فلانتين بقى وبتاع

بقيت احس فعليا ان المصريين بقوا يستنوا كل لحظة تفرحهم بكل شوق.

ويمكن يكونوا بيعدوا الايام والليالى والثوانى عشان تيجى اى لحظة ولو مدتها دقايق معدودة عشان تفرحهم.

يقولوا حلال يقولوا حرام مبقتش قضيتهم.

المهم ايه اللى يفرحهم.

ويمكن بعدها يقعدوا يسألوا نفسهم:ياترى هيجى يوم تانى قريب يفرحنا؟؟ جميل أوى التعبير عن الحب بهدايا والوان حمرا وقلوب وبلالين وكلام وأغانى

بس الاجمل اننا نحب بعض بجد

ومتتحولش علاقاتنا الى تعبيرات ورموز مادية بحتة عشان ميفقدش الحب جماله

طب ايه اللى هيحصل لو حبيبك او حبيبتك مجبلكش او مجبلكيش هدية فى اليوم دا؟ ايوا يعنى هتتصرفوا ازاى يعنى؟؟ عمرى ما فكرت احتفل بعيد الحب خالص

انا فاكرة موقف طريف كل ما يجى عيد الحب افتكره واقعد اضحك على نفسى

كنت فى سنة اولى فى الجامعة

ومكنتش اعرف ان الحب عاملينله يوم بيحتفلوا بيه وبيلبسوا احمر وبيشتروا هدايا والحاجات دى

وانا من ساعة ما اتولدت بموووت فى اللون الاحمر

فكانت صدفة انى كنت لابسة احمر فى اليوم دا

وطول ما انا ماشية للجامعة لاقية ناس لابسين احمر وماسكين ورد احمر وانا ماشية فى قمة الاذبهلال

ومش عارفة فى ايه

ولما قربت من الجامعة لاقيت ناس كتير بيبيعوا ورد احمر وعليهم زحمة كتييييييييييير

كل دا وانا مش مستوعبة ايه اللى حصل

وبسأل نفسى هو الربيع جه بدرى وللا الناس بقت رومانسية فجأة وللا فى ايه؟

ولما دخلت السكشن بتاعى لاقيت اصحابى بيبصوا للاحمر اللى انا لابساه وبيقولولى ايوا يا عم!!!!!!

وانا مشششششششششششششششششش فاهمة بردوا

بحسبهم معجبين بشياكتى واناقتى كالعادة يعنى :) بس العبط ليه ناسه بقى!!:) المهم فى الاخر قالولى ان اليوم دا عيد الحب وافتكرونى ساعتها مرتبطة بقى وعايشه قصة حب وانا كنت زى الهبلة

مش فاهمة هم بيقولولى كدا ليه

وبعد ما فهمت قعدت افهمهم انى اصلا مكنتش اعرف وبصراحة كان شكلى عبيط اوى

ورجعت البيت بقول لاختى الصغيرة ..الناس كلها لابسة احمر النهاردة

لاقيتها ما شاء الله عليها فاهمة ومش مصابة بالطفولية اللى كانت عندى وقالتلى ايوا النهاردة عيد الحب

ومن ساعتها مبقتش البس احمر فى الفلانتين

حتى بعد ما اتخطبت بطلت الاحمر فى اليوم دا لان حبى لخطيبى مالوش علاقة ولا باحمر ولا بأخضر

احنا كل ايامنا فلانتين..(من غير حسد يعنى..انا عارفة ان فى عيون مدورة شوية) ربنا يجعل ايام الناس كلها حب وورود ودباديب واحمرات واصفرات واخضرات ويارب نقدر نحب نفسنا ونتصالح معها قبل ما نحب غيرنا

لاننا اذا كرهنا نفسنا هنكره غيرنا ومش هيبقى قلبنا فى حب لحد

ياريت كل واحد يقف مع نفسه وقفه ويسأل نفسه اذا كان بيكره حد او بيتمنى زوال الخير من عند حد؟وهل حصل فى

مرة كان قلبه جواه حقد وضغينة على حد وهو مش حاس انه ماشى فى الطريق دا

والله اعرف ناس بتغير من بعض لدرجة انها بتضايق من فرح غيرها..الغيرة ليها درجات..ياريت نفرمل نفسنا قبل ما

توصل الغيرة الى حقد

طب واللى قلبه مليان غيرة وحقد على غيره ازاى يقدر يحب ويقول كلام حلو لشريك حياته

اكيد الكلام دا بيقى كدل ونفاق والحب دا مبيبقاش صادق وربنا مش بيبارك فيه..

حاسة انى دخلت فى نقط كتير جوه بعضها يارب مكونش لخبطكم

أبو تريكة

السلام عليكم بالرغم من انى مبفهمش كتير يعنى فى الكورة بس تابعت كل ماتشات منتخب مصر فى الدورة الافريقية دى .ماعدا ماتش واحد بس وامبارح كان الماتش أكثر من رائع..كنت فرحانة أوى وخاصة لما شفت بعد الماتش لقطات من الشوارع المصرية بعد الماتش مباشرة وفرحتهم والاعلام والاغانى..حسيت ان شعبنا طيب اوى بجد والله شعب مفيش أطيب منه..بيستنى أآ حاجة ولو صغيرة عشان يفرح وينشى همومه ومشاكلة وقسط التلاجة وقسط البوتاجاز وازمة رغيف العيش اللى بقى شبة كحك العيد..الف الف مليون مبروك لمنتخب مصر ولكل المصريين.. عجبنى أوى الجول اللى جابه ابو تريكة بمساعدة زيدان..واستبسال زيدان فى انه يفضل معه الكورة ويشوطها حتى وهو واقع على الارض..عجبنى كمان لعب زكى ..كان جامد جدا..أما عصام الحضرى بقى فدا مشكلة كل لما أشوفه افتكر الاسد أو النمر ما شاء الله عليه ..أحسن واقوى حارس مرمى شفته فى حياتى..بيعجبنى أوى تركيزه وانه عارف الكورة اتجاهها ازاى ويبقى واقف مستنيها..ويمسكها..واللى ضحكنى بجد لما طلع الحضرى فوق الشبكة وقعد يرقص ويطلع لسانه لجماهير الكاميرون..ههههههههههههه..وأحلى حاجة كمان انهم بطول الدورة الافريقية كل لما يجى جول يسجدوا كلهم فى مشهد رائع وامبارح كملن لما سجد معاهم حسن شحاتة ..مشهد جميل اوى..ويهز القلوب الف الف مليون مبروك للمنتخب المصرى الهايل واللى فرح الشعب الغلبان دا.. بجد لو كل واحد عمل اللى عليه وخد باله فى شغله بالشكل دا هنبقى أحسن أمة فى الدنيا..وأنجح ناس على رأى إعلانات موبينيل..بس يا سلام بقى لو تكون الرواتب بالالافات كدا والهدايا بالملايين زى اللاعيبة عشان نعرف نركز كويس فى شغلنا ونعمله بضمير بجد..

مستمرة فى التخاريف

السلام عليكم يوم الاربع اللى فات كنت فرحانة جدا جدا جدا..عشان بعد أحلام وأمنيات وكلام من دا يعنى كانت أول مرة يتنشرلى أول موضوع مترجم ليا فى جريدة روزاليوسف..صحيح كان موضوع صغير والمحرر بصراحة ظبتهولى جامد .بس مكانتش فارقة معايا إذا الموضوع صغير ولا مش صغير المهم انى كنت فرحانة مووووووووووووت.مكنتش مصدقة إن إسمى محطوط عليه ومش مصدقة ان دا شغلى. الحمد لله رب العالمين.بجد إحساس جميل أوى. .................................................... .................................................... إمبارح كانت خطوبة بنت خالتو سارة الامورة ..كانت خطوبة جميلة أوى وسارة كانت عاملة شغل جامد هههههههههه.. البنت عندها عشرين سنة وكانت قاعدة تقول بقالى عشرين سنة مستنية اليوم دا ونازلة تصقيف ورقص(بنات لوحدنا يعنى مش اوبن بوفيه)..كأنها معنسة وعندها خمسين سنة ههههههه بجد ضحكتنا كلنا جامد..كانت خطوبة كوميدية جداااا..ربنا يباركلك يا سارة ويزيدك سعادة وفرحة انتى وعريسك يارب..بس مش عارفة كان هيبقى موقفه ايه لو شافك وانتى فى حالة الجنان اللى طلعتيه علينا دا..كان هيتخض وخاصة انك كنتى قدامه زى الملاك البرىء يا عينى ونزلت عليكى الرقة فجأة ههههههههههههههه .................................................... .................................................... إمبارح كانت وفاة الكاتب المحترم مجدى مهنا..ربنا يرحمه ويسكنه الجنة يارب ..بجد موته أثر فيا جامد أوى..كنت بحسه دائما راجل محترم وكنت بحب اتفرج على البرنامج بتاعه على دريم..برنامج "فى الممنوع"..وعموده الرائع فى المصرى اليوم.. بجد هنفتقدك جامد يا أستاذ مجدى..ربنا يرحمك ويرحم كل أموات المسلمين..

تخاريف كلاكيت تانى مرة

هل الطبقة العليا الاغنيا يعنى بيشغلوا نفسهم بمشاكل سياسية أو ثقافية او يتكلموا فى مشكلة زى مشكلة فلسطين وغزة ؟؟هل بيخطر على بالهم حكاية قرية القرصاية؟؟هل بيلاحظوا زيادة موضوع الاعتصامات اللى زاد فى مصر وبيزعلوا لما بيسمعوا واحد من اللى بيعملوا اعتصامات دول بيقولوا ان مرتبه 200 جنية ونفسه مرتبه يزيد؟؟ وللا الناس العادية اللى دماغها مش مشغوله بالفلوس هم بس اللى بيقعدوا يفكروا ويشغلوا بالهم بالحاجات دى عشان يلاقوا حاجة تشغلهم ويحسوا انهم مهمين وليهم رأى وكدا؟؟

كنت دائما بقول اننا من الطبقة الوسطى وان طبقتنا دى قربت تنقرض عشان مصر بقى فيها طبقتين بس وهما طبقة الفقراء وطبقة الاغنياء..بس مكنتش متخيلة ان الطبقة الوسطى دى بالفعل انقرضت!!!!!!!!! .......................................................... ........................................................... يمكن يكون ناس كتير بيعتبروا الاخوان المسلمين هم حماة الاسلام وهم اللى لو مسكوا الحكم هيعدوا البلد وينتشر العدل ويكون الحكم اسلامى ونبقى عايشين زى زمن النبى..ويمكن أكون انا مش مقتنعة بأن الاخوان مثاليين زى ما ناس كتير شايفنهم..ودائما بقول ان كلنا مسلمين ومينفعش نقسم نفسنا الى شوية اخوان وشوية مش اخوان..وكل طرف يبص للطرف التانى على ان هو اللى صح والطرف التانى غلط..الاخوان مسلمين زيهم زى أى مسلم..بس بحس انهم رغم اعلانهم انهم مش عاوزين الحكم خالص..انهم بيسعوا للحكم .. لكن الغريب ان تطلع جرايد ومجلات بشكل مستمر وتهاجم الاخوان بحجج وكلام غريب..لدرجة تحسسنى انى زهقانة ومش مصدقه ان كل الحاجات الغريبة دى الاخوان بيعملوها وكأنهم عصابة ارهابية.. ...................................................... ...................................................... لما كنت قاعدة فى البيت كنت فاكرة ان الدنيا صغيورة وسهلة وبسيطة بس لما دخلت الشغل حسيت الدنيا كبييييييرة أوى عليا..والناس مش بالشكل الطيب المثالى اللى كنت فاكراه..طلعوا بيحاربوا فى الدنيا ..بيضحكوا فى وش بعض وممكن يقولوا كلام مش كويس على بعض من ورا بعض ..وبيغيروا من بعض.. رغم انهم بيشتغلوا فى مؤسسة واحدة يعنى المفروض ان كلهم يعملوا مع بعض عشان المؤسسة دى تنجح..بس العكس هو الحاصل..وممكن يغير البعض منهم مبادئه وأفكاره ومعتقداته عشان يرضى شخص واحد رئيسه ويشترى رضاه بكلامه دا.. طب بيكون شكلهم ايه قدام نفسهم بعد لما بيعملوا كدا؟؟

غزة

قضية عارفينها وشايفنها 24 ساعة يوميا من يوم الجمعة اللى فات..وهى طبعا حكاية غزة.. وفصل الكهرباء عنهم ..وحجة إسرائيل فى الموضوع ده هو انها عاوزة تبيد حركة حماس بالكامل..طبعا مسلسل اعتقد إننا كلنا فاهمينه كويس ومش جديد عيلنا من ساعة ما اتولدنا لحد النهاردة حجج اسرائيل الفارغة.. ولكن نقطة الخلاف فى الشارع العربى الان هى حول دور مصر فى حل هذه القضية البعض يرى أنه من واجب مصر فتح معبر رفح وادخال المعونات والادوية لغزة وخروج المصابين الفلسطينيين لتلقى العلاج اللازم لهم بمصر..والبعض يرى أن مصر ليست هى المسئولة الوحيدة عن حل هذه الازمة..وأن باقى الدول العربية من الواجب القاء اللوم عليهم أيضا.. ولكن السؤال الان هل ننظر كمصريين لهذه المشكلة من منطلق دينى وإنسانى أم ننظر اليها من منطلق سياسى دبلوماسى يريد الحفاظ على الامن القومى لمصر؟؟؟؟؟ إذا كنا هننظر للموضوع من منطلق دينى وإنسانى فإنه من الواجب على مصر فتح المعبر والسماح للفلسطينيين بالدخول والسماح بخروج التبرعات من مصر لأهل غزة.. وإذا كنا هننظر للموضوع من منطلق سياسى دبلوماسى..هنقول ما الفلسطينيين لو دخلوا مصر بكدا هتكون حجة إسرائيل انها تضرب سيناء عشان هناك موجود أهل غزة..وبكدا هنلاقى مصر دخلت طرف فى المشكلة وترجع أرض سيناء محتلة زى زمان ولما يجى يوم 25 أبريل مش هتبقى مصر اليوم فى عيد وكلام من دا....بالإضافة الى إن دا ممكن يستنفذ قوى مصر وتخرب أكثر ما هى خربانة اقتصاديا وبدل ما يبقى فقر واعتصامات مسيطرين على مصر يبقى نضيف ليهم إحتلال كمان..مع الوضع فى الاعتبار إن مفيش ولا دولة عربية ساعتها هتعبرنا ولو بشلن حتى.. وإذا نظرنا للموضوع من منطلق مختلف عن هذا وذاك..هنلاقى إن لما لما حزب الله فى لبنان كانت بتضرب فى إسرائيل وإسرائيل بتضرب فى لبنان..إن النتيجة كانت إن حزب الله طحنهم رغم إنه حزب وااااحد بس من دولة كاملة ولكنه قدر يرعبهم جامد..وكان بيعتبر إن هو المنتصر فى النهاية..فيكون الوضع فى الحالة دى إن مصر تدخل فى مواجهة مع اسرائيل وتبقى ضامنة انها كدا كدا الكسبانة.. مش عارفة رأيكم ايه فى اللخبطة دى ؟؟ ............................... ............................... بعد ما الموضوع دا اتكتب بيوم أهل غزة دخلوا من الحدود ومسابولناش فرصة التفكير فى فتح أو غلق الحدود ههههه الغريب إن قبل ما الحدود تتفتح معظم رؤساء الدول العربية ( الشقيقة ) أدانت موقف مصر وبقوا يطلعوا تصريحات ويقولوا إننا لو كنا على الحدود مع غزة زى مصر كدا كنا عملنا وسوينا وساعدنا أهالى فلسطين وكلام من دا..طيب يا أخوننا ..كل دا جميل.. أدى الحدود إتفتحت..هااااااااااا كان موقف الدول دى إيه بقى من اللى اتعمل دا؟؟ ولا دولة منهم أشادت باللى أـعمل دا ولو بكلمة واحدة أممممممم طيب نيجى بقى للنقطة التانية وهى إن بردوا كلهم قالوا انهم عاوزين يساعدوا الفلسطينين بردوا جميل لكن نيجى نشوف موقفهم دلوقتى ..اهى الحدود اتفتحت فين بقى المساعدات اللى نزلت ترف على الفلسطينين منهم؟؟؟؟؟؟؟ هم دول الاخوة العرب.. ................................................. .................................................

تحديث: اول امبارح كان فى اجتماع فى القاهرة بين حماس وفتح

طيب يا ترى الاخوة الفلسطينيين انفسهم عاوزين يحلوا مشكلة غززززززززة

لا طبعا كل واحد فيهم راكب دماغه طالما ان فى دولة اسمها مصر فتحتلهم ابوابها وقالتلهم بالاحضان يا حبايبى

ازاى عاوزينا نحس بتعاطف وتضامن معاهم وهم نفسهم اصحاب المشكلة مش هاممهم اهلهم ولا بلدهم وكل واحد فيهم همه مصالح شخصية ليس اكثر.

الحل فى ايديهم ولو عايزين يحلوا المشكلة كانوا هيحلوها بس بردوا المصالح الشخصية والطمع اهم بكتير بالنسبة لهم.

شيوخ السلفية ارحمونا

إمبارح وأنا بتفرج على برنامج للشيخ محمد حسين يعقوب على قناة الناس لاقيته قال حاجة عجيبة جدا مكنتش متخيلة إن ممكن شيخ أو رجل دين يكون تفكيره كدا قال فى وسط كلامه إن بنته قعدت من المدرسة من وهى فى إعدادى وانه معجب بتفكيرها وانه فرح انه لاقى بنته بتحب قعده البيت ومش بتزهق منها وانه كمان فرحان أوى من مراته لانها مش بتزهق من قعدة البيت ولا بتقوله خرجنى ودائما هى عذراه لانه مشغول لكن السؤال هو: هل من الاسلام ومن الايمان ان البنت الكويسة هى اللى بتحب قعدة البيت ومش بتزهق منها؟ ليه شيوخ السلف بالذات بيحسسونى إن البنات أو النساء كائن من نوع خاص..ليه معاملة خاصة؟؟ يا جماعة احنا بنى أدمين بنتنفس زيكم بالضبط بنحب نخرج ونتعلم ونشتغل ودماغنا زيكم يا معشر الرجال ليه مقسمنا حزبين؟ ومين اللى قال ان حاجة حلوة ان الست تفضل قاعدة فى البيت تشتغل زى الماكنة من غير ما تقول تعبت ومن غير ما تقول زهقت ومن غير ما تقول عاوزة اخرج أشم هوا؟؟؟؟؟؟؟؟؟؟؟ أنا مش بأقصد أن الست متقمش بدورها تجاه بيتها وجوزها وأولادها لكن بردوا بقول لشيوخ السلف بالذات أحنا بشررررررررررررررررررررررررررررر

حاجة كمان: فى حديث عن الرسول يقول اطلبوا العلم من المهد الى اللحد..هل الحديث دا مخصص للرجال فقط؟؟؟

كمان كل انسان مسئول عن رعيته..يا ترى هو كدا مش مقصر فى واجبه تجاه ابنته؟؟أم ماذا؟؟

أحبك

أتسمعنى؟

أتسمع خفقات قلبى؟؟

أتسمع ما يدور بين خلجات نفسى؟؟

قلبى يرددها دوما!!

أحبك .. أحبك..

أمسيت تائهة فى ظلام لم أكن أعلم نهايته

لم أعرف يوما أننى سأحظى بمثل هذا الشعور

سرت متباطئة مترددة نحوك

كنت خائفة.. شاردة..حائرة

ولكننى أخذت قرارى

وعندها وجدت قلبى يقفز من بين ضلوعى مرددا

أحبك..أحبك..أحبك

وبعدها وجدتنى طائرة محلقة فوق كل البشر

ولدى جناحان بألوان لم أعهدها من قبل

وبلون جناحى لونت دنياى

فأصبحت أحبها وأعرف طريقى بها

وتلاشى من داخلى ذلك الشعور الذى طالما طاردنى

وكلمنى قائلا

حياتك بلا ألوان

فالان ها أنا ذا

أرد عليه قائلة

حياتى أصبحت كلها ألوان

وأصبحت أنت الغلطان