قضية عارفينها وشايفنها 24 ساعة يوميا من يوم الجمعة اللى فات..وهى طبعا حكاية غزة.. وفصل الكهرباء عنهم ..وحجة إسرائيل فى الموضوع ده هو انها عاوزة تبيد حركة حماس بالكامل..طبعا مسلسل اعتقد إننا كلنا فاهمينه كويس ومش جديد عيلنا من ساعة ما اتولدنا لحد النهاردة حجج اسرائيل الفارغة.. ولكن نقطة الخلاف فى الشارع العربى الان هى حول دور مصر فى حل هذه القضية البعض يرى أنه من واجب مصر فتح معبر رفح وادخال المعونات والادوية لغزة وخروج المصابين الفلسطينيين لتلقى العلاج اللازم لهم بمصر..والبعض يرى أن مصر ليست هى المسئولة الوحيدة عن حل هذه الازمة..وأن باقى الدول العربية من الواجب القاء اللوم عليهم أيضا.. ولكن السؤال الان هل ننظر كمصريين لهذه المشكلة من منطلق دينى وإنسانى أم ننظر اليها من منطلق سياسى دبلوماسى يريد الحفاظ على الامن القومى لمصر؟؟؟؟؟ إذا كنا هننظر للموضوع من منطلق دينى وإنسانى فإنه من الواجب على مصر فتح المعبر والسماح للفلسطينيين بالدخول والسماح بخروج التبرعات من مصر لأهل غزة.. وإذا كنا هننظر للموضوع من منطلق سياسى دبلوماسى..هنقول ما الفلسطينيين لو دخلوا مصر بكدا هتكون حجة إسرائيل انها تضرب سيناء عشان هناك موجود أهل غزة..وبكدا هنلاقى مصر دخلت طرف فى المشكلة وترجع أرض سيناء محتلة زى زمان ولما يجى يوم 25 أبريل مش هتبقى مصر اليوم فى عيد وكلام من دا....بالإضافة الى إن دا ممكن يستنفذ قوى مصر وتخرب أكثر ما هى خربانة اقتصاديا وبدل ما يبقى فقر واعتصامات مسيطرين على مصر يبقى نضيف ليهم إحتلال كمان..مع الوضع فى الاعتبار إن مفيش ولا دولة عربية ساعتها هتعبرنا ولو بشلن حتى.. وإذا نظرنا للموضوع من منطلق مختلف عن هذا وذاك..هنلاقى إن لما لما حزب الله فى لبنان كانت بتضرب فى إسرائيل وإسرائيل بتضرب فى لبنان..إن النتيجة كانت إن حزب الله طحنهم رغم إنه حزب وااااحد بس من دولة كاملة ولكنه قدر يرعبهم جامد..وكان بيعتبر إن هو المنتصر فى النهاية..فيكون الوضع فى الحالة دى إن مصر تدخل فى مواجهة مع اسرائيل وتبقى ضامنة انها كدا كدا الكسبانة.. مش عارفة رأيكم ايه فى اللخبطة دى ؟؟ ............................... ............................... بعد ما الموضوع دا اتكتب بيوم أهل غزة دخلوا من الحدود ومسابولناش فرصة التفكير فى فتح أو غلق الحدود ههههه الغريب إن قبل ما الحدود تتفتح معظم رؤساء الدول العربية ( الشقيقة ) أدانت موقف مصر وبقوا يطلعوا تصريحات ويقولوا إننا لو كنا على الحدود مع غزة زى مصر كدا كنا عملنا وسوينا وساعدنا أهالى فلسطين وكلام من دا..طيب يا أخوننا ..كل دا جميل.. أدى الحدود إتفتحت..هااااااااااا كان موقف الدول دى إيه بقى من اللى اتعمل دا؟؟ ولا دولة منهم أشادت باللى أـعمل دا ولو بكلمة واحدة أممممممم طيب نيجى بقى للنقطة التانية وهى إن بردوا كلهم قالوا انهم عاوزين يساعدوا الفلسطينين بردوا جميل لكن نيجى نشوف موقفهم دلوقتى ..اهى الحدود اتفتحت فين بقى المساعدات اللى نزلت ترف على الفلسطينين منهم؟؟؟؟؟؟؟ هم دول الاخوة العرب.. ................................................. .................................................
تحديث: اول امبارح كان فى اجتماع فى القاهرة بين حماس وفتح
طيب يا ترى الاخوة الفلسطينيين انفسهم عاوزين يحلوا مشكلة غززززززززة
لا طبعا كل واحد فيهم راكب دماغه طالما ان فى دولة اسمها مصر فتحتلهم ابوابها وقالتلهم بالاحضان يا حبايبى
ازاى عاوزينا نحس بتعاطف وتضامن معاهم وهم نفسهم اصحاب المشكلة مش هاممهم اهلهم ولا بلدهم وكل واحد فيهم همه مصالح شخصية ليس اكثر.
الحل فى ايديهم ولو عايزين يحلوا المشكلة كانوا هيحلوها بس بردوا المصالح الشخصية والطمع اهم بكتير بالنسبة لهم.
10 comments:
اصل الكلام ببلاش و احنا كعرب سيد مين يفنجر ببقه لكن ساعة الجد مفيش
مفتوحة مش عاجبيين و مقفولة مش عاجبيين
أحسن حاجة نواربها
:)
فعلا الكلام ببلاش
موقف العرب حاجة تفرس
لكن كمان موقف الفلسطينيين مش عاجبنى ..لانهم مش بيشتروا حاجياتهم ويرجعوا بلدهم..لا البعض قعد فى غزة والبعض جه القاهرة..والبعض بعد ما خرج جابوا بلدوزر وعاوزين يعملوا فتحة تانى فى السياج الفاصل بيننا وبينهم على الحدود
ونسيواان"ان كان حبيبك عسل متلحسوش كله"
يا إخواننا فى غزة خلوا قلبكم علينا بردوا..ومش كدا
لا.... هايل هايل
مدونه متميزه بجد
تستحق الزياره اكثر من مره
بالنسبه لموضوع غزه
انا بقيت شايف ان اللى كان مطلوب مننا احنا الشباب اننا نطالب الحكومه بقتح المعبر والحمد لله حصل
بعد كده نحاول نساعدهم ماديا وانسانيا
لكن محاولة فهم مين الصح ومين الغلط دلوقتى بقت " سلطه " بصراحه الواحد مش قادر يقول ان الحكومه كويسه ... يمكن الامر اتفرض عليها بجراة الفلسطينين
وفى راى بيقول يمكن الصهاينه عايزين يخلو غزه علشان يصطادوا قيادات حماس
وعلشان كده الحكام الجبناء سابوهم يمرروا
عموما القضيه اقل ما توصف به انها على صفيح ساخن
وانتمائنا وتعاطفنا الاول والاخير مع الناس الفلسطينيين الغلابه
... ومع المقاومه طبعا
سلام
ربنا معاهم
هذا هو اقصى ما نستطيع فعله
ولينتقم الرب
هكذا صار الكلام بعيدا عن المباح جرم اكبر فى نظرهم -من يحكمونا خطئا-
اولا انا بكره اننا عرب لأن الموضوع ده بصراحة جايبنا لورا قوي
ثانيا بعد ما فتحنا الحدود اترد لينا الجميل والاخوة الفلسطينيين اللي بنتعاطف معاهم سرقونا واشتروا بضايعنا بفلوس مزورة وضربوا عسكرنا وهتفوا ضدنا وقذفونا بالحجارة وبعد ده كله بنقول اشقاء
يا جماعة نفكنا بقى من الكلام في السياسةبالشكل ده لأن السياسة قواعدها وحساباتها مختلفة تماما عناي تعاطف بيضر مصلحتنا
تحياتي
السيد شبل:مش محتاجين نطالب الحكومة بفتح المعبر لانه بالفعل اتفتح..
هو لو بصينا للموضوع من ناحية انسانية هنقول ادينا فتحنا المعبر ودخلوا خدوا اللى هم عايزينه
لكن اتفرج على تصرفات بعض الفلسطينيين طبعا مش كلهم
عندما دخل أحدهم الى بنى سويف ووجدوا بحوزته حزام ناسف..ياترى دا هو رد فعلهم تجاه مصر؟؟؟؟؟؟؟؟؟
تفتكر لما بيحاولوا يزوغوا من الشرطة ويدخلوا القاهرة وينتشروا فى المحافظات ودا طبعا هيجيب لمصر مليون مشكلة ..تفتكر دا رد فعل طبيعى تجاه وقفة مصر جنبهم؟؟؟؟
كرنيش:أهلا بيكى هنا
وطبعا بندعى ربنا معاهم ومعانا لكن تعاطفى لم يصبح كبيرا مثل تعاطفك معهم لأسباب ذكرتها
أنا حر:أهلا بحضرتك
متفقة مع حضرتك فى إن للسياسة حسابات أخرى غير العواطف
للاسف الموضوع محطوط امام خيارات صعبه
لكن المفروض الفلسطنين ميدوش الفرصه لاسرائيل لتنفيذ لعبه قذره
كدا اسرائيل عايزه توسع الاراضي الفلسطنيه مش بالاستغناء عن جزء من الاراضي المحتله لا عن طريق ظغط فلسطيني علي مصر ويدخلوا في سينا
وتبقي بلد ليهم بقي ونشيل احنا ادينا
وبيني وبينك الفلسطنين لما هيلاقوا نفسهم اعدين في مصر مرتاحين هيقولوا ليه منعودش هنا واحتمال كمان يجبوا دلائل شرعيه احقيه سينا لفلسطين فاهمه قصدي
النهاردع قفلوا معبر رفح بس الله واعلم ايه اللي جاي قلبي مش مرتاح
علي راي الممثل بتاع مسلسل الدالي
انا متشاؤم يا فندم
اسفه للاطاله
بس موضوع سرده جميل
تحياتي
اهلا كوكا:عندك حق فى كل اللى قولتيه
وربنا يستر من الايام اللى جاية
إرسال تعليق