كلنا عايشين فى ملكه
كلنا بناكل من رزقه
كلنا بنتنفس هواه
كلنا عايشين فوق أرضه
والاكيد الاكيد انه عمره مبيظلم حد أبداً
يعنى محدش النهاردة بيلاقى هواء كتير يتنفسه فى حين ان حد تانى ميلاقيش هوا يتنفسه
الفقير زى الغنى كله بيلاقى هواء ..
والاكل بردو.. كله بياكل .. يمكن بتختلف انواع وأسعار الاكل حسب الطبقات
لكن فى النهاية كله بياكل
لو مؤمن بربنا قول دائما كلمة أنا عندى كذا وربنا أنعم عليا بكذا
وانسى تماما كلمة أنا مش عندى
ولو مؤمن بربنا هتعرف انه مستحيل يظلمك
..............
بعضنا بيشوف بس الجانب السلبى فى دنيته ويركز عليه
ويفتكر ويظن ويقول انه دائما مظلوم فى الدنيا دى
بس والله لو كل واحد فينا زى ما بيشوف ويركز الضوء كدا على الحاجات اللى مضايقاه فى حياته
ركز ولو لمرة واحدة على نعم ربنا عليه أكيد منظوره للدنيا هيتغير
وهيفهم ان الحاجات اللى مضايقاه دى حدوثها دلوقتى هو أفضل شىء ليه والله..
وساعتها هيشوفها بعين تانية
وعمره ما هيحسن انها مضايقاه
وهيعرف ان كل حاجة فى الدنيا دى بميعاد محدد لها عند ربنا
يعنى مينفعش حاجة تحصل أسرع من وقتها ولا أبعد من ميعادها
أستشعر نعمة ربنا عليك وأشكره على كل نعمة تشعر بها الان.. وبلاش
تجحد عليه بنسيانك لنعمه عليك
وتذكر دائما " الحمد لله"
....................
حد فهم حاجة؟؟
أنا مش بدى نصايح لحد.. أنا بس بفكر نفسى بللى بتنساه فى الطريق :)
18 comments:
والله انتى كلامك مظبوط جدا وانا موافقة عليه
وانا شايفة ان الانسان بدل ما يفضل يفكر فى السلبيات فى حياته يدور على الايجابيات اللى ربنا رزقه بيها ويحاول يغير السلبيات بانه يسعى ويجتهد علشان ربنا يكرمه
وتقريبا دى نفس حكمتى ان الانسان لازم يعرف ان ربنا عمره ما هيظلمنا وانه حتى لو اتحطينا فى شدة دى بتكون تجربة ربنا عايز يوصل لنا بيها حاجة او اختبار لينا او تكفير ذنوب يعنى فى الاخر كله هيكون لمصلحتنا
أول زيارة ليا وسعيدة انى كمان اول تعليق :)
تحياتى
ربنا يكرمك ويبارك فيكى
بجد والله لو كل واحد عمل كده هيشعر براحة غير عادية
اللهم لاتجعلنى احب تاخير ماعجلت ولا تعجيل ما اخرت
سما: على فكرة أنا بردو كنت بنسى كتير نعم ربنا عليا وبفتكر السلبيات واركز عليها واضايق نفسى .. بس قررت أشوف نعم ربنا عليا واستشعرها واحمده عليها ..عشان مش عشان حاجة متأخرة عنى شوية يبقى الدنيا باظت يعنى :) ...يارب متكونش دى اخر زيارة ومستنيين مشاركاتك دائما يا سما
............
موناليزا:
اللهم امين.. وربنا يبارك فيكى انتى كمان وبجد سعيدة جدا بمشاركتك
الحمد لله الذى لا يحمد على مكروه سواه
صحيح الحمد لله على كل شىء
لازم نشكر ربنا طول ما فينا نفس
تحياتى:)
desert cat:
الحمد لله رب العالمين عدد خلقه ورضا نفسه وزنة عرشه ومداد كلماته
.........
برنسيسة:
فعلا عندك حق
الحمد لله عدد ماكان وعدد مايكون وعددالحركات والسكون
ايوه احلي كلمه
الف حمد وشكر لله رب العالمين
تعرفي بكلامك ده خليتي الواحد يرجع ويهدي لان الواحد انهارده كان مضاااااااايق اوي بجد ربنا يكرمك علي التذكره الجميله دي ربنا يخليكي ويجعلها في ميزان حسناتك
والحمد الله
سمكه
الحمد الله
عندك حق فى كل ما كتبتيه
منى: منورة المدونة .. الحمد لله عدد ما كان وعدد ما يكون وعدد الحركات والسكون..
.................
سمكة واحدة: الحمد لله يا سمكاية ويارب تكونى بقيتى اهدى دلوقتى مفيش حاجة تستاهل..
.................
مشمش:
يارب نفضل فاكرينها ونفضل فاكرين نعم ربنا علينا ومننساش فروضه ودا أبسط شكر على النعمة..
..................
أسوور: سعيدة بمشاركتك ويارب تنورينا دائما
انا جيت اهوة
المشكلة اننا ادعونا دايما نشتكى و نسينا ان عندنا نعم كتير بس تقريبا عاملين مش واخدين بالنا او يمكن بنبص على الاى معة اكتر مننا و نسينا اننا نحمد ربنا على كل شى على السراء و الضراء و لازم نعرف ان العبد لما بيبتلى دة بيبقا اختبار من ربنا
فالنحمد الله كثيرا على كل شى على وجودنا فى هذة الدنيا علىسمعنا و بصرنا و على كل شى
اللهم اجعلنا من الحمدين الشاكرين دائما
السلام عليكم ورحمة الله وبركاته
جزاك الله خيرا علي التذكرة
الحمد لله علي كل حال لو تفكرنا لوجدنا اننا مغمورين بنعمه ظاهرة وباطنه وهناك رزق عام ورزق خاص فالرزق العام بيكون لكل الناس وبما اننا اعتدنا عليه بقي قليل جدا ان احنا نفتكر ونشكر ربنا عليها مثلا شكل جسمنا طريقه التنفس التلقائي بعد الشمس عن الارض ولو اقتربت ميل واحد لاحترقت الارض ولو بعدت ميل واحد لتجمدت الارض وظواهر كتير جدا في الارض وتسهيل المشي عليها ولم يجعلها كلها جبال ولكن مهد لنا الارض وجعل فيها الجبال رواسي لتثبتها ونعم كتير واحنا مطلوب مننا نتفكر ونشكر ونقول الحمد لله
ونعمة الاسلام ان ولدنا علي النور وولدنا مسلمين وكفا بها نعمة فالحمد لله
ولغتنا العربيه لغة القرءان لنفهم ونتدبر فالحمد لله فهناك الكثير من المسلمين الذين لا يعرفون اللغه العربيه قلوبهم تتقطع شوقا لمعرفة كلام الله فالحمد لله
اما الشكر الخاص فالرزق سواء المال او الصحه او الاولاد او.... فالحمد لله وان تعدوا نعمة الله لا تحصوها
بس للاسف دايما بننظر الي الشئ الناقص في حياتنا ونتزمر ليه عسي ان تكرهوا شئ وهو خير لكم ممكن يكون تضيق الرزق في شئ معين هو عين الخير ونحن لا ندري افلا يستحق منا هذا الرب العظيم ان نشكره اناء الليل واطراف النهار فالحمد لله حمدا كثيرا
مدونتك حلوه ما شاء الله
ادعوكي لزيارة مدونتي الجديده
بارك الله فيك وثبت خطاكي علي الخير
nona:
منورة يا جميل.. يمكن يكون عندك حق فى حكاية اننا بس اتعودنا نشتكى ودا من الاسباب اللى نستا نحمد ربنا..
............
غير معروف:
اهلا بحضرتك واكيد عندك حق فى اللى قلته وجزاك الله خير على المعلومات اللى أضفتها..
موضوعك جميل .. وشكرا على التذكرة
وختاما .. الحمد لله
دمتى بكل خير .. تحياتى
انا فهمت طبعا...والحمد لله واجب فى السراء والضراء ...
ولو النعم احنا مش شايفينها يكفى نعمة الحياه دى فى حد ذاتها نعمه كبيره بس احنا نقدرها ونحمد ربنا عليها
.....
ربنا يكرمك على البوست الرائع ده
...
وعارفه الصوره فضلت قدامها اسبح بحمد الله اختيارك فيها موفق قوى قوى
جزاكى الله كل خير....
د\ رامى: اهلا بحضرتك فى المدونة وشكرا للمتابعة..
............
محاسن صابر:
تسعدنى دائما مشاركتك والحمد لله ان البوست عجبك والصورة كمان:) دا شرف ليا..الحمد لله عدد خلقه ورضا نفسه وزنة عرشه ومداد كلماته
السلام عليكم ورحمه الله وبركاته
اشكرك اختي علي زيارده مدونتي
بس ممكن اطلب منك طلب كنت حابه اروج عن مدونتي الجديده ممكن تساعديني لاني بكتب فيها مواضيع دينيه وعايزاها توصل لعدد كبير ان شاء الله
والدال علي الخير كفاعله وان شاء الله تكوني سبب لتوصيل الخير
والسلام عليكم
إرسال تعليق