كنت نفسى بقالى فترة انى اروح مكان بعيد وهادى ومفيهوش ناس كتير ويكون فيه بحر وهوا ورمل وفقط
واخيراً ربنا حققلى حلمى وكنت فى المكان دا لمدة اسبوع كامل الاسبوع اللى فات
الساحل السمالى
مكان كدا كأنه حلم
البحر الوانه تجنن
دا غير المساحات الخضراء الكتير (الحدائق)
والهواء لا يوصف جماله
والهدوء مفيش ااجمل من كدا
اول مرة اروح مكان بالهدوء دا
بعيد عن الجرائد والاخبار اللى دائما بتحرق دمى
بعيد عن الدوشة
مكنتش عايزة افكر فى اى حاجة تضايقنى هناك
كنت بس بحب اقعد متنحة قدام البحر
واشم هواء نضيف
وللا وقت الغروب يا الله.. يجنن.. بجد سبحان الله
ربنا خلقلنا البحر بالوانه المتدرجة دى كلها ليه؟
كان ممكن يخلقهولنا بلون واحد او يخليه هو والنيل نفس اللون
ليه خلى الالوان بالجمال دا
الله
ربنا عمله كدا عشانى وعشان كل انسان يقعد قدام البحر يقول يا الله معقول عملته كدا عشانى.. عشان اتفرج عليه
واستمتع بجماله واهدى اعصابى
وللا لما ابص بعيد وابقى عايزة عنيه تجيب اخر البحر والاقى فى الاخر كأن السما متحدة مع البحر
وللا وقت الغروب لما السما تتغير الوانها ويبقى فيها تدرج الوان جميل بدرجات الاحمر وبعدين الشمس وكأنها بتغطس جوا البحر وبتدخل لبيتها
كل دا يارب عملته عشانى
عشان اتمتع بجماله
وللا الموج اللى ماشية فى صفوف صف ورا التانى ومبتتعبش
ليه البحر المتوسط بيكون فيه موجة واضحة ومختلف عن البحر الاحمر تماماً
ليه يارب مخلقتش البحرين الاحمر والمتوسط شبه بعض وللا حتى خليتهم شبه النيل
ياااااااااه
بردو عشانى
عشان استمتع بجمالهم واشوف قدرتك واحس بحبك للانسان اللى قاعد يعصاك ليل نهار
2 comments:
سبحان الله فعلا
وتبارك الخلاق فيما خلق وابدع
وهايل ان الانسان بشوف ابداع الخالق ويتأمله
حمدالله على سلامتك وطالما البحر بيطلع منك الحاجات الجميله دى وبيخليكى تتأملى كدا
ابقى روحى البحر كتير
برافو عليكى يا جميله
ربنا يباركلك يا حبيبتى
طب انا بقالي بتاع سنة و شوية عمال أبوس ايد أصحابي نطلع في أي حتة زي اللي بتقولي عليها دي .. حتى لو فوق السطح ! و طبعا كل واحد عامل لي فيها الفاميلي مان :) و الالتزامات اللي وراة و هلم جرا ......
:) أنا بصراحة مبسوط لك عشان من فترة للتانية الواحد بيعوز ينتعش كدة ويبعد عن ضغوط الحياة ... ان شاء الله تكرريها و تنبسطي أكتر و أكتر
إرسال تعليق