خطوبة
:
هو:هاى بيبى وحشتينى اوى؟
هى:هاى حبيبى..وانت كمان واحشنى؟
جواز:
هى:ايوة يا حسنى..انت فين؟؟مش بترد على الموبايل ليه؟
هو:ايوة يا فاطمة..خير فى حاجة؟؟
بعد الانجاب:
هى:مع السلامة يا ابو على متتاخرش بقى
هو:حاضر يأم على مش هتأخر
ليه الاسامى بتتغير بعد الانجاب الى ام فلان وابو فلان
هو الزوج دا اصلا مش ليه اسم بردو وللا كان مجهول الهويه لحد ما على باشا جه الدنيا بالسلامة؟؟؟
طيب والزوجة بردوا مش ليها اسم؟؟
-عمرى ما اتفرجت على فيلم اجنبى ولاقتهم فيه بعد ما بيجيبوا بيبى يتحول اسمهم الى ام فلان او ابوفلان
كل واحد ليه اسمه..
يعنى مفيش عندهم"ام بيتر او ام جاكسون او ام كلينتون او ابو جاك!!ههههههههههه
وللا ام على دى ماينفعش تفضل يتقالها يا بيبى ويا حبيبتى
والاب بردوا ما ينفعش يتقاله يا بيبى ويا حبيبى بعد ما يشرف اخينا على؟؟؟؟؟
وللا الكلام دا مقتصر فقط فى الخطوبة وشهر العسل فقط لا غير بعد كدا بينزل عليه التخفيض
16 comments:
ههههههههههههههههههههههههههه
أنا مش عارف أمسك نفسي من الضحك
بس حقلك ياباربي
اللي إنت بتقوليه ده عادة فعلا في أغلب المجتمعات العربية
وأنا يا ما فكرت فيها ومش لقيلها حل
لا والموضة دلوقت يتقال للأم بإسم بنتها على طول
يعني اللي عندها بنت إسمها بسنت مثلا
وهي إسمها فوزية
تلاقي زوجها وصاحبتها بيقوللها
يا بسنت
عموما إحنا مالناش دعوة بالناس دي
يابيبي
إنت كنتي وحتفضلي طول عمرنا إن شاء الله حببتي
وماي بيبي
بعد كده ماتكلميش كده على علي لحسن يزعل
ههههههههههه
:)
سيبك
هي بس تعملي أم علي بالمكسرات
وأنا مش حقولها غير يا بيبي
:)
هى دى أكيد الأغلبيه طبعا
بس لسه فى ناس بشوفها بيبقى عندها عيال كبيره ولسه بيندهو بعض يا حبيبى
اعتقد الموضوع راجع للمشاعر اللى ممكن تقل او تتغير بعد الجواز وبعد الانجاب
او الناس اللى مشاعرها لسه زى ماهى ولسه بيحبو بعض زى ما يكونو مخطوبين وأكتر
وفى ناس بتفتكر ان الكلام ده عيب مش عارفه ليه
يعنى عيب لما يكون اب ويتقله يا بيبى او يا حبيبى
مش عارفه ايه وجهه نظرهم فى انه عيب بس بتبقى دماغهم متركبه كده :)
البوست جميل
وده أول تعليق ليا
بس أكيد ليا زيارات تانيه
تحياتى واحترامى
هى تقريبا تغيير وكسر الرتابة فى العيشة والحياة
اهو تغيير ...بس انا هينادونى بأبو مشمش :D
بس بتبقى جميلة ...ابو على وام حسين ...وخالتو ام فارووق ....
تجديد يعنى
بتبقى فرحة بالسيد علي مش اكتر...او كل واحد زهىء من اسم التاني...
بوست تميز بخفة الدم
تحياتي
افكارنا العربيه بتخلينا نعتز بالأبوة والأمومه ...فالرجل بيفرح أوي لما حد بينسب له ابنه وعلشان كدا في شباب كتير بتلاقيهم مسمين نفسه ابو كذا مع انهم مش متجوزين ومش مخلفين ..أما أم كذا انا اكيد مش هخلي حد يندهلي بيها لأن عمري ما سمعت حد في عائلتنا بيندها لحد ..أممم كنت عايزة اقول حاجه كمان ..ساعات مشاكل الحياة بتخلي الناس تفقد الحب للأسف ...وتنسى الطرف التاني وانهم لازم يبصوا لنفسهم قبل ما تمر بيهم السنين..وبس خلاص
تدوينة جميلة
فعلا الاغلبية كدة بس مش كله الصراحة
فعلا
عادى يعنى
الموضوع مش بيفرق مع ام وابو على
ولو فرق مش هيتنادو بام وابو على
ومش كل الناس بتنادى بعضها كده بيتهيالى
وخلاص
شكرا
كل يغني على ليلاه
يعني من الخر الحاجات ده راجعه لهو و هى هما اليقدروا يخلوا حياتهم كلها بيبي
هى المشكلة فى بعد الحب بين الزوجين بعد الجواز وان العملية بتكون تعود بقى اكنهم اخوات يعنى وبتبقى حياة روتينية مملة بس مش دى القاعدة واى اتنين ممكن يغيروا واقعهم ده اذا حبوا بس المشكلة اننا بنستسهل ومش عايزين نتعب عشان نعيش حياة افضل
فعلا الموضوع ده حيوى اوى
دايما بحس ان الى خلف ده عمره انتهى ووجوده فى الحياه فقط من اجل اولاده
ممكن تقولي فرحة بقي بالولاد
بيتفشخروا
مش مهم بينادو بعض بايه المهم
بيعاملو بعض ازاي
والله هو في اكتر من سبب او احتمال:
ممكن جدا يكونوا خايفين على علي من المياصة....اه مش عايزينه يطلع متدلع ومتعود على بيبي والكلام دة
وممكن جدا يكون السبب ان الحياة فرمتهم وكحرتتهم تماما لدرجة ان نفسهم اتسدت عن الدلع خالص
بوست جميل
تحياتي
ياه ليكي حق
انا لسه كنت بتكلم علي الموضوع ده
و قولت اني هعود الناس ان محدش يقولي كده لما اخلف
تحسي ان شخصية الست و الراجل بتروح و بيبقوا ام فلان و ابو فلان بس في الحياه
ههههههههههه
ههههههههههه
والله ده اللي بيحصل
لا ورنة الصوت مقلكمش بتتحول بطريقة غريبة
هيه الاحبار الصوتية مش بتبقى واحدة يا جدعان
وامال السهتنة والرقة بتروح فين بعد الجواز ؟؟؟؟؟؟؟
بس والله انا شايفة اختي هيه صحيح لسة متجوزة قريب بس لسة فيه بيبي وبطيخ بتاعها ده
:D
إرسال تعليق