BLOGGER TEMPLATES - TWITTER BACKGROUNDS »

٢٧‏/٠٢‏/٢٠٠٨

تنظيم القاعدة شايفينه بأى عين ههه"اليمين وللا الشمال"

تنظيم القاعدة اكيد عارفينه
هحكيلكم على الموضوع من البداية
كنت امبارح فى ندوة فى الجامعة الامريكية
كنت بحضر ندوة كدا لكاتب صحفى أمريكى اسمه لورانس رايت..وكانت الندوة بعنوان"منظمة القاعدة بين الماضى والحاضر والمستقبل" الراجل دا عامل كتب كتير اوى عن تنظيم القاعدة ومتكلم فيها عن شخصيات مهمة للتنظيم دا زى اسامة بن لادن وايمن الظواهرى..المهم ان الموضوع الرئيسى للندوة طبعا واضح من العنوان انه عن تنظيم القاعدة وفضل يقول نقد واعتراضات كتير على حكاية القاعدة والارهاب والبيئة اللى سمحت بوجود شخصيات امثال اسامة بن لادن والظواهرى. حلو وبعد المحاضرة كنت بتكلم أنا وواحدة صاحبتى عن موضوع الندوة..وفى وسط الكلام قالتلى ان فى ناس فاهمين ان القاعدة دى هى حامية الاسلام وانها حركة مقدسة جدا عند البعض ومش بيعتبروها حركة ارهابية..رغم كل اللى بيتقال عن القاعدة من قيامها باعمال ارهابية كثير..وكل الناس عارفاها.. انا ساعتها اعترضت على كلامها وقلتلها ..لا محدش بيفكر كدا خالص..المهم اختلفنا فى النقطة دى ولما رجعت البيت حكيت لماما عن الندوة وفى وسط الكلام لاقيتها بتقول نفس الكلام بتاع صاحبتى وبردو اختلفنا فى النقطة نفسها.. دلوقتى انا عاوزة أعرف الناس بشكل عام شايفين تنظيم القاعدة دا من أى منظور بالضبط ياترى شايفينه على انه"حامى حمى الاسلام" وانه حركة دفاع عن المسلمين وللا شايفين انهم جماعة ارهابية وياترى عندكم أسباب لموافقتكم لسياسات القاعدة أو إعتراضاتكم عليها ؟؟ عندى فضول اعرف لانى لما سمعت رأى صاحبتى ورأى ماما حسيت انى شايفة الموضوع من منظور واحد بس وناسية ان فى وجهات نظر أخرى.. مستنية أعرف أراءكم فى الموضوع دا بقى

13 comments:

بطوط حبوب يقول...

تقريبا ده اول تعليق عندك
فعلا فى ناس كتير بيشفوا ان تنظيم القاعده دول حامين حمى الاسلام
لو جيتى اصلا لنشأتهم فهم الى حاربوا الروس - طبعا مع بعض الفصائل التانيه غير طالبان- انما هم الى هزموا الروس
واسامه بن لادن راجل دين ولو شفتيه وهو بيبرر ضربه لابرج التجاره وقعد يستدل باقوال العلماء من السلف والخلف - انا مشفتش الفيديو بس واحد من المقتنعين انه حامى حمى الاسلام قالى عليه- ممكن اكمل لما اشوف باقى التعليقات

صوت من مصر يقول...

تنظيم القاعده هو التنظيم الذى اربك خطةط امريكا نحو حلمها افريقيا واسيا وايضا الشرق الاوسط
بامانه بعتبر بن لادن نفسه انسان ذو قيمه عاليا

ياسر شمس الدين يقول...

تنظيم القاعده هو تنظيم ارهابى يسئ للاسلام وبن لادن اعتبره من اغبى المسلمين على مر التاريخ
ناس مش فاهمه يعنى ايه اسلام بزمتك هيقولوا ايه لربنا عن الاطفال اللى قتلوهم فى البرجين والا الناس الابرياء اللى اتقتلوا فى مصر ايام الارهاب ولو قولتى لحد كده تلاقيه يرد عليكى يقولك ما هى امريكا بتقتل اطفال وستات
يا سلام النبى فى الحرب امر المسلمين انهم ما يقتلوش طفل ولا امراه ولا كهل ولا الناس اللى ما حملوش السلاح على المسلمين
والنبى كان عارف ان الكفار ممكن يقتلوا اطفال وعواجيز ومع كده امرنا بعدم قتل الاطفال والعجائز فى الحروب اسامه بن لادن ما بينفذش الطلام ده
وهو اللى قدم الاسلام والمسلمين وبلاد المسلمين على طبق من ذهب الى الاستعمار بافعاله وجنانه

The Rock يقول...

هو الموضوع معقد حبتين
والأمر مش بالباساطة اللي إنتي متخيلها دي

فأولا: تعاطف الناس مع تنظيم القاعدة يرجع لأحد سببين في رأيي

واحد تعاطف نشأ من البيئة اللي خلقتها أمريكا والغرب عموما وهي اللتي وضعوا فيها الأسلام بصورة خالصة كعدو لهم
ومهما كانت أقوالهم في هذا الصدد فيكفي فقط لأي شخص ذي عقل أن يتابع الأحداث والمواقف التي يتخذونها من الأسلام والمسلمين
أبتدأ من الصور المسيئة لرسولنا الكريم مرورا بالمجازر في فلسطين والعراق وأفغانستان والسكوت على المذابح اللتي تقام في حق المسلمين
وحتى أضهاد الأقليات الأسلامية في الغرب وإن كان بصفة غير رسمة وحتى محو صورة أبوتريكة وتعاطفه مع غزة من على الشبكة العنكبوتية.
فمجرد وقوف القاعدة في وجه هذا الطغيان أكسبها تعاطف الكثيرين من شرائح المسلمين
لا حبا فيها ولكن كرها في أمريكا وما تمثله من تكبر وجبروت.

أتنين: الفريق الذي لايشكك في "نوايا" طالبان والقاعدة ولكنه يختلف معهم تمام الإختلاف في الأساليب المتبعة من قبلهم وفي الكثير من أفكارهم - وأنا أعتبر نفسي من هذا الفريق- فانا لا أشكك أن نوايهم سليمة وهم يريدون إعلاء كلمة الدين والدفاع عن المسلمين والذوذ عنهم في وجه الطغيان الغربي متمثلا في أمريكا وحلفائها.
ولكن أفكارهم شابها الكثير والكثير من التشويه نتيجة لعدة ظروف مما أدى بالطبيعة إلى تشوه في أفعالهم والتصرف بشكل يسئ إلى الإسلام والمسلمين ولا يخدمهم بالمرة.

ثانيا: الغير متعاطفين مع القاعدة

وهم ثلاث فئات في رأيي

فئة تتبع الغرب أو هي الغرب نفسه
تعتبر كل ما يقوم به الغرب هو الصحيح
وكل من يعاديه هو المخطئ فإذا كان ماتقوم به القاعدة هو ما تقوم به الولايات المتحدة مثلا لكان هذا دفاعا عن النفس وليس إرهابا
وبالمناسبة بعض أساليب الحرب المتبعة في العراق من قبل مايسمى تنظيم القاعدة في العراق هي نفسها تماما "كوبي وبست" ما كانت تطبقه القاعدة في حربها مع الإتحاد السوفيتي
ولكن وقتها كانت أمريكا قبل العرب أنفسهم تطلق عليهم المجاهدين وتمدهم بالسلاح والمال وكان الأئمة على المساجد يدعون لهم لإنهم وقتها كانوا في خدمة الصالح الأمريكي....!!!

الفئة الثانية: وهي ماتمشي ضمن ثقافة القطيع
إذا ذكر على التلفاز والجرائد والكتب والندوات أن القاعدة إرهابين فهما أرهابين وحشين كمان
وإذا ذكر في كل ركن من أركان الإعلام أن القاعدة مجاهدين ستجدهم أول المهللين للمجاهدين العرب والأفغان وربما يطلقوا أبن لادن لقب أمير المؤمنين كذلك.

الفئة الثالثة وهي الغالبة في رأيي
وهي اللتي لاتحبذ العنف بكل صوره وتنبذه شكلا وموضوعا أي كان هدفه أو جنسيته أو ديانته

فيكفي مثلا تفجير برجي التجارة - أو أي حدث عنيف آخر - حتى يتخذوا موقف مضاد من القاعدة أو غيرها ممن يتبع العنف في توصيل رسالته فهم يؤمنون بالسلام ويحلمون به حتى في أحلك الظروف.

بس خلاص

lonlysmily يقول...

بيتهيالى ان نسبه قليله اوى من المسلمين اللى شايفين القاعده انها بتدافع عن الاسلام
بس هى مجموعه من المسلمين شايفين ان الجهاد فى سبيل الاسلام بشكل عنيف وانهم يقتلوا ناس ابرياء ملهاش ذنب
الرسول صلى الله عليه وسلم قال:من أذى زميا فقد أذنى"
مكنش بيقتل ولا بيحرق الكفار اما دخل مكه وقالهم اذهبواوانتم الطلقاء وكان بيحميهم مقابل انهم يدفعوا فلوس
بس القاعده شايفه ان مفيش فرق بين مثلا امريكى مدنى وملوش اى دخل فى السياسه وامريكى مجند ماسك سلاح وبيقتل فى المسلمين فى العراق وافغانستان
بيتهيالى المجند هو اللى المفروض اننا نقاومه بس مش المدنيين
الاعتداء على المدنيين دا ضعف مش قوة

barbie girl يقول...

السلام عليكم

بطوط حبوب:
اذن حضرتك ضد تنظيم القاعدة وشايف انه تنظيم ارهابى وانهم طالما بيقتلوا مدنيين يبقوا ارهاب ونهم بيستخدموا اراء السلف لتبرير تصرفاتهم العدوانية..
جميل
طب مستنيين حضرتك تكمل وتقولنا عن راى احد المقتنعيين بعكس الكلام دا زى ما حضرتك قلت
عشان كلنا نستفيد

barbie girl يقول...

صوت من مصر: اذن حضرتك مع التنظيم
لانه ضد أمريكا
طب مش يمكن يكون رأيك دا تقصد بيه الجيش الامريكى اللى قاعد يضرب فى العراق وافغانستان..يعنى أعتقد المدنيين ملهمش ذنب

barbie girl يقول...

ياسر شمس الدين:أنا بردو مستحرمة الاطفال والمدنيين اللى بيموتوا دول من غير ذنب غير انهم امريكان
لكن بص أنا أعتقد يعنى ان انحياز البعض للقاعدة سببه كراهيتهم لأمريكا الحكومة بس بيقعوا فى نقطة لخبطة ما بين الحكومة والشعب

يعنى فى النهاية حضرتك شايف انه تنظيم ارهابى..

barbie girl يقول...

لونلى سمايلى: رأيك تقريبا هو هو رأيى..ياريت تقرأى كمان التقسيمات اللى عملها ذا روك
ومنورة البلوج كالعادة طبعا:)

barbie girl يقول...

روك : حلو التحليل بتاعك يا روك
عجبنى

وانا كدا بقى طبقا لتحليلك ابقى من اخر نوع الرافضين للعنف تماما

............

بس يا ترى رأيك ايه فى اغتيالهم لبنظير بوتو؟
هل هم كدا كانوا بيدافعو عن الاسلام؟؟ازاى؟؟
وارسالهم تهديدات دلوقتى بقتل ابن بنظير بوتو؟
هل هى وابنها عشان كانو عايشين فى امريكا يبقوا لازم يتقتلوا ؟
طب ما هو اسامة بن لادن نفسه اتعلم فى امريكا على اعلى مستوى
هل معنى كدا انه لازم يتقتل؟؟؟

مششششششششششششش فاهمة!!!

أنا حر يقول...

اكبر غلط اننا نعتبر ان تنظيم القاعدة هو حامي الاسلام لأنهم ملهمش اي علاقة بالاسلام والمسلمين
لازم نعرف ان اسامة بن لادن يهاجم امريكا لاختلافه معها بعد ان كان الرجل الاول لها وهذا يؤكد ان تنظيم القاعدة ليس تنظيم صنعه الاسلام وإنما صنعته امريكا لتستخدمه ضد العرب والمسلمين
أما اقتناع البعض بغير ذلك فسببه عدم وجود رمز وبطل تلتف حوله الامه
تحياتي

barbie girl يقول...

أنا حر: يعنى حضرتك مع الرأى القائل بانهم ارهابيين
فكرة تحترم بردو
دا طلع كل واحد عنده الفكرة والاسباب الدالة عليها واللى مقنعة الى حد كبير

غير معرف يقول...

اتظيم القاعدة هو واجهة إسلامية للـ CIA
http://alayasser.maktoobblog.com/cat/58562/%D8%AD%D8%A7%D8%AF%D9%88-%D8%B9%D8%A7%D8%B4%D9%88%D8%B1%D8%A7%D8%A1