أمريكا وللا اليابان؟؟

كنت بلفلف كدا على النت فقرأت عمود فى النيويورك تايمز كاتبه الكاتب توماس فريد مان فى أول الموضوع لاقيته بيقول ان اليوم الفلانى كان أسوأ يوم فى حياتى وقعد يحكى عن زيارة له لليابان.. قلت لما نشوف ايه اللى مزعله من اليابان.. طلع انه غيران من اليابان وشايف ان اليابان بلد متقدمة شوية عن أمريكا.. تخيلوا غيران من ان فى بلد بلد واحدة متقدمة شوية عن بلده.. الغيرة بتاعته توجع اى حد عايش معانا فى دول العالم التالت او يمكن وصلنا للعالم الرابع والخامس كمان..دول ازمة رغيف العيش .. توماس فريدمان شايف ان أمريكا عندها مقومات النجاح.. عندها تعليم كويس وجامعات من أحسن جامعات العالم وخريجين متفوقين فى مجالاتهم على مستوى العالم وبيسأل فى الموضوع بتاعه طب ليه اليابانيين اتقدموا أكتر من أمريكا.. وبيقول أن يمكن يكون السبب سوء تفكير من الامريكان فى انهم بيسمحوا للناس تهاجر لأمريكا ويعيشوا ويتعلموا عندهم أحسن تعليم على أعلى مستوى بالعالم وبعدين يسمحولهم انهم يرجعوا بلادهم فبالتالى الناس دى بعد لما بترجع بلادها بيستخدموا العلم اللى بيتعلموا فى أمريكا عشان يطوروا بلادهم ويخلوها منافسة متقدمة لأمريكا نفسها وهو شايف ان دى غلطة المفروض الامريكان ميسمحوش لحد بيتعلم عنهم انه يرجع يستخدم علمه اللى اتعلمه عندهم ويطور به بلاده.. طبعاً منطق شرير من كاتب المقال وفى أنانية وغيره واضحة لكن برده مش دى النقطة اللى مضايقانى.. لان النقطة اللى ضايقتنى هو انه شايف ان امريكا اللى هى امريكا اللى العالم كله بيقف لها تعظيم سلام فى بلد وااااحدة متقدمة عنها شويييييية!!!!!!