BLOGGER TEMPLATES - TWITTER BACKGROUNDS »

٠٤‏/٠٣‏/٢٠٠٨

فين مجنون ليلى؟

زمان كان لما المحبين بيتفرقوا لأى سبب من الاسباب كان منهم اللى بيموت ومنهم اللى بيتجنن زى مجنون ليلى اللى فضل هايم فى الصحراء عشان حببته جوزوها واحد غيره لحد لما اتجنن وفى الاخر مات وعنترة اللى فضل يلف بلاد وبلاد عشان يجيب مهر عبلة عشان بس ينول الرضا!! هم فين الناس دى مبقناش يعنى بنسمع عنهم مليون واحد بيحب ومليون واحدة بتحب ويمكن كتير منهم يكون عندهم ظروف تعوقهم عن انهم يكملوا بس الحياة مبتقفش لحد كدا ولا ليلى بتنتحر ولا قيس بيتجنن وللا بيموتوا من الحب ولا حاجة من دى.. ليلى بتتجوز وتخلف وتحب ولادها وجوزها ويبقى قيس بالنسبة لها زكرى يمكن تنساها مع مرور الوقت وقيس مبقاش يتجنن ولا ينتحر بيزعل شوية وهو كمان يروح يتجوز ويخلف ويحب مراته وتبقى حبيبته مجرد زكرى ممكن يبتسم لما يفتكرها ويمكن يقول يااااه دى كانت ايام شباب وخلصت.. هو الحب معناها اتغير؟ وللا العقول هى اللى اتغيرت؟ وللا حب زمان كان حاجة وحب دلوقتى بقى حاجة تانية؟؟ طب هم ليه دلوقتى بيستسلموا للامر الواقع سواء ولد او بنت وزمان كانوا حاجة تانية غيرنا؟كانوا بيعملوا زى عنترة اللى عشق عبلة وصمم يتجوزها حتى بالرغم من ان مهرها غالى عليه وشبه مستحيل بس صمم واتحمل كل الصعوبات لحد لما عرف يجيب المهر وليه قيس مقدرش يستحمل فكرة ان حبيبته ابوها جوزها لواحد غيره..لدرجة انه فقد صوايه ومخه ضرب عشان سواد عيون ليلى وللا يمكن زمان كانوا البنات حاجة تانية حلوين يعنى وبنات اليومين دول اى كلام وللا ايه؟؟؟ مش عارفة يمكن المحبين من كتر ما عرفوا ماساى قصص الحب خافوا على نفسهم لحسن تكون نهايتهم ماساوية اوى كدا زى بتوع زمان مش عارفة

21 comments:

mohamed يقول...

معلش الحياة بقت وقاعيه اكتر يمكن

او هما مبقوش يحبوا بجد

متعرفش

بطوط حبوب يقول...

مش مسئله واقعيه ولا يحزنزن
الفكره ان الشباب بقوا موكسين اه والله موكسين
لا فى شغل ولا فى فلوس ولا فى اى حاجه هحب من غير رصيد

زى الهوا يقول...

ههههههههههه نسيتى تقولى قصة علاء الدين برده , لما كان هيضحى بحياته وركب البساط السحرى هههههههههه , خلاص العقل دلوقتى بقى قبل القلب فى كل حاجة , حتى اللى بيحب بقلبه اوى بقى يدخل عقله برده فى كل فتفوته

barbie girl يقول...

محمد:
الحياة بقت واقعية
وللا الناس هى اللى بقت واقعية؟؟؟:)

barbie girl يقول...

بطوط حبوب:
يعنى تفتكر ان الماديات هى اللى مخلية مفيش عنترة ولا قيس فى الزمن دا؟

طبعا فى ليلات كتير
المشكلة عندكم انتم:)

barbie girl يقول...

زى الهواااا:

يا عاقل انت يا عاقل
حكم يا موحة
بتقولى حكم ههههههههههه

:)

Ahmed Al-Sabbagh يقول...

جميل اوى

بالمناسبة دى بقى

انا سمعت ان اتنين حبو واحدة واتجننو

طب الاولانى اتجنن عشان ما عرفش يتجوزها

سألت التانى اتجنن ليه

قالولى

عشان اتجوزها

ههههههههههه

تحياتى

Mona Shereif يقول...

هههههههههههههههههههههههههه


عارفه

والله السنه اللى فاتت قرأت روميو وجوليت
واكتشفت ان روميو كان عنده 16 سنه وجوليت 14
هههههههههههههههههههههههههههههههه

بسم الله ما شاء الله
ناس كانت عايشه وبتحب بجد

دلوقتى حياتنا مش جد
بتبقى جد لما يكون فيه امان
عارفه ليه كل واحد من اللى كانوا بيحبوا بعض وكل واحد فيهم اتجوز حد تانى وعاش مبسوط؟
الاجابه سهله اوى
هو حس معاه بالامان

واكيد مجنون ليلى لسه موجود

الأستاذ يقول...

طب وهي فين ليلى؟
هاتيلي ليلى وأنا أدلك على واحد أجن من قيس أصلاً
العيب في الشخصيات باختلاف المسميات
مين اللي يرمي نفسه دلوقتي علشان بنت ومين اللي تضحي بنفسها علشان ولد؟؟؟
أرجو يكون ده موجود لكن مش ظاهر
مع أطيب تمنياتي بإننا نلاقي قيس وليلى
تحياتي

مدحت محمد يقول...

اسمحيلى اقلك انى اللى بيحب دلوقتى هو اللى بيروح للحب
مش بيستنى الحب يجيله هو بس او هى بتبقى عايزة تعيش القصة
فيوهمو نفسهم بالحب
هى تقله بحبك وهو يقلها بحبك عشان عايزين يعيشو القصة
لكنهم محبوش بجد
لكن الحب لو جه هتشوفى كذا مجنون ليلى
بس المهم الحب اللى يجى
ازاى وليه وفين
مش مهم بس المهم منرحش للحب
هو اللى يجيلنا
وده اللى بيحصل دلوقتى كله بيروح للحب
تحياتى

المـــفـــــــقــــــــوعـــــة مــرارتـهــا يقول...

احسن حاجة ربنا انعم علينا بيها النسيان
احسن من الإنتحار ... مافيش حد يستاهل ننتحر عشانه

ღϠ₡ღأمير الهدوءღϠ₡ღ يقول...

مش عارف ليه حاسس إني رديت على الموضوع ده

بس اتصدمت لقيت نفسي مش رديت

المهم
حب زمان كان اسمه حب
حب دلوقتي اصبح حب الناس بتلعب بيه

حب دلوقتي حب إعجاب

بس لا غير

ناس دماغها فاضيه
علشان كده
بنشوف حجات كتيره غريبه في الزمن ده


عرضك للموضوع رائع

تحياتي
:)

oceaneyes يقول...

الحياة اللى احنا عايشينها دلوقتى دى بقت صعبة موووووووووز يعنى ..

قليل اوى انك تلاقى اتنين متجوزين عن حب بجد ..وقليل اوى انك تلاقى اتنين بيحبوا بعض كملوا مع بعض للنهاية ..لا والأسخم انهم لو كملوا للنهاية بتلاقيهم اختلفوا بعد كدة واتطلقوا :s


دلوقتى الكل بيفكر بعقله قبل قلبه ..صح ده مناسب فى الزمن اللى احنا عايشين فيه ده دلوقتى ..بس ده لا يمنع ان ايام زمان كانت احلى بكتير ..


حلو البوست ده


تحياتى يا جميل

:)

meshmesha يقول...

أنا سعيده بزيارتك لمدونتى يا باربى
انا رأيى ان الحب اخد شكل جديد من اشكال الحياه و هو خروج و فسح و بدون وعى اتلغت المشاعر و اصبحت فى خبر كان
المشكله الاكبر ان الانثى بطبعها رومانسى فهى اللى بتتألم لكن الطرف الاخر كله عقلانيه و اصرار و عزيمه على تحقيق هدفه اولا فى الحياه ثم يركز بعدين فى الحاجات التافهه اللى هى الحب و الرومانسيه و كدا بقى

وداعا للرومانسيه الا فى يوم الفلانتين اللى مش بيتشاف الا فى صورة ورود حمرا فى المحلات او قلوب حمر اكبيره متعلقه

صديقتك الباحثه عن الحب الحقيقى

فتافيت سكر يقول...

السلام عليكم ورحمة الله وبركاته

موضوع لذيذ اوي , بس مش قيمة الحب بس اتغيرت , اللي حصل للحب زي اللي حصل للاخلاق والشهامة والكرامة والحاجات اللي كنا بنسمع عنها زمان دي..

الناس اتغيرت والحب بقى ليه حسابات تانية..

تحياتي
yasmeen

The Rock يقول...

رأي الشخصي

قيص وعنتر وروميو موجدين

زي ما ليلى وعبلة وجوليت موجودين

وهما حوالينا في كل مكان

إي إتنين مرتبطين بيعرفوا فعلا يعني إيه الحب ومعنى الكلمة دي إيه

بيكونوا وصلوا للمرحلة دي وعدوها كمان وعايشين في تبات ونبات ومحدش سامع ليهم حس عشان مش همهم غير بعض

أما اللي فاكر الحب الحقيقي هو أغاني تامر وإليسا

ولبس أحمر وورود وفلابتيز وكلام حلو على كورنيش النيل وقرطاسين ترمس بس كده

أكيد بالنسبة ليه الأيام دي راحت ومن غير راجعة كمان

وبعد كده لامؤاخذة قيص ده أهبل
وأنا شايف إن العاشق يتشبه بعنترة أشرفله وأحسنله
عنتر كان راجل في زمن ندرة فيه الرجال

barbie girl يقول...

Ahmed Al-Sabbagh :

ههههههههههه
ههههههههههه
هههههههههههه

الحمد لله ان الاتنين اتجننوا

وكان دى النهاية السعيدة

barbie girl يقول...

Sometimes :

:)
:)

هو دا النضوج والعقل:)
عشان كدا قصصهم كانت خالدة

حتى حب المواهقة عندهم كان قوى
دلوقتى بنسميه لعب عيال





الأستاذ :
لا معلش ليلى موجودة بقى كتييييييير
لكن قيس هو اللى نزل عليه التخفيض


مدحت محمد :
يمكن يكون كلام حضرتك فيه شىء من الصح
لكن منقدرش نعمم الموضوع دا

barbie girl يقول...

المفقوعة مرارتها :
بغض النظر عن ان مفيش حد ننتحر عشانه
بس الانتحار كفر

يمكن تكون النزعة الدينية العالية هى اللى قللت قيس وليلى

أمير الهدوء :
انا حاسة انك بتوصف اى قصة حب بانها كدا

لكن اللى انا بتكلم فيه هو ان يمكن يكون فى محبين
لكن قوة القصص نفسها اختلفت..فهمتنى؟

barbie girl يقول...

oceaneyes يقول...
اول فقرة فى كلام فكرنى باغنية عبد الحليم اللى بتقول طريقك مسدود مسدود يا ولدى

لكن حكاية تحكيم العقل اللى زكرتها بعد كدا طبعا مهمة جدا لان مفيش حاجة بتمشى بالمشاعر فقط

meshmesha :
لاحظى يا مشمة كل المغريات اللى حولين الشباب والبنات والحاجات اللى بيشوفوها فى السنما
اكيد بيبقى نفسهم يعيشوها
دا غير الضجة الاعلامية الجامدة حولين الفلانتين
اللى قرب يتحول الى عيد قومى فى مصر



يا سمين:

الحب بقى ليه حسابات تانية تعليق فى الجول والله

روك:

انا شايفة ان زمن عنترة دا هو زمن الرجال
مش زمن قل فيه الرجال!!!

اكيد طبعا ان اى اتنين بيحبوا بعض بتتعمق العلاقة بينهم اكتر بمرور الزمن..لكن ما زلت بقولت لازم يبقى فى عوامل مساعدة تدعم الحب دا عشان يعيش

princess يقول...

فيه حب بس قليل اوى ,واللى بيصمد نادر جدا