خبر قرأته الصبح على المصرى اليوم مش عارفة إذا هيكون بيهم حد وللا لاءة بس الخبر بعنوان " صرة من الدنانير" ومحتواه بيتكلم عن ان يوم 15 فبراير هيكون اخر يوم للتعامل بالربع جنية والنص جنية الورق بمصر.. يعنى اللى معه عملات من النوع دا يتخلص منهم بأسرع وقت ممكن!
خبر تانى قرأته فى جريدة دى فيلت الالمانية عن الممثلة أنجيلينا جولى وعن رغبتها الملحة فى انها تنجب طفلاً أخر فى أقرب وقت ممكن .. وللى مش عارف يعنى ان أنجيلينا عندها أربعة أطفال بالتبنى وطفلين توأم لسة جايين للدنيا فى شهر سبعة اللى فات.. يعنى كدا الست أنجيلينا عندها ستة أطفال اللهم لا حسد وكانت مصرة جداً انها تبقى حامل فى الوقت الحالى لكن الدكاترة قالولها لازم ترتاح سنة على الاقل قبل انجاب طفل جديد.. قارنوا حالتها بحال مصر اللى بتدعو الجميع لعدم انجاب أكثر من طفلين وواجعين دماغنا بالزيادة السكانية وهم هناك عندهم أزمة مالية مطلعة عنيهم لكن ما شاء الله شغالين الله ينور بالستة والسبعة ومع ذلك مبيعانوش من أزمة سكانية!!
!!!
خبر تالت بقى قرأته برده فى المصرى اليوم بس موتنى من الضحك.. الخبر بيقول انك لازم تغير تليفزيونك خلال ست سنوات وتجيب تليفزيون جديد حتى لو كنت لسة شارية دلوقتى.. تفتكروا ليه؟! عشان سعادتك تقدر تشوف القنوات الارضية المصرية !! يا سلام إذا الناس بيشتروا دش عشان يهربوا من تخلف القنوات الارضية.. سؤال كدا على ماشى: هو لسة فى حد بيتفرج على القنوات الارضية أصلاً؟؟
15 comments:
الخبر ابو ربع ونص جنيه ده ايه مدى حقيقته
عشان دى العمله اليى ساريه المفعول معايا
اما القتليفزيون فلا دش ولاا ارضى الواحد مش فاضى يبص لنفسه فى المرايه
اما انجلينا يعنى انتى يا وافز عايزه واحده متجوزه براد بيت تعمل ايه
غير انها تتمنى انه يكون عندها دستتين عيال منه
بعدين احنا معندناش ازمه سكانيه قد ازمتنا النفسيه
والله البلد دى تضحك
بالنسبة للربع او النص المواصلات هما اللى بقوا ياخدوا الفئة دى...غير كده اشك انها بتتداول...هههههههههههههه
* هناك بيخلفوا كتييييييييييييير ....بس بيموتوا فى الحروب اللى فاتحنها فى كذا مكان فمش فارقة معاهم ^_^
*اخر خبر ولا اكنى قريته :D
ازيك يا باربى
بجد صدمنى خبر الربع جنية والنص جنية ده
يعنى المواصلات هتغلى بقى على كده
لان السواقين مابيرضوش ياخدوا الربع جنية المخروم ولا النص جنية المعدن كمان
ربنا يستر ده الربع جنية ده بالذات ليه مكانة كبيره قوى عندى ومعزة خاصة
لسه واحده صحبتى امبارح كانت عندى وبتقولى انتى جبتى دش ليه دى القنوات الارضية طوروها وبقت غير زمان
وقصائد مدح فى الارضى فى الاخر قولت لها معندناااااش ايريال
اولا .. يعنى كده المفروض نتخلص من الفلوس اللى معانا ..:d
وبعدين موضوع الانجاب ده المفروض فعلا يقل
شوفى فرق المعيشه بين هنا و بين برا عامل ازاى ..
و طبعا لاء .. محدش بيتفرج على القنوات الفضائيةةةةةة
mahasen saber:
الخبر بتاع الربع جنية منشور فى المصرى اليوم يعنى هم المسئولين عن صحة الخبر.
أما التليفزيون: فباين عليك مشغولة كتير مش من الناس الفاضيين أمثالى :) الله يكون بعونك.
عمرو فكرى:
:)
برنسيسة:
أحياناً بحس انى ناقمة على البلد واللى فيها بس احيانا بحس انها جميلة اوى
مشمش:
طب يلا طلع كل اللى محوشه واصرفه فى المواصلات عشان تخلص منه ومتنساش تشترى حصالة جديدة عشان العملات المعدنية الجديدة:)
..
بالعكس القاعدة الاساسية هناك هى انهم مبيخلفوش كتير ويمكن مبيخلفوش أصلا بس حالة انجيلينا حالة فريدة من نوعها
لونلى:
لما يعرفوا انها اتلغت هيرضوا ياخدوها غصب عنهم متضايقيش نفسك:)
..
هههههههه حلوة فكرة الاريال دى والله ضحكتينى.. انا معتقدش ابداً ان القنوات العقيمة دى ممكن تطور
كات روز:
المستوى المعيش مش قليل هنا بسبب الانجاب الكتير .. بصى للصين وشوفى عدد سكانها وقارنيها بينا هتعرفى ان الفرق مش فى الانجاب نهائياً.. باين عليكى مبتحبيش الاطفال :)
قريت الخبر بتاع الدنانير بصراحة الفلوس الورق شكلها يعر - من عار - ودلوقت ممكن حضراتكم تلاقو خمسين قرش محروقة من النص .. في مرة كنت بشتري طعمية وبتاع الطعمية بص في الخمسين قرش وبصلي بصه غريبة ونفخ زي ميكون عملت فيه عملة انا بجد ملاحظتش انها محروقة لان الحرق كان خفيف فلما شفت خمسينات كتير بالشكل ده قلت في نفسي دي اكيد ظاهرة وسألت عن السبب من اهل الخبرة واليكم السبب وهو ان الجماعه الحشيشة بيعملوا قرش الحشيش بالخمسين قرش وبكده عرفت ليه بتاع الطعمية بصلي بهذه الطريقة
يعنى انا محوشة فلوس كتير وكلها ورق جنهات واربع وخمسينات يعنى
ارميهم بقى ولا ايه وتضيع عليه التحويشة
..................
غير كده ان هو احنا اصلا عندنا قنوات أرضية تتشاف بعد الشر دا كفاية المذيعات اللى تسد النفس
حاجه ارف والله
ايه كبت الحريات دا
.......................ز
صـدى اختنـ سندريلا ـاق
سبحان الله لسة كاتب برضة موضوع عن العملات الورقية والمعدنية بس الجنيه بوجه الخصوص
اما بالنسبة للزيادة السكانية هانروح بعيد ليه؟
ما الهند عندهم ارانب....بينتجوا عيال مش بيخلفوهم
وبسم الله ما شاء الله في ازدهار وتقدم
الزيادة السكانية دي حجة البليد ليس الا
تحياااتي
الخبر بتاع الربع جنيه ده
لو جد يبقى كارثه
إرسال تعليق