BLOGGER TEMPLATES - TWITTER BACKGROUNDS »

٢٥‏/٠٩‏/٢٠٠٧

المسلمون فى رمضان

النهاردة الموافق 28_9

عيد ميلاد وسام

كل سنة وانت طيب يا سمسم وعقبال 200 سنة

انت بقى هتبقى عجوووووز وعندك 200 سنة وانا هبقى صغنونة وعندى 197 ههههههههههههه

والتورتة دى هدية عيد ميلادك ايه رأيك بقى؟؟

انا عارفة انك بتحبها بالشيكولاتة بس انا جبتهالك كلها كريمة ..غلاسة بقى

وبعدين ما احنا كدا كدا صايمين..يعنى مش هناكلها بقى

..........................................................
........................................
كانوا عايشين فى عصر غريب فى الستينيات والسبعينيات..فى الافلام بتاعة زمان بنشوف البطل ميبقاش بطل الا لما يشرب خمرة والبطلة متبقاش بطلة الا لما تلبس مينى جيب وكت..زمان مكانش فى اهتمام ووعى بالدين زى دلوقتى بس كان فى اخلاقيات فى التعاملات بين الناس.. طيب جميل..ودلوقتى..الظاهر ان الحال اتغير..وبقى فى وعى وثقافة دينية كبيرة..ومعتقدش ان فى بيت دلوقتى مفيهوش ستلايت ومبيشفش القنوات الدينية او البرامج اللى بتنشر الوعى باى حال من الاحوال.. ولما اقارن دلوقتى بزمان الاقينا دلوقتى فى نعمة كبييييييييييييييييييرة اوى..ازاى..اقولكم ازاى..يعنى زمان مكانش الدش منتشر كدا زى دلوقتى..كان البرامج الدينية الوحيدة اللى بشوفها على حد زاكرتى يعنى ..برنامج حديث الروح اللى بيقعد بالضبط خمس دقايق قبل نشرة التاسعة مساء..وبرنامج الشعراوى يوم الجمعة..بسسسسسس بردو جميل ..والاجمل ان دور العبادة انتشرت للمسلمين والمسيحين حتى..يعنى مفيش حد حاجة ناقصاه.. طب التسهيلات دى بتقول يبقى اكيد الجيل دا اتصلح حالة والناس بقت طيبة ومتدينة وعارفين الصح من الغلط كويس اوى.. هم عرفوا فعلا الصح من الغلط والحلال من الحرام..لكنهم فاصلين تماما بين الدين والدنيا..شايفين ان الدين هو الصلاة والصوم والعبادات فى رمضان وخلاص..ونسيوا ان رسول الله صلى الله عليه وسلم كان قرآنا يمشى على الارض..نسيوا انهم محتاجين يربطوا العبادات بحسن المعاملات مع الاخرين.. انا كنت بقالى كتير مش مواظبة على انى اصلى فى المسجد..ومن حوالى سنتين بقيت اصلى التراويح فى المسجد..ودا تالت رمضان يعدى عليا وانا الحمد لله بحب اصليها فى المسجد بردو..بس خلال السنتين دول ولحد رمضان دا كمان بشوف حاجات عجيبة فى المساجد.. 1- زى مثلا ان واحدة خبطت واحدة غصب عنها تقوم خناقة والصوت يعلى ولا كأننا فى بيت ربنا..مش عارفة هم تفكيرهم بيكون ازاى فى اللحظة اللى بينسوا فيها انهم فى مسجد وبيكون كل همهم ان كل واحدة تبين قوتها وتثبت انها لا تقهر ابدااا 2- الحاجة المنتشرة السنة دى واللى تقريبا مش بيعدى يوم الا ولازم اسمعها هى كلمة(حرااااااااااااااااام)..كل واحدة تصليلها يومين فى المسجد تعتقد خطأ انه من حقها تقول حرام وحلال..مثال على كدا واحدة كانت بتصلى فى المسجد وكانت معها اطفالها وطبيعى الاطفال بيعملوا شوية دوشة كدا بس اهم كانوا قاعدين فى اخر صف واذا بالنساء فى المسجد بيزعقوا لوالدتهم وبيقولولها حراااااااااااااااااااااااااااااااااااااااااااااااااااااام عليكى عشان جايباهم معاكى..خديهم وروحى ..ومحاضرات بصوت عالى عن الحرام والحلال لحد ما والدة الاطفال قالتلهم كلمة واحدة بس(شكرااا)واخدت اولادها وخرجت من المسجد.وبجد صعبت عليا اوى ومكنتش عارفة اعملها حاجة... 3- ومرة كنت رايحة المسجد بصلى وانا لابسة جيب جينز قامت واحدة متبرعة قامت وجت جنبى..وقالتلى ..الصلاة بالجينز حراااااااااااااااااااااااااااااام.. بقى سهل علينا يا مسلمين نحلل ونحرم بمزاجنا للدرجة دى..ليه؟؟ بقى سهل علينا اننا نزعق ويعلى صوتنا ليه؟؟ كل النعم اللى ربنا انعم بها علينا وحالنا مش مظبوط..وكله بياكل فى كله.. ياسلام لو ننتهز الشهر الكريم دا وكل واحد يقعد مع نفسه قعدة كدا على انفراد ويشوف عيوبه ويحاول يصلح من نفسه..يا سلام لو يبقى عندنا سعة صدر لتقبل بعضنا لبعض..يا سلام لو نحاول يبقى خلقنا القرآن زي رسولنا الكريم صلى الله عليه وسلم..يا سلام لو نبقى مسلمين على حق..ونستحق كلمة مسلمين بجد

10 comments:

Layla يقول...

اقرأ حاليا كتاب اسمه التدين المنقوص لفهمي هويدي..بيتكلم فيه عن اسباب غياب الاخلاق وادب المعاملات عن المتدينين

الكتاب جميل جدا..كنت جبت الرابط بتاعه من مدونة لست ادري

http://www.4shared.com/file/21306077/c772a0aa/fahmy_hweidy_tedayyun.html

بالتأكيد الاطفال في المسجد بيعملوا دوشة لانهم اطفال مش فاهمين حاجة..لكن في الف طريقة ممكن يتم توجيه الام بها احسن من طردها من الجامع

ربنا يثبت ايمان الام ويحفظها من الفتنة بعد الموقف السخيف ده

أنا حر يقول...

بداية احب احيكي على المدونة بس انا ليا كام ملحوظة ياريت تتقبليهم بصدر رحب
موضوعك جميل ومميز بس مش عارف ليه دخلتي فيه نقطة فصل الدين عن الدولة وتأثيرها مع ان البوست بتاعك في الاول والاخر انا شايف انه بيتكلم عن موضوع خاص بالسلوك الخاطئ والدليل على كده ان اوروبا دولها علمانية وقمة في السلوك الحضاري اذا احنا غايب عننا السلوك الانساني وده اللي بيخلي سلوكنا الديني خاطئ يعني الازمة مش ازمة فصل دين على قد ما هو غياب قيم واخلاق متوفرة في الدول اللي مفهاش دين
ثاني نقطة انا شايف انك ضد الفكر العلماني وده حقك طبعا بس مش الاول نفهم يعني ايه علمانية بجد ونحدد تأثيرها علينا ولا مجرد هجوم خوفا من تأثر دينا بيها
ياريت ما تقريش في اتجاه واحد واتفضلي عندي انا في المدونة شارح العلمانية بشكل بسيط مش عايزك تكوني علمانية انا عايزك تفهمي الفكر ده كويس
تحياتي ليكي ولبوستك الرائع

barbie girl يقول...

marvel:

اكيد بيعملوا دوشة بس ميصحش يكون نتيجة كدا نطردهم من المسجد

الحسن والحسين كانوا بيركبوا على ظهر النبى صلى الله عليه وسلم وهو بيصلى وكان بيفضل ساجد لحد ما يقوموا وينزلوا من عليه مش كان التعامل بالعنف اللى شفته دا

barbie girl يقول...

انا حر:

حضرتك شرفت المدونة وشرفتنا بقراءتك البوست كمان

رأى حضرتك يحترم

بس انا مؤمنة تماما بأن الاسلام مش دين عبادات بس ..دا صالح لعبادات ودنيا ومعاملات واخلاقيات..دين شامل..وقانون حياة

عمرو فكرى يقول...

(((((هم عرفوا فعلا الصح من الغلط والحلال من الحرام..لكنهم فاصلين تماما بين الدين والدنيا..شايفين ان الدين هو الصلاة والصوم والعبادات فى رمضان وخلاص..ونسيوا ان رسول الله صلى الله عليه وسلم كان قرآنا يمشى على الارض..نسيوا انهم محتاجين يربطوا العبادات بحسن المعاملات مع الاخرين..)))))

برافو عليكى والله
النقطة دى مهمة جدا فعلا وبعانى منها جدا


((((وبيكون كل همهم ان كل واحدة تبين قوتها وتثبت انها لا تقهر ابدااا)))))
برضه الموضوع ده منتشر جدا بس فى الحياة عموما مش بس فى الموقف ده
كل واحد لازم يبين انه اقوى وانه لا يقهر ابدا


(((((ومرة كنت رايحة المسجد بصلى وانا لابسة جيب جينز قامت واحدة متبرعة قامت وجت جنبى..وقالتلى ..الصلاة بالجينز حراااااااااااااااااااااااااااااام..)))))
وعملتى ايه ؟؟؟؟

barbie girl يقول...

عمرو فكرى:
بتعانى منها ازاى..يعنى انت كدا وللا اللى حواليك هم اللى كدا؟؟؟


وعملتى ايه ؟؟؟؟


معملتش حاجة تنحت شوية كدا مش مستوعبة هو فى ايه.. ..وبعدها بدأ الامام اقامة الصلاة

Mohamed Hesham Safa يقول...

يا سلام لو يبقى عندنا سعة صدر لتقبل بعضنا لبعض ...

يا سلام ...

Lapa يقول...

Do you know one of the best portuguese writers ever: CRISTÓVÃO DE AGUIAR?

ALIVE IN MY BLOG.
Thank you.

Young entrepreneur يقول...

السلام عليكم
زوروا العدد الثاني من مجلتاكم و قولولنا رأيكم
Trateesh kalam

غير معرف يقول...

لم انتهي من المدونة ساكملها غداً

ولكني احب ان اشكرك على هذه المدونة الرائعة