المذاكرة ملل

دى حالتى

أم على.. بالمكسرات

خطوبة

:

هو:هاى بيبى وحشتينى اوى؟

هى:هاى حبيبى..وانت كمان واحشنى؟

جواز:

هى:ايوة يا حسنى..انت فين؟؟مش بترد على الموبايل ليه؟

هو:ايوة يا فاطمة..خير فى حاجة؟؟

بعد الانجاب:

هى:مع السلامة يا ابو على متتاخرش بقى

هو:حاضر يأم على مش هتأخر

ليه الاسامى بتتغير بعد الانجاب الى ام فلان وابو فلان

هو الزوج دا اصلا مش ليه اسم بردو وللا كان مجهول الهويه لحد ما على باشا جه الدنيا بالسلامة؟؟؟

طيب والزوجة بردوا مش ليها اسم؟؟

-عمرى ما اتفرجت على فيلم اجنبى ولاقتهم فيه بعد ما بيجيبوا بيبى يتحول اسمهم الى ام فلان او ابوفلان

كل واحد ليه اسمه..

يعنى مفيش عندهم"ام بيتر او ام جاكسون او ام كلينتون او ابو جاك!!ههههههههههه

وللا ام على دى ماينفعش تفضل يتقالها يا بيبى ويا حبيبتى

والاب بردوا ما ينفعش يتقاله يا بيبى ويا حبيبى بعد ما يشرف اخينا على؟؟؟؟؟

وللا الكلام دا مقتصر فقط فى الخطوبة وشهر العسل فقط لا غير بعد كدا بينزل عليه التخفيض

معايير الصح والغلط اصبحت متفاوتة

يا ترى فى فرق بين الحلال والحرام (والصح والغلط)؟ انا كنت فاكرة إن أى شىء حلال إذن فهو صح أى شىء حرام إذن فهو غلط..لكن فى وسط تعاملاتى مع الناس عرفت إن المعايير دى مختلفة من عندى لعندهم!! يعنى فى أشياء حرام مثلا وهى أشياء واضحة جدا ومافيهاش أى لبس فى الفهم خالص ومع ذلك ألاقى ناس بتقولى على الحاجات دى "يابنتى عادى بقى وعديها ومافيهاش حاجة يعنى" فى حين إن الحاجات دىبالنسبة لى بعتبرها كارثة وحاجة حرام جدا وببقى مستغربة إذاى قدروا يهونوا المووضوع على نفسهم ويقولوا "عادى دى" يعنى مثلا:فى العلاقة بين المخطوبين المفروض ان فى ضوابط شرعية ليها!وطبعا مش بتتساوى هذه العلاقة بعلاقة الأزواج!!ودا فى رأيى حتى لو كان فى أبسط الاشياء حتى فى مسكة اليد..مينفعش تحصل أصلا..إذاى اى بنت ترضى إن انسان مش جوزها قدام ربنا ويلمسها اساسا.. انا مقتنعة جدا بكدا وكنت فاكرة ان أى بنوتة فى الدنيا برضوا بتفكر كدا ,لكن فوجئت مرتين وأنا باتكلم مع بنات اصحابى أن الموضوع عندهم مختلف تماما..مع العلم إنى عارفاهم بقالى سنين وعارفة أخلاقهم بس مش عارفة ليه الموضوع دا بالذات بيموتوا ضميرهم بالنسبة له.. المرة الالى:كانت من كام شهر كدا لما واحدة صاحبتى إتخطبت وكنت رايحة أباركلها وكدا فقعدت تكيلى عن خطيبها وأد ايه هو خجول ولخمة لأنه لو مسك إيدها ومامتها دخلت عليهم بيتلخبط وبيتخض وبيسيب إيده..الموضوع دا كان مضايق صاحبتى اوى. وهى قال ايه كانت بتشكيلى ..وانا ياعينى تنحت وقلتلها هو ايه دا اللى يمسك ايدك يا بنتى هو انتى عبيطة ..وقعدت اقولها ان كدا حرام ومينفعش ولازم تراعى ربنا حتى فى ادق الاشياء عشان ربنا يباركلهم فى حياتهم.. فقالتلى :الكلمة الشهيرة"لا يابنتى عادى ..دا خطيبى"ممم وهى فضلت مصممة على رايها وعلى ان الموضوع عااااااااادى خاااااالص وبعدها بكام شهر ..قالتلى انها فسخت الخطوبة وساعتها قعدت افتكر كلامى معها..وقلت يعنى الانسان اللى كان خطيبها دا بقى خلاص فركش ..اممممممممم يعنى لو اتخطبت خمس مرات مثلا وفركشت يبقى فى خمس بنى ادمين لمسوها حتى ولو كانت اللمسة مجرد مسكة ايد؟؟ المهم انى نسيت الموضوع دا من ساعتها وقلت خلاص كل واحدة حرة فى حياتها... وبعدين الموقف الثانى حصل امبارح:مع واحدة صاحبتى تانية بردوا ..هى مخطوبة وهتتجوز بعد تلات او اربع شهور ان شاء الله..ولاقتها بتحكيلى نفس الكلام وبتقولى ان خطيبها مسك ايدها وقعدت يلعب فيها وكانت بتحكى وهى مبسوطة مووت وبتضحك..وانا باسمعها حاسة ان اللى هى وهو عملوه دا ذنب كبييييير اوى..فقلتلها لا متخليهوش يعمل كدا تانى كلها كام شهر وتبقى مراته قدام ربنا ..متستعجلوش الحلال يابنتى ..راحت هى مغيرة الموضوع وكانها ندمت انها حكتلى اصلا!! ليه دايما انا باشوف الموضوع دا على انه غلط فادح وهم بيشوفوه على انه عادى خالص خالص.؟. ليه ميبقاش عند بنات وشباب المسلمين عفة؟ ليه مبقاش فى صبر على الحلال؟ ليه سهل علينا نقصر فى حق ربنا ؟ وصعب علينا جدا نقصر فى حق نفسنا؟ ليه ميبقاش ربنا احب الينا من انفسنا ومن شهوتنا وتبقى اوامرة قانون امامنا واجب تنفيذه؟ عاوزة اقول للبنات والولاد دول افتكروا كدا وانتو بتعصوا ربنا اننا خير أمة أخرجت للناس Barbie girl

هل هو حقا دين فى أعناقنا؟؟

خلقنا جميعا وكل منا له حقوق وعليه واجبات..هكذا نسمع دائما..

وعندما كنت أتحدث انا واحد صديقاتى عن والدينا,وجدتها نقول لى..إن جميل والديها هو دين فى عنقها!! وعندها توقفت قليلا وأخذت

أفكر وأتساءل ..هل تربية الاباء والامهات لابنائهم وبناتهم تعد جميلا يظل محمولا فى أعناق الابناء؟؟

وسرعان ما تبادر الى ذهنى سؤال اخر:

إذا كانت تربيتهم لنا جميل أو دين فى أعناقنا ,اذن فلماذا ينجبوننا ويحملوننا جمائل من البداية اصلا؟

هل عندما ينفق الاب على أبنائه يكون بذلك قد فعل فيهم معروفا؟

هل عندما يعلم الاب ابنائه فى المدارس يكون قد فعل بهم جميلا ولابد ان يظلوا حاملين لهذا الجميل طوال حياتهم؟

هل عندما تحنو الام على أبنائها وتحتضنهم بين ذراعيها تكون بذلك تمن عليهم؟

هل عندما يؤدب الاب أبنائه يكون بذلك يمن عليهم؟

هل عندما يوفر الاب حياة كريمة لاولاده يكون قد حملهم جمائل كثيرة؟

هل اصبح كل شىء لابد أن يكون له مقابل..حتى الاشياء الفطرية والمشاعر؟

وعندئذ أجبت على نفسى قائلة:لا ..لا أعتقد ان ما يفعله اى اب واى ام تجاه ابنائهم يعد جميلا لنا او دينا علينا..!

لماذا؟

لأننا اذا اعتقدنا ان كل ذلك جمايل فى اعناقنا فلن نقدر حتى ولو عشنا مليون سنة ان نوفى حقوقهما علينا

ولكن كل ما نقدر على ان نفعله لهما هو ان نطيعهم ونعاملهم بالحسنى

ولكن بعد ان توصلت لهذه النتيجة تذكرت حديث رسولنا الكريم "أنت ومالك لأبيك" فهل هذا الحديث هو اشارة على أن كل ما يفعله اباؤنا لنا دين علينا..

ولكنى فكرت قليلا وقلت :اذا كان ذلك دين علينا "يبقى احنا كدا كدا هندخل النار" لأننا مش هنقدر نوفى هذا الدين ابدااااا!! طيب لو هنعتبر ان كل حاجة دين علينا يبقى مين هيربى الابناء كويس ومين هيعيشهم كويس ومين هيعلمهم كويس .

قال تعالى "المال والبنون زينة الحياة الدنيا"

اذن فنحن زينة الحياة بالنسبة لهم ..اذن فنحن ايضا نمنحهم السعادة ونزين حياتهم ..وهذا هو كلام رب العالمين.

ارى ان هذا هو دور كل اب وام تجاه ابنائهم وان الله سيحاسبهم عليه اذا لم يقوموا به على اكمل وجه,,وهذا ايضا حقنا عليهم ..بالضبط مثلما ان لهم حقوقا علينا

ولكن الغريب اننا كلنا بنسمع عن حقوق الاباء على الابناء دائما والجميع ينادون بها..ومن كثرة ما سمعنا منهم نسينا ان الابناء ايضا لهم حقوق على الاباء..

وربما نسى الاباء ايضا ان للأبناء حقوق عليهم..

Barbie girl

مجهول أخشاه أنا

عندما انهيت الدراسة فى الثانوية العامة وجالى التنسيق بكلية الالسن, شعرت فى الايام الاولى بعد التنسيق بحزن شديد لأننى لم التحق بالكلية التى كنت اريدها طوال حياتى, ولكنى بعد ذلك بدأت ان أتأقلم على الوضع ورضيت بما قسمه الله لى,وبدات انا وصديقاتى التجهيز لهذه المرحلة الجديدة التى كما بصددها,كنا تقريبا نتحدث يوميا وكان كل اللى شاغلنا ومفرحنا اننا هنشترى هدوم كتيييييييير على غير المعتاد يعنى وهنترحم من اليونيفورم بتاع المدرسة,ولكن كلما كان يقترب موعد بداية الدراسة كلما ازددت قلقا وتوترا.. وهذه هى طبيعتى كلما اهم بدخول اى مرحلة جديدة فى حياتى..

كنت قلقة من هذا العالم المبهم بالنسبة لى,لم أكن أعرف عنه شيئا سوى كلام من مروا بهذه المرحلة من قبلى, وهو ان الجامعة عبارة عن لبس وشياكة وميكب ومفيش مذاكرة وصحوبية وولاد وبنات وسلاطة..ومن ضمن الخرافات اللى كان بعض البنات بيقولوها ان البنت لو عايزة اى محاضرة لازم تطلبها من الولاد عشان البنات مش هيرضوا يدولها حاجة!!!

هذا ما سمعته قبل دخولى الجامعة من اصحابى!!

واتت ساعة الصفر وبدات الدراسة..كنت مبهورة بهذا العالم الذى دخلته..شعرت وقتها انه عالم كبير على بنوتة صغيورة مثلى..لم اكن اصدق بالفعل اننى اصبحت انسة جامعية ..تدخل الى هذا العالم الذى طالما سمعت عنه..

لم تكن الصورة كالتى رسموها لى من قبل دخولى الجامعة

نعم رأيت بعض الاشياء التى وصفوها لى ولكن ليس كل شىء سمعته ..رأيته

اولا: مسألة اللبس والميكب ..نعم وجدت الكثيرات من البنات لديهم هذه المسألة بشكل مبالغ فيه جدا جدا جدا

كدت انزلق معهم ولكن ربنا رحمنى واكرمنى بانى اركز وانتبه ان هؤلاء البنات غلط ..

ولكن حتى اكون عادلة ان هذه المسألة ليست منطبقة على كل البنات هناك..فهو عالم كبير..فيه المحجبات والغير محجبات والمنتقبات والغير منتقبات..وفيه وفيه...!!

ادركت ان الله خلق لنا عقلا وان كل واحدة مننا هى اللى هتتحاسب عن نفسها ومش هتقول لربها "معلش اصلى كنت باعمل ذى اصحابى"

ثانيا:حكاية البنات والولاد والمحاضرات اللى عاوزة تتنقل دى

طبعا كله كلام فارغ

وعرفت ان اللى سمعتهم بيقولوا كدا كانوا بيبرروا لنفسهم تصرفاتهم الخطأ وليس اكثر من ذلك

انا لا ادعو للانعزالية ولكن بأقول اللى عايزة تعمل حاجة غلط تعملها بس مش لازم نقعد نجيب حجج وتبريرات فارغة عشان بس نرضى ضميرنا!!!!

ثالثا حكاية ان مفيش مذاكرة: تنطبق عليها قول(خدعوك فقالوا)

لانى لا ينطبق على كليتى هذا الكلام اطلاقا

حتى ان بعض المواد ملهاش كتب وبتكون المذاكرة كلها على النت..انا اللى بدور على المعلومة واطلعا وامتحن فيها..والموضوع مطلعش لعب عيال ذى ما سمعت

*والان وبعد ارع سنوات قضيتها فى الجامعة اعتدت على ان اذهب اليها كل يوم..واحضر المحاضرات واشوف اصحابى وناكل سوا ونهزر سوا ونضحك سوا ونحكى لبعض على اللى مفرحنا ومزعلنا

اعتدت على هذا الجو الذى احببته ولا أدرى كيف سأتركه ؟؟

كيف اعود واذهب الى عالم مجهول اخر بالنسبة لى

ومن هنا تبدأ رحله المجهول مرة ثانية فى حياتى!

باق اقل من شهر على الامتحان..كلما مر يوم يزداد قلقى وخوفى من ان اصل للعالم الذى لا اعرف عنه شىء

فانا لا اعرف ماذا ينتظرنى بعد يوم 13 يونيو 2007!!

لا اقدر على ان اتصور حياتى تتغير عن هذا النهج الذى تعودت عليه

سوف افتقد كل شىء فى الجامعة

سوف افتقد صديقاتى الى حد كبير..فهن يمثلهن الكثير بالنسبة لى

سوف افتقد ضحكنا ولعبا وتزويغنا من المحاضرات (ههههه مش كتير اوى يعنى)وتعبنا واحنا بنذاكر

سوف افتقدكن حقا

سوف افتقدك كثيرا يا خديجة يا احب واحلى واطيب صديقة عرفتها!!

اعرف ان كل واحدة منا سوف تنشغل بحياتها المستقبلية

كل واحد ة سوف تتزوج بإذن الله ويكون لها حياتها الخاصة

يمكننا ان نتواصل نعم ..ولكن اعرف ان تواصلنا سوف لا يصل الى ما نحن عليه الان

سوف افتقد حتى الدكاترة ..لا انكر اننى تعلمت منهم الكثير..رغم ان بعضهم كنت لا اطيقه.زولكن الغالب هم من تركوا بى اثرا ايجابيا سوف يفيدنى فى حياتى

ادعو الله ان يكتب لى الخير فيما هو قادم فى حياتى

ادعو الله ان يختار لى الخير دائما

barbie girl

الكورة أهم من كل شئ

إمبارح زي ما كلنا كنا عارفين كانت مباراة الأهلي وبرشلونة في أحتفالية الأول بمرور 100 عام على تأسيسه. واللي أنتهت نتيجتها لصالح النادي الكتالوني بأربعة أهداف نظيفة مع الرأفة. ولحد هنا الموضوع يعتبر عادي بيحصل في كل مكان في. الدنيا لكن اللي مش عادي هو اللي بيحصل بعد المباراة واللي بيحصل بعد كل مباراة للأسف. إمبارح بعد نهاية المباراة مفيش 5 دقائق بالظبط سمعت زعيق وشتائم بالأم والأب والدين كمان وهيصة ما بعدها هيصة حبتين وسمعت صوت فرقعة جامدة (عرفت بعدين إنه صوت زجاج أتهشم) طبعا أنا أستغربت من كل ده ومكنتش فاهم في إيه وعلى غير عادتي طلعت لأول مرة من البلكونة أشوف في إيه لكن لقيت الشارع فاضي مع إن صوت الزعيق لسه واصلي كبرت وقلت أهه خناقة زي كل خناقة وخلاص ودخلت أعملي مج نسكافيه محترم وأقعد أقرأ شوية وأنا بقلب النسكافيه سمعت صوت عارفه من تحت البلكونة بيقول أنا حموتك يامصلحي (دا واحد غيرك على فكرة يا أحمد حسن) فطلعت تاني أبص من البلكونة لقيت واحد أعرفة من المنطقة بالفانلة الداخلية ووشه أحممممممممر والناس مسكه فيه وهو على لسانه كلمة واحدة ورحمة أمي لدبحك ورحمة أمي لدبحك.... وبصيت لقيت صاحبي أسامة وسط المعمعة اللي تحت دي فبكل برود ناديت عليه وأنا بضحك وقلتله أسامة هو في إيه....؟ قلي مش وقته ياروك دلوقت قلتله: طب لما تخلصه خناق يبقى عدي عليا. ودخلت صبيت النسكافيه وأقعدت أقرأ بعد وقت مش طويل طلعلي أسامة (متبهدل ياعيني) دخل وبعد السلام قلتله خير ياعم في إيه ....؟ أنا سامع زعيق وحجات بتفرقع في إيه...؟ قلي لا أبدا ياعم دي كانت خناقة (ياسلااااااااااااام جبت التيه ياوله) قلتله ما أنا عارف إنها خنقاة ليه يعني إيه السبب...؟! قلي أبدا الواد مصلحي وكام واحد زملكاوي كده بعد الماتش قعدوا يتريقوا على الأهلي وعلينا قمنا مسكنا فيهم بصتله من فوق لتحت وقلتله وإيه اللي فرقع ده قالي ده إزاز القهوة اللي كنا قاعدين عليها أصل رضا مش عارف زق مين ...إلخ وهعفيكم من بقيت الحوار وأبدا موضوعي من هنا أيوا أبدأ... لما ماتش كورة يعمل كده بين الناس (وسعات الناس دس تبقى أصحاب) يبقى ده إسمه إيه لما ماتش كورة يخلي شباب يتخانق ويكسر إزاز يخلي واحد عمال يحلف إنه حيدبح التاني عشان كورة...؟؟؟؟؟ للأسف الشديد الكورة دلوقت بقت أهم حاجة حاجة في حيتنا أيون.... أهم حاجة في حيتنا شوفوا مثلا حال البلدساعة لما يبقى فيه (لقاء قمة) تلاقي الشوارع فاضية والناس متسمرة قدام التلفزيون وعلى القهاوي والصلاة تأذن ولا حياة لمن تنادي صلاة مين ياعم الحج صلي على النبي الصلاة تتقضى بعدين إنما الماتش ما ينفعش...! إمبارح كان يوم حافل على المستوى العالمي.... إمبارح العلماء في ناسا أكتشفوا أول كوكب شبيه بالأرض خارج حدود مجموعتنا الشمسية إمبارح في الولايات المتحدة تم الموافقة على عقار جديد يعتقد أنه سيتمكن من القضاء على مشكلة الإيدز وعلاج هذا المرض إمبارح في طفلة مصرية أنتحرت ورمت نفسها من الطابق التالت في مدرستها عشان أبوها وأمها أطلقوا إمبارح كتائب عز الدين القسام أعلنت نهاية الهدنة مع الكيان الصهيوني بعد أعتداءاته الأخيرة في الضفة وقتله لتسعة فلسطنين وأطلقت 8 صواريخ من غزة على ما يسمى بإسرائيل. إمبارح أعلن وزير الصحة والسكان في مصر، حاتم الجبلي، نجاح أول عملية جراحية لزراعة كبد بشري، تم إجراؤها في أحد المستشفيات التابعة للوزارة بتكلفة تصل إلى 9 في المائة من تكلفتها في حالة إجراء مثل هذه الجراحات في الخارج، أو في مراكز طبية متخصصة وإمبارح كان ماتش الأهلي وبرشلونة ومن كل اللي حصل إمبارح ده الناس كلها ماكنش على لسنها غير الأهلي واللي حصله من البارسا وبعد كده نندب على حظنا إن إحنا فقراء ومن دول العالم التالت ومطهدين والحكومة معذبانا (وأظن هنا الحكومة مالهاش دخل اهه) والعالم كله بيجري وبيطور وإحنا بتفرج وياريتنا بنتفرج عليه كنا ممكن نستفيد حاجة إنما الخيبة إن إحنا بنتفرج على ماتشات والخيبة الأكتر إن بعد كل الفرجة دي مابنعرفش نلعب كورة حتى زيهم و ماعندناش لعيبة تطلع على مستوى رونالدينهو أو ميسي في ناس بتقول طب مه في أنجلترا وأسبانيا بيعملوا أنيل من كده والكورة عندهم يمكن أهم من عندنا كمان ققلهم ياخلق ياهوووووووووووه شوفوا بريطانيا وأسبانيا عاملين إزاي في التعليم في الأقتصاد في حاجات على مستوى الأفراد زي نظافة الحي والمكان والإنسان ذات نفسه شفوهم في الشغل إزاي ولا إحنا بقينا عملين زي الذباب عينه ما تقعش غير على القبيح سايبين كل حاجة حلوة برة ومابنخدش غير الوحش وبس The Rock

كيف ومتى تأخذنا قناة الناس الى الجنة؟

قناة تأخذك للجنة..هذا هو شعار قناة الناس الدينية الفضائيةالتى لايتراوح عمرها عام واحد ومع ذلك حققا نجاحا كبيرا فى العالم العربى وفى مصر على وجه الخصوص..استعانت بشيوخ لم نعتد على رؤيتهم فى باقى القنوات وهم شيوخ لهم ثقلهم فى عالم الدعوة ولا انكر اننى استفدت منهم كثيرا. أغلب الاسر المصرية كبارا وصغارا يحرصون على مشاهدة هذه القناة التى اختارت شعارا لها قناة تاخذك للجنة وبالطبع الجميع يريد ون ان يدخلوا الجنة..حتى انه اصبح لا يخلو لى حديثا مع احد بدون ذكر قناة الناس وذكر ان الشيخ الفلانى على قناة الناس قال كذا والشيخ الفلانى قال كذا وكذا..ومما لاحظته ايضا فيم يخص هذه القناة ان اغلب ستات البيوت قاعدين فى بيوتهن طوال النهار والليل امام قناة الناس.. كل هذا جميييييييييل جداااااا ومبشر بالخير لهذه الامة المتعطشة لدخول الجنة التى ترحمها من شقاء وقسوة الدنيا..ولكن ما اعرفه ان هذه القناة بقالها حوالى سنة شغالة والناس بقالهم سنة يشاهدونها..ياترى بعد مشاهدة البرامج بها والمواظبة عليها لمدة عام,هل تغير حالنا كمسلمين؟؟؟؟؟؟؟ هل تلاحظون اننا تغيرنا واصبحنا امة تعرف دينها وتراعى الله فى كل تصرفاتها ؟؟ هل اصبحنا لانكذب؟ هل اصبحنا لا نخون؟ هل نؤدى ما علينا من واجبات والتزامات نحو اهلنا ونحو حتى انفسنا حتى نقابل الله وهو راض عنا ؟ هل اصلحنا من انفسنا؟ هل طهرنا قلوبنا من الغل والحقد والحسد والانانية؟ هل اصبحت كل زوجة تراعى حقوق زوجها عليها؟ هل اصبح كل زوج يراعى حقوق زوجته عليه؟ هل انتهت العلاقات الحرام بين الولاد والبنات؟ هل وهل وهل؟؟؟؟ هل نرى هذه القناة باعيننا فقط ام باعيننا وعقولنا وقلوبنا؟ اذا كنا نراها باعيننا فقط ,فهذا بالفعل هو حالنا بعد عام من مشاهدة هذه القناة وحتى بعد عشرة وعشرين عاما من المشاهدة اذا كنا نراها باعيننا وعقولنا فكان حالنما اكيد هيتغير عما هو عليه الان. نعم..نعم اصبحنا نعرف الحلال والحرام فقط معرفة..دون تنفيذ لو كنا فعلا نسمع ونعقل ما يقال لنا على هذه القناة او على غيرها من القنوات الدينية والله والله كنا هنبقى أمة لا مثيل لها سوف يسألنا الله تعالى عما تعلمنا ولم نعمل به طيب اذا كنا لاننوى أن نعمل بما نتعلمه , فلماذا نحرص كل الحرص على ان نتعلمه أصلا؟؟ ومن الحاجات اللى باشوفها ايضا ولا افهمها ان لما يبقى فى مجموعة من الناس مثلا قاعدين مع بعض بيتكلموا ومشغلين التليفزيون على اى قناة دينينة..وهم اصلا مش مركزين مع التليفزيون ولكنهم قاعدين يرغوا مع بعض..ويقوم واحد منهم قايل انا انا هغير المحطة دى ..يبقى يا ويله انه قال كدا ويقوم الجمع الغفير_ اللى هم قاعدين ولا سامعين حاجة فى التليفزيون ولا مركزين اصلا _يقولولوا يا عم ادينا قاعدين فى مجلس علم طالما القناة دى شغالة واهو تحفنا الملائكة!!!!!!!! هو فين مجلس العلم دا اصلا وانتوا قاعدين فى عالم تانى؟ هم فاكرين انهم بيتبركوا بالقنوات الدينية طالما هى شغالة جنبهم وخلاص حتى لو مفيش فايدة هيتعلموها منها. ياريت كل اللى نتعلمه نعمل به عشان نحس بتغير ولو بسيط

Barbie girl