BLOGGER TEMPLATES - TWITTER BACKGROUNDS »

٠٨‏/٠٨‏/٢٠٠٧

عمرك زهقت من نفسك

يمكن تقدر تنتقد اى انسان فى الدنيا..ولكن متقدرش تنتقد نفسك اكيد
وحتى لو حصل وانتقدت نفسك..هتكون غالبا بتقول الجانب الحلو فيك فقط
حتى الجانب الوحش اللى انت شايفه فيك..هتقوله برده بس هتحاول
تظهره بشكل كويس وتحوره بحيث يطلع شكلك حلو فى الاخر
لكن هل عمرك حسيت انك مخنوق من نفسك..ومش عاوزك..ورافض نفسك..وفى نفس الوقت مش قادر تتغير؟؟
دا بقى احساسى تجاه نفسى
كنت بنوته هادية ورقيقة والناس بيحسدونى على الهدوئى..
دلوقتى بقيت عصبية موووت..نرفوزة جدا
الاول لما كانت اى حاجة بتيجى تضايقنى كنت باخد الموضوع بهدوء وافكر واشوف هتصرف ازاى
دلوقتى مش بدى لنفسى اى وقت افكر فى اى حاجة
اقل تصرف من اى حد بينرفزنى واول ريأكشن بعمله هو انى بزعق
انا مش طايقانى بجد
انا عاوزة باربى بتاعة زمان ومش عارفة ارجعها تانى
وحشتنى باربى الاولى بجد..كانت عسولة اوى
ليه انا وصلت للدرجة دى؟
ليه العصبية والنرفزة المفاجأة دى؟
يمكن عشان ماما مسافرة وكل حاجة فوق دماغى؟؟
يمكن عشان خايفة من المستقبل..ومش عارفة هاشتغل ولا مش هلاقى شغل اصلا وللا هعمل ايه فى حياتى؟؟
مش عارفة بابا هيوافق على خطوبتى ولا لاءة؟؟
مش عارفة روك هيسافر ولا هيلاقى شغل هنا؟؟
مش عارفة هنلاقى شقة ولا لاءة؟؟
كل دا بالاضافة لعلاقتى المتوترة ببابا..هو عمل حواجر كتير اوى بيننا من زمان
وجاى دلوقتى عاوز يكسر الحواجز دى
بس الوقت متأخر ..متأخر اوى..انا خلاص اتعودت على كدا ومش عاوزة اغير السيستم دا ومش قادرة ابدأ من جديد
يمكن اكون غلطانة..بس مش قادرة اتغير..او بمعنى صريح..مش عاوزة اتغير
المهم انى مش مرتاحة..وعاوزة باربى بتاعة زمان..

3 comments:

فاروتا المصرى يقول...

ربنا يجمع عليكى امرك
ويرزقك الثبات
ويقضى عنك حاجاتك

غير معرف يقول...

ana 7asa bike

rbna zsl7 el7al

عمر عاشق القرآن يقول...

هو كويس اوى ان الواحد يفكر فى المشاكل اللى فىنفسه وينتقدها

لكن الاجمل أكيد انك تحطى خطة للحد من المشاكل دى

كلنا كنا كويسين واحنا أطفال علشان ربنا خلقنا كويسين ولعدين الحياة "لوثتنا" لكن العاقل اللى بعد كده يدرك الحقيقة ويرجع كويس باختياره

كل شىء ممكن وافتكرى حديث النبى::

"انما العلم بالتعلم وانما الحلم بالتحلم"

ربنا معاكى