من ضمن الاشياء الغلط اللى كنت فاهماها ..إن الانسان لو فى كلية طب أو هندسة
اذن فهو مثقف من الدرجة الاولى..
كنا أربع بناتيت ,بس مش أى بناتيت ,.لا بنات من الناس الدحيحة يعنى اللى بياكلوا الكتب دول!!كلنا كنا قسم علمى
علوم_ظهرت نتيجة الثانوية العامة..
أثنين مننا راحوا طب بشرى..وواحدة راحت طب اسنان وانا رحت السن ألمانى
_أول واحدة من اللى راحوا طب ..اتقطعت صلتى بيها تماما ومعرفش عنها حاجة..
الثانية والتالتة لسة على صلة بيهم ببعض ..بس بنشوف بعض على فترات متفاوتة ..لكننا بنتكلم على طول فى
التليفون.
.
وبما إنهم كملوا طريق العلمى ودخلوا كليات علمية..فهم لسة دحيحة ذى زمان..وبما انى دخلت كلية نظرية ..لسة
جينات الدح فى دمى لكن أقل مليون مرة منهم طبعا..لدرجة انى بأعتبر مدلعة بالنسبة لهم ..
طول سنين الكلية والدكاترة كانوا مدخلين فى دماغنا اننا عشان نبقى مترجمين ناجحين لازم نكون مثقفين ونعرف على
الاقل شىء عن كل شىء ونقرا كتير ونشوف الاخبار والبرامج الثقافية ونحضر ندوات كلما اتيحت الفرصة لسماع أى
(على ادى يعنى ..مش عبقرية)وسنة ورا سنة:كل ما اجى أتكلم مع واحدة من الاتنين اصحابى دول مثلا عن اى خبر
من الاخبار اللى شفتها او سمعتها او قراتها واحب اتناقش معاهم..الاقيهم واحدة تقولى:مش بحب اسمع النشرة او
الاخبار والتانية :تقولى مش فاضية للحاجات دى..
بحس بذهول ساعتها بس بعديها بقى وخلاص واغير الموضوع..
أجى أتكلم معاهم عن موقع عجبنى على النت واكون عاوزة اديهلهم يشوفوه..يقولولى..واحدة تقولى:معنديش كمبيوتر
ومش بحبه أصلا ومش بعرف استخدمه ولو استخدمته بلعب جيميز وخلاص
والتانية تقولى:مش بدخل على النت اصلا
طيب هى كليات القمة بتخلى الناس كدااااا!!!
وأرجع أصاب بذهول للمرة التانية وبالتالى تم غلق الموضوع..
الاقى واحدة منهم تقعد تكلمنى عن المواد بتاعتها والتقديرات واذاى هى اتأثرت اوى لما جابت امتياز بس مطلعتش
بترتيب على الكلية
وفى الاخر يجيلى صداع منها لانى مش خارجة معاهم عشان اتكلم عن المواد بتاعتهم
والتانية دكتورة بس رومانسية زيادة عن اللزوم وبتحب واحد قريبها معاه دبلوم وعايزة تتجوزه..اول ما قالتلى الخبر
محستش بنفسى غير انى قاعدة ازعق ومنفعلة وباقولها انتى بتعملى فى نفسك كدا ليه؟؟حرام عليكى
هى طبعا نفضتلى وقالت انى مش حاسة بيها وكدا..وبعد كدا انا قلتلها هى حرة تختار حياتها براحتها..والغريب ان اهلها
موافقين!!
سنين بعدناها عن بعض..خلت كل واحدة فينا بفكر مختلف..بس مش عارفة دى طبيعة حياة وطبيعة بيئة وللا ايه؟وللا
طبيعة كليات مختلفة
كنا اربع سنين مع بعض فى المدرسة
وبعد اربع سنين جامعة
بقت كل واحدة مختلفة تماما عن التانية..
ياترى لو كنت فى كلية عملية ذيهم كنت هابقى كدا... وللا ايه؟؟
وللا الكلية ملهاش ذنب فى كدا كله؟
20 comments:
عايزة الصراحة
غالبا غالبا يعني ..
في اغلب الاحيان يعني...
يعني هو انا مش عايزة اكون انا والزمن عليهم بما انهم زملاء مهنة
بس غالبا كنتي هتكوني زيهم
كليات طب وصيدلة لو الواحد اصلا مبيحبش القراية ومتابعة الاحداث وانه ينمي نفسه ثقافيا
الكلية كفيلة انها تقتل اي نية جواه لكده
يعني لما تبقي شغالة في دوامة محاضرات وعملي ومذاكرة من اول يوم في الدراسة وتروحي مهدودة كل يوم ويدوبك نفسك بس تناميلك شوية
غير المذاكرة والامتحانات اللي بتبدا من تالت اسبوع
اكيد اي نية جواكي انك تحافظي علي دماغك لازم تتقتل في مهدها
اللي بيفلت من المصيدة دي بس هو حد يكون من صغره عنده ميول ثقافية وبيهتم بالشان العام ومتابعة الاخبار والقراية
غير كده
غالبا بيكونوا زيهم واهتماماتهم بتتسطح اولا باول بفعل عدم استعمال الدماغ غير في الدراسة وبس
يللا هاقول ايه
....نظام تعليم
وللا بلاش
خليني كاتمة في قلبي وساكتة
احسن انا لو اتفتحت
في احتمال مدونتك تتقفل
ههههههه
المدونة جميلة
سعيدة اوووي باول زيارة ليا عليها
تحياتي
تحياتي
الموضوع ده مجنني
مش عارف ليه دايما المتفوقين
معندهمش فكرة عن الدنيا
اكيد مش كلهم
بس الاغلبية
مبيقروش ولا عندهم ثقافة عامة
بس دي غلطة نظام التعليم
اللي بيخلي التفوق للدحيحة
اللي بيحفظوا من غير فهم
ايييييييييييييييييه
انتم بتقولوا ايه بسسس
ماهي واحدة اهو في صيدلة والحمد لله جيد جدا تقديري :)
واهو اعدة اربع وعشرين ساعة على النت :d
مش قصدي بس اساسا النت من هواياتي الاولى بلوجز ومنتديات وفيس بوك واي حاجة حتلاقوني فيها
وليا نشاطاتي والحمد لله ووصلت لدرجة مشرفة في المنتديات
وبذاكر اهو وبجيب تقادير يعني تعتبر مش بطالة
وسياسية من الدرجة الثانية بلاش الاولى دي :)
لا والله مش زي مانتم متصورين
انا دفعتي معظمها اساسا بقابلهم على النت كتير جدا وليهم في النشاطات الاخرى جدا
بالعكس انا بعتبر كليات القمة بتفتح عقل الواحد بطريقة علمية رائعة
بحيث تعامله مع الواقع بيبقى ليه طعم تاني عن اي حد غيره
ربنا يكرمك يارب اكيد الحكاية ليها علاقة بصحابك :)
أعتقد ان ممكن يكون حد فى كلية الطب وعادى جدا بيفهم فى كل حاجه
وممكن يكون لا يفقه شئ
وأعتقد كمان ان ممكن يكون حد معاه دبلوم وعادى جدا بيفهم فى كل حاجه
وممكن برضه يكون لا يفقه شئ
كمان أعتقد علشان بحب أعتقد شويتين
ان ممكن حد متعلمش خالص ويكون بيفهم فى كل حاجه
وممكن برضه يكون لا يفقه فى أى شئ
وبما ان الأشخاص اللى فوق دول ممكن يكونوا بيفهموا فى كل شئ وممكن يكونوا برضه مبيفهموش فى أى حاجه
اذا فالموضوع غير متعلق بكلية طب ولا دبلوم ولا كلية تجاره ولا حقوق ولا اى حاجه
الموضوع كله بيرجع لتكوين الشخص
والتكوين ده له عوامل كتير بتأثر فى الشخص
علشان يظهر له التكوين
سواء بقى تكوين عدم الفهم
او تكوين الفهم
هذا وبالله التوفيق
انا بقول لأ...لأ
انا صاحبي في رابعة طب وجايب امتياز الثلاث سنين السابقة ومتابع الاخبار السياسية كويس وعنده معلومات احسن من ناس كتيير في الكمبيوتر وممكن نقول مثقف هوه آه ده مش دليل بس ده مثال
حضرتك لو كنت في كلية عملية كنت هتعملي ايه؟
الاجابة صعبة لانها هتكون معتمدة على التخمين
الثقافة مش مرتبطة بالدرجة العلمية ولا بالكلية والدليل على كده العقاد بالعكس انا اكتشفت ان معظم اصحاب كليات القمة اللي هما بيحفظوا اي شيء وكل شيء في اثانوية العامة مش بيحبوا القراية ولا الرياضة ولا الفهم بيعشقوا الحفظ وبالتالي العملية هتلاقيها بعيده خالص عن الثقافة وبعيدة عن النت وبعيدة عن التفكير بشكل عام
بس على فكرة مش ذنبهم لوحدهم السبب الرئيسي في الموضوع ده نظام الثانوية العامة
احفظ اكتر ومتفكرش مجموعك يزيد
معادلة غبية بجد يارب تتلغي خالص
تحياتي ليكي ولموضعك الروعة
الي اولئك الذين المتهم صور اقتتال الاخوة الاشقاء في فلسطين
الي كل من تخيل ان الاخوة الاشقاء باعوا القضية لاعدائهم واجهزوا علي ماتبقي منها
الي كل من انجر وراء حملة التضليل الاعلامي التي ساقوها علينا
الي كل ساع الي الحقيقة
الي كل هؤلاء اهدي
التبيان في اقتتال الاخوان
تجدونه فقط
في
ارض الحرب
طيب ،، كلام جميل
عارفة حضرتك يا أخت باربي
أنا باتابع مدونتك من زمان و حريص على متابعتها،و أحياناً كتييييييييير أدخل هنا بس علشان أسمع الموسيقى اللي في المدونة
بيعجبني حاجة جميلة أوي في كتاباتك
إن حضرتك بتكتبي الحياة من غير فلسفة و لا تعقيد
يعني أغلب اللي قرأته هنا ، أنا في الواقع عارفه ، لكن كنت مبسوط و أنا بقرأه و حسيت إنه فعلاً لازم يتكتب ، و لازم حد يكتبه ، و أكيد الحد ده الأخت باربي
ندخل بقى في موضوع التدوينة
في الحقيقة عندك حق في اللي حضرتك كتبتيه
أولاً الثقافة بشكل عام هي مبدأ في شخص الفرد غير متعلقة بطبيعة دراسته
ثانياً: فعلاً الكليات دي بتستهلك طلابها و بتسنزف قواهم
أنا عن نفسي كنت باطلع من الأوائل و ليا ترتيب على الدفعة ، و لما حبيت أبقى مثقف على آخر سنة و بدأت أقرأ في الصحف و أدخل نت و أشوف برامج متميزة على التليفزيون زي ال 10 مساءً و برامج الجزيرة ،لما عملت كل ده اضطريت إني أعتذر سنة عن الامتحانات علشان أحافظ على تقديري و ترتيبي و أقدر اتعين في الكلية و أحقق حلم حياتي
الامتياز في حد ذاته في الكليات دي مش معضلة ، لكن اللي معضل فعلاً هو الترتيب على الدفعة .
الحاجة الأخيرة ، اللي حضرتك اتكلمتي فيها عن احساسك أنكم أصبحتم مختلفين عن زمان و إنكم مش بقيتيوا منسجمين زي الأول ، ده شئ طبيعي ، لأن الكلية مش بس كتب و دراسة ، الكلية بيئة و مجتمع متكامل ، بيأثر في الفرد تأثر كبير جداً و خصوصاً إنها بتكون في مرحلة عمرية الإنسان بيحاول فيها إنه يستكمل شخصيته و يبحث عن ذاته ، و بيستجيب للتغيرات بسرعة
حتى لو حضرتك ركزتي في شخصيتك انتي ، هتلاقي انك اتغيرتي كتير عن ما كنتي عليه في الثانوية العامة ، اتغيرتي في ثقافتك ، في اهتماماتك ، في تفكيريك و في حاجات تانية كتييييير
بس بصراحة أنا ضحكت جداً على حاجات كتير حضرتك كتبتيها في التدوينة دي ، خصوصاً صاحبتك اللي عايزة تتزوج واحد معاه دبلوم و أهلها مشجعين ، مش ممكن حاجة تموت من الضحك فعلاً
نهايةً ، تدوينات حضرتك رائعة جداً
ربنا يوفقك
هى دى سنه الحياة
كل واحد يبنى شخصيته
وربنا ينفع بيكم الاسلام
انتى عارفه ...
هى المشكلة مش فى السن ولا تجارة ...ولا حتى بتوع طب ..
هى المشكلة فى الشخص نفسه ...او فى الانسان اللى بيدخل الكلية ...
هوا اللى بيحدد طريقه هيبقى عامل ازاى ...
انا ليا صحاب فى طب وطب اسنان ..بس فى اسكندرية ...مرة لقتهم جم وقضوا يوم فى القاهرة من الفجر لتانى يوم الفجر...ومشيوا وكنت مزهول انتوا يابنى مشش طب...يقولى اهى كلها كليات...والحمد الله بيبجيبوا تقديرات عاليه ..وبحب ااقعد معاهم عشان تفكيرهم كويس وعالطوول معايا عالخط فى اى حاجه نت واقع سياسة كله...
وناس معايا دخلت معاهم حقوق ...خلصوا خلاص واخدوا اهوة الليسانس ...بس تلاقى اغلبهم من النوع الدحيح اللى يقعد قبل الامتحان بشهر فى منازلهم يذاكر ...
بس المشكلة مش فى الكليات ولا نظامها...
المشكلة فى الناس اللى بتدخل الكليات هى اللى بتزنق نفسها فى القمقم ومش بتحب تطلع منه ..ززى اصحابك كده ممكن...
اصل الحياة مش دراسة وبس ...بمعنى لازم نطور نفسنا ...ولازم نبقى على دراية بكل حاجه حوالينا ...
:)
واحدة بتحب البلد دى:
الحمد لله انى مش بقيت ذيهم..لانى مش عاوزة ابقى كدا
لو اتجوزت عاوزة اعلم ولادى اذاى يتثقفوا مش اذاى يحفظوا وبس
amr ahmed:
نفس فكرتى
اللى مش لاقيالها اجابة
flona:
انتى عسولة خالص
باين عليكى دماااااااغ
ومكسرة القاعدة
بس كدا احسن
مدونة كسبان:
يمكن يكون الموضوع طبيعة تربية وبيئة وشخصية
hafed mohammed:
يمكن بردوا الموضوع على حسب انت عاوز تعرف ولا نووو
وكل حد بيختار الطريق اللى يرحه
الاسهل ليه
او اللى عاوز يوصله
انا حر:
نفس الرد
dr.cool:
يارب حضرتك تفضل متابع المدونة على طول دا شرف لينا طبعا
حضرتك بتقول الثقافة بشكل عام طبيعة الشخص مش طبيعة دراسة..بس انا شايفة ان بردو طبيعة الدراسة الصعبة والكم الكبير من الحفظ بيؤثر بالسلب على الانسان
فاروتا المصرى:
شكرا لحضرتك
سفاح كرموز شكرا ليك بردو نفس الراى
علاء: شرفتا بزياتك
من امتى الثقافة دى ياإإإإيمى ياخطى ، انا شايفة برده إن الحكاية بترجع لميول الإنسان وإن فى فرق شششششششششششاسع بين التعليم وبين الثقافة ، ياما ناس دبلومات مثقفة جدا وفى برده ناس علماء ومش مثقفين يعنى على حسب رغبتك انتى والاخبار اللى بتسعدى بسماعها ، اما بالنسبة للتغيير اللى حسيتيه فى صحابك فأكيد اربع سنين بتغير اى حد وخصوصا لأنك زى ماقولتى انكم ماكونتوش بتتقابلوا كتير
ana 3yza aktb nafs el kalam ely ktbto "wa7da bt7b el balad de" bema eny f handasa ba2kdlek en el kalam de by7sal l aghlbyet el nas asln
هذه هي المشكلة
ان مجتمعنا العربي
يخلط بين التخصص والثقافة
فلا شئ يجمع بينهما فعلياً
قليس كل طبيب او مهندس مثقف
وليس العكس ايضا
تحياتي
المشكلة دي بلاقيها في كتير من اصحابي
لنما في نفس الوقت اصحابي اللي في مجال شغلي عكسهم خالص
لمشطلة ان اللي بيتابع كل حاجة اصبح هو اللي غريب واللي مشغول في جانب واحد من جوانب حياته هو دا اللي عادي وطبيعي
انا عارف ان لما تكون لغه الحوار مبينكم في نطاق ضيق دا شئ مش ظريف خالص ويخليكي مضايقه علي طول من الاحاديث اللي بتجمعكم
بالنسبة لصاحبتك اللي عايزة تتجوز واحد معاه دبلوم
كلامك في البوست بيرد علي الموقف دا
بان الكلية مش محدد للمستوي الثقافي والفكري
مش ممكن يكون هو اعلي منها فكرياً وثقافياً المؤهل مش مقياس خالص
المهم يكنوا متوافيقن مع بعض
ومش لازم ننسي البعد الانساني من الموضوع لانها عامل مؤثر قوي
والله الموضوع نسبى شوية والكلية حاجة من الأتنين يا اما تخلي الواحد مننا يشغل دماغه بجد ويبقى عارف الدنيا ماشية ازاى على الأقل فى مجال دراسته وشغله (بافتراض انه هيتشغل بشهادته) يا اما تخليه يعمل زى الغالبية الساحقة من طلاب جامعات مصر النظام اياه بتاع المذكرات والملازم ودح يا عم اخر شهر قبل الأمتحان وعك وربنا يفك!!!
ملحوظة// هناك طلبة بكليات القمة لا يفقهون اى شئ عن دراستهم بالرغم من وصولهم الى السنوات النهائية وانا شاهد عيان !!! واحد من دفعتنا والمصيبة انه دايما من الأوائل بيطفى جهاز الكومبيوتر من الشاشة!!!
ملحوظة كمان : انا بدرس هندسة حاسبات .. شوفتو المصيبة ؟؟ هو العيب ف دماغنا ولا ف الدنيا اللى حوالينا ولا ف الكلية اللى مخليانا عاملين ف نفسنا كدة ؟؟
إرسال تعليق