BLOGGER TEMPLATES - TWITTER BACKGROUNDS »

١٢‏/٠٥‏/٢٠٠٨

هل الجواز هدف أم وسيلة؟

هل الجواز هدف أم وسيلة؟؟ هو ليه الناس بتتجوز أصلا؟ ياترى بيتجوزوا عشان هم وصلوا لسن مناسب للزواج؟ وللا بيتجوزوا عشان محدش يقول عليهم عنسوا أو فاتهم القطار؟ وللا بيتجوزوا عشان يثبتوا لنفسهم وللى حواليهم أنهم مرغوب فيهم؟ وللا بيتجوزوا عشان يخلفوا؟ وللا عشان بيحبوا الللى هيتجوزوه؟ وللا عشان يعفوا نفسهم؟ وللا عشان اييييييه؟ طب نشوف الجزء الأول من السؤال: إذا كان الجواز هدف فى حد ذاته..هيكون إزاى؟ هيجى واحد عايز يتجوز ..يقولوله ان فى بنت كويسة عمرها كذا وعينها شكلها كذا ومناخيرها عاملة كدا وشعرها لونة كذا وطخينة او رفيعة وطويلة او قصيرة وهو يشوف المواصفات اللى تعجبه ويشوف البنت ويوافق عليها وهى توافق عليه من منطلق إن عنده شقه فى المكان الفلانى ..مساحتها كذا والموبيليا حلوة والسيراميك أمور والعريس بيشتغل ومرتبه كام ألف ومن منطلق ان الجواز هدف ولازم يتحقق عاجلا او أجلا.. فبتوافق لأن محدش يرفض عريس جاهز بالشكل دا وإلا يمكن الفرصة دى متتكررش تانى.. وبعدين عصفور فى اليد بقى..وبعد كدا تيجى تسأل العروسة انتى وافقتى عليه ليه؟؟ ايه اللى شدك ليه يعنى عشان توافقى انه يبقى جوزك وتعيشى معه باقى حياتك ؟؟ تقولك قال رسول الله صلى الله عليه وسلم " إذا جاءكم من ترضون دينه وخلقه فزوجوه" صدق رسول الله صلى الله عليه وسلم.. طبعا واضح جدا ان العريس اللقطة دا منطبق عليه الحديث بالكامل.!!!!!!!!!! !!!!!!! احنا عارفين الحديث لكن مش عارفين ان الناس بقت تستخدمه بمزاجها .. يعنى سؤال كدا..لو العريس اللى جه للأخت دى كان فقير ومفلس ومتدين جدا ..وأخلاقه كويسة كانت هتوافق عليه وتطبق الحديث السابق ذكره..لا وألف لاءة كمان.. طب ولو سألأتها يا بنتى موافقتيش عليه ليه..مش دا ممن ترضين دينه وخلقه؟ هتقولك اه بس مش مرتاحة له نفسيا ومش عايزة اتجوز دلوقت!! مش عيب ان الانسان يحب يعيش مرتاح..كلنا عايزين نعيش مرتاحين وفى مستويات كويسة لكن منغلفش الحاجات اللى على هوانا الشخصى بأحاديث نبوية هى أسمى من انها توضع فى مكان غير موضعها.. انا شا يفة ان الجواز مش هدف ولكن الجواز وسيلة ربنا اداهلنا عشان تسعدنا تسعدنا باننا نعيش مع حد بنحبه تسعدنا بذرية صالحة تسعدنا ببيت جميل مبنى على الحب والطاعة تسعدنا ببيت مش مبنى على الانانية والمصالح المادية تسعدنا بأن الزوج عندما ينظر لزوجته وحبيبته تسره تسعدنا بأن الزوجة تكون راضية عن زوجها حتى ولو كان كان مفلس هههههههه فى الحالة الاولى يعنى لما يبقى الجواز هدف: لو العريس دا بعد الجواز فلس فجأة أو تعب ياترى العروسة اللى وافقت عليه من منطلق انه عريس لقطة وميتفوتش ..طبعا هو كدا مبقاش لقطة لقطة ولا فار حتى..طب هيكون ايه التصرف بقى من العروسة؟؟ وفى الحالة التانية: الجواز أصلا مكانش مبنى على أسا س مصالح يبقى مش هتفرق..لأن البداية مكانتش مبنية على هذا الاساس..

5 comments:

AHMED SAMIR يقول...

انا طبعا هتكلم من موقف ذكوري
الاغلب الاعم مننا نحن معشر الشباب بيتجوز علشان موضوع انه يعف نفسه وكدة على اساس المغريات حوالينا بقت لا تطاق والبنات الشيطان وازز لها جامد
اما الاقلية فبيتجوزوا من اجل الاستقرار وتكوين اسرة وتعمير المجتمع والحاجات دي
اما الاقلية جدا فبيتجوزوا بالدفع الذاتي التلقائي بمعنى انه لازم يتجوز بعد ما عدى ال 30 والاهل مش سايبينه في حاله فبالتالي لازم يتجوز علشان يرتاح من زنهم على ودنه
دة رأيي والله اعلم
تحياتي

barbie girl يقول...

أستاذ سمير: أحييك على الصراحة فى الاجابة.. كويس انك عارف ان فى أسباب..دا فى ناس كتييييير اوى بيتجوزوا وهم مش عارفين هم ليه بيتجوزوا أهو شكليات وخلاص.. ويمكن غياب السبب من البداية بيكون من أكتر الاسباب فى هدم بيوت كتيرة اوى

غير معرف يقول...

السلام عليكم

الزواج اولا سنة عن النبى صلى الله علية وسلم لكن مش معنى كدة اى عريس وخلاص لا طبعا ، اى حد بيتجوز عشان عايز يكمل مع شخص بيحبة بيخاف علية بيقدرة وناوى يشجعة ومتاكد ان من غيرة مفيش حياة واللى فات من العمر قبل مايعرفة كانة ماكان ، الجواز دنيا لو مالهاش اساس يبقى احسن بلاش واساس الجواز الحب

princess يقول...

انا شايفة بردو الجواز وسيلة
ومبحبش ان الواحد فجاة يقرر يتجوز عشان لازم عشان المجتمع والسن والكلام ده
عشان كده فى حالات طلاق كتير
اساس الجواز الحب والتفاهم

فارس بلا جواد يقول...

سؤالك ده مهم وللاسف ناس كتير بتفتكر نفسها عارفه الاجابة ويتضح انهم أكبر مخدوعين.. عشان كده هاقول مجرد وجهة نظر .. انا شايف ان الحب ده غريزة بشريه واحتياج طبيعي للانسان.. زي بالظبط الاحتياج لحنان الام ..أكيداللي بيتحرم من أمه هيبقي نفسيا مختلف عن الناس العاديين..عشان كده اللي بيحاول يضحك علي نفسه ويقول ان الحب ده من الكماليات او ممكن يجي بعد الجواز طبعا غلطان ..وبالتاي نرجع لموضوعنا وهو ان السبب الرئيسي للجواز احتياج الانسان انه يعيش قصة حب .. واللي مش حاطط الهدف ده قدامه يبقي نصيحتي بلاش يتجوز أحسن
بالمناسبة أنا لسه جديد في عالم المدونات وأتمني ان كلكم تشرفوني و تزوروا مدونتي وتقولولي رأيكم
تحياتي