يا ترى بتفكر فى ايه؟

السلام عليكم الايام دى الموت شغال الله ينور.. مش بيفرق بين كبير وصغير.. بيطول الكل كنت بتكلم مع واحدة صاحبتى ولاقيتها بتقولى من فترة كدا فلانة قريبتى ماتت وبعدها بفترة قصيرة وانا بكلم صاحبتى دى بردوا قالتلى فلانة جارتى ماتت والاتنين فى العشرينات من عمرهم وماتوا من غير اى سبب ولا مرض .. موت الفجأة .. قلتلها لا حول ولا قوة الا بالله الله يرحمهم جميعا .. وسكتت لاقيتها بتقولى : احنا قاعدين نشوف الناس قاعدة تموت هنا وهنا وكبار وصغار .. طب يا ترى مبنفكرش اننا ممكن يكون الدور علينا.. ربنا قاعد يبعت لنا فى رسائل عشان نفكر ونعرف ان الدنيا مش مستاهلة.. مش مستاهلة تخانق فلان وتسب فلان وتعادى فلان.. مش مستاهلة تحقدى على دا وتحسدى دى..مش مستاهلة تشغلى نفسك بأمور غيرك الافضل تشغلى نفسك بأمورك انت وحياتك انت..مش مستاهلة ان كل اتنين متجوزين يبقى هدفهم الاول والاخير انهم ينكدوا على بعض.. مش محتاجة الناس كلها تكون وحشة كدا وبتاكل فى بعض كدا صاحبتى دى كان عندها مشاكل كتير مع جوزها لحد ما وصلت المشاكل دى للطلاق.. فلاقيتها بتقولى انا لما بشوف الناس قاعد الموت يفرقهم بلا رجعة كدا بحتقر نفسى وبحتقر جوزى اوى.. احنا عملنا حاجات كتير غلط فى بعض ومجاش فى بالنا للحظة واحدة ان اللحظة دى ممكن تكون اخر لحظة لينا فى عمرنا .. ممكن بعد المشكلة دى نموت واحنا زعلانين من بعض ومش طايقين بعض..يبقى ايه الفائدة اللى اخدناها؟؟ ضيعنا دنيتنا واخرتنا!! حسيت بجد انها عندها حق كل واحد لما بيسمع ان فلان مات بيعمل ايه؟؟ بيقول يااااااه الله يرحمه.. ولا بيجى فى مخه انه يفكر فى كدا.. يفكر ان ممكن الدور الجاى يكون عليه انا مش هخبى عليكم انا بترعب من الموت.. وبخاف اوى لما باسمع ان حد مات.. رغم انى مش دائما براعى فكرة الموت دى فى بعض تصرفاتى لانى بشر وكدا كدا اكيد بعمل ذنوب..لكن حقيقى دائماً حاسة انى مش جاهزة.. وخاصة لما فكر فى انى هيجى يوم عليا واكون تحت التراب ومحدش معايا ولا اهلى ولا صحباتى ولا حبايبى.. بس لوحدى مفيش معايا غير عملى.. ساعتها بدعى " اللهم ارحمنا فوق الارض وتحت الارض ويوم العرض عليك" وبتمنى انى اموت على طاعة مش معصية.. نفسى اموت وانا ساجدة وبكلم ربنا فى سجودى اللهم احيينا على طاعتك وامتنا على طاعتك يارب العالمين