البت انتيمتى بقت ماما

السلام عليكم

من يومين كدا وانا قاعدة فى أمان الله لاقيت التليفون بيرن تيريرن تيريرن ..مين يا ترى ؟؟؟ دى خديجة عايزاكى على التليفون أوك قمت وسلمت عليها ووحشانى وكل سنة وانتى طيبة وفجأة باربى أنا جبت "لارا" تيرارا را !!

ساعتها حصلى حاجة غريبة رغم انى كنت عارفة انها كانت حامل وفى الشهر التاسع والمفروض انى متوقعة

انها تجيب البيبى فى اى وقت الا انى اول ما سمعت منها انها ولدت وسمعت صوت

البيبى بتعيط لاقيت عينى مدمعة بقيت حاسة بحاجات ملخبطة ..مش عارفة..فرحانة

ومذبهلة ومتنحة وعايزة اتنطت من كتر الفرحة..بقيت مش مصدقة ان خديجة

صاحبتى بقت أم .. ولاقتنى بفتكر واحنا فى الجامعة وقاعدين فى المدرج صغنطتين كدا واحيانا واحنا

مزوغين من المحاضرة واحيانا متأخرين على المحاضرة ودكتور سليمان يبقى داخل

قبلنا بدقيقة وميرضاش يدخلنا المدرج .. واحيانا بنضحك ونهيس ونتريق على كل

الناس وكله كوم وفلفلة كوم تانى..هههههه دايما كنت أكسل أخرج معاها نفطر فى فلفلة

واحب افطر فى الكافيتيريا بتاعة الكلية اللى كانت زمان اسمها " كا فيتيريا مشهور"

وبعد كدا بقت " كافيتيريا ميدو" وهى تحكم دماغها وتصمم اننا نخرج نفطر بره الجامعة

ونروح لحد فلفلة وطبعا كنت بسمع الكلام زى الشطورة وبخرج معها..ونفضل ترغى طول

الطريق وهى تحكيلى عن فيصل جوزها حاليا لما كان متقدم لها ونقعد نرغى ونحكى كتير كتير.. وللا بقى

لما نتأخر على المحاضرة وعشان نرضى كبرياءنا ونعمل نفسنا مجتهدين نقوم طالعين

المكتبة قال يعنى الاجتهاد كان واخد حقه معانا.. وفى احيان تانية نفضل قاعديدين جنب

بعض فى حالة صمت غريب وكل واحدة سرحانة فى حاجة واحيانا نكون سرحانين فى

نفس الحاجة ومتضايقين من نفس الشىء وعندنا نفس التبريرات :) ربنا يباركلك يا خديجة فى بنوتتك العسولة ويجعلها بنت صالحة يارب

وعقبالى هههه لما اتجوز اولا وبعدين ابقى أم ثانيا بجد دى أمنية كبيرة اوى ليا

نفسى يبقى عندى بيبى بتاعى أنا ..بس يكون أمور واقعد اشتريله لعب

كتيييييييييييييييييييير كتيييييييييييييييييير وبالمرة أعلمه الالمانى واخد فيه ثواب ههههههههههههه