غزة تحترق بذنوبنا

كلنا شايفين اللى بيجرى لغزة كلنا بنشوف كل يوم كم طفل بيتقتل وكم إمرأة بتستشهد وكم شاب ورجل بيستشهد كلنا بنتوجع مائة مرة فى اليوم عشان أهل غزة ( دا بغض النظر عن كوننا متفقين وللا مختلفين مع حماس) لكن فى النهاية موجوعين عشان اهل غزة والعذاب اللى هم عايشينه كلنا نفسنا نعمل حاجة نساعدهم بيها اللى انا حاسة بيه هو انه يمكن يكون اللى بيجرالهم دا بذنوبنا كعرب نسينا اننا مسلمين نسينا ان دينا بيوحد مش بيفرق نسينا ان نبينا واحد وقراءننا واحد وربنا واحد

وافتكرنا بس مصالحنا الشخصية ولقمة عيشنا كل دولة بتلقى بللوم على الدولة التانية كل دولة طالعة تقطع فى اختها

ونفس حال الدول العربية هو هو نفسه حال الناس داخل الشعوب نفسها بجد احنا بقينا وحشين جدا وكلمة احنا يعنى كلنااااااااااااااااااااااا كلنا عارفين إننا مش صح ولو مكناش شايفين كدا يبقى دا فى حد ذاته غلط أكبر

**شوفوا حال الناس فى الشوارع وشوفوا تصرفاتهم .. محدش طايق حد .. ومحدش بيحترم حد.. ومحدش بيراعى حد.. كله بياكل فى بعضه.. **شوفوا وقت الاذان مين بيجرى على المسجد يصلى دا حتى فى رمضان كانت وقت صلاة التراويح والقهاوى مليانة بشر والناس رايحة وجاية تعاكس فى خلق الله.. دا كان بيحصل فى رمضان .. فى شهر الصيام فما بالكم بحال شوارعنا بعد رمضان ** شوفوا تساهلات البنات والشباب فى تصرفاتهم مع بعض سواء فى الجامعة أو فى أماكن العمل ** شوفوا كم راجل بقى لسه فاضل فى كاااام بيت عربى.. راجل يعنى راجل بجد.. بيخاف على أهل بيته وبيحافظ عليهم وعارف كويس انه هيتسأل عنهم يوم القيامة.. عارف انه ميصحش يسيب ولاده مشغلين قنوات أغانى ليل ونهار لدرجة ان يجيلهم لا مبالاة ويبقوش عارفين ايه الصح وايه الغلط وايه الحرام وايه الحلال وبعد كدا يكبروا ويطلعولنا شباب مش محترمين بيستحلوا معاكسة بنات الناس فى كل مكان ** شوفوا بلادنا لسة فيها كاااام راجل بياخد باله من لبس بنته وهى خارجة من بيتها وكم أم بجد بتقول لبنتها يا بنتى دا حرام ودا حلال ** شوفوا كااام رب أسرة بيعلم ابنه انه يغير على اخته ويحافظ على امه ويبعد عن كل شىء حرام ** شوفوا غيرة وحسد الاخوات والاقارب على بعضهم البعض داخل العائلة الواحدة بقى أد ايه ** شوفوا كمية الجرائم والقتل والاغتصاب والسرقة اللى بقت موجودة بشكل يومى فى الجرائد لدرجة انى بقيت حاجة انى فى بلد غير بلدى احنا كلنا جوانا حاجات كتير غلط عايزة تتصلح محتاجين نصلح نفسنا عشان ربنا يعزنا من جديد يا جماعة ربنا بيقولنا فى القراءن" إن الله لا يغير ما بقوم حتى يغيروا ما بأنفسهم"

يلاااااااااااااااااااااا يا بنات نغير من نفسنا ونخلى بالنا من تصرفاتنا وعباداتنا ولبسنا وننضف نفوسنا من جوانا.. يا بنات لازم نحاول نتغير ونبقى صح دا لو انتم بجد عايزين تساعدوا أهل غزة .. نغير من نفسنا عشان ربنا يغيرلنا حالنا ويرجع لنا كرامتنا !!

يلااااااااااااااااااااا يا شباب كل واحد بيقرأ الكلام دا أرجوه يأخد عهد على نفسه أنه مفيش سجاير ومفيش مخدرات ومفيش معاكسات ومفيش قنوات ومواقع إباحية.. خد عهد على نفسك تبقى راجل بجد.. دا لو أنت فعلاً عايز تساعد أهلك فى غزة اللى بيستشهدوا كل لحظة.. هاااااااا لسه مش قادر تتخلى عن أغلاطك وهفواتك.. هقولك شوف الأطفال إزاى متقتلين ومتبهدلين فى غزة.. شوف أد إيه ربنا مخليك عايش فى نعم كتييييييييير وقادر تخرج وتشم هوا وتروح جامعتك وقادر تنام من غير ميكون حواليك أصوات ضرب نار وتكون خايف تنام لحسن متقمش تانى .. شوف الشباب اللى أدك فى غزة ازاى مترمين قتلى على الارض.. واعرف انك فى نعمه وقول الحمد لله وحاول تكون صح وتغير من نفسك عشان ربنا يغيرلنا من حالنا اللى بقى يكسف متنسوش الأيه دى "إن الله لا يغير ما بقوم حتى يغيروا ما بأنفسهم"