السلام عليكم
بالرغم من انى مبفهمش كتير يعنى فى الكورة بس تابعت كل ماتشات منتخب مصر فى الدورة الافريقية دى .ماعدا ماتش واحد بس
وامبارح كان الماتش أكثر من رائع..كنت فرحانة أوى وخاصة لما شفت بعد الماتش لقطات من الشوارع المصرية بعد الماتش مباشرة وفرحتهم والاعلام والاغانى..حسيت ان شعبنا طيب اوى بجد والله شعب مفيش أطيب منه..بيستنى أآ حاجة ولو صغيرة عشان يفرح وينشى همومه ومشاكلة وقسط التلاجة وقسط البوتاجاز وازمة رغيف العيش اللى بقى شبة كحك العيد..الف الف مليون مبروك لمنتخب مصر ولكل المصريين..
عجبنى أوى الجول اللى جابه ابو تريكة بمساعدة زيدان..واستبسال زيدان فى انه يفضل معه الكورة ويشوطها حتى وهو واقع على الارض..عجبنى كمان لعب زكى ..كان جامد جدا..أما عصام الحضرى بقى فدا مشكلة كل لما أشوفه افتكر الاسد أو النمر ما شاء الله عليه ..أحسن واقوى حارس مرمى شفته فى حياتى..بيعجبنى أوى تركيزه وانه عارف الكورة اتجاهها ازاى ويبقى واقف مستنيها..ويمسكها..واللى ضحكنى بجد لما طلع الحضرى فوق الشبكة وقعد يرقص ويطلع لسانه لجماهير الكاميرون..ههههههههههههه..وأحلى حاجة كمان انهم بطول الدورة الافريقية كل لما يجى جول يسجدوا كلهم فى مشهد رائع وامبارح كملن لما سجد معاهم حسن شحاتة ..مشهد جميل اوى..ويهز القلوب
الف الف مليون مبروك للمنتخب المصرى الهايل واللى فرح الشعب الغلبان دا..
بجد لو كل واحد عمل اللى عليه وخد باله فى شغله بالشكل دا هنبقى أحسن أمة فى الدنيا..وأنجح ناس على رأى إعلانات موبينيل..بس يا سلام بقى لو تكون الرواتب بالالافات كدا والهدايا بالملايين زى اللاعيبة عشان نعرف نركز كويس فى شغلنا ونعمله بضمير بجد..
5 comments:
الف مبروك فوز الابطال امبارح
تصدقوا رغم اني بش مصريه بس حسيت وكأني جزء من الشعب ده ..حسيت اني انعجنت بروح الطموح والهمه الي تميز هذا الشعب الراقي اكثر من اي شعب اخر فعلا
ان ينصركم الله فلا غالب لكم.......
ده الي كنت بردده امبارح لما شوفت الهدف ولما شوفت الاعبين وهما بيخروا ساجدين لله ..فعلا فعلا دول قدوه لينا في الاجتهاد والاخلاق والدين
ياريت نلاقي امثالهم بباقي المجلات ..
هي بس نقطه وحده حبيت اني انبه عليها
اياكم والغرور بنجاحكم يأيها الشعب الرائع..لان ده يمحي اي حاجه حلوه حتعملوها
فعلا كان ماتش جامد واداء روووووووووعة , انا برده ماليش فى الكورة خالص , بس ادمنت الكورة فى الاسبوع دا , وايه السعادة اللى الشعب كان فيها دى , مش ممكن على الجمال فعلا
وحدة حبيت ماتش امبارح:
منورة المدونة
وشكرا على الكلام الجميل اللى قولتيه على الشعب المصرى..دا من زوقك ورقتك ..الجميل ان معظم الشعوب العربية كان عندها فرح بسبب الماتش دا ورافعين اعلام مصر
بجد كان احساس حلو اوى
موحة: المدونة نورت بيكى
بقالك زمن مدخلتيش هنا..انتى كمان حبيتى الكورة فجأة زيى..ايوة يا بنتت احنا بنتفرج على المهم بس وهو دا التميز هههههههه..اخر جملة انتى كاتباها محسسانى انك معلقة رياضية يا موحة باين التعليق اثر عليكى..يارب تكونى ماشية كويس فى الشغل
الموضوع اننا بقينا فعلاً بننتظر أي فرحة عيد ينسينا البهدلة أللي أحنا فيها وفوز مصر كان حاجة وحالة حاجة مشرفة وحالة لأني تابعت الجمهور العربي كله لقيته فعلا بيشجع مصر نفسي التشجيع يوصل لمرحلة أو محطة تانية غير الرياضة وهي فرص العمل ، تكاتف أقتصادي توحيد العملة ومايتبعه من توحد الأفكار بحلم أشوف قطار يربط كل اقطار الوطن العربي المنعزل من المغرب حتى أبواب تركيا
حالة تمني
بالنسبة لسؤال مصاريف الكلية في منتدى جامعة أون لاين زيادة المصاريف على الكل في حقوق أسكندرية مثلا كانت 33.75 أصبحت 75.75 لفترة وجيزة وأصبحت هذا العام 115.75 وده أنتظام غير الكتب والكورسات وي وي ........
إرسال تعليق