BLOGGER TEMPLATES - TWITTER BACKGROUNDS »

13‏/05‏/2009

حكم بمنع المواقع الاباحية من على النت بمصر

سلاموا عليكم سمعتوا عن الحكم بتاع حجب المواقع الاباحية بمصر.. موضوع جامد جدا وعاجبنى موت .. انا سمعت عن الموضوع دا امبارح فى البيت بيتك وقرأت عنه انهاردة فى المصرى اليوم.. والله اجدع حكم صدر فى مصر لحد دلوقتى .. لأن برأيى إن موضوع التحرش اللى انتشر بمصر وكتر أوى فى الفترة الاخيرة من أهم أسبابه هى وجود المواقع دى وخاصة مع انتشار النت كافيهات اللى بقت هى كمان منتشرة اوى اوى.. يعنى اللى عندوا رقابة فى البيت بيخرج يسهر عليها برة البيت.. واللى تلاقى اغلب اللى بيعملوا التصرفات القذرة دى بيسهروا طول الليل على الكافيهات دى وبعدها يخرجوا للشوارع ويبقوا عاملين زى القنبلة الموقوتة.. مستنيين بس اى انثى تعدى من قدامهم ماهم بيكونوا متعبيين بشحنة جامدة من كتر المواقع القذرة اللى بيسهروا عليها.. الموضوع دا اتطبق فى الصين والسعودية يعنى مش احنا اول ناس تعمله ودى حاجة مطمئنة بردوا .. لكن اللى مستغرباه هو الناس المعترضين على التنفيذ بحجة قال ايه الحرية وتقبل الثقافات الاخرى.. اى حرية واى تقبل واى ثقافات بيتكلموا عليها.. مش عارفة ايه منظورهم للحياة وهم بيدافعوا عن مواقع قذرة كدا؟؟ طيب واللى بيدافع وبيقول حرية وتبادل ثقافات دا لو دخل على ابنه او بنته او مراته حتى ولاقاهم فاتحين مواقع من ديه فى بيته هيكون رد فعله ايه؟؟ هيقولهم وماله اتفرجوا يا حبايبى اصل انا راجل ديمقراطى؟؟ وللا لو واحدة دخلت لاقت جوزها على موقع من المواقع دى هيكون رد فعلها ايه؟؟ ساعتها هتنادى بردوا بالحرية وتقبل ثقافات الاخر والعولمة؟؟! بجد مش فاهمة وجهة نظرهم دى جاية من اى منطلق؟؟ طيب والأعجب اللى بيقول ان فى كتير هيعرفوا يفكوا شفرات المواقع دى ويدخلوها بردوا حتى بعد حجبها دول ناس مصرين على الغلط .. مصرين طيب نعملهم ايه؟؟ طيب هم حرين فى نفسهم لكن مش معنى ان فى حبة هيفكوا الشفرات لأنهم مش محترمين يبقى نلغى الحكم خالص ونقول ما هى كدا كدا بايظة.. وللا ايه؟!

09‏/05‏/2009

دى مش بدعة ومش حرام

السلام عليكم اولاً يا جماعة ياريت اللى يدخل مدونتنا العسولة دى يعمل الاستقصاء اللى فى الجنب دا بتاع احلى كتاب قرأته فى حياتك.. ثانيا بقى اكلمكم عن حلقة برنامج خدعوك فقالوا بتاعة مصطفى حسنى.. حلقة بجد أكتر من رائعة.. هى كانت عن مفهوم البدعة وبجد كان نفسى كل الناس تشوف الحلقة لأننا عايشين فى مجتمع ما شاء الله لا نحسد عليه .. كل من هب ودب كل ما يشوف حد بيعمل حاجة تبسطه يقوله حرام دى بدعة وما أكثر الاشياء التى نسمع انها بدعة من ناس كتير حوالينا.. يعنى بجد بقابل ناس بالحياة اما منهم اللى بيحاول يقرب من ربنا بجد وبيقع فى مشكلة الفتوى بالطريق يعنى أقصد انه بيقرأله كتابين تلاتة ويسمع له كام شريط كاسيت لشيوخ من اللى بيقعدوا يصرخوا فى الشرايط دول ويخلوا حياتنا مقتصرة على كلمتين " حرام وبدعة" .. مش عارفة ليه بيكرهوا الناس فى الدين وليه بيكرهوا الناس فى القرب من ربنا .. اكيد يعنى مش بقصدهم يعملوا كدا بس اذهانهم مش عارفة بتبقى مالها .. المهم امبارح شفت حلقة من أروع الحلقات للأستاذ مصطفى حسنى الله يباركله..

خدعوك فقالوا: دي بدعة ================ هل كل شئ لم يفعله النبي يعتبر بدعة؟ هل السبحة بدعة؟ هل لبس الدبلة بدعة؟

هل يجوز الاحتفال بمولد النبي عليه الصلاة والسلام؟ لمعرفة إجابات هذه الأسئلة: شاهد الآن أحدث حلقات برنامج خدعوك فقالوا بعنوان "دي بدعة " للداعية مصطفى حسني بتاريخ 8 مايو

http://www.mustafahosny.com/multimedia.php?id=439

للتعليق على الحلقة ________________ http://forum.mustafahosny.com/sho

wthread.php?t=458

وذكر استاذ مصطفى حسنى 9 تعريفات للبدعة مما ورد عند سلف الأمة منها: أولاً البدعة لغوياً: شىء اتعمل على غير مثال سابق. 1 ـ الإمام الشافعي رحمه الله تعالى:فقد قال رحمه الله: المحدثات من الأمور ضربان:أحدهما: ما أحدث يخالف كتاباً أو سنة أو أثراً أو إجماعاً، فهذه البدعة الضلالة. والثانية: ما أحدث من الخير لا خلاف فيه لواحد من هذا، وهذه محدثة غير مذمومة ...(1) 2ـ ابن حزم الظاهري رحمه الله: فقد قال: البدعة في الدين كل ما لم يأت في القرآن، ولا عن رسول الله صلى الله عليه وسلم، إلا أن منها ما يؤجر عليه صاحبه، ويعذر بما قصد إليه من الخير، ومنها ما يؤجر عليه ويكون حسناً، وهو ما كان أصله الإباحة، كما روي عن عمر رضي الله عنه: »نعمت البدعة هذه« وهو ما كان فعل خير جاء النص بعمومه استحباباً وإن لم يقرر عمله في النص، ومنها ما يكون مذموماً ولا يعذر صاحبه، وهو ما قامت الحجة على فساده فتمادى القائل به. انتهى.

بعض الاشياء اللى فاكرينها بدع وطلعت مش بدع:: 1_ الاحتفال بمولد النبى: الامام بن حجر العسقلانى قال: فعل الشكر لله على أى نعمة بأى عبادة من صلاة أو صيام أو صدقة أو سجود أو تلاوة ليس به شيئاً.. وأكبر نعمة هى خروج سيدنا محمد صلى الله عليه وسلم للبشرية.. فلو مش عايز تحتفل بمولد النبى ص فمتنكرهاش على غيرك. 2_ استخدام السبحة: إذا أحسنت فيه النية فلا بأس فيه.. كتاب مجموع الفتاوى لابن تيمية 3_مسح الوجه بعد الدعاء ليس بدعة كتاب مسائل بن حنبل 4_ التعريف يوم عرفة: وهو الدعاء جماعة بعد صلاة العصر يوم عرفة لغير الحجاج حيث يقول الامام أحمد بن حنبل لا بأس بذلك. 5_ الفاتحة للأموات: أقره ابن تيمية وابن حنبل .. اٌقرأوا القران واوهبوا ثوابه للميت وكذلك الصيام والعبادات الاخرى 6_ الدبلة ورد بصحيح مسلم" كان خاتم النبى فى هذا وأشار إلى الخنسر بيده اليسرى" وبالتالى ليس بدعة 7_ حرماً وجمعاً بعد الصلاة: أقر النبى الدعاء والذكر بعد الصلاة فهو ليس بدعة

03‏/05‏/2009

إيه هو أحلى يوم فى حياتك؟؟

السلام عليكم أيه هو أحلى يوم فى حياتك؟؟ السؤال دا أتسأل امبارح لما كنت بأتفرج على برنامج على قناة رسالة لاقيت البعض جاوب وكانت الاجابات كلها اجابات روحانية, بمعنى انها متعلقة بالجانب الدينى.. يعنى فى اللى قال : احلى يوم بحياتى لما حفظت القران كله, وفى اللى قال احلى يوم بحياتى لما ربنا يتقبل توبتى, وفى اللى قالت لما لبست الحجاب وهكذا.. ايه رأيكم كل حد يدخل هنا يقول ايه هو احلى يوم بحياته لحد دلوقتى؟؟ ومش عاوزة حد يقولى احلى يوم لسة مجاش؟؟ اكيد كلنا مستنيين الافضل طبعاً لكن برده لازم تقول ايه هو احل يوم عيشته بحياتك لحد دلوقتى.. ومش لازم تكون الاجابات روحانية دينية.. يعنى ممكن يكون احلى يوم دا هو يوم قضيته على البحر وقت الغروب وممكن يوكن احلى يوم دا هو يوم تخرجك من الجامعة مثلاً وممكن يوكون احلى يوم هو يوم اشتغلت فيه شغلانه بتحبها وممكن يوكون احلى يوم هو يوم فرحك او خطوبتك .. فاهمينى ؟؟ انا هبدأ بنفسى: بس اجابتى هتكون منقسمة لجزئين ...... جانب روحانى دينى وجانب شخصى, أولاً الجانب الدينى فأحلى يوم هو أى يوم من أيام رمضان بقضيه فى التعبد لله يعنى عبادة بضمير من كروتيشن يعنى هههههههه,. وثانياً الجانب الشخصى هو يوم خطوبتى من سنة ونص تقريباً كان يوم عسول رغم انى كل لما اتفرج على الصور والفيديوهات احس انى كنت طفلة ومرتبكة ومتلخبطة وعملت تصرفات كتير غبية وقعدوا يضحكوا عليا .. بس بردو هيفضل يوم متميز بحياتى رغم كل لخبطته ..