عيد سعيد يا يوكى

العيد اللى فات كنت عاملة زى البطيخة..مكنتش عارفة البس هدوم شيك تليق بالعيد وكنت بحقد عليهم كلهم هنا فى البيت عشان لابسين براحتهم هدوم حلوة ..فى العيد اللى فات كانت يارا فى بطنى وكنت مقضياها نووووم..لكن العيد دا ان شاء الله هفضيه مع احلى بنوتة فى الدنيا..هتصحينى على وأوأتها العسولة النونو ونلبس جديد سوا سوا ونغنى اهلا اهلا بالعيد ونلعب بالبلالين سوا سوا.. يارب اجعله احلى عيد مع احلى يارا فى الدنيا..كل سنة وانتو طيبين جميعا ويارب الكل يكون سعيد ومزقطط فى العيد ويارب كل اسرة تكون متجمعة ومفيش حد منهم يبقى بعيد..عيد سعيد عليكم يارب:)

بنوتى الحلوة

الحمد لله بقيت ماما بقالى شهر تقريبا..احساس كنت باتمناه من ربنا من زمان والحمد لله ربنا رزقنى به.. بنوتى الحلوة خليتنى نفسى أرجع بيبى..ماما تنيمنى على رجلها.. وتدلعنى وتلاعبنى .. بنوتى الحلوة خليتنى نفسى اعرف لما بتنام بتحلم بإيه؟؟ ولما بتسكت بتفكر فى ايه؟؟ بنوتى الحلوة خليتنى احس انى بحب الحياة عشان هى موجودة فيها.. خليتنى احس ان ليا لازمة فى الوجود.. بنوتى الحلوة خليتنى كل لما ابصلها اقول" الحمد لله" "الحمد لله" " الحمد لله" ربنا يباركلى فيها وميحرمنيش منها ابداً

مصر وتحرشات العيد

بالصور نقلاً عن اليوم السابع... تحرشات جماعية بالبنات فى الحدائق العامة تفسد فرحة المصريين بالعيد.. و"الصبية" يدخنون السجائر بحديقة الفسطاط فى يوم حظر التدخين بالأماكن العامة

http://www.youm7.com/News.asp?NewsID=276432&SecID=12 الظاهر ان كتير من الناس فى البلد دى مش ناويين ينضفوا ولا بشهر رمضان ولا من غير رمضان..مفيش حاجة فارقة معاهم وقلة الادب بقت حاجة متأصلة فى دمهم. المستفز بقى انهم شوية عيال معدوش 15 سنة وطبعاً دا الجيل الجديد بتاع بلدنا المحروسة..معرفش اهاليهم شغلتهم ايه فى الحياة ..دول عيال مشافوش تربية من الاساس. بلد تعدادها اكتر من 80 مليون مخلوق مش عارفين نوفر منهم شوية ناس يشتغلوا فى الامن لحماية اهلها.. معلش اصل الدنيا عيد والامن بيعيدوا بقى وبياكلوا كجك وبسكوت..ربنا يرحمنا ويحمينا ويبعد عنا ولاد الحرام..كل سنة وانتوا طيبين.....

يارب اهدينى

وايه يعنى؟

المشكلة اللى عندى واللى هى السبب فى عصبيتى فى الحياة هى:انى عاوزة كل حاجة مظبوطة!! انا فعلاً انسانة غريبة لانه بكل بساطة مينفعش تبقى كل حاجة مظبوطة. ومينفعش يبقى كل الناس صح وماشيين بالورقة والقلم بالمظبوط. اومال امتى نستخدم كلمة "وايه يعنى"؟ وايه يعنى لما نؤجل اللى المفروض نعمله انهاردة لبكرة؟ وايه يعنى لما اللى المفروض نعمله بكرة نؤجله للاسبوع الجاى؟ وايه يعنى لما نعيش حياتنا كدا من غير تخطيط وتفكير ونعيش بركاوى؟ وايه يعنى لما نشوف الغلط بعنينا ونعمل عبط؟ وايه يعنى لما الواحد يسمع الاذان بودنه ويستهبل وينام؟ وايه يعنى لما دائما تقلل من نفسك اودام الناس وتخاف تطلب حقك ؟ وايه يعنى لما تدعى المرض اودام الناس عشان تصعب عليهم؟ وايه يعنى لما تكون قدراتك قليلة وتصمم تبقى دكتور مثلاً ولا تعترف بقلة قدراتك فى مجال معين ولا تتجه لمجال تانى تكون فيه اكثر تفوقاً؟ وايه يعنى لما تكون تعبان ومحدش مقدر انك تعبان؟ وايه يعنى لما حد يغدر عليك فجأة وبدون اسباب؟ وايه يعنى لما تلاقى تصرفات بتحصل اوادمك بدون تفكير؟ وايه يعنى لما تلاقى حد قريب منك زعلان لفرحك وفرحان لفرح غيرك؟ اكيد العيب فيا وكل الحاجات دى متنرفزش حد .. واكيد المفروض ابقى هادية جدا واعصابى باردة وباضحك كمان لو حصل اودامى اى تصرف من دول.. ما هى مشكلتى انى مش فاهمة انى مينفعش امشى الكون على مزاجى..

رمضان كريم

كل سنة وزوار مدونتنا الكرام والامة الاسلامية كلها بأل خير يارب ورمضان كريم علينا كلنا ويارب أعنا على رمضان يارب اعنا على الصيام والقيام وقراءة القران والدعاء. اللهم اجعلنا من المقبولين فى رمضان. شهر رمضان كما ورد فى حديث عن رسولنا الكريم"أوله رحمة واوسطه مغفرة واخره عتق من النار" اللهم انزل علينا رحمتك فى اوله واغفر لنا ذنوبنا فى اوسطه واعتقنا من النار فى اخره.

اللهم بارك لنا فى شعبان وبلغنا رمضان

كل سنة وانتم طيبين يا زوار مدونتنا الكرام بدأ شهر شعبان وهو شهر ترفع فيه الاعمال الى الله فلنحرص جميعاً على الطاعات حتى تكون اخر اعمالنا التى ترفع الى الله هى الطاعات وليست الذنوب. وياريت كل واحد فينا يبدأ يخطط كدا ويحط لنفسه جدول الطاعات اللى ناوى يمشى عليه فى رمضان ان شاء الله.