أفضال عمرو خالد عليا كتير

أعتقد إن الاستاذ عمرو خالد أفضاله على كتير من جيل الشباب دا.. وأنا بأعترف إن أستاذ عمرو خالد أفضاله عليا أنا كتير أوى أوى.. ليه كل لما يجى يعمل خير توقفوه؟ وليه كل لما يلتف حواليه الشباب تطردوه؟؟ وليه منع برامجه من على الفضائيات المصرية أصلاً.. ونرجع ندعى ونقول إحنا دولة ديمقراطية!! طيب يعنى إيه ديمقراطية فى دولة الفساد فيها باقى والخير فيها بيتهاجم بالشكل دا؟؟

شوفوا عندنا كام قناة فضائية عربية مليانة بالعرى والخلاعة والأغانى اللى كلها إيحاءات جنسية ؟؟!! كاااااام؟؟ عددهم أد إيه؟؟ وشوفوا فى المقابل فى كام قناة دينية متشددة مبتتكلمش غير على اللحية والنقاب واللبس الأسود ويتتكلم عن أهمية إن البنات يبقوا متخلفين وميكملوش تعليمهمظ؟؟ فضائيات مليانة ببرامج كلها صراخ ونواح فقط دون أن تجذب الشباب إلى فعل الخير والى تحويله إلى واقع عملى!!

ولما يجيلنا دعاة جدد محترمين أمثال الأستاذ عمرو خالد ومصطفى حسنى نلاقى الكل شد الهجوم عليهم وكأنهم عملوا كبيرة من الكبائر.. كل دا ليه؟؟ لما الاستاذ مصطفى حسنى عمل حلقة البدعة الاف الناس هاجموه.. وطلعوا فيه هو نفسه البدع.. أنا بقول لكل اللى هاجموا أستاذ مصطفى حسنى كلكم غيرانين منه.. موتوا بغيظكم .. كل ما بتهاجموه بردوا بتزادا شعبيته وبتعملوا له دعاية أكتر لبرنامجه" خدعوك فقالوا"

وأستاذ عمرو خالد الانسان المحترم اللى شغال فى التنمية بالإيمان واللى ملتف حواليه ملايين الشباب فى العالم العربى المتعطشين لإصلاح أنفسهم ومستعدين لفعل الخير كمان منعتوا برنامجه من الظهور على الفضائيات المصرية فى رمضان.. الله حرام عليكم.. قال يعنى مفيش فضائيات تانية غير مصرية.. ما أكثر الفضائيات المحترمة اللى ممكن تتبنى برنامجه.. أنا من طقوسى الثابتة فى رمضان إنى أصلى التراويح ولما أرجع من الصلاة أتفرج على برنامج عمرو خالد ..وأكيد مش أ،ا بس أكيد فى زيى الملايين اللى بيستنوا برنامجه فى رمضان.. ودا أكبر غباء من التليفزيون المصرى انه يمنع برامج استاذ عمرو خالد..

لما سمعت خبر منع برنامجه فى رمضان قعدت أفتكر زمان من أيام ثانوى يعنى من حوالى 8 سنين لما كنت فى سنة تانية ثانوى وكنا فى حصة الدين ومدرس الدين كان بيكلمنا فى وسط الحصة عن شريط سمعه من أستاذ عمرو خالد ودى كانت أول مرة فى حياتى أسمع اسم عمرو خالد وبعد كدا بقيت أسمع له وأشوفه فى التليفزيون.. ساعتها مكانش عندنا دش وكان من الأسباب اللى خلتنا نجيب دش هو اننا عايزين نشوف برامج عمرو خالد..

وسنة ورا سنة بقيت متابعة برامجة وكلنا فى البيت كدا..

ولما قعدت أفتكر أنا اتعلمت من عمرو خالد ايه.. لاقيتنى بقول لسة طوييييييييييييييييله أوى اتعلمتها من برامجه..عرفت إن أفضاله عليا كتير

اتعلمت من عمرو خالد

1_ أهمية صلاة الفجر.. لأنى مكنتش بصليه فى معاده.. كنت بصليه لما أصحى.

2_أهمية صلاة الضحى

3_ الأذكار

4_إزاى اختار شريك حياتى..وطبقت كلامه لما جيت أختار خطيبى من غير ما أقوله ههههه

5_ حدود العلاقة بين المخطوبين

6_ اتعلمت أبوس إيد ماما

7_العفو عند المقدرة

8_ ما أتنازلش عن حقى

9_أكون مسلمة شيك ومش معنى التدين ان الواحدة تكون مبهدلة فى نفسها

10_عرفت ان سيدنا محمد كان بيحب زوجاته وبيلعب معاهم ودى كتير منننا ميعرفوهاش وفاهمين ان الدين هو عبوس وكراهية

11_ صلاة القيام ولو ركعتين

12_ الدعاء والالحاح فى الدعاء

13_ أحب شهر رمضان وأستناه واستعد له من سنة لسنة.. بعد ما كان رمضان عندنا هو نوم وتليفزيون وأكل بعد الفطار وحلويات وبس

14_ اتعلمت أحط نية كويسة وانا باعمل أى حاجة عشان أثاب عليها.. يعنى لو حضرتلهم الفطار فى رمضان أحط نية إفطار صائم.. ولو جهزت الغدا فى غير رمضان أحط نية بر الوالدين عشان اخد ثواب حتى على تحضير الأكل.

15_ أهمية صلاة الجماعة مع أهلى بالبيت.. مكناش بنصلى جماعة أبداً ودلوقتى بقيت لما أجى أصلى أنادى أى حد منهم يصلى معايا.

16_ الصبر

17_مناجاة ربى

18_أكون قوية طالما معايا الحق

19_ أهمية القراءة.. ولو كانت حتى بسيطة

20_ قراءة ورد من القران

اتعلمت حاجات كتير أوى .. لو قعدت أعدهم مش هخلصهم

وفى النهاية مفيش بإيدى حاجة أساعده بيها غير انى أدعى لأستاذ عمرو خالد بإن ربنا يفرج كربه وياريت كلنا ندعيله.. لأن أفضاله على ناس كتيييييييييييييييييييير