BLOGGER TEMPLATES - TWITTER BACKGROUNDS »

٢٣‏/٠٢‏/٢٠٠٩

ارهاب بالحسين يعنى terrorism

امبارح حصلت انفجارات فى الحسين وماتت واحدة فرنسية واتصاب حوالى 17.. افتكرت ايام زمان فى اول التسعينات لما كانت على طول بتحصل اعمال ارهابية .. لكن ازاى تعدى سنة دلوقتى على مصر من غير كوارث.. لازم يطلعلنا حد مخه ضارب يفرقع ويعمل شوية قلبان فى البلد.. نفسى أعرف البنى ادم اللى عمل كدا دا كان مخه فى ايه.. ازاى يجيله قلب يقتل ناس أبرياء ملهمش اى ذنب فى اللى حصلهم دا وحتى لو ليهم ذنب وحتى لو كانوا من الكفار ايام ابو جهل ليه الواحد ده يعين نفسه حاكم و يحكم عليهم بالقتل.. دا أكيد حد مش طبيعى من اللى فاكرين نفسهم فى جهاد مع الغرب.. وللا تلاقيه من اللى ليهم افكار غريبة وبيقولوا ان السياحة حرام فحلل قتل الناس بالباطل.. فى الاول انا قلت ممكن يكون شاب من اللى بيعانه من البطالة وجاله اكتئاب فعمل كدا.. بس عقلى مش راضى يقبل المنطق دا ان واحد عشان زهقان فى حياته يقوم قاتله شوية اجانب.. محدش عنده دين وقلب وضمير ممكن يعمل كدا

21 comments:

fnoonh يقول...

بيني وبينك مش زعلانه على الاجانب انا زعلانه من العمل ده بس يعني ممكن اليعمل كده في الاجانب يعمل في المسلمين

barbie girl يقول...

fnoonh:

لا يا فنونة انا باختلف معاكى .. ازاى مش زعلانة على الاجانب دول ناس زينا زيهم بنى ادمين ومش أذونا فى حاجة يبقى ازاى نقول انهم مش مهم انهم اتأذوا.. احنا ديننا مبيؤمرناش بأذية الناس ابداً .. لا يا جميل عيدى نظر فى الموضوع تانى :)

مهندس / على درويش يقول...

مش عارف أقووول ايه وابدأ منين


بس انا هقوول حاجه واحده بس
هما كفار ودا ممكن يكون اكيد بس هل هو أطلع على الغيب لعل الله يخرج من أصلابهم رجل يكون مسلم ويفيد الأسلام

حكم على واحد بالكفر وحكم عليه بالموت


بس اللي انا متأكد منه أنه الواحد دا أكيد عنده هدف ومقتنع بيه جدا وإلا مكنش عمل كدا


لا حول ولا قوه إلا بالله

romansy يقول...

عارفه دا كلام فى الهوا ملوش اساس ولا ليه هدف
ضرب من هدف ليه
علشان ايه
وعمل ايه ولا استفاد ايه مش عارف
حسبى الله ونعم الوكيل
مش ناقصه خراب

اقصوصه يقول...

فعلا تفكيرهم جدا غريب

كيف يبيحون لانفسهم قتل الابرياء

شو يستفدون من هالتصرف يعني

وزهق هالارواح البريئه

هل يا ترى بيغير في العالم شي

او بيضيف اي شي ايجابي

للوضع اللي احنا فيه؟

بنوتة يقول...

السلام عليكم
ربنا ينتقم منهم هو مش واحد هما للاسف ناس كتيرة واقفة ضد السلا والمسلمين
ربنا يسترها معانا ويحمينا
تحياتى ليكى

lonely يقول...

السلام عليكم
لا ما اعتقدش انه واحد زهقان من نفسه علشان الحالات المكتئبة دى مابيقدرش يواجه نفسه وبيكون ضعيف ,, ما اعتقدش

الناس دول مابيسمعوش غير نفسهم ومن اللى زيهم مابيهمهمش العالم بيقول ايه ,, ضد الاسلام وبنسمى عملياتهم الاستشهادية دى ارهاب يعنى من الاخر شايفين العالم بالنسبة لهم متخلف مش فاهمهم
لو الدنيا كلها قالت ان مش لازم نصوم فى رمضان هتسمعى كلام الدنيا وماتصوميش ؟
بالنسبة لهم المبادئ دى خلاص شايفينها انها صح وحياتهم قدامها رخيصة علشان كده مابيفكروش
ده الرسول عليه الصلاه والسلام مكانش بيدعى على الكفار وكان بيدعيلهم ,, يبقى ازاى دخلت دماغهم ان قتل الكفار حلال .. وكل حرب وليها ضحايا من المسلمين
ربنا يهديهم لان اللى زى دول لو عرفوا الصح هايعملوا حاجات جميلة جدا للاسلام بنفس الحماس اللى بيخليهم يفجروا نفسهم او يخربوا اى حاجة
اللى يزعل يا باربى انهم رايحين قرب الازهر ومسجد الحسين على الاقل كانوا يراعوا شوية ان دول مناطق اسلامية

MONDAHESH يقول...

مش لازم يكون فاكر ان ده جهاد او ان السياحة حرام علشان يعمل كده

ارفض اننا نرجع اي مشكلة للدين

حتى لو اعتبرناه يحمل مفهوم خاطئ

تحياتي

أم فريده يقول...

اولا بعتذر فى التأخير على زيارة مدزنة الجميلة

بس هقولك اية غير حسبى الله ونعم الوكيل


عارفة من كتر الحاجات دى ما بتحصل فى الدنيا
انا بطلت انى اتفرج على الحاجات دى عشان اعصابى مش تتعب

انا عارفة ان دة غلط لازم اعرف اية اللى بيحصل حوليا

بس الحاجات دى صعبة اوى

ومنهم لله

تحياتى

barbie girl يقول...

مهندس على درويش:

بس يا ترى ايه الهدف من انه يؤذى ناس ملهمش ذنب فى حاجة دا غير طبعاً المصريين اللى هيتبهدلوا من وراء الحادث زى مثلاً الناس المشتبه فيهم .. دا حتى سمعت فى التليفزيون ان الطفل المصرى اللى اتصاب بالحادث دا أخذوا أبوه من المشتبه فيهم.. يعنى واحد ابنه اتصاب وكمان هو اتقبض عليه.. سبحان الله

barbie girl يقول...

romancy:

على رأيك مش ناقصة خراب!!!!!!

barbie girl يقول...

أقصوصة:

لا طبعاً مبيضفش اى شىء جديد لكن بيعمل تغيير للأسوأ زى ان فى ناس أتأذوا ومحلاتهم اتقفلت من اللى بيشتغلوا هناك من غير ذنب

barbie girl يقول...

بنوتة:

منورة المدونة.. بس بيتقال ان القنبلة دى يدوية الصنع يعنى مش حد محترم عايز يشوه الاسلام دا حد عادى حتى مفتقد الامكانيات المادية اللى يعملها بيها

barbie girl يقول...

lonely:

متفقة معاكى جداّ

barbie girl يقول...

مندهش/

اهلاً بحضرتك واحنا مبنربطش المشكلة بالدين اطلاقاً لكن السنين اللى فاتوا كلهم كان اى حد بيعمل حاجات ارهابية كدا بيستغل المظهر الدينى عشان يعمل اعمال تخريبية زى النقاب مثلاً تلاقى اى حد داخل يسرق لابس نقاب.. دا مش هجوم منى على النقاب ولكن توضيح لان اى حد بيعمل اعمال عنف بيستغل المظهر الدينى فى كدا ودا طبعاً مش صح.. ومحدش يقدر ينكر ان فى ناس لحد دلوقتى بتحرم السياحة ومتأثرة بأعمال القاعدة .. او مممكن يكون دا حد حابب ينتقم من الغرب واسرائيل واللى عملوه فى غزة فجت معه كدا بتفجير اى اجنبى قدامه وخلاص

barbie girl يقول...

زوجة عنيدة:

نورتى المدونة ومستنيينك حتى لو اتأخرتى.. اعتقد انك بعدتى شوية عن الاخبار بحكم انك عروسة جديدة ومش عايزة حاجة تعكر مزاجك :).. كل انسان كمان بيجيله وقت يحس انه مش طايق يسمع اى خبر فى الجرايد والصحف ومش عايز يسمع اى حاجة تضايقه وتعكر مزاجه.. لكن شوية كدا وهترجعى تتابعى تانى:)

مذكرات مشاغب يقول...

معاكي حق واللهي
حاجه تفقع

تحياتي

mahasen saber يقول...

اصحاب القلوب الميته كتير

ربنا ينتقم منهم
ده من قتل نفسا بغير حق ..

حسبى الله ونعم الوكيل فى اصحاب النفوس والعقول المضلمه

ريكو يقول...

بجد حسبى اللة ونعم الوكيل
أنا زيك مش مصدقة ان اللى عمل كدة ممكن يكون شاب مصرى
لأنه لازم هيفكر الف مرة قبل ما يعمل كدةان ممكن ابوه او اخوة او حتى صاحبة موجود فى المكان دة وقت التفجير
اكيد اللى عمل كده شخص مش مصرى زيينا
تحياتى لك ولمدونتك الجميلة

بنت الغربة يقول...

والله انا مش زعلانه على الاجانب ولا على اللى عمل كده...انا زعلانه على ام اللى عمل كده ..واصحاب المحل اللى حصل فيه التفجيير..
دول اللى بيتأثروا فعلا مش اللى فجر نفسه ومااات او الاجانب ..
وزعلانه قوى على حال مصر وولادها اللى بقى ممكن اى حد تافه يلعب فى عقلهم...ويفهمهم ان ده هو الدين..
حسبى الله ونعم الوكيل
تحياتى

mahasen saber يقول...

لما تفجيرات زى دى تحصل فى بلادنا الاسلاميه والعربيه
ده شئ بيشين اكتر صورتنا كمسلمين وكعرب عامتا

ربنا ينتقم من اصحاب القلوب المريضه والعقليه الكفيفه اليى بتعمل الاعمال المشينه دى