ليه أوقات فراغ وليه دخول البلوج مش زي خروجه....؟

هو ده السؤال اللي سألهولي أصحابي لما قلتلهم حنعمل بلوج ونسميه كده ولإني عارف إن ممكن البعض يسأل نفس السؤال فحبيت تكون الإجابة هي أول مشاركة ليا في البلوج بتاعنا أما عن إسم البلوج -أوقات فراغ- فالأسم جه أولا كفكرة ضمن عدة أسماء أخرى إلا إننا أتحمسنا أوي للإسم وفضلناه على باقي الأسامي المقترحة ، شخصيا أنا أتحمست للإسم ده جدا لإني أؤمن بإن الطريقة اللي بيستغل بيها الإنسان وقت فراغه بتحدد بشكل كبير شخصيته وكمان حياته في المستقبل ففكرت إن وقت فراغنا يكون في حاجة مفيدة وفي نفس الوقت بنعملها مع بعض وإستقرينا إن مدونتنا تكون عامة مش مختصة بمجال لوحده يعني نتكلم في اللي نفسنا نتكلم فيه ونتكلم عن اللي إحنا بنفكر فيه ونفضفض عن اللي جوانا و نقول رأينا في اللي شايفينه حولينا بكل صراحة وبكل أدب وإحترام برضه ونحاول نعمل حاجة نحسن بيها حياتنا وحياة من حولنا بطرح فكرة أو التنبيه لمشكلة أو إقتراح حل أما عن العبارة اللي نحت إسم البلوج "دخول البلوج مش زي خروجه" فهي زي ما كلكم خته بالكم مقتبسة من المثل الشعبي الشهير لكن إحنا فعلا نفسنا يبقى دخول البلوج ده مش زي الخروج منه نفسنا تدخلوا البلوج بتاعنا وتطلعوا بحاجة مفيدة فكرة.....رأي....كلمة نفسنا تدخلوا البلوج بتاعنا تستفيدوا وتفيدوا أو حتى واحدة منهم نفسنا تتفاعلوا وتعيشوا معانا في أوقات فراغنا