تاجز من بلوج وحدى

السلام عليكم

التاج دا وصلنى من فاطمة طبعا صاحبة بلوج وحدى

لوأعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

1_ ماما وردة بيضاء

2_روك وردة حمرا

3_ خديجة صاحبتى وردة صفرا

..............................

.................................

لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟

هكتب نفسى أكون راضية عن نفسى..

نفسى أعمل حاجة ليها قيمة حتى لو مكانتش كبيرة ..

نفسى محسش بأى نوع من أنواع الملل..

ما هو هدفك فى الحياة ؟؟

اشتغل مترجمة فى مجال الصحافة لانى اشتغلت فى المجال دا قبل كدا وكان عجبنى

ونلاقى شقة( قريبا)

نتجوز ويبقى عندنا اطفال كتييير عساسيل واقعد العب معاهم ونربيهم كويس!!

...........................

............................

إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟

هو انا مصدقة ان محدش هيعيش حياته كلها فى حالة واحدة

بمعنى ان محدش حياته كلها سعادة وفرح وخالية من المشاكل

ومحدش حياته كلها نكد وحزن

الحياة بتجمع بين الاتنين

شوية حلو وشوية مر

............................................

................................................

أجمل مقولة سمعتيها فى حياتك ؟؟

هى مش مقولة هى ايه قرانية بحبها أوى

وإذا سألك عبادى عنى فإنى قريب أجيب دعوة الداعى إذا دعان فليستجيبوا لى وليؤمنوا بى لعلهم يرشدون"

...........................

...............................

من المغنى اللى بتحبه أوى و إيه أحلى أغنية ليه بتحبها ؟؟

مش حد معين يعنى بحب اسمع تامر حسنى

وشيرين

وعمرو دياب الحاجات القديمة شوية مش اغانيه الجديدة

والاجنبى سيلين ديون

بحب الاغانى الهادية غالبا

................................

................................ غزة" تمثل لك؟ إيه فى حياتك ؟؟ غزة بتمثلى كلمة ارض محتلة..لان من ساعة ما اتولدت ومبسنعش حاجة عن فلسطين غير كلمة احتلال وضرب وشهداء وعمليات استشهادية وهدم بيوت ..

.................................

................................. أعطى لإنتمائك لوطنك درجة من مائة ؟؟ 80% مصر كمصر يعنى حلوة موووت لكن الاوضاع فى مصر كحومة ودولة وحشة موت مصر كنيل وشجر وبحر وهوا وكدا تحفة جدا مصر كإعتقالات ومهانة وصراعات ومستوى اقتصادى متدنى لأغلب الناس وازمة رغيف عيش وأحداث المحلة والشباب اللى متخرج ومش لاقى شغل والرواتب الضئيلة جدا طبعا حالة يرسى لها..

...............................

...................................... لو تزوجتى و أنجبتى بنتين و ولدين أى الأسماء تختار لهم ؟؟ الاولاد على (عشان روك ميزعلش مش عشان انا بحب الاسم) و معتز(دا بقى وسام مش عاجبه الاسم) و عمرو والبنات: أريج ولجين ومايا .......................

................................ عمرك غشيت فى أمتحان و انت صغير ؟؟ غشيت مرة واحدة وانا فى رابعة ابتدائى كانت مادة الدراسات الاجتماعية وكنت مش فاهمة فيها حاجة لحد ما دخلت الامتحان .. بس من ساعتها مغشتش أى حاجة خالص لحد ما أتخرجت من الجامعة .. لدرجة انى وانا فى الثانوية العامة كنت فى امتحان مادة الاحياء وكان قدامى ثلاثة اسئلة مش فاكرة لهم اجابة وبالرغم من كدا مرضيتش أسأل أى حد فى اللجنة عن اجابتهم عشان فهمت كويس اوى ان الغش حرام..وبعد ما صممت انى مسألش حد على اجابتهم لاقتنى فجأة والله افتكرت اجابتهم كلهم..عرفت ان ربنا مش بيضيع حد وانى صح..

..........................

...................................... لو أتعرض عليك رشوة كبيرة و انت فى زنقة ماليه هتعمل إيه ؟؟ من غير تفكير مش هقبلها خالص

...............................

قول 3 صفات ب 3 كلمات بس توصف بيهم شخصيتك (يعني كريم طيب خدوم كده )0؟؟ 1_ عنيدة 2_ مجتهدة 3_ واقعية ومش حالمة 4_ أحيانا ببقى رومانسية (حلوة احيانا دى :)) 5_ حساسة شويتين :)

.......................

.................................... اول مرتب ليك وكان كبير قوي يكفي تجيب اغلى هدايا هاتجيب لكل فرد في عيلتك ايه؟؟ هههههههه محدش يفكرنى بأول مرتب دا عملى فيونكة نفسية أول مرتب كان 135 جنية كل لما افتكرة افتكر فيلم صعيدى فى الجامعة الامريكية ..لما هنيدى سرق من أحمد السقا الفلوس بتاعته وقاله الصندوق مكانس فيه غير 135 جنييييييييييييييييييييييييييييييييييييييييييه J J طبعا لو حصلت معجزة وأشتغلت تانى ومعجزة أكبر وأخدت مرتب كبير ( مش عارفة كلمة كبير دى مطاطة شوية بس هنعتبره كنز مش مرتب) ههههههه هشترى بيه 1_ لماما خاتم عسول على زوقى وبابا بدلة شيك 2_ روك هنتج له الفيلم اللى بيحلم بيه 3_ أختى ضيعت الانسيال بتاعها الدهب من كام سنة وبتحقد عليا عشان الانسيال بتاعى مضاعش زيها فهشتريلها انسيال جديد 4 _ أخويا مممم لاب توب عشان هو بيحب الكمبيوتر والحاجات الالكترونية دى

.............................

برضه بكلمة واحدة ايه اهم صفة عايزها في شريك حياتك؟؟ هو فى كل الصفات اللى عايزاها وأهمها الحنية

بس نفسى ميشغلش تفكيره بحاجات كتير عشان دى بتشتته المجال اللى غير دراستك وشايف نفسك فيه قوي حتى لو كان ياشيخ الرسم عالحيطة ايه؟؟

مبعرفش اعمل حاجة غير الترجمة والقراءة وأحيانا بحب اقف فى المطبخ واخترع و وسام يشهد طبعا (وممكن يحكى لكم عن الخرشوف) لانه مش مصدقنى ان فى أكلة اسمها خرشوف بلحمة المفرومة وقعد يتريق عليا لما عملتهاله ..ياريت تقنعوه ان فى اكله اسمها خرشوف فعلا عشان يصدق ههههههههههه بتحب السفر طبعا

..........................

طب دلوقتى حالا ايه المكان اللى نفسك تكون فيه على البحر

................................ تمرر التاج ده لمين ؟؟ زى الهوا أميرة الغروب رنا كات رنين الصمت سمسمة يمامة

....................................................................................

................................................................................................... التاج التانى ادكر 10 أشياء عن نفسك؟ 1_ عنيدة 2_ مجتهدة 3_ واقعية ومش حالمة 4_ أحيانا ببقى رومانسية (حلوة احيانا دى J) 5_ بحب الخير لكل الناس 6_ حساسة شويتين 7_مش عارفة لو انا متدينة وللا لاءة بس بحاول ابقى متدينة ومزعلش ربنا 8_مبحبش أقعد فاضية طول النهار مبعملش حاجة ..الحكاية دى بتجيبلى اكتئاب بجد 9_ أحيانا ببقى عصبية 10_ كتومة الى حد كبير جدا.. بحب دائما تكون لى حياتى الخاصة ومبحبش حد يتدخل فيها..

ملائكة وشياطين

وأنا هنا لا أتكلم عن تحفة دان براون الأدبية بل عن أشخاص أصبحوا بين ليلة وضحاها أشهر من نار على علم عن أشخاص عادين يعشون بيننا أصبحوا في لمح البصر أبطال شعبين وقادة مخلصين أتحدث عن ملائكة في نظر مؤيديهم ومحبيهم وشياطين في نظر معارضيهم وكارهيهم إني أتحدث أيها السادة - عن بطلة الساعة -......إسراء عبد الفتاح. إسراء - لمن لايعلم وإن كنت أشك أن هناك من لم يعد يعلم- هي فتاة عادية في 29 من عمرها فتاة كأي فتاة تقابلها في الطريق فتاة كأي فتاة تمت لك أو لكي بصلة قرابة لايمزيها شئ اللهم إلا إنتماؤها لحزب الغد...! فتاة تملك جهاز كومبيوتر ووصلة إنتر نت تبحر من خلالها في عوالم الشبكة الألكترونية وإذ حط بها الرحال على شواطئ موقع الفيس بوك فتفاعلت معه كأغلب شباب وفتيات هذه الأيام وتمر الأيام والليالي ويحدث في مصر ما نعرفه ونعانيه جميعا من إرتفاع في الأسعار لجميع السلع إلى أزمات الخبز و الأجور وإحتكار لصناعات أساسية..إلى آخر هذه القائمة الطويلة التي لايبدوا أن لها نهاية. ومن واقع معانتها لهذه الأحداث وماتراه وتسمعه من حولها أطلقت هذه الشابة دعوة على موقع الفيس بوك لعمل إضراب سلمي في يوم السادس من أبريل لعام2008 تضامنا مع عمال مدينة المحلة وإحتجاجا على أرتفاع مستوى المعيشة والأسعار وللتعبير عن غضب الناس من سياسات الحكومة في مواجهة الأزمات المتلاحقة على شعب مصر العزيز. وحدث ما حدث في هذا اليوم وكلنا شاهدنا وقرأنا وسمعنا الأخبار عن هذا اليوم العصيب في تاريخ مصر الحديث. وكما هو معروف ومتوقع قامت أجهزة الأمن بإعتقال المئات من جميع المحافظات ممن شاركوا في هذا الإضراب وكان من المؤكد أن الأمن لن يترك الرأس المدبر والمحرك لهذا الإضراب طليقا وأن الأعتقال آت لامحالة إن عاجلا أو آجلا وتم بالفعل إلقاء القبض على إسراء. إلى هنا والموضوع يبدوا عاديا -نوعا ما-....!! ثم فجأة سمعنا ورأينا - في كل الوسائل المقرؤة والمرئية- أن إسراء قد صدر قرار بالإفراج عنها ولكنها أختفت في ظروف غامضة وظهر محامي الفتاة على أشهر البرامج الحوارية المصرية يطالب الداخلية بتحديد وإعلان مكان الفتاة وقرأنا على صفحات الجرائد المعارضة والمستقلة مناشدات الأم والجمعيات الحقوقية بمعرفة مكان الفتاة والإفراج عنها إن كانت أعتقلت من جديد. وكما أختفت إسراء فجأة صدر قرار العفو والأفراج عنها فجأة وفي تغطية حية لبرنامج القاهر اليوم - الأشهر والأكثر مشاهدة وتأثيرا على مستوى البرامج المصرية- الذي يقدمه الأعلامي عمرو أديب رأينا خروج إسراء من السجن ومعانقتها لوالدتها أمام شاشات التلفزيون. وإلى هنا أيضا -يمكن بنوع من الغصاصة- إعتبار الموضوع عاديا. ولكن ماهو غير عادي هو ماحدث وقيل بعد ذلك..... بعد المشهد "المؤثر" للقاء الفتاة بأمها وبكائها الهستيري على كتف أمها - مما دفع والدتها للقول بالنص خلاص يابنتي إهدي بقى-. سألت المذيعة الفتاة "المنهارة منذ ثوان قليلة جدا" بتعيطي كده ليه مالك...؟ شخصيا انا قلت البنت مش حتقدر تتكلم او تقول حاجة عشان الصدمة اللي كانت فيها اولا وعشان الحالة الهستيرية اللي كانت فيها حالا من ثواني ثانيا...لكني لقيت إسراء بتجاوب "بإبتسامة" ماما وحشتني يعني....!!!!! قلت في نفسي عادي جدا جدا وبتحصل في أرقى العائلات لكن.... وخده بالكم جدا من لكن دي سألتها المذيعة السؤال التالي المكون من أربع كلمات فقط -والذي دام ثانية ونصف تحديدا- إنت كنتي كويسة جوة..؟ (الدقيقة 1:14في الفيديو الأول) لتتحول إسراء و والدتها إلى بوق داعية لسجن القناطر محولة إجابات الأسئلة اللاحقة (من الدقيقة 1:17 وحتى نهاية الفيديو الأول) لتعديد الصفات الحميدة والمذهلة والرائعة للمكوث في سجن القناطر- السفن ستار مش فايف لو اللي هي بتقوله صح- وكيف انها -إسراء- مصونة داخل السجن وانها تعامل معاملة حسنة جدا لدرجة دفعتها للدهشة ولنقل هذه الدهشة لوالدتها بقولها (أنا مش مصدقة لما هما بيعملوني كويس أوي كده مسكوني ليه...!) وشفوا اللي جي بقى وخدوا بالكم من الكلام اللي جي ده -وهو بالنص من على لسان إسراء- بيأكلوها أحسن أكل وبيشربوها أحسن شرب وبينيموها في أحسن مكان ووقت ما بتحب تنزل تنزل تكلم مع الناس اللي عارفاهم وتقرأ وقت ما بتحب تقرأ. يا مساء الأنوار الله الله الله الله ده لو فندق مش حيعملوا معاها كده كان ناقص بقه يجبولها دي في دي على رأي رياض المنفلوطي مأمور القسم في فيلم اللي بالي بالك أنا ليا هنا تعلقين صغيرين خالص في النقطة دي مرة كنت في -ريسبشن قسم المطرية- بقدم شكوى -خدوا بالكم ريسبشن هه- وماقلكوش على الألفاظ والشتائم اللي سمعتها من سب للدين وأستغفر الله لسب بعرض وشرف الأم وكل ما تطرب له أذن الإخوة العربجية وآسف في التعبير وده تاني كان ريسبشن قسم مش تخشيبة ومش سجن. وأذكر أيام المظاهرات اللي كانت تضامنا مع القضاة إني أعرف أتنين أتقبض عليهم ورحوا سجن طرة تقريبا مش متأكد والله بس اللي متأكد منه إن ماحدش فيهم ولا من اللي كان معاهم اتعامل أحسن معاملة أو كل أحسن أكل أو شرب أحسن شرب أو نام في أحسن مكان. هي الحاجة الوحيدة اللي شهدوا أنهم تلقوا فيها أفضل معاملة وتمت معاهم بضمير هي الضرب على القفا....! لكن سبحان مغير السجون طالما ماحدش كان جوة يبقى محدش يعرف الحقيقة إيه...! المهم الأم -طبعا- توجهت بالشكر للسيد رئيس الجمهورية والسيد وزير الداخلية لتدخلهم للإفراج عن إسراء وعاوز آخد النقطة دي والكلام اللي قالته إسراء في الدقيقة 1:50 من الفيديو الأول وأطرح سؤال بسيط على مؤيدين إسراء ومحبيها ولكل اللي بيوصفها بصفات البطولة لما إسراء قالت بلسنها إن اللي عملته غلط وسوء تقدير منها ولما أمها توجهت بالشكر للسيد رئيس الجمهورية والسيد وزير الداخلية بأي حق تصفون أتباع النظام والمنتمين للحزب الوطني وكبار رجال أعمال الدولة ورؤساء تحرير الصحف القومية بالنفاق وبأنهم سبب أزمة مصر وبأنهم لايشعرون بالمواطن المصري البسيط وبأن كل همهم هو نفسهم ونفسهم فقط وبأنهم فاسدون...إلى أخر هذا الكلام أسالهم ماذا أختلفت إسراء أو والدتها عنهم - وانا هنا بالمناسبة لا ألقي بأي نوع من اللوم على إسراء أو والدتها فيما فعلوه إطلاقا فالنضال والكفاح له ناسه ممن يقدرون على تحمل عواقبه وتبعاته اما الغالبية فهي فئة مستضعفة لاحول لها ولاقوة ولا تريد من الدنيا سوا الستر كما ان الفتاة يتيمة وهي بالطبع قرة عين لوالدتها لذلك أكررها والله انا لا ألقي بأي لوم عليها أو على والدتها إطلاقا- ولكني ألوم من يصفها بالبطلة الشعبية فهي أقرت بأن فكرة الإضراب خاطئة تماما كمن تتهمونهم بالنفاق وهي ووالدتها وجهوا الشكر للسيد وزير الداخلية على تدخله للإفراج عنها بارغم من انه أصدر قرارات كثيرة بإلقاء القبض على أخري ممن شاركوا في الإضراب أي انها أهتمت بمصلحتها هي فقط وتناست الباقين ممن شاركوا في الإضراب الذي دعت هي إليه. فبماذا أختلفت عن الأخرين الذين تتهمونهم بالإهتمام بمصالحهم الشخصية فقط لما الكيل بمكيالين أم إنه هجوم لمجرد الهجوم وفقط. وماذا عن الذين أستجابوا لها وأعتقلوا ومنهم من قتل بينما حصلت هي على حد تعبيرها وقولها على معاملة فايف ستار في سجنها. أين البطولة هنا يقول المؤيدون لها أنها بألف رجل تحركت ودعت ولم تختبأ خلف الشاشات - أي أجهزة الكومبيوتر- متناسين تماما انها هي نفسها فعلت ذلك بالحرف الواحد اي أنها أطلقت الدعوة من بيتها من خلف الشاشات أيضا ولم تنزل إلى الشارع وتوزع المنشورات أو تعلق الملصقات أو تخطب في الجموع والحشود أو تنشأ أحزاب أو أو أو وهي على حد قولها في الفيديو الثاني في الدقيقة 7:06 انها منذ 6 أشهر لم يكن لها أي نشاط سياسي أو أي حاجة أين البطولة في الدعاية -السخيفة والسافرة- للسجون ولوزارة الداخلية والتي ذكرتني بالحملة الدعائية لمصلحة الضرائب ففي الفيديو الثاني وفي الدقيقة 6:34 تقول إسراء انها قالت للظباط في السجن ( انا عاوزة أسلم على ماما قبل ماتسافر ولو حتى أسلم عليها ورجعوني -تقريبا- بس ...قلولي خللاص إحنا حنجبلك ماما تسلمي عليها وتروحي معاها) يا حلاوة ماحدش شاف الجمال اللي إحنا فيه ياخونا إيه الديموقراطية اللي إحنا عايشين فيها دي خلاص ياولاد أنا لقيتلكم الحل لكل ماشاكلنا مين عاوز يتجوز...؟ خلاص ياسيدي روح أعملك إضراب أو إعتصام وخليهم يعتقلوك ولما تكون في القسم ويسألك الظباط عاوز إيه قلهم عاوز اتجوز وهما يجبولك العروسة والشقة والجهاز كمان وانت ياحبيبي......عاوز إيه....؟ عاوز عربية لا بسيطة خالص روح أعملك أي جريمة كده ولما إن شاء الله يتقبض عليك وتخش السجن قول لعمو اللي هناك انا عاوز عربية وهو يجبهالك على طول أهما حاجة ياولاد ماتخلوش نفسكوا في حاجة وأفتكروا دايما إن الشرطة في خدمة الشعب الداخلية..سلم نفسك أولا تم تراارارام تمتم بصراحة هو ده السيناريو اللي دار في دماغي عن شكل حملة الدعاية اللي حتعملها الداخلية -لوفكرت تعمل يعني- عشان تنافس بيها حملة الضرايب أنا مابفتريش لكن مش قادر أصدق إن الداخلية تفرج عن المفكر والمدبر وصاحب فكرة ا الإضراب على النت وتسيبه يروح لحال سبيله بينما تستمر في حبس الأخرين( شاهدوا الفيديو الثاني الدقيقة 8:30) الذين شاركوا فقط ولم يدعوا أو ينظموا لشئ من غير ما يكون في الموضوع إنه. تاني للأخوة اللي فهمهم بطئ حبتين زي حالاتي أنا لا أهاجم إسراء أو بقول أن هي فبركت الموضوع مع جهات رسمية أبدا لكن إسراء أتصرفت بوطنية ونية صافية ( الدعوة للأضراب) واتحطت في موقف غير عادي (الإعتقال والسجن) فحصلها صدمة وفضلت التراجع والأبتعاد عن الموضوع لأنها شخص عادي وليست مناضلة -ودي هي نقطة خلافي مع محبيها واللي انا بتكلم فيه- وأي حد وانا منهم كان حيعمل اللي عملته . أما للأخوة اللي بيصفوها بالشيطان -ده تعبير مجازي من عندي كناية عن الشر- وبيقوله إنها زي أغلب الناس الشباب بالذات بيعترضوا لمجرد الإعتراض دون أن يقدموا حلول عملية فأحب أقول حاجة بسيطة خالص الحلول العملية دي مش شغلانة الشباب اومال إيه لازمة الخبراء وإيه لازمة السياسين وإيه لازمة أهل العلم والمثقفين وعلى أي أساس يتولوا المناصب دي ويحصلوا على رواتب ضخمة لما الحلول للمشاكل اللي بتواجه البلد المفروض الشباب هو اللي يقلها باي منطق الكلام ده بعد كده ولنفترض إن إسراء أو غيرها لم يدعوا لإضراب و أخترعوا أو أبتكروا حلول عملية فمن يسمع والأهم من ينفذ كلنا يعرف أن القضاء على الفساد بكل أشكاله حيحل 90% من مشاكنا لكن مين بقيده التنفيذ الشباب.....! خلاصة: البشر ليسوا ملائكة خالصين او شياطين خالصين بل مزيج من الأثنين ربما يغلب أحدهما الأخر( حتى درجة الإضمحلال) أو يكونا متساين في الظهور لكن الأكيد أن كليهما موجود في النفس البشرية. لا أملك أن أتخيل ماذا كان سيحدث لو أستسلم الصحابة عند أول قطرة دم أسيلت منهم في المعارك التي خاضوها لإعلاء كلمة الحق كيف كان سيكون حال أمتنا وقتها أو ماذا كان سيحدث لو فر تشي جيفارا من أمريكا الجنوبية عند سماعه لصوت الرصاص خلال معاركه لتحرير القارة كيف كان سيكون شكل القارة ونوع الحكم فيها الآن ياترى...؟ أو لو "صوتت وقعدت تصرخ" جان دارك لما رأت الأنجليز وقد جهزا جيشهم بسيوفهم وعتادهم لملاقتها في أورليانز الفرنسية وهي بعد أبنة 13 ربيعا هل كنا سنعرف يوما بلدا إسمه فرنسا فعلا للنضال والكفاح ناسه وأختم بهذه المقولة الخائفون لا يصنعون الحرية...والمترددون لن تقوي أيديهم علي البناء. ************************************************* الفيديو الأول الفيديو الثاني

جواز مبكر وللا جواز أطفال؟؟؟؟؟

موضوع عمرى فى حياتى ما كنت أتخيل انه يبقى موضوع ومحل نقاش لكنه أصبح الان ظاهرة ومحور حديث الكثير من الفضائيات والمواقع الالكترونية!!طب

يعنى ايه جواز أطفال أصلا؟؟

http://www.20at.com/newArticle.php?sid=15036

يعنى أبو الولد وأبو البنت بتربطهم علاقة معينة سواء علاقة عمل وفلوس أو علاقة قرابة وعاوزين يجوزوا الولد للبنت ويضمنوا ان فلوس العيلة متطلعش لبرة..يااااااااااااه دا موضوع فيلم عربى قديم وعفى عليه الزمن..

هقولكم اه هو فيلم عربى فعلا بس فى الفيلم العربى كان أبو البنت والابن بيتفقوا ويقولوا فلان خطيب فلانة وخلاص ولما العيال يكبروا يبقوا يفكروا ويقرروا لو هم موافقين على اكمال الارتباط دا وللا لاءة..

لكن دلوقتى فى بلاد كتير مثل السعودية بيجوزا الاطفال على ايد مأزون حقيقى وفى مهر وشبكة وكدا وبيبقى الطفل والطفلة اللى ميزدش عمرهم عن ثمانية او تسعة سنيين أزواج فعلا على ايد مأزون حقيقى..والبنت ترجع تقعد فى بيت أهلها والصبح تروح المدرسة والولد كمان زيها ولما يكبروا بقى يلاقوا نفسهم متجوزين ومفيش مفر من كدا ومفيش فرصة للرفض أو الموافقة.. (دا حلال دا وللا حرام)

وأول امبارح على موقع البى بى سى كان فى عرض لمشكلة مشابهة لنفس الموضوع دا..

هحكيهالكم

المشكلة تتلخص فى ان فى اليمن حدث زواج لطفلة وهى فى الثامنة من عمرها برجل يبلغ من العمر تلاتين سنة!!!! بس الفرق بين الحالة دى والحالة بتاعة السعودية بقى ان الطفلة دى مقعدتش فى بيت أهلها لحد ما بقت بالغة وقادرة على تحمل مسئولية الزواج كاملة ..لاءة..دى انتقلت من بيت أهلها الى كنف زوجها فعليا..مش عارفة ازاى ..علامات تعجب كتير أوى مخلوطة بعلامات ازبهلال مرسومة على وشى..لانى مش عارفة ازاى يحصل الكلام دا فى بلد مسلم؟؟وازاى أهلها أصلا يعملوا فى بنتهم كدا؟؟ وازاى الطفلة دى اللى هى محتاجة للحصول على حب ورعاية الام والاب فى السن دا تصبح زوجة؟؟ وازاى طفلة كل أحلامها انها تلعب مع الاطفال اللى زيها ويخرجوا يجروا فى الجناين ويركبوا مراجيح تصبح زوجة مرغمة على ممارسة علاقة زوجية مع رجل بالغ وقد أبوها,فى حين هى طفلة عندها 8 سنين؟؟؟؟؟؟؟؟؟ مش عارفة!!

طب ما الدول العربية كلها بتعانى من زيادة نسبة العنوسة فى البنات..طب ليه واحد عنده تلاتين سنة زى أخينا دا ميروحش يتجوز واحدة من سنة أو حتى أصغر بكام سنة ..أشمعنى يعنى يحب يتجوز طفلة ليست بالغة ولا تعى شىء فى الحياة ويحملها العبء دا كله؟؟؟؟؟؟؟

الغريب فى الموضوع ان نتيجة الاستفتاء اللى كانت على البى بى سى كانت

• تسعة وخمسين فى المائة موافقين على مثل هده الزيجات وبيسموها زواجا مبكرا

• وواحد وأربعين فى المائة معترضين وبيسموها حالة أغتصاب مقنن

السؤال دلوقتى هو دا حلال ولا حرام؟؟

وهل ينفع يحصل كدا فى دولة مسلمة ؟؟

وهل دا ممكن نسميه زواجا مبكرا؟؟

وللا نقول عليه اغتصاب مقنن؟؟

عاوز ايه من نصفك التانى؟؟

امبارح وانا بتفرج على عمرو أديب كان فى فقرة أخيرة فى البرنامج هو قال انه واخدها من برنامج أوبرا..أوبرا كانت بتسأل الازواج عاوزين ايه من زوجاتهم والزوجات عاوزين ايه من ازواجهم بمعنى ان كل واحد يقول ايه الحاجة اللى مضايقاه فى الطرف التانى ويطلب منه ان الحاجة تتغير..عمرو أديب بقى أخد الموضوع دا وعمل فقرة فى البرنامج بتاعه امبارح..قعدت أشوف كل زوج هيطلب ايه من زوجته والعكس لاقيت اتصالات كان منها كتير يضحك وكوميدى .

1_

.زى مثلا واحدة اتصلت وقالت بطلب من جوزى يبطل تكشير ويغير شكل حواجبه اللى عاملهولنا تمانية وتمانين بقاله على الحال دا سنين.. وقالت انها مش مخلياه محتاج حاجة لدرجة ان لما بيجى يغسل سنانه هو بيمسك الفرشاة وهى بتحطله المعجون عليه..راح عمرو قالها ما هو أكيد عشان كدا مندهش وحواجبه تمانية وتمانين هههههههه مش عارفة والله ايه دا ..رجالة اخر زمنJ

ومن التعليقات الغريبة ان:

2_

واحد تانى اتصل وقال:اتمنى ان تعاملنى زوجتى كطفل وليس كرجل!!!!!!!

3_

واحدة بقى بجد صعبت عليا:لما قالت نفسى جوزى يناديلى باسمى ..دا من ساعة ما اتجوزت وعمره ما نادالى باسمى ولا مررررررررررررررة....الحكاية دى سمعت عنها قبل كدا وبصراحة مش بفهمها لما بعض الرجالة يتجوزوا وينادوا على زوجاتهم باسم ولد مثلا أو ميزكرش اسمها من الاساس ..هو اسم الست عورة ..ظب هم عملولنا اسامى ليه أصلا؟؟

4_

واحدة برضوا اتصلت تانى وقالت:ان جوزها من ساعة ما اتجوزوا مقالهاش كلمة بحبك ولا كلمة حبيبتى ولاااااااا مرة وهم بقالهم تلاتين سنة متجوزين.. مش عارفة ليه كدا هى دى قسوة وللا خجل وللا جهل وللا كبرياء وللا ايه؟

5_واحدة تانية قالت نفسى جوزى يسمعنى ويتناقش معايا ويفهم رأيى ولو لمرة واحدة..بعض الرجالة وخاصة المتجوزين وفى فرق كبير شويتيين فى السن بيبص لمراته على انها بيبى علىة طول ومتفهمش حاجة خالص فى الدنيا ولازم تسمع كلامه من غير مناقشة وتعامله على انه باباها وتقوله نعم وحاضر واوامرك وخلاص..على اعتبار انه الكبير اللى فاهم الدنيا وفاهم مصلحتها كويس اوى اكتر منها..

6

_أما عن الرجالة بقى فعاوزين مطلب صغنن خالص وهو ان الستات متتخنش وتاخد بالها من مظهرها زى الاجنبيات ..دول طلعوا غلابة وملهمش غير الطلب الصغنن دا ..ياريت يا ستات تنفزوا مش هيكلفكم حاجة والله دا حتى هيوفر فى الاكل..بقى معقول تفضلى طبق الكشرى على رضى جوزك :) خليكى جدعة وبطلى الكشرى لفترة كدا وابقى ارجعيله بعدين

علاقة عمر الانسان بزيادة ونقص الايمان

هل للسن علاقة بزيادة أو انخفاض معدل التدين عند الانسان؟؟ الحكاية دى فكرت فيها كتير وموصلتش لحل وهى حكاية زيادة ايمان الانسان بزيادة عمره واعتقد ان يمكن البعض مننا ملاحظين الموضوع دا والطفل بيكون صغير اهله بيعلموه الصلاة والمبادىء البسيطة بتاعة الدين وبعدين بيكبر وبيبقى شاب ممكن يكون بيصلى وبيصوم ومحافظ على اسس دينه بس فى نفس الوقت بيكون عايش حياته زى ما يحب..خروجات وسينمات واغانى وتليفزيون وكدا..وبعدين بيكبر اكتر واكتر وكل لما يحس ان العمر بيجرى بيه يبدأ يعمل لاخرته ويقولك دا حلال ودا حرام وعاوز احج وعاوز اعمل عمره وعاوز اصلى القيام واصلى الفجر وعاوز وعاوز وعاوز.. هل دا مرتبط بوجود احساس داخلى جوه كل انسان بيخليه يحس ان العمر بيجرى بيه ولازم يعمل حاجة لأخرته..وللا هى حكاية مرتبطة بإن زيادة السن بتخلى الانسان يعقل شوية ويفهم الصح من الغلط..وللا من كتر ما شاف من الدنيا فهم انها متستاهلش ان الانسان يغلط عشانها وللا ايه؟؟وللا بيكون خلاص اتبسط فى الدنيا بما فيه الكفاية لحد ما زهق منها؟؟ حاجة كمان غريبة فى الموضوع دا وهى ان الحكاية دى كمان بتتلاحظ عند الستات اكتر من الرجالة..يعنى الست كل لما تكبر فتتجه لربنا وتقولك عاوز احج وتلاقيها محافظة على القران ..والرجل كل لما يكبر يحس انه عاوز يمسك فى الدنيا بايديه وسنانه وكتير من الرجالة لما بيكبروا فى السن ويحسوا ان العمر جرى بيهم بيفكروا يتجوزوا بنات صغيرة عشان يحسوا ويثبتوا لنفسهم انهم لسه صغيرين..حاجة غريبة!!

تاج العزوبية

السلام عليكم التاج دا وصل من فاطمة صاحبة بلوج "وحدى" 1_ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين ؟ ههههههه انا شايفة ان الموضوع نسبى وبيرجع لشخصية الانسان..يعنى فى ناس بتبقى مبسوطة من العزوبية وفى ناس لا..بس رأيى ان أى انسان بيلاقى نصه التانى عمره ما بيكون مبسوط من العزوبية خالص وبيبقى عاوز يخلص منها فى اسرع وقت :) 2_ما هى العوائق من وجهة نظرك التى تحول بين الشباب والزواج هذه الايام ؟؟؟ فى عوائق كتيرة بس اكتر العوائق انتشارا هى اسباب مادية فى المقام الاول..يعنى صعب جدا ان حد فى بداية حياته يلاقى شقه لوحده وبمجهوده الخاص من غير مساعدة أهله..ويمكن تيجى مشكلة الاختيار فى المقام التانى ..وهى ان الولد عاوز يتجوز بس مش عارف يختار مين ..بيكون عاوز ملكة جمال تعيش معه باقى حياته .. بغض النظر عن اى شىء تانى..يعنى لو مش متدينه يقول مش مهم هخليها بعد الجواز متدينة..مبتصليش يقول مش مهم هخليها بعد الجواز تصلى..مش محجبة يقول مش مهم هخليها بعد الجواز تتحجب..مش مثقفة..يقول مش مهم هخليها وهخليها وكأنه متصور انه هيتجوز عروسة حلاوة يشكلها بمزاجه زى ما هو عاوز:) وطبعا دى اوهام لأن قليل جدا اللى ممكن ينجح انه يغير حد 180 درجة!! اما من جانب البنات فكل واحدة عايزة تعيش فى مستوى كويس والمستوى الكويس اللى بتحلم بيه دا صعب انه يتحقق مع شاب فى بداية حياته فأغلب البنات بتفضل تتجوز حد أكبر منها على الاقل بعشر سنين عشان تعيش فى المستوى اللى بتحلم بيه..وهكذا وهكذا المشاكل والعوائق كتيرة وملهاش اول من اخر.. 3_من وجهة نظرك هل النكد موجود فى العزوبيه ام فى الزواج ؟ ولماذا ؟ النكد موجود فى أى مكان مفيهوش حب ومفيهوش دين ومفيهوش تفاهم..:) يعنى مالوش مكان مقيم فيه اقامة دائمة:) مش عارفة ليه شامة ريحة ان الستات هم سبب النكد زى ما هو شائع بين الولاد ..لكن والله الستات مش سبب نكد المشكلة ان الستات او البنات حساسين شوييتين وممكن يزعلوا من حاجات تبدو من وجهة نظر الولاد انها بسيطة لكنها بتكون عند البنات حاجة جامدة جدا ومش بسيطة خالص..نصيحة اقروا كتاب الرجال من المريخ والنساء من الزهرة ..عشان ساعتها تفهموا ان فى فرق فى طبائع البنات والولاد وان كل فصيلة لازم تتفهم طبيعى الفصيلة الاخرى الاتية من الكوكب الاخر:) 4_ما الحل من وجهة نظرك لمشكلة (( العزوبية )) فى مصر ؟؟ تقليل تكاليف الجواز وتفهم اهل العروسة لمشكلة ارتفاع الاسعار بشكل عام..والحل الاكبر يكمن فى يد عز باشا اللى مخلى الحديد اسعاره نار..مفيهاش حاجة يعنى ان تقلل مكسب حضرتك بدل ما هم كام مليون يبقوا كام مليون الا حبة:) 5_من وجهة نظرك ....هل للعزوبية مميزات وعيوب ؟؟؟ مميزات:ان الواحد بيتصرف براحته وهو مش حاطط فى باله حد تانى غير نفسه..يعنى مش خايف على زعل حد..مش خايف يتأخر على حد..بيصرف فلوسه براحته ومحدش مسئول منه.. العيوب: ان مهما عاش حياته بحرية بيجى فىاخر اليوم ويحس ان فى حاجة ناقصاه:) 6_ما هو رأيك فى انشاء مدونة (( رابطة )) للعزاب من المدونين ؟؟؟ هههههههههه لا مش للدرجة دى..هيقعد العزاب يحقدوا على المرتبطين وهتكون مدونة مليانة بالحقد وكدا لا لا لا:) 7_أخيرا ....لمن تمرر هذا التاج ...على الأقل خمسة ؟؟؟ امرره لكات صاحبة بلوج رنين الصمت وبرنسيسة صاحبة بلوج برنسس صن ست..وموحة صاحبة بلوج زى الهوااا وسمسمة وكليوباترا