَ الْحَيَـاةَ فَلا بُدَّ أنْ يَسْتَجِيبَ القَـدَر

وَلا بُـدَّ لِلَّيـْلِ أنْ يَنْجَلِــي وَلا بُدَّ للقَيْدِ أَنْ يَـنْكَسِـر

تاج من زى الهوا

2010-06-17T02:17:00.005+03:00

هو تاج صغنن شفه بالصدفة وانا فى مدونتها ولاقتها عاوزانى اجاوبه هم سؤالين السؤال الاول

رتب الاتى حسب اهميتها بالنسبه لك

الصداقه _ الحب _ العائله_ المستقبل _ المال

الاجابة: 1_الحب 2_العائلة 3_المال 4_الصداقة 5_المستقبل

السؤال التانى

اجب عما يلى

1_ عرف الحب فى جمله صغيره ( حب الحبيب و الحبيبه) ,

وهل يمكن ان نعيش بدون حب (الحبيبه او الحبيب برده ) ؟؟؟

2_ ما الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش ؟ الاجابة: 1_الحب هو الامان ..اه ممكن الانسان يعيش من غير حب مش هيموت يعنى 2_الرسالة: معلش يا موحة مش هكتبها:)

الحب اللي مش حقيقي

2010-06-06T09:30:00.003+03:00

كنت أنوي أن أستكمل اليوم موضع مصر، ولكن جد حدثين أصبحا حديث الناس في مصر على الأقل إحداهما دولي – الإعتداء على أسطول الحرية – وثانيهما محلي – إنتحار الشاب من فوق كوبري قصر النيل – وسأتاناولهما سريعاً في موضوعين منفصلين وسأبدأ من الثاني.

أعتقد أن الكل سمع أو قرأ بحادثة شاب في الـ "31" من عمره قام بالإنتحار عبر شنق نفسه بالقفز من فوق كوبري قصر النيل ورغم أن الحادث أثار تعليقات كثيرة بين الناس ما بين مشفق أومتعاطف إلى ساخر من الحادثة لكن هذه الحادثة أثارت في نفسي تسؤلات كثيرة بل وكثيرة جداً...

وقبل أن أبدأ أحب أن أعترف بشيئين أولهما أني لا أملك تعاطفاً مع أي شخص يقتل نفسه أية كانت الأسباب التي أدت به لذلك، وثانيهما أني أخطأت حينما كنت أعلق على الخبر أول قرأتي له واصفاً إياه بالكافر والعياذ بالله وأرجو من الله أن يسامحني ويعفو عني جهلي...والله وحده أعلم أكافر هو أم عاصي في النار أم في الجنة فأستغفر الله العظيم..

أهم سؤال طرأ على ذهني على الفور كان أي فكر هذا الذي دفعه لفعلته هذه فيما كان يفكر أو بالأحرى كيف كان يفكر...

عذراً فهذا ليس بوله أو عشق هذا غباء محض..ألم ليفكر لثانية فقط هل ستفعل هي نفس الشئ هل ستنتحر وتنهي حياتها لأنها لم ترتبط بي والإجابة هي بالطبع لا لأنها هي التي طلبت الفراق وعدم إتمام الزواج لعدم قدرته المادية.

أهذا هو الحب في مجتمعنا مبدأ " سأكمل حياتي معك او مع غيرك على حسب الظروف " انا لدي إقتناع تام أنه إذا احب طرفان بعضهما بصدق وعفاف وأكررها بصدق وعفاف وليس توهماً فلا شئ أبداً يمكن أن يقف في طريقهما وستذلل كل العقبات في طريقهما وأقسم بالله على هذا لأن هذا ما حدث معي ولله الحمد والشكر دائماً وأبداً.

أنا لا أقصد ابداً أبداً أن لا تهتم الفتاة أو اهلها بظروف المتقدم لها المعيشية فكما من حق الرجل أن يختار شريكة عمر ذات دين وجمال ونسب من حقها هي أيضاً – وأنا هنا اتكلم في المطلق وليس عن هذه الحالة تحديداً - أن تتأكد انها ستكون آمنة من كل الجوانب مع هذا الإنسان وأحد هذه الجوانب هي الجانب المادي، شئنا أم أبينا هذه هي "التقسيمة" المتعارف عليها .

ولكني أتحدث عن زواج الحب تحديدا أن يحب الطرفان بعضهما بصدق وعفاف والصدق والعفاف يجب أن يضع تحتهما 100 خط هذا الحب لن يقف شيئاً في طريقه وإذا كان صادقاً وعفيفاً فعلاً إعلم أن الله سيسهله لك ولها إن كان فيه الخير لكما... هذا الحب هو كما يقول الغرب – To Die For – وهذا تعبير مجازي فقط بمعنى أنك على إستعداد لفعل أي شئ من أجل حبيبك

روميو وجوليت القصة الرومانسية الأشهر أتحدى من قرأ النص للأصلي للمسرحية ألا يكون قد أصيب بالملل وفكر في رميها بعيداً ولكن شهرة الرواية جاءت من النهاية التي تجسد تعبير – To Die For – فبعد كل المحاولات لجمع شمل الحبيبين معاً وإعتراض الأهل – الذي يبدو انهم دائماً من يشعلون الإختلاف في الرواية أو الواقع الفعلي بسبب موروثات وعادات خاطئة - ومحاولة هروبهما ليجتمعا بعيداً عن كل المعوقات ظن روميو أن جوليت ماتت فقتل نفسه " لأنه لا يستطيع العيش من دونها" فلما إستيقظت جوليت "التي كانت مخدرة فقط لتبدو كأنها ميتة" ووجدت حبيبها قد فارق الحياة حزناً عليها فقتلت نفسها وراءه على الفور " لأنها لا تستطيع العيش من دونه" هذه النهاية المأساوية والرومانسية حقاً هي سبب شهرة المسرحية.

أنا لا أدعو لإنتحار الحبيبين معا لا سمح الله انا أقول أنه في الخيال "المسرحية" لما كان الحب صادقاً لم يستطع الطرفان أن يعيشا من دون بعضهما ..اما في الواقع لوكان الطرفان يحبان بعضهما هذا الحب فإنهما سيتزوجان قطعاً إن شاء الله.

ولكن نأتي للخيالات المريضة "واقعنا للأسف" – والذي يبدو أن العرب فقط هم من يتميزوا به – لنرا قصص العشق الأشهر

أخونا

قيس

بن الملوح "العبيط بإمتياز" - وعبطه لأن من عادات العرب ألا يزوجوا فتاة لشخص تغزل بها في أشعاره وأخونا لم يترك مكان في بلاد العرب إلا وقص عشقه فيه بل وواصفا جسدها في بعض الأبيات بغرض الغزل طبعاً - هذا الذي فتن بـ ليلى إبنة عمه لأنهما كنا يلعبان سوياً وهم صغار وتقدم لها فتم رفضه فماذا كانت النتيجة...

اما أخونا قيص "فصدع دماغ كل العرب" بأشعاره عن ليلى وجمال ليلى وذكرياته مع ليلى إلى أن فقد عقله ومات في وسط الصحراء وسط قطيع من الأغنام كأي كلب رعي.

وهي...

الأخت ليلى تزوجت وانجبت وعاشت حياة هنيئة " وآخر إنبساط" – والبعض قال أنها أجبرت على الزواج حتى اكون منصفاً - ولم تسأل عن " اخونا اللي إتجنن "

أهذا حب أهذا يسمى حب..هذا الغباء بعينه أهيم بشخص لا يكن نفس المشاعر لي..إن عشقت فتأكد أن معشوقك يعشقك كذلك وإن احببت فتأكد أن حبيبك يهيم بك حباً وإن ضحيت بنفسك لأجله فلا بد من ان تكون متأكداً من انه سيضحي بنفسه اولاً قبل أن تقبل على ذلك...هو ده الحب "الحقيقي" على رأي محمد فؤاد..فيا سيدي الفاضل ويا اختي الفاضلة إن لم يكن من تحبه أو تحبينه يكن لك نفس المشاعر أو أكثر وقدر الله أن تفترقى فأحزن إن شئت ولكن إعلم أن الله سيعوضك عنه / عنها خيراً إن شاء الله (مافتكرش أي حد فينا عارف بكرة فيه إيه)، ولكن أن ترفض نعمة الحياة – وهي من أكبر نعم الله علينا – ولأجل شخص لم يرد الإرتباط بك أو لم يحبك كما تحبه أو يتمسك بك كما كنت متمسك به فهذا هو " الحب اللي مش حقيقي".

مصر...(1 - 6)...السؤال

2010-05-31T13:26:00.003+03:00

هل فكر أحدكم يوماً أن يلقي نظرة على مصر من "فوق" ؟

وأنا لا أقصد أن ينظر إليها من طائرة مثلاً أو غيره لكن أن ينظر نظرة بانورامية على أحول البلد.

أقصد أن يتأمل ويفكر ولو قليلاً في "إفرازات" هذا البلد في مناحي الحياة المختلفة..

ماذا سيجد ؟!

عايزة انام

2010-05-31T04:12:00.002+03:00

I wanna sleep like this baby but I can not.

يارب

2010-05-30T01:19:00.002+03:00

اكرمنا يارب لأننا دائماً محتاجينك ومحتاجين كرمك ورحمتك

New Tag

2010-05-29T03:09:00.002+03:00

اولاً شكراً لأستاذ أحمد راضى على اهداءه هذا التاج لمدونتنا انت مين بقى؟ إيمان أو باربى عندك كام سنه؟ 24 سنة هل انت متزوج ؟ وهل عندك اولاد؟ ايوة متزوجة من ذا روك أو وسام شؤيكى فى المدونة وفى الحياة كلها.. لا لسه معندناش بيبى دراستك ايه؟ ليسانس ألسن قسم ألمانى كم طولك...وما لونك..؟ secrets هل تمارس عملا بشهادتك ام عمل حر وماهو ؟ أنا باترجم من خلال مدونتى الخاصة بالترجمة..يعنى ميعتبرش شغل أد ما هو تسلية ماهى مدة عملك اليوميه ؟ 00000 ماذا تفعل بوقت فراغك ؟ نت او قراءة أو تليفزيون افلام أو توك شوه هل لديك هوايات....وهل تمارسها ؟ بحب القراءة هل تشعر برضا ربنا عنك ؟ أحياناً بحس إنى قريبة من ربنا وأحياناً بحس انى بعيد وساعتها ببقى مخنوقة ومش طايقة نفسى هل تحب ؟...ومن بقلبك الان؟ طبعا..وسام لو لم تجد من تحب ....فماذا ستفعل ؟؟ كنت هدعى ربنا كتير لحد لما ألاقى الحب عندما تكون فى موقف اتخاذ القرار..تخالف الجماعه.. ام تشرك معك الاخرين ؟ باعمل اللى يريحنى واللى أنا شايفاه صح بعد ما اخد رأى اللى حواليا بس بالنهاية باعمل اللى أنا شايفاه صح حتى لو كان مخالف لرأى الاخرين هل تتعامل بواقعيه؟ كتير ماهو الشيء الذى فعلته وندمت عليه طول عمرك ؟ احياناً بحسب ان الكل بيحب الخير لبعضه لكن باكتشف ان النفوس اتغيرت كتير ومينفعش اتعامل مع كل الناس على انهم اخواتى أو بيحبولى الخير هل تصارح غيرك بالحقيقه ؟ ام تقول له مايريد سماعه؟ بصراحة أحياناً بأتحايل على الحقيقة لو كانت بتضايق بس من غير ما أرخم أوى يعنى صف انسان يمكن ان تحبه عمرك كله ؟ أهم حاجة عندى الحنية متى يقسو قلبك ؟ لما حد بيظلمنى كتير بيقسى قلبى عليه من هو اول من قلت له احبك؟ جوزى هل يمكن ان تحب احد من المدونين؟ أنا مرتبطة بقى وهل يمكن ان يكون شريك حياتك؟ أنا وجوزى أصلاً اتعرفنا على منتدى شمساوى يعنى من خلال النت.يعنى الموضوع مش مشكلة. ماذا تعنى لك المرأة او الرجل؟ المرأة .. الحنية الرجل .. الاحتواء والحماية وتحمل المسؤلية فى زمن البحث عن الماده ..عن ماذا تبحث انت ؟ الأمان متى تعرف انك تحب؟ من لهفتى ولنشغالى على حبيبى ماهى الشخصيه التى اثرت بحياتك ؟ ماما بحب حنيتها اوى اوى وسام بحس بالأمان وأنا معه عمرو خالد علمتى الفرق بين الصح والغلط فى العلاقات فى بداية معرفتى بوسام لما كان خطيبى وحدود العلاقة تبقى ازاى.. علمنى اعرف نعم ربنا عليا.. علمنى ان رمضان شهر العبادة مش التليفزيون..مصطفى حسنى علمنى انى لازم مخى يبقى كبير واستوعب أراء الاخرين حتى لو كانت عكس رأييى..عمرو أديب علمنى أبص للموضوعات عموماً بحيادية هل يوجد من تراه سعيدا فى الدنيا ولماذا ؟ نعم ربنا مغرقة كل الناس لكن من كتر خوف الناس من الحسد مبيحبوش بيبنوا انهم سعدا ودائما بيدعو الحزن رغم سعادتهم ماهى درجة صراحتك ؟ كبيرة وماهى المواقف التى يمكن ان تكذب فيها ؟ بكره الكذب كره العمى هل يتغير الحب بعد الزواج؟ مش فاهمة يتغير ازاى يعنى؟؟ ينتهى وللا ايه؟؟ فيما تفكر الان ؟ بفكر فى ان النت بطىء ومغلس عليا لو لم تعيش بمدينتك ؟؟ ؟فاى مدينه اخرى تفضلها ؟ مكان فيه بحر من اول من ياتى ببالك لتحكى له اسرارك؟ جوزى وماما من هو الد اعدائك؟ أعداء؟؟ أى حد بيحقد وبيحسد وبيكره الخير للناس من هو صديقك؟ عندى كذا واحدة خديجة وسالى ومها وشيماء هم أقرب الناس ليا لو الدنيا كلها زيك....لمن تقول هذه العباره ؟ مش عارفة مفيش حد زى التانى أبداً ماذا تكره فى الحياه ؟ انى أكون نفسى فى حاجة وعاوزاها أوى وشايفاها حق طبيعى ليا ومش عارفة اوصل لها ماذا تحب ؟ البحر والهدوء والهواء النقى كيف تواجه مايضايقك وماذا تفعل عند المفاجآت ؟ بتخض شوية وبعدين باتصرف عادى لو معاك فلوس اكثر مما تتخيل...فماذا ستفعل بها ؟ هجيب فيلا وعربية واحج انا وماما ووسام واعمل اعمال خيرية يعنى ممكن اعمل مستشفى او شى ء من هذا الفبيل هل الفقر يصنع حبا؟؟ مش عارفة وماذا لو وجد الحب فى زمن الفقر المادى؟ كل واحد بيظبط اموره على أد قدراته ماهى اقسى صدمه تعرضت لها حتى وقتنا هذا؟ بكون متوقعة رد فعل معين من حد ويصدمنى بالعكس تماما كان رد فعلك؟ كله بيعدى هل تعلمت منها شىء؟ محطش املى فى حد اوى ومتعشمش خير اوى فى الناس هل انت على استعداد لتلقى صدمات اخرى؟؟ لا ليه كيف ترد على من لاتصدقه ؟ بضحك واحيانا بسكت واحيانا بقوله فى وشه انه بيكدب اذا احببت انسان ما ...هل تصرح له بحبك ؟ اه.. لما بحب أى واحدة بقولها انى بحبها فى الله ماذا تفعل لو لم يتجاوب معك؟ اه انت تقصد راجل يعنى.. لا مش هصرح له الا لما أتأكد .. لو وسام مكانش قالى الاول انه بيحبنى مكنتش عمرى هقولهاله الا لما يبدأ هو هل تؤمن بالمثل القائل:انا احب فانا اعيش ؟ الحب بيخلى للحياة طعم مختلف لكن بالنهاية الكل عايش سواء بيحب او لا ماهى القضايا التى تشغل بالك؟ المستقبل هل تستطيع تحقيق كل احلامك؟ اتمنى هل تمتلك طموحا...وماهو؟ اه طبعاً.. على المستوى الاسرى نفسى أنا ووسام نكون فى مكان واحد ببلد واحد مش متفرقين كدا.. نفسى يبقى عندنا شقة كبيييرة وأطفال كتير.. كيف ستحقق طموحك...ام سيبقى حلما فقط!!!!!!!!!! يارب ربنا يكرمنا ماهى علاقتك بالدنيا؟ كدا كدا بنعيشها لو لك اختيار زمن تعيش به....فماهوذلك الزمن ؟ ولماذا ؟ زمان كان أسهل وأرخص والمتطلبات قليلة أوى والناس بتحب الخير وبتفرح لفرح بعضهم عكس دلوقتى هل يمكن ان ارا ك وانت غائب؟؟؟؟؟؟؟ عندما ترى كلماتى ترانى ماذا ترى فى نفسك مميزا عن الاخرين؟ عندى صبر كبير وثقة فى الله كبيرة اوى.. ومبدخلش نفسى فى اللى ماليش فيه وبافرح اوى اوى لفرح غيرى من اذا اقترب منك ...هربت منه بعيدا؟ النكد من تقول له : قرب منى قرب ...ياقلبى يا متغرب ؟ ههههه sleeping ماذا تريد ان تقوم به قبل ان تموت؟ احج اهداء التاج ؟؟؟؟؟؟؟؟؟ سفاح كرموز وزى الهوا وريرى

ورنين الصمت

ترضى بنص الكيكة؟؟

2010-05-16T16:48:00.002+03:00

فى ناس رضيت تاخد نص الكيكة وقالوا النص التانى هيجى بعدين المهم اننا بدأنا واخدنا حتة وفى ناس فضلوا مصممين انهم يستنوا لما تجيلهم الكيكة كاملة تماماً وقالوا يا كلها يا بلاش يا ترى مين الاسعد فيهم اللى رضيوا بالنص وللا اللى مستنيين الكيكة كلها؟؟

ظاهرة مسك الازواج لايدى زوجاتهم

2010-05-12T17:00:00.002+03:00

كنت بلفلف على النت بدور على حاجة ولاقيتنى دخلت احد المنتديات الخليجية الشقيقة

ولاقيت فى موضوع بعنوان ظاهرة مسك الازواج لايد زوجاتهم فى المولات

استغربت للعنوان

ودخلت اشوف التوبيك

لاقيت واحد كاتب ان دى ظاهرة جديدة فى مجتمعنا العربى وبيسأل ازاى الظاهرة دى انتشرت بشكل كبير فى بلادنا العربية ويعنى ايه الزوج بكل جرأة يمسك ايد مراته وهم بيتفسحوا

وبيسأل الناس هل لما تتجوزوا هتعملوا كدا ؟؟

وياترى ايه رأيكم منين جت لنا هذه الظاهرة؟؟

ةالغريب ان الناس اللى رادين عليه هم كمان مستنكرين الظاهرة على حسب ما سموها يعنى

وبيفولوا ان سببها الافلام الاجنبية الدخيلة على مجتمعنا

وبيقولوا انهم طبعاَ لما يتجوزوا مستحيل يعملوا كدا

فكرونى بمسرحية عادل امام ولما بيقول* ما هى المشكلة انها مراته ملهى لو كانت واحدة غريبة كنا قلنا معلش*

سبحان الله فى ناس يحرمون ما احل الله ويحعلون العادات المتشددة تغطى على الحلال فى وسط مجتمع بقى مليان بالمغريات والاشياء الكثير الغلط

ازاى نفرح؟ هو احنا بنعرف نفرح؟

2010-04-15T00:46:00.003+02:00

حالة من الحزن والكابة منتشرة فى البلوجات.. مش بس البلوجات دا فى الحياة العادية

وفى الشوارع وفى كل مكان..

عبوس على الوجوه

وناس مش راضيى بحالها

اللى متعلمش نفسه يتعلم

اللى اتعلم نفسه يشتغل

اللى اشتغل نفسه فى شقة

اللى عنده شقة نفسه يتجوز

واللى اتجوز نفسه يخلف

واللى خلف واحد نفسه فى التانى

المهم ان كل واحد شايف انه ناقصه حاجة

وبالرغم من ان كل اللى فات دا مطالب عادية وحقوق مشروعة لكل بنى ادم

الا ان محدش بياخد كل حاجة

كل واحد باصص لغيره وعاوز يمتلك اللى عنده..

مش عيب ولا غلط ولا حرام ان تكون عندنا امال واحلام وطموحات ونتمنى نحققها

بس العيب اننا ننسى ان ربنا موجود.. عارفين دا معناه ايه؟

معناه اننا بنعبد من له ملكوت السماوات والارض ومن فيهما

ربنا بيزل الينا فى التلت الاخير من الليل كل يوم وينادينا

هل من صاحب حاجة فأقيها له؟؟

اصح وقوم واقف بين يديه عشر دقايق بس بليل ..ادعيه وابكى بين يديه واترجاه يحققلك ما تتمناه

وانت بداخلك اليقين بانه سيجيبك لانه يحبك واهلم انه وحده القادر على ان يفرج كربك ويزيل همك

ويقضى حاجتك لانه الملك وحده.. فقط الجأ اليه ولا تتكبر عن دعاءه فقهو بانتظارك كل ليلة فلا تفوت

هذه الفرصة..

اللهم فرج كرب المكروبين واقض حاجتنا وحاجة المحتاجين

اللهم امين

الحشيش شاحح فى السوق

2010-04-14T00:50:00.003+02:00

المصريون حالهم بقى يصعب على الكافر من كترة الوقفات الاحتجاجية اللى كلهااااااا عن الاجور والمرتبات المهينة

مش عارفة بعد كدا حالنا هيوصل لايه.. بس النكتة بقى ان من كام يون كدا كان فى برنامج عمرو اديب بيتكلم عن

معاناة اخرى من معاناة المصريين وهى ان الحشيش بقى شاحح فى السوق .. يعنى الداخلية لمت الحشيش كله

من السوق وقال ان صحيفة اللوس انجلوس تايمز مطلعة تقرير بيقول ان الحشاشين فى مصر عددهم 7 مليون

مصرى.. يا فضيحتنا وسط باقى الدول .. هو احنا اما مفضوحين بالفقر او مفضوحين بالحشيش.

الطريف بقى ان الناس كانت بتتصل بالبرنامج وبتشتكى وبتزعق وبيقولوا حررررراااااام هى الحكومة عايزة مننا

ايه؟ حتى الحشيش كمان بتاع الفقراء ومحدودى الدخل منعوه عننا؟؟!!

يا حلاوة ويا جمال الشعب الجميل اللى بقى شايف ان المخدرات كمان بقى فيها محدودى الدخل ةبقى فيها

تقسيمات للمخدرات ان الفقراء يشربوا بانجو وحشيش والاغنياء يشربوا الهيروين والحاجات التانية .

شفتوا احنا منظمين نفسنا طبقات طبقات مش بس فى الرواتب والسكن والاكل والشرب والترف ولكن كمان فى

المخدرات

وحشنى زمان

2010-04-12T02:00:00.002+02:00

وحشنى زمان وجو زمان وناس زمان

زمان لما كانت الناس طيبين

زمان لما كانت الاخلاق راقية

زمان لما كان الراجل راجل بتصرفاته المليانة شهامة ورجولة والست ست بأنوثتها ورقتها وشياكتها وصوتها واحترامها لنفسها

زمان لما كان الكل بيحب الخير لغيره ولما كان بيبقى فى فرح فى بيت سواء قريب او غريب كان الكل فرحان بدون غل ولا حقد

زمان لما كان جو الاسرة له طعم حلو.. كان فى جو اللمة والدفء والحب والحنية

زمان كانت أقل الاشياء تفرح

lonely

2010-04-09T01:05:00.001+02:00

lonely without you

مينفعش

2010-04-06T21:36:00.002+02:00

مينفعش واحد يبعد بعيد وميشاركش من هم مسؤلون منه احداث حياتهم ولا افراحهم واحزانهم ولا يساعد بحل مشاكلهم ويفضل يبعد ويبعد وفجأة يرجع ويقول اسمعوا كلامى انا هنا لسة موجود. ................... تناقض ان تظهر حنية وجدعنة زايدة وللقريب قسوة وجفاء فى نفس الوقت. ................... غريب ان واحدة منتقبة يعنى مش باين منها حاجة وتلاقيها بتتصارع فى اى مناسبة عشان تتصور مع اصحاب المناسبة طب ماهى كدا كدا مش باين منها حاجة

حيرتنى معاها

2010-02-23T13:27:00.003+02:00

مبقتش عارفة بلدنا دى حلوة ولا وحشة؟ مبقتش عارفة دى بلد الجدعنة والخير والحب والطيبة والضمير ولا بلد الرشاوى وقلة الاخلاق والظلم ساعات بشوفها اجمل بلد فى الدنيا لما بشوف بنت صغيرة بتقوم تقف فى المترو عشان تقعد سيدة كبيرة.. ولما بشوف فرحتنا بفوز المنتخب بأى ماتش.. ولما بشوف بساطة وفرحة الناس وتجمعهم فى صلاة العيد وتجمعهم فى الافراح والاحزان واقفين جنب بعض..بشوف طيبة وتضحية مطلقة وبلا مقابل لما بشوف سيدة مصرية مستحملة ظلم وافترى جوزها بس عشان ولادها رغم ان انا ضد الفكرة دى بس دا لا يمنع جلد وتحمل المصرية واللى يمكن متكونش موجودة فى ستات العالم كله..بشوف الامل والرغبة فى التغيير لما اتجمع الناس لاستقبال البرادعى ساعتها حسيت ان فى ناس بجد مستنية قشاية تتعلق بيها عشان حالهالنا ينصلح رغم ان الراجل كرر كذا مرة انه مش هيترشح غير بشروطه الصعبة اللى من من المستحيل تتحقق.. وبشوفها بلد مليانة بالرشاوى لما الواحد يدخل أغلب المصالح الحكومية ويلاقى ورقه واقف عشان مدفعش رشوة للباشا الموظف عشان يخلصله الورق.. وبيشوفها مليانة ظلم وافترى على الغلابة لما ناس يعيشوا ويموتوا منسيين من البلد دى زى سكان الدويقة اللى ماتوا بعد ما الجبل وقع عليهم ولسة باقيتهم مستنيين الموت بنفس الطريقة ولا حد سائل ولا حد سامع ولا حد مهتم.. وبشوفها مليانة بإنعدام الاخلاق من كتر الالفاظ الغير محترمة اللى ناس كتير بيستخدموها فى الشوارع ولما تلاقى بنت ماشية فى حالها وحصل لها تحرش ومعاكسات..وبشوفها بلد الاهمال من كتر ما بنشوف الزبالة مالية الشوارع حتى فى الاماكن الراقية فى مصر.. مبقتش عارفة افهمها بجد هى بلد ايه بالضبط؟؟!!

Never say never

2010-01-20T00:50:00.004+02:00

I read a good book which is called " NEVER SAY NEVER" I learnt some points from this book and I wrote them in order to share them with our readers. I hope you learn from them like me. ما تعلمته من كتاب" لا تقل لا أبداً" لفيليس جورج 1_ إن أول خطوة على طريق التغيير هى أن تفهم أنه لا شىء يستحق الخوف منه ( الفصل الثانى) 2_ التغيير جزء من نظام الحياة وفى كل مرة تمر بتغيير سيكسبك ذلك قوة وثقة بالنفس بدرجة أكبر لمواجهة التغيير فى المرة التى تليها ( الفصل الثانى) 3_ لا تدع التيار يجرفك, اصنع لنفسك طريقاً وحاول السير فيه ( الفصل الثالث) 4_ الفشل بمثابة حجر تعبر عليه للوصول للنجاح ( الفصل الثالث) 5_ صاحب الاعمال الناجح يرى ما لا يراه الاخرون ( الفصل الرابع) 6_ابحث على موهبتك واستغلها جيداً (الفصل الرابع) 7_ ثق فى حدسك واجعله مرشداً لك فى اتخاذ قراراتك ( الفصل الخامس ) 8_خبراتك السابقة تمنحك اساساً للحكم على مدى ما يمكنك من الثقة بقدراتك ( الفصل الخامس) 9_ يمكنك أن تزيد من فرص نجاحك وسعادتك إذا لم تتعجل فى الاختيار_ قم بوضع عدة خيارات محتملة امامك حتى إذا لم تنفع أحدها فربما تنفع الاخرى (الفصل السادس) 10_ عليك أن تتوقف لحظات مع نفسك بعد كل تجربة تمر بها وتسأل نفسك: ما الذى تعلمته من المواقف السابقة ( الفصل السادس) 11_ لا تضيع أى فرصة تأتيك حتى ولو لم تفكر فيها من قبل ( الفصل السادس) 12_ إذا أردت ان تقول كلمة (لا) قلها بأسلوب لطيف ورقيق ومهذب ولا تقلها بشكل مباشر وجاف ( الفصل السابع) 13_ ترفع عن رد الاساءة بمثلها ( الفصل السابع) 14_غالباً ما تقوينا الصدمات التى نمر بها فى حياتنا وتشكل شخصياتنا ( الفصل الثامن) 15_ تمثل العقبات فرصاً لإكتساب الثقة بالنفس والتغلب على القلق والخوف من الفشل ( الفصل الثامن ) 16_ ليس كل من يضحك بوجهك يحبك ( الفصل الثامن ) 17_ عليك ان تعلم وتعلم ابناءك أن الحياة ليست مثالية فبها لحظات نجاح ولحظات فشل ومن الافضل ان نتعلم من تجارب الفشل حتى لا تتكرر ( الفصل الثامن ) 18_ عليك العيش بشخصيتك ولا تكن شخصاً اخر غير نفسك( الفصل الثامن ) 19_ الشخص المتشائم يرى صعوبة فى كل فرصة والشخص المتفائل يرى فرصة فى كل صعوبة ( الفصل الثامن ) 20_ إذا وجدت أن بعض الاشخاص لديهم مشكلة فى شخصياتهم وسلوكياتهم وهذه المشكلات تضايقك فتذكر أنه أمر لا يعنيك بل يعنيهم, فلا تجعل من مشكلات الاخرين مشكلة لك فهى مشكلة لا تخصك بل تخصهم وكل ما عليك فعله هو تغيير طريقة معاملتك وعلاقتك بهم بدلاً من محاولتك تغيير هؤلاء الاشخاص انفسهم ( الفصل التاسع) 21_ حاول النظر الى خطئك بشىء من الدعابة والتبسط وعدم التشدد ( الفصل العاشر ) 22_ الضحك هو السلاح السرى للبقاء , صف مواقفك وكأنها مشاهد مسرحية , حينئذ ستجد انها ليست سيئة للغاية كما كنت تظن ( الفصل العاشر ) 23 استمتع باللحظة الحالية من حياتك ورتب اولوياتك ( الفصل العاشر)

عودة بعد شهر العسل

2009-12-30T14:18:00.004+02:00

عودة جديدة بعد ما عدى شهر العسل عقبال كل اللى عايزين يتجوزوا يارب فرحنا كان عسول الحمد لله.. مكنتش متخيلاه هيكون كدا.. كنت متخيلاه هادى اوى على عكس ما حصل خالص مكنتش متخيله انى انا ووسام هنفضل نتنطط كدا طول الفرح  فرحانة بكل حد حضر فرحنا بجد وبقولكم كلكم نورتونا بجد سواء اصحابى او اصحاب وسام اللى خلو للفرح جو تانى وخلونى اشوف وسام لاول مرة فى حياتى وهو مهيبر وبيرقص وكنت فرحانة اوى بريرى وشيماء وويسبر .. كنت فرحانة بجد انهم كانوا جنبى برغم اننا كنا بعاد عن بعض بعد التخرج بس متعرفوش فرحت بيكم اد ايه والله وعقبال يارب ما نحضر فرحكم قريب يارب يارب وربنا يفرحكم كلكم يارب احلى حاجة بقى انى كنت خارجة من البيوتى سنتر مش مستوعبة ان اليوم دا فرحنا انا ووسام بعد قصة حب لثلاثة سنين وبعد كل الصعوبات اللى عدت علينا وبعد كل العقبات وبعد ما اتحملنا كل الكلام الشرير اللى كله احباط من الناس اللى حوالينا..يا ما سمعت كلام " يا عينى لسة مجبتوش شقة" " يا عينى كل دا مخطوبين" " يا عينى طب هتتجوزوا امتى وازاى؟!" " يا عينى يا عينى يا عينى........." لحد لما كان بيعدى عليا اوقات احباط واكتئاب كتير من كتر الكلام اللى مالوش لازمة دا .. بس المهم ان الصبر اخرته خير نرجع للحكاية من الاول لما كنت خارجة من البيوتى سنتر ومش مصدقة ان اليوم دا فرحنا ومش مصدقة انى لابسة الفستان الابيض والطرحة البيضاء.. مش مصدقة انى هخرج مأنججة وسام اودام كل الناس.. كل الافكار دى كان مخليانى متوترة لدرجة انى كنت باترعش وايدى متلجة.. وبعد ما خرجت ووسام لاقانى متوترة كدا راح ادانى لبانة نعناع وهو كمان خدله واحدة والاحلى بقى اننا فضلت اللبانة معانا لحد بعد الزفة واحنا قاعدين نمضغها بكل ثقة وناسيين خالص اننا بنتصور فيديو ههههه لما جينا بعد الفرح بفترة نتفرج على السى دى افتكرنا اننا كان معانا اللبان طول الفترة دى وظاهريين بوضوح فى التصويرهههههههه وبكدا نبقى اول عريس وعروسة بيتزفوا وهم قاعدين يمضغوا لبان وكأننا جايين مع المعازيم نيجى بقى للنادى حصلت اكتر حاجة مضحكة فى الدنيا هى دلوقتى بأقول عليها مضحكة لكن ساعتها كانت اكتر حاجة مستفزة ممكن تحصل لعرسان كان معادنا فى القاعة الساعة سابعة بعد العشاء وانا ووسام وصلنا فى المعاد بالضبط لكن المفاجأة ان مفيش ولا واحد من المعازيم كانوا وصلوا وكان موقف فظييييييييييييييييييييع ههههههههه وفضلنا فى العربية وقعدنا نلفلف بيها حوالى نص ساعة على ما المعازيم جم وبعدها رجعنا تانى على النادى ..كنا ساعتها متنرفزين بس بعد كدا بقت ذكرى غريبة لينا ومضحكة فى نفس الوقت وبعد ما الزفة خلصت واتصونا جينا بقى لمرحلة دخول القاعة وانا وقفت بره القاعة ومش راضية ادخل ومصممة ان الدى جى اللى جوة القاعة لااااااااااااااااااااازم لااااااااااااااااازم يشغلنا نشيد الزفاف بتاع ماجدة الرومى واحنا داخلين القاعة هههههه وفضلت واقفة برة وصممت انى مشداخلة غير لما تشتغل الاغنية وفعلاً شغلوهالى وارتحت نفسياً ودخلت بس مش عارفة كان هيبقى الموقف ايه لو بعد التصمصم دا طلعت الاغنية دى بالذات مش موجودة عندهم كانت هتبقى كسفة جامدة ليا لانى كنت كدا كدا هدخل فى ااخر بس الحمد لله ربنا ستر وما اتكسفتش وبعد كدا بقى اغانى وزغاريد وشبكة والبروجرام العادى داخل القاعة طبعاً اخدنا كمية حسد لا بأس بها حتى الان لكنه يوم مميز فى حياتنا بجد لا هو مش بس مميز هو من اجمل ايام حياتنا حقيقى ربنا يجعل كل ايامنا سعادة وحب يارب ويارب تتحل مشكلة سفرك يا وسام يارب وربنا يسترها معانا

Happy new year2010

2009-12-24T19:38:00.004+02:00

السلام عليكم ورحمة الله وحشتونا كتيييير وكل سنة وانت كلكم يارب بخير ويارب السنة الجديدة تكون سنة مليانة سعادة وخير للجميع بإذن الله بس قبل ما نبدأ السنة الجديدة 2010 عايزين نعمل حصر لأهم ما حدث السنة دى وعشان كدا وعندنا ليكم إستفتاء صغير كده نتمنى مشاركتكم فيه عشان بجد يهمنا أوي رأيكم ومشاركتكم يلا نبدأ..

1- أهم حدث (سياسي / إقتصادي / إجتماعي / رياضي) في عام 2009. 2- أهم حدث شخصي حصل ليك / ليكي في عام 2009. 3- أكتر حاجة كان نفسك تحققها في 2009 وماقدرتش / ماعرفتش تعملها. 4- أفضل كتاب قرأته في 2009. 5- أفضل شخصية سياسية في 2009. 6- أفضل شخصية علمية في 2009. 7- أفضل شخصية أدبية في 2009. 8- أفضل شخصية صحفية في 2009. 9- أفضل مذيع & مذيعة في 2009. 10- أفضل صحيفة في 2009. 11- أفضل برنامج تلفزيوني & إذاعي في 2009. 12- أفضل قناة فضائية في 2009. 13- أفضل ممثل & ممثلة في 2009. 14- افضل مطرب & مطربة في 2009. 15- أفضل شخصية رياضية & فريق رياضي في 2009. .

زفافنا

2009-11-12T14:20:00.002+02:00

""" زفافي انا و وسام يوم الثلاثاء ان شاء الله ""

كأمواج البحر

2009-11-01T16:12:00.001+02:00

تتسابق الافكار بداخلى حتى شعرت انها كأمواج البحر

مصر اليوم

2009-10-26T13:23:00.001+02:00

مصر اليوم

1_شوارع مليئة بالقمامة

2_سحابة سودا

3_حوادث سيارات وقطارات

4_اهمال فى المصالح الحكومية

5_بطالة

6_قرية البرادعة وناس مصابة بالتيفود وبتشرب مياة صرف صحى ونحن فى القرن 21

عايزة انام

2009-10-08T03:30:00.003+02:00

نفسى اعرف انام بسهولة,نفسى لما اجى انام ماافضلش قلقانة بالساعات لحد ما اعرف النام رغم انى بكون مرهقة وعايزة انام ومش قادرة افتح عينى بس مش عارفة ليه مش قادرة انام

فاروق حسنى خسر اليونسكو وخسر احترام الناس

2009-09-27T15:10:00.000+02:00

الوزير فاروق حسنى وزير ثقافة مصر منذ 22 عاماً طل علينا من خلال الصحف والتليفزيونات منذ فترة وهو يردد أنه مرشح لليونسكو(ليكون وزير ثقافة العالم) ومنذ أيام قليلة ظهرت نتيجة انتخابات اليونسكو وخسر فاروق حسنى.

فاروق حسنى شخصية غريبة مثيرة للجدل

فهو وزير ثقافة فى مصر منذ ربع قرن ولم نعرف عنه سوى أنه فنان تشكيلى..لا أدرى ماذا فعل وماذا زاد وماذا جدد فى ثقافة شعب مصر؟؟ فهو وزير ثقافة لشعب نصفه مصاب بمرض الأمية والجهل.. أى ثقافة هذه التى جعلته يطمح لمنصب اليونسكو؟؟

وزير تصريحاته وتصرفاته حافلة بالتناقضات فمرة يطل علينا من خلال وسائل الاعلام وينتقد الحجاب للمرأة المسلمة ويدعو للتحرر منه وعندما هاجمته الصحافة عاد ليطل عينا نفس الطلة ويتحدث عن الحجاب بشكل جيد ويمدح ويقول انه مع حرية ارتداء الحجاب من عدمه..

مرة نراه فى مجلس الشعب وهو منفعل ويقول سأحرق أى كتاب اسرائيلى فى مكتبة اسكندرية

وبعد ان هاجمته اسرائيل والصحف الارسائيلية نراه يعتذر لإسرائيل على صفحات الجرائد طمعاً فى ان ينول رضا أسرائيل لتحن عليه اسرائيل وتوافق عليه فى اليونسكو ومن وقتها وهو يستجدى رضى وعطف اسرائيل لدرجة أنه أتى بموسيقار إسرائيلى فى الابرا أيام احتفالات مصر بأعياد تحرير سيناء ولا أدرى كيف يقبل عقل وقلب مصرى ، يأتى بموسيقار أسرائيلى فى مثل هذه المناسبة؟!

وبعدها نراه يصرح فى الصحف بأنه أصدر قراراً بترجمة عدد كبير من الكتب الاسرائيليلة . كل هذا وهو كان مازال يستجدى رضى إسرائيل. أى كتب هذه؟ وما قيمة الثقافة الاسرائيلية حتى يصدر قراراً بترجمتها؟

كنا ننتظر بعد ذلك أن نرى أعلام إسرائيل معلقة فى شارع جامعة الدول العربية ونرى تماثيل لرؤساء إسرائيل فى وسط ميدان التحرير

وبعد كل هذه التنازلات عاد فاروق حسنى بالخسارة من اليونسكو

ولكن ما يضحك هو تصريحاته التى طلت علينا بطلتها البهية النجية كالعادة وهو يقول " أنا أكبر من اليونسكو" " سأعود لأواجه إسرائيل وأكشفها على حقيقتها أمام العالم"

فاروق حسنى وزير ثقافة مصر ولم يكن يعلم بحقيقة اسرائيل الا بعد ان قدم تنازلات عديدة وفى النهاية بردو اسرائيل مرضيتش عنه وخسر.. فبعد الخسارة علم حقيقة اسرائيل وأراد أن يكشفها للشعب المصرى .. نظرية بردو