الدنيا كبيرة أوى وغريبة أوى أوى ..كل واحد عايش فى عالمه الخاص ..وكل واحد بيلف ويدور فى دائرة خاصة بيه..ناس ربنا مديها حاجات كتير ومش مرتاحة وناس معندهاش حاجة ومش مرتاحة وناس معندهاش حاجة ومرتاحة!!ناس عندهم علم ودين ومال ومفتقدين المشاعر ومحتاجينها اوى وحاسين إنهم ممكن يضحو بكل ما هو غال وثمين من أجل هذا الاحساس..وناس عندهم المال والمشاعر ومفتقدين العلم والثقافة وحاسين إنهم مالكين الدنيا بفلوسهم بس ناسيين إنهم جهلة ومش عارفين إن دا غيبهم..وناس عندهم عايشين عندهم علم وأسرة ومعندهم فلوس وناس وناس وناس.......!!ص
ناس عندهم صحة ربنا أنعم بيها عليهم ومش حاسيين.أحيانا ربنا يبعتلنا رسايل كدا تنبهنا وتقولنا خدوا بالكوا ربنا مديكوا حاجات كتير وانتو مش واخدين بالكوا منها..
من عادتى إن مش بحب أروح مع أصحابى ملاجىء أزور ناس هناك أو مستشفيات أزور حد هناك..باستنى لما الحد اللى فى المستشفى يخرج ويرجع بيته وبعدين ازوره..لحد ما خالتو دخلت المستشفى من كام يوم ..مممممفدى خالتو بقى وهتعمل عملية صعبة فى القلب وكدا فلازم اروح ازورها..
المهم انا رحت امبارح عندها المستشفى وكنا قاعدين نضحك ونهزر وكدا وبعد كدا لاقيت ممرضات داخلين وطالعين وقاعدين يدوها حقن وحاجات كدا كذا مرة ..هم كانوا بيجهزوها للعملية عشان المفروض انها تعملها النهاردة..وبعد مشهد الحقن لاقيت ممرضة جت وجابت حاجة طويلة كدا ومتعلق فيها كيس دم ومتوصل منه انابيب وخراطيم رفيعة خالص ووصلوه فى ايد خالتو عشان ينقلولها دم...انا قعدت مذبهلة..الحاجات دى باشوفها بس فى التليفزيون..مكنتش معتقدة ان دا حقيقى ..وانا باتفرج واقول فى نفسى ياااااااااااااه ..كل السنين دى ومش واخده بالى من نعم ربنا عليا..مدينى حاجات كتير كتير اوى وناسية أشكره عليها..انا مكسوفة من ربنا أوى..ومش عارفة أقولك إيه يارب..مكنتش حاسة ان قلبى دا نعمة كبيرة اوى ..مكنتش حاسة ان لسانى سليم وباتكلم بيه وأحيانا باعصاك بيه..مكنتش حاسة ان عينى سليمة وغيرى مش بيشوف
انا عارفة يارب انى مقصرة فى حقك
ساعدنى يارب على حسن عبادتك
9 comments:
انا اول مره ادخل عندك
وحظي الحلو اني كنت اول تعليق
وعاوز اقولك ان الدنيا كده
فيها الطيب وفيها الوحش
فيها الغني وفيها الفقير
فيها السعيد وفيها الحزين
بس المهم احنا عاوزين نبقي ايه
لان احنا اللي بنحدد
نكون
سعدا ولا حزناء
اغنياء ولا فقراء
ده طبعا بعد اراده المولي عز وجل
تحياتي لكي
شاب نفسه يحقق حلمه:
شكرا لتعليق حضرتك
الناس فعلاً بتختلف
بس السعادة دايما تنبع من الداخل
مش من الحاجات الخارجية
بتنبع من اقتناعك بنفسك وامكانياتك حتى لو كانت بسيطة
بالنسبة لموقف المستشفى
كويس ان الموقف ده حصل
ربنا ساعات كده يحب يفوقنا فيبعت حاجات تفكرنا بامكانياتنا عشان نستعملها صح
بوست متميز
الي اولئك الذين المهم صور اقتتال الاخوة الاشقاء في فلسطين
الي كل من تخيل ان الاخوة الاشقاء باعوا القضية لاعدائهم واجهزوا علي ماتبقي منها
الي كل من انجر وراء حملة التضليل الاعلامي التي ساقوها علينا
الي كل ساع الي الحقيقة
الي كل هؤلاء اهدي
التبيان في اقتتال الاخوان
تجدونه فقط
في
ارض الحرب
بوست جميل ,بجد الدنيا دي لغز كبير ,اتمني الشفاء لخالتك وابقي طمنينا عليها
الف سلامة علي خالتو يابربي
شفاها الله وعفاها
وحقيقي زيارة المريض في المستشفي بترقق القلب ... فحمد لله علي سلامة قلبك
جددالله ايانك وايانا وثبتنا علي الحق
the terminator:
فعلا ربنا ربنا احيانا بيحطنا فى مواقف مكناش نتخيلها عشان يصحى فينا حاجة نسيناها او تناسيناها
wahed:
شكرا لحضرتك
ادعولها انها تقوم بالسلامة
بالله المستعان:
شكرا يا قمر..ادعيلها انتى بس وان شاء الله ربنا يشفيها ويشفى كل مرضى المسلمين
وانا معاكى بقول شكراااااااااااا ليك يا ربى على كل نعمك عليا الى انا مستحقهاش
مهم اوى ان احنا نقف شويه و نهدى من اللف فى دايرة الدنيا علشان نقعد و نتأمل نعم الله العظيمه علينا
تحياتى يا باربى و الف سلامه لعمتك و متنسيش تبقى تتطمنينا عليها
إرسال تعليق