شفتوا إعلان استرجل؟؟

أقل ما يوصف به إعلان زى دا هو انه اعلان مستفز هو مش اعلان واحد دول مجموعة اعلانات لنفس المنتج وبنفس الشعا ر..والشعار هو " استرجل" يعنى الرجولة زى ما جه فى الاعلان هى انك تشرب المنتج بتاع الشركة دى ولو مشربتوش متبقاش راجل واصحابك يبصولك بصه مش كويسة كأن عدم شربك للمشروب دا هو انتقاص من رجولتك.. والاعلان المستفز بجد هو اللى فيه بنت ماشية وواحد مبيشربش المنتج المعلن عنه دا وبيقول دى شخصيتها حلوة.. واصحابه اللى بيشربوا المنتج دا بيبصوله بإحتقار عشان بيعلق على شخصيتها وبيتقالو استرجل واشرب كذا وشخصية البنت اخر حاجة تعلق عليها.. والله أعلان سافل.. بيفكرونى بالحاجات اللى كنت بشوفها فى الافلام بتاعة زمان .. لازم تشرب سجاير عشان تبقى راجل واللى ميشربش اصحابه يتريقوا عليه ويقولوله " انت خايف من ماما" .." استرجل" .. ونفس الشىء الانسان اللى مبيعملش علاقات نسائية محرمة اصحابه يقولوله .." انت خايف من مراتك بقى؟" " متسترجل" .. الرجولة بدل ما كانت شىء بيعنى الاحترام والنخوة والشهامة والاخلاق بقت بتعنى انك تبص وتعلق على جسم البنت مش شخصيتها وانك تشرب سجاير ومخدرات وتعمل علاقات نسائية متعددة محرمة.. كل دا أصبح بيتعمل تحت مسمى الرجولة!! الله على مفهوم الرجولة اللى بقينا نشوفه دلوقتى!! ونعم الرجولة