BLOGGER TEMPLATES - TWITTER BACKGROUNDS »

٢٨‏/٠٦‏/٢٠٠٨

الاعترافات

كلمة اعتراف بتعنى ان فى سر مخبيه وعايز تعترف بيه. بس ياترى لو هتعترف بحاجة هتعترف بيها لمين؟ لنفسك وللا لغيرك ؟ بيتهيألى لو هتعترف لنفسك بحاجة دا مش معناه انك مش عارف الحاجة دى ومخبيها على نفسك! دا معناه انك عارف الحاجة دى بس بينك وبين نفسك بتنكرها ومش عايز عقلك يصدقها فبتقعد مع نفسك كدا فى ساعة صفا وتعترف لنفسك بللى انت عارفه ولكن رافض تصدقه..ولو هتعترف لغيرك..يبقى يا ترى غيرك دا هو مين؟ صاحبك؟ اخوك؟ نصفك التانى ؟ وايه لازمة الاعتراف لشخص تانى اصلا ما كفاية ان انت بس عارف الشىء دا!! يمكن يكون الظن المسيطر على الانسان اللى بيقرر يعترف لشخص غيره بسر من اسراره هو الاحساس بالذنب ومحاولة انه يخلى الاعتراف دا حاجة تخفف عنه وتشيل منه الاحساس بالذنب او يكون الاعتراف دا عشان حد يشيل مسئولية السر دا معه.. كل الافكار والاسئلة اللى دارت فى مخى دى جت لى وانا بتفرج على برنامج على أوربت كان بيتكلم على فكرة الاعتراف وبيسال هتعترف بإيه ولمين؟ بصراحة أنا ساعتها قلت أكيد أغلب الاتصالات هتكون مثلا ان زوج خان مراته واعترف لها بخيانته فسامحته وعاشوا فى تبات ونبات وخلفوا صبيان وبنات ودى كانت نتيجة الاعتراف بالخطأ يا أبنائى والندم عليه والحياة بتتصلح وتبقى حلوة ولذيذة وكدا..لكن لاقيت كوارث بتحصل نتيجة الاعتراف بالخطأ. يعنى مثال زى اللى لسة قايلاه دا مكانتش نتيجة الاعتراف تسامح وغفران وخلاص لكن كانت طلاق .. والغريب ان كل واحد من اللى اتصلوا واعترفوا بخيانتة زوجاتهم كانوا بحبوا ستات تانيين متجوزين والستات اللى متجوزين دول بيبادلوهم نفس المشاعر.. بصراحة أتصدمت..أنا كنت بقرأ رواية مترجمة من كام يوم كدا وكانت فيها تقريبا حاجة شبه كدا بالضبط وانا كنت متضايقة جدا فى بداية الرواية لأن كان فيها بردوا رجل متجوز بيخون مراته مع ست متجوزة بس اللى جه فى بالى ان القصة أصلا أمريكية وموضوع الخيانات والعلاقات دا منتشر فى الغرب بشكل كبير فقلت خلاص يا باربى عديها دول أجانب بردوا وقعدت أقول استحالة خيانة بالشكل دا تحصل فى مجتمعنا الشرقى..يعنى اللى كنا بنشوفه فى الافلام أو بنقراه فى الروايات هو ان لو رجل خان مراته يعنى بيكون بيحب واحدة بنوتة تانية أصغر من مراته مثلا ومش متجوزة .. يعنى لو حب واحدة مش متجوزة يبقى ممكن هو يتجوزها انما لما يحب واحدة متجوزة وهو عارف انها متجوزة ومستحيل يتجوزها يبقى ايه لزومة كدا ذنوب وخلاص وللا فراغ وللا جهل وللا شيطان وولا عين زايغة وخلاص وللا ايه..ومكانتش بتجى سيرة ان ست متجوزة هى كمان بتخون جوزها.. وكنت بقول دائما ان الست بتكون شايفة جوزها أيا كان شكله وأيا كانت عيوبه على أنه حياتها كلها ومستحيل تخونه أو تبص لغيره. لكن وانا بشوف الحلقة بتاعة البرنامج دا شكيت للحظة اننا فى بلاد عربية شرقية المفروض ان ليها قيم ومفاهيم معينة..أنا مببررش خيانة الرجل على الاطلاق سواء خان مراته مع ست متجوزة او غيرها.. لكن بشوف ان ربنا حلل للرجل انه يتجوز اكتر من واحدة لان الرجل دى طبيعته ممكن يحب يتجوز واحدة واتنين وتلاتة ومراته من حقها ترفض وتسيبه والموضوع ينتهى وخلاص..انا مش مع التعدد بردوا على الاطلاق ولكن دا امر واقع..لكن مكنتش بقدر أشوف ان الست كمان بقت تقدر تحب حد غير جوزها ويبقى الموضوع عادى..كنت بشوف فى رأيى ان الست ممكن تكره جوزها لكن مش ممكن تخونه ابداااااا..وبعدين قعدت افكر جه فى بالى حاجة الرجالة لما بيخونوا مراتهم او بيتجوزوا عليها بيكون مبررهم الحب وان دا حاجة مش بإيديهم ..طب تفتكروا ممكن تكون الستات اللى بتخون بردوا دا مبررهم بينهم وبين نفسهم..ان الحب هو اللى سيطر عليهم وان دا جاجة مش بإيديهم؟؟ مش عارفة.. الموضوع معقد .. ومش قادرة اتخيل ان الحال وصل بالناس للدرجة دى من التخلى عن الدين وعن القيم والاخلاق.. عشان ايه ؟ هيوصلوا لايه فى الاخر ؟؟

18 comments:

lonely يقول...

انا انصحهم بقرايه الرجال من المريخ والنساء من الزهرة

شفـقــة و إحســــان يقول...

البوست هايل جدا وله هدف ....بشكرك بجد عليه
بس ما تفكريش كتير علشان ما تتعبيش هى الدنيا كده فيها الحلو وبردوا فيها الوحش
شفقة

عايش... ولكن !!!! يقول...

بوست بجد رائع
بس يعنى لو اخدتى بالك من كل حاجه هتتعبى ع الفاضى
كبرى دماغك

princess يقول...

الفكرة مبقتش غرب وشرق خلاص الدنيا بايظة من زمان
طبعا اللى فى الشرق بيحكم اكتر الدين لكن الناس بعدت عن الدين فمفيش حاجة تحكمه
تحياتى ولسا يما هنشوف:(

blue-wave يقول...

متهيألى السؤال اللى بيسألوة دلوقتى
هوا يعنى ايه اخلاق؟

god-of-luck يقول...

بوست رائع

barbie girl يقول...

فاطمة:
منورة يا فطوم ..بس تفتكرى دا حل للخيانة؟؟

..............
شفقة هانم:
منورة يا جميلة ما هو انا لازم أفكر عشان أنا عايشة.

................

عايش ولكن:

ما انا كدا كدا تعبانة بس بدل ما يبقى التعب على الفاضى يبقى على المليان

barbie girl يقول...

برنسيسة:

فعلا طالما اتخلينا عن ديننا فمنلومش نفسنا على اى حاجة تحصل لنا!!

.................
بلو وييف:

يعنى مبقاش فى دين ولا أخلاق؟؟؟
هو اعتقد انه فى البعض عندهم اخلاق لكن زى ما فى جزء كبير عنده اخلاق فى بردو جزء كبير معندوش اخلاق
المشكلة ان دا كبير ودا كبير

.............
جود أف لاك:

شكرا ليك

Unknown يقول...

اول حاجه بتفق مع فاطمه انهم يقروا الرجال من المريخ والنساء من الزهره

تانى حاجه الست هى اللى بايدها تخلى جوزها ميخونهاش او يخونها
الا فى حالات تانيه وان الراجل يكون خاين بطبعه
عشان كده لازم تعرفى شريك حياتك كويس قبل الجواز
بصراحه انا شايفه ان حالات الخيانه زادت جداا بسبب عدم التفاهم بين الازواج

ربنا يستر علينا بقى :D

غير معرف يقول...

بوست جميل وهايل
بس
نفض تعش تنتعش

موناليزا يقول...

قليلا مايضعون منهج الله امام ناظرهم ولذلك كثرت الذنوب والفواحش
اللهم لاتؤاخذنا بمافعل السفهاء منا

أحمد هشام يقول...

أنا أظن إن المشكلة في أننا نظن أننا كشرقيين معصومين من الوقوع في الخطأ ...فقط لأننا أكيد عندنا قيم ومباديء ... هذا هو المبرر ... نحن لا نحل المشكلات التي تؤدي إلي تلك الأزمات ... فالزوجة الخائنة .. لابد و أن يكون هناك تقصير من زوجها في شيء ما ... وربما تكون هي في الأصل غير أمينة و إنسانة سيئة التربية ... فيكون تقصيره انه لم يحسن اختيارها من البداية ...
ثم إن تصميمنا علي عدم مواجهة أخطائنا الاجتماعية و تصحيح الأوضاع الخاطئة أحد أسباب انتشار تلك الأورام السرطانية في سلوك الكثير من الرجال والنساء ..
و شكرا علي البوست الجميل

Princesa ... WHiSPeR يقول...

البوست ده ياباربى حسسنى انك طيبه وعلى نياتك زياده عن اللزوم

احنا مش عايشين فى اليوتوبيا
واحيانا لما يكون الواحد عايش كل حياته بيحافظ انه يعمل كل حاجه صح بييجى عليه وقت ويمل
وبيحس انه محتاج لشويه ساسبنس فى النص
ومحتاج انه يغلط حتى ولو كان الغلط ده حاجه بسيطه جدا لان كل البشر بتغلط ماحدش فينا معصوم
اذا كان ربنا بيقول اننا لو ماغلطناش فى حاجه هيجيب ناس غيرنا علشان تغلط وتتوب
فدى حاجه طبيعية جدا ان كل واحد فينا يجى عليا فترة ويغلط
بس المهم انه مش يتمادى فى الغلط ده
والاهم ان اللى حواليه مايعلقولهوش المشنقة علشان كده هيرجع يغلط تانى ومش هيندم ولا يعترف بغلطه
وبعدين موضوع ليه الست ممكن تخون جوزها فى الحاة دى زيها زى الراجل هو بيخونها لانه بيقول انه مش لاقى الحب وهى كمان هتخونه علشان مش لاقيه معاه الحب او الحنان او الرقه

يمامة شاردة يقول...

يا بنتي مجتمعنا بقى مليان بلاوي .. احنا بس اللي بنحب نعمل زي النعامة وندفن راسنا في الأرض ..

و لأ احنا معندناش بطالة .. ولأ احنا معندناش أزمة عيش .. ولأ احنا معندناش فتنة طائفية .. وووووو 600 ألف معندناش و احنا أساسا عندنا كل حاجة ..

موضوع الخيانة دا بأه عايز له مدونة لوحده .. مش بس تعليق على بوست !!

..........

بالنسبة للاعترافات .. فعلى حسب الغلطة .. وكمان ياتري حسيت بيها وللا لأ؟ وندمت فعلا وللا لأ؟ و اللي هاحكيله ده حد ثقة وللا لأ؟

اعتبارات كتير اوي!

mostafa rayan يقول...

بس انتي ماقولتيش اللي الستات اللي اعترفوا ايه كانت اسباب خيانتهم
لو عرفناالأسباب جايز نوصل لحل

ملحوظة ل la Princesa ... WHiSPeR
قولك لو مغلطناش ربنا هيجبي ناس تانية غيرنا تغلط ويتوبوا ويسامحهم
دي مش ايه قرآنية دة معني حديث للنبي صلى الله عليه وسلم

غير معرف يقول...

Hi to every one, because I am genuinely keen of reading this webpage's post to be updated regularly. It consists of fastidious stuff.

Here is my web page view more about

غير معرف يقول...

I'm truly enjoying the design and layout of your blog. It's a very easy on the eyes which makes it much more pleasant for
me to come here and visit more often. Did you hire out a developer to create
your theme? Outstanding work!

my blog - screen next

غير معرف يقول...

I was suggested this website by my cousin. I am not sure whether this post is written by him as no one else know
such detailed about my trouble. You're incredible! Thanks!

my weblog - smokies